Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w96 12/15 p. 25-29
  • Yu Save Bihainim Tingting Bilong God Long Ol Samting Bilong Dring?

No gat vidio bilong dispela seksen.

Sori, popaia kamap long lodim vidio.

  • Yu Save Bihainim Tingting Bilong God Long Ol Samting Bilong Dring?
  • Wastaua i Tokaut Long Kingdom Bilong Jehova—1996
  • Ol Liklik Het Tok
  • Wankain Infomesen
  • Tingting Em God i No Laikim
  • Hamas Dring i Planti Tumas?
  • Lukautim Gut Tingting Bilong Yu
  • Wanem Samting i Givim Tingting Long Yu Long Ol Samting Bilong Dring?
  • No Ken Pundaunim Ol Narapela
  • Ol Kristen i Narapela Kain Tru
  • Holimpas Stretpela Tingting Long Pasin Bilong Dring Alkohol
    Wastaua i Tokaut Long Kingdom Bilong Jehova—2004
  • Larim Tingting Bilong God i Stiaim Yu Long Pasin Bilong Dring Alkohol
    Wastaua i Tokaut Long Kingdom Bilong Jehova (Stadi)—2023
  • Ol Kristen i Ting Olsem Wanem Long Dring?
    Wastaua i Tokaut Long Kingdom Bilong Jehova—1988
  • Ol Kristen i Mas i Gat Wanem Tingting Long Alkohol?
    Stap Amamas Oltaim!—Stadi Long Baibel
Lukim Moa
Wastaua i Tokaut Long Kingdom Bilong Jehova—1996
w96 12/15 p. 25-29

Yu Save Bihainim Tingting Bilong God Long Ol Samting Bilong Dring?

INAP olsem 20 yia i go pinis, ol saveman i digim graun i go daun na ol i painim wanpela olpela haus ol i bin wokim long brik, klostu long taun Urmia, Iran. Insait long dispela haus ol i painim wanpela botol graun em ol saientis i tok i bin stap inap planti tausen yia, kirap long taim ol man i bin wokim ol setelmen long bipo tru. Nau tasol ol i bin mekim wok long ol nupela save bilong saiens bilong skelim dispela botol. Ol saientis i kirap nogut long painim sampela marasin samting insait long en i olpela tru, winim olgeta narapela marasin ol man i bin painim i kamapim klia olsem long bipo tru ol man i bin wokim wain.

Baibel tu i kamapim klia olsem kirap long bipo tru, ol man i bin dring wain, bia, na sampela narapela kain dring. (Stat 27:25; Saveman 9:7; Nahum 1:​10) Wankain olsem ol narapela kaikai, Jehova i larim yumi i makim wanem samting yumi laik mekim​—⁠yumi ken dring o yumi no ken dring. Planti taim Jisas i dring wain taim em i kaikai. Jon Bilong Baptais i no save dring.​—⁠Matyu 11:​18, 19.

Baibel i tambuim pasin bilong dring planti tumas. Man i dring spak em i mekim sin long ai bilong God. (1 Korin 6:​9-​11) Olsem na sapos wanpela man i kamap man bilong dring spak na em i no tanim bel, ol Witnes Bilong Jehova i no ken larim em i stap insait long kongrigesen Kristen. Sapos sampela insait long kongrigesen ol i laik dring, orait, ol i mas kisim dring long skel tasol​—⁠ol i no ken dring planti tumas.​—⁠Taitus 2:​2, 3.

Tingting Em God i No Laikim

Planti man long nau ol i no bihainim tingting bilong God long ol samting bilong dring. I no hatwok long save olsem Satan i wok long kirapim ol man long mekim nabaut long dispela samting bilong bipo yet. Olsem: Long sampela ailan bilong Saut Pasifik, em pasin bilong ol man long bung wantaim na daunim planti dring ol yet i bin wokim. Ol i bung olsem long planti taim, na sampela taim ol i dring i go i go inap sampela aua​—⁠planti man i save dring olsem long olgeta de. Sampela man i ting dispela em i pasin bilong ples tasol. Sampela taim ol i daunim bia na ol strongpela dring tasol, na sampela taim ol i daunim ol dispela kain dring na ol dring ol yet i bin wokim. Olsem na planti taim ol i save spak.

