Helpim Planti Man Moa Long Harim Gutnius
TAIM mi tingting long ol manmeri long kantri bilong mi, mi kisim save olsem planti ol i save long ol Witnes Bilong Jehova long rot bilong ripot bilong ol nius tasol. Mi tingting olsem, i mas i gat man i go lukim ol na bai ol i ken save ol Witnes Bilong Jehova i husat na ol i bilip long wanem samting. Tasol olsem wanem bai mi helpim ol? Man bilong mi em i wanpela elda Kristen, na em i givim sampela gutpela tingting long mi long ol samting mi ken mekim.
Mipela i kisim wanpela gutpela tingting long wanpela stori (“Magazines That Give Practical Comfort”) long Kirap! (tok Inglis) bilong Janueri 8, 1995. Dispela stori i toktok long wok bilong wanpela Witnes, olsem: “Em i save wok strong long bungim sampela olpela nius Kirap! em i laik mekim wok long en—em i kisim long haus bilong ol narapela Witnes. Na em i save go lukim ol lain em i ting ol bai laik long kaunim sampela stori bilong ol dispela nius.”
Man bilong mi i helpim mi, na i no longtaim na mi bungim sampela handet nius. Mi skelim ol dispela nius na nau mi inap makim ol stori i stret long ol man mi bai toktok wantaim ol.
Mi mekim wok long buk bilong telefon na buk i gat lista bilong ol manmeri, na mi wokim lista bilong ol haus sik, ol haus pasindia bilong ol yangpela, na ol haus bilong lukautim ol sikman na lapun. Na mi wokim tu lista bilong ol man i gat wok long stretim ol samting bilong planim ol man i dai pinis, ol bikman na ol man bilong givim tok long ol pikinini long skul bilong helpim ol, ol dokta bilong skelim bodi bilong man bilong painim as bilong indai bilong em, ol ofisa bilong haus kalabus na ol haus kot. Long lista bilong mi, mi raitim tu nem bilong ol dairekta bilong ol lain i save helpim ol man i kalabus long dring na kisim drak na bilong ol lain bilong stretim ol hevi bilong bagarapim bus na graun, na bilong ol man skin bilong ol i bagarap na ol man i kisim bagarap long pait, na bilong ol lain i save skelim kaikai bilong strongim skin. Mi no lusim ol lain bilong welfe, ol lain bilong helpim sindaun bilong ol man, na ol lain bilong helpim ol famili—mi putim ol tu long lista.
Bai Mi Tok Wanem Long Ol?
Namba wan samting mi mekim taim mi go lukim ol, em mi toksave long ol long mi husat. Na mi tokim ol olsem mi bai toktok wantaim ol inap sampela minit tasol.
Taim mi bungim man mi laik lukim em, mi save tok: “Mi wanpela Witnes Bilong Jehova. Tasol mi no kam bilong toktok wantaim yu long lotu, na i no stret yumi stori long dispela samting long taim bilong wok.” Dispela tok i mekim na bel bilong ol i stap isi. Taim mi lukim olsem man i orait long harim, mi tok moa olsem: “I gat tupela as na mi kam lukim yu. Namba wan as, em mi laik tokim yu olsem mi amamas long ol wok lain bilong yupela i save mekim. Em bikpela wok tru yupela i save mekim na mipela i mas tok tenkyu long yupela. Yupela i save lusim taim na strong bilong yupela bilong helpim olgeta man. Mi mas tok tenkyu long dispela wok.” Planti man, taim mi tok olsem long ol, ol i save kirap nogut.
Orait nau dispela man bai tingting long wanem namba 2 as na mi kam lukim em. Mi save tok: “Namba 2 as na mi kam lukim yu i olsem: Long nius Kirap! bilong mipela, em mipela i save tilim long olgeta hap bilong graun, mi bin makim sampela nius i stori long kain wok yupela i save mekim na ol hevi bilong dispela wok. Mi ting bai yu laik save, dispela nius mipela i wokim bilong ol man bilong olgeta hap i stori olsem wanem long dispela hevi. Mi bai amamas long lusim dispela nius long yu.” Planti taim ol man i save tokim mi olsem ol i amamas long hatwok bilong mi long kam lukim ol.
