Mekim Wankain Pasin Long Olgeta Man Olsem Jehova i Save Mekim
1 Jehova i save tingim ol manmeri. Em i laikim olgeta man i mekim laik bilong em, maski ol i bilong wanem lain. (Ap 10:34, 35) Taim Jisas i autim tok long ol man, em tu i bin mekim wankain pasin long olgeta man. (Lu 20:21) Yumi mas bihainim pasin bilong ol, olsem Pol i bin mekim, em i tok: “Bikpela wanpela tasol em i Bikpela bilong yumi olgeta. Na em i save mekim gut tru long olgeta manmeri i singaut long em na askim em long helpim ol.”—Ro 10:12.
2 Taim yumi autim gutnius bilong Kingdom Bilong God long olgeta man yumi bungim, dispela i save litimapim nem bilong God. Yumi mas wok yet long tokim ol man long dispela gutpela tok, na yumi no ken tingim skin bilong man, wok ol i mekim, skul ol i kisim, o hamas mani ol i gat. (Ro 10:11-13) Olsem na yumi mas autim tok long ol man i laik harim tok—ol man, ol meri, ol yangpela, na ol lapun. Yumi mas autim tok long olgeta haus na ol man long ol dispela haus bai i gat rot long harim tok i tru.
3 Tingim Tru Olgeta Man: Yumi laik autim tok long olgeta man yumi gat rot long toktok wantaim ol. Sampela pablisa i gat dispela tingting, olsem na ol i autim tok long ol manmeri i stap long ol ofis bilong ol dokta, ol haus sik, na ol narapela narapela ofis bilong gavman. Na tu, ol pablisa i bin autim tok long ol man i gopas bilong mekim wok bisinis, ol bikman bilong skul na ol man bilong givim tok long ol pikinini long skul bilong helpim ol, ol jas, na ol lain i bosim sampela wok bilong wanpela ples. Taim yumi go lukim ol dispela lain, i gutpela long tok amamas long ol long gutpela wok ol i mekim bilong helpim ol manmeri. Tingim gut ol, na soim ol nius i stret long wok ol i save mekim.
4 Long wanpela taim wanpela sista i strong na i go toktok wantaim wanpela jas long ofis bilong em. Jas i toktok gut wantaim sista, na em yet i kirap tok olsem: “Yu save long wanpela samting bilong ol Witnes Bilong Jehova mi save laikim? Ol lo bilong ol i gat strongpela as bilong en na ol i no save lusim.” Sista i autim tok long dispela man i gat namba.
5 Yumi no save long bel bilong ol man. Tasol taim yumi toktok wantaim olgeta man yumi bungim, yumi kamapim olsem yumi bilip long strong bilong God long stiaim wok bilong yumi. Na tu, dispela i givim rot long ol manmeri long harim tok na kisim dispela tok bilong gutpela samting ol inap wetim i kamap bihain. (1 Ti 2:3, 4) Yumi mas mekim gut wok long taim bilong yumi na strong long bihainim pasin bilong Jehova long mekim wankain pasin long olgeta man na autim gutnius long olgeta man yumi gat rot long toktok wantaim ol.—Ro 2:11; Ef 5:1, 2.