Long narapela ailan bilong Pasifik, ol man i no dring long skel tasol. Taim ol i dring, ol i dring bilong ol i ken spak. Olsem na long taim bilong kisim pe, sampela man i save bung wantaim na baim sampela katon bia, em ol katon wan wan i gat 24 botol long en. Ol i dring i go i go inap long bia i pinis olgeta. Olsem na planti man i save spak na raun.

Long ol kantri bilong Afrika, ol man i save dring wain em ol i bin wokim long diwai pam o sampela narapela dring ol man bilong ples i bin wokim. Em pasin bilong sampela lain long ol i mas givim dring long man i kam lukim ol. Ol i save givim planti dring long man, winim skel bilong em. Long wanpela hap, em pasin bilong ol man long sanapim 12-pela botol bia long ai bilong man i kam lukim ol.

Planti kampani long Japan i stretim rot bilong ol wokman bilong ol i ken kisim bas na go long wanpela raun. Ol wokman i kisim planti dring i go wantaim ol, na kampani i no gat tok long ol i dring spak. Sampela kain raun olsem i save stap inap tupela o tripela de. Nius Asiaweek i tok, long Japan, “maski man i fama nating bilong planim rais o em i wanpela maniman i mekim wok politik, samting i makim em i man tru, em skel bilong dring em inap daunim.” Nius Asiaweek i tok, “ol man bilong Saut Korea ol i save daunim planti strongpela dring, winim skel bilong dring ol man long olgeta narapela kantri i save daunim.”

Long planti skul koles long Yunaitet Stets, ol i save dring i go i go na pinisim planti botol. Nius The Journal of the American Medical Association i tok, “ol man i dring i go i go na pinisim planti botol, ol i no ting ol i gat hevi long dring.”a Yumi no ken kirap nogut long dispela, long wanem, ol nius na televisen samting long planti kantri i save kirapim ol man long ting olsem pasin bilong dring em i gutpela samting em planti man i gat nem ol i save mekim. Ol nius na televisen samting i save grisim ol yangpela long kisim dring.

Long Briten, skel bilong bia ol man i bin kisim insait long 20 yia em i go bikpela olsem dabol, na skel bilong ol strongpela dring i go bikpela inap tripela taim. Krismas bilong ol man bilong dring i go daun, na planti meri i save dring, winim bilong bipo. Na i wankain tu long ol kantri bilong Isten Yurop na Latin-Amerika. Samting i kamapim klia ol dispela samting, i olsem: Ol man i kalabus long dring, na ol man i dring na bamim ka na kisim bagarap olgeta, ol i kamap planti. Olsem na yumi save, pasin bilong dring planti tumas i go bikpela long olgeta hap bilong graun.

Hamas Dring i Planti Tumas?

Baibel i kamapim stretpela tingting long dring. Baibel i tok, wain em i wanpela presen God Jehova i bin givim long yumi man na i mekim “bel bilong [man] i amamas.” (Song 104:​1, 15) Tasol taim Baibel i tambuim pasin bilong dring planti tumas, em i kolim ol tok olsem “dring nabaut oltaim,” “spak,” “pasin bilong spak nabaut, na pasin bilong mekim ol bikpela pati na kaikai planti tumas na dringim planti strongpela dring,” “larim wain i bosim tingting bilong ol.” (Luk 21:34; 1 Pita 4:3; 1 Timoti 3:​8; Taitus 2:⁠3) Tasol hamas dring em i “planti” dring? Olsem wanem Kristen inap save long tingting bilong God long ol samting bilong dring?

I no hatwok long save long dring spak em wanem samting. Baibel i stori long ol samting dring spak i kamapim, olsem: “Wanem ol man i gat bikpela hevi na i save sori long ol yet? Na wanem ol man i save toktok planti na kirapim pait? Na wanem ol man i save kisim sua long skin bilong ol? Na ai bilong wanem ol man i save ret oltaim? Em ol man i save dring planti wain na bia samting, ol dispela man tasol. . . . Bai tingting bilong yu i bagarap na yu ting yu lukim ol kain kain samting. Na bai yu mauswara planti long olkain samting nabaut.”​—⁠Sindaun 23:​29-​33.

Planti dring tumas inap mekim na tingting bilong man i paul nabaut, na man i ting em i lukim kain kain samting, na tingting bilong em i dai, na sampela narapela samting nogut inap kamap long tingting na skin bilong em. Taim man i dring planti tumas, ating em i no inap bosim em yet, na em inap bagarapim em yet o ol narapela. Sampela man bilong dring spak ol i save mekim pasin i kranki stret, na pasin ol man i save sem long lukim, na pasin pamuk.