Mi Kirap Nogut na Amamas Long Ol Samting i Kamap
Taim mi bihainim dispela pasin bilong toktok wantaim ol dispela lain, planti ol i amamas long harim tok bilong mi; long olgeta man mi bungim ol, wanpela tasol long olgeta 17 man i no laik harim tok bilong mi. Mi kirap nogut na amamas long planti gutpela ekspiriens mi kisim.
Olsem: Inap 4-pela taim mi bin traim long i go lukim wanpela inspekta bilong ol skul long distrik. Tasol bihain rot i op na mi inap bungim em. Em i gat planti wok tru. Tasol em i gat pasin pren na em i toktok liklik long mi. Taim mi laik lusim em, em i tok: “Mi pilim tru hatwok bilong yu, olsem na bai mi kaunim gut ol nius bilong yu.”
Long narapela taim, mi go long distrik kot, na mi bungim nambawan jas, em man i lapun liklik. Taim mi go insait long ofis bilong em, em i apim het na lukluk long mi olsem em i kros liklik.
Em i tok: “Taim bilong lukim mi em long Tunde long moningtaim tasol, long dispela de bai mi gat taim bilong toktok wantaim yu.”
Kwiktaim mi tokim em: “Sori tru, mi kam lukim yu long taim i no stret. Bai mi amamas long kam bek gen na lukim yu long narapela taim. Tasol mi kam bilong lukim yu long wanpela samting bilong mi yet.”
Nau tingting bilong jas i kirap. Long pasin isi liklik em i askim mi, mi laik toktok wantaim em long wanem samting. Mi tok gen olsem bai mi kam lukim em long Tunde.
Mi kirap nogut taim em i tok: “Plis yu kam sindaun. Yu laik toktok long mi long wanem samting?”
Mitupela i kirap long toktok, na em i tok sori long em i no mekim pasin pren long pastaim, long wanem, em i gat planti wok tru.
Bihain liklik jas i askim mi: “Yu save long wanpela samting bilong ol Witnes Bilong Jehova mi laikim? Ol lo bilong ol i gat as bilong en na ol i no save lusim. Hitler i bin mekim kain kain samting long ol Witnes, tasol ol i no bin go insait long pait.”
Taim mitupela i go insait long wanpela ofis, ol kuskus i stap insait i luksave long mipela. Nambawan kuskus i tok long mipela olsem, “Presiden i no save toktok wantaim ol man i kam bilong kamapim hevi bilong ol.”
Mi bekim tok isi olsem: “Tasol em bai toktok wantaim mipela, long wanem, mipela ol Witnes Bilong Jehova. Mipela i no lain bilong kamapim ol hevi bilong mipela, na mipela i no inap toktok longtaim winim 3 minit.” Long bel mi beten strong, “O Jehova, plis opim rot long mipela!”
Kuskus i bekim tok strong olsem, “Orait bai mi traim askim em.” Em i wokabaut i go. Bihain long tupela minit mi ting em i no inap kam bek, tasol em i kam bek na presiden tu i bihainim em i kam. Presiden i no mekim wanpela tok, tasol em i kisim mipela i go abrusim tupela rum na i go bek gen long ofis bilong em.
Taim mipela i kirap long toktok wantaim, em i toktok gut wantaim mipela. Em i orait long kisim Kirap! i gat ol bikpela stori long en. Mipela i tenkyu long Jehova long em i opim rot long mipela long toktok wantaim ol man long as bilong wok bilong mipela.
Taim mi tingting bek long ol gutpela ekspiriens mi kisim, dispela i mekim na mi pilim tru tok bilong aposel Pita, em i tok: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Laik bilong God i olsem, em i laik bai ol manmeri i gat kain kain sindaun, tok ples, o ol i holim bikpela namba, ol i mas i gat rot bilong save long laik bilong em long ol manmeri na long graun.—Wanpela meri i salim dispela stori i kam.