Sapos man i dring i go i go inap long em i spak, na ol samting nogut yumi stori pinis long en i painim em, orait yumi ken save, em i bin dring planti tumas. Tasol sampela man i save dring planti na i no gat wanpela samting i kamap ples klia bilong makim olsem em i dring spak. Olsem na sampela taim i hatwok long save, man i bin dring planti tumas o nogat. Olsem wanem yumi inap save man i dring inap long skel tasol o em i dring planti tumas?

Lukautim Gut Tingting Bilong Yu

Baibel i no putim sampela mak, olsem mak bilong hamas dring i ken i stap insait long blut bilong man bambai em i ken save hamas dring em i ken kisim, nogat. Dring i no mekim wankain pasin long olgeta man. Tasol ol lo bilong Baibel i stret long olgeta Kristen i mas bihainim na ol dispela lo i ken helpim yumi long kisim tingting bilong God long ol samting bilong dring.

Jisas i tok, namba wan lo i olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:​37, 38) Dring i save mekim sampela wok long tingting, na sapos yu dring planti tumas, dispela inap pasim yu long bihainim dispela nambawan bikpela lo. Dring inap mekim na man i no inap skelim gut ol samting, stretim gut ol hevi, bosim gut skin, na i pasim sampela narapela bikpela wok bilong tingting. Baibel i tokim yumi: “Yu mas was gut na holim strong gutpela tingting na save bilong yu. Nogut yu lusim. Gutpela tingting na save bai i givim laip long yu na em bai i stap olsem gutpela bilas bilong yu.”​—⁠Sindaun 3:​21, 22.

Aposel Pol i tokim ol Kristen: “Yupela i mas givim bodi bilong yupela long God olsem ofa i stap laip na i holi na God i save laikim, em wok bilong God yupela i mekim wantaim stretpela tingting.” (Rom 12:⁠1, NW) Sapos Kristen i dring i go i go inap long em i lusim “stretpela tingting,” yu ting ‘God i ken laikim’ em? Man i dring planti tumas, ating isi isi em i ken apim skel bilong em long dring na i olsem dispela i no mekim wanpela samting long em. Ating em inap pilim olsem, tru, em i dring planti, tasol em i no spak. Kain man olsem inap kamap man i kalabus long dring. Yu ting kain man olsem inap givim bodi bilong em olsem “ofa i stap laip na i holi”?

Maski man i kisim liklik dring tasol, sapos dispela i tekewe “gutpela tingting na save” bilong em, orait yumi ken tok, em i bin dring planti tumas.

Wanem Samting i Givim Tingting Long Yu Long Ol Samting Bilong Dring?

Kristen i mas skelim tingting bilong em long ol samting bilong dring​—⁠em i bihainim tingting bilong ol man long nau o pasin bilong ples o olsem wanem. Long ol samting bilong dring, yu no ken bihainim pasin bilong ples o ol piksa yu lukim long televisen samting. Bilong skelim tingting bilong yu, askim yu yet, ‘Mi bihainim tingting bilong ol man long hap bilong mi? O mi bihainim ol lo bilong Baibel long ol samting bilong dring?’

Ol Witnes Bilong Jehova i no save birua long ol pasin bilong ples. Tasol ol i save i gat planti pasin em Jehova i nolaik tru long en, em planti man long olgeta hap long nau i save orait long en. Sampela lain i orait long pasin bilong rausim bel, kisim blut, pasin sodom, o maritim planti meri. Tasol ol Kristen i save bihainim tingting bilong God long ol dispela samting. Tru tumas, sapos Kristen i kisim tingting bilong God, dispela bai kirapim em long bel nogut long ol dispela pasin, maski ol wanples i orait long en o nogat.​—⁠Song 97:⁠10.

Baibel i tok long “olkain pasin ol haiden i save laikim tumas long mekim,” na insait long dispela pasin i gat “pasin bilong spak nabaut” na “mekim ol bikpela pati na . . . dringim planti strongpela dring.” Dispela tok, “mekim ol bikpela pati na . . . dringim planti strongpela dring” i makim pasin bilong bung wantaim bambai ol man i ken daunim planti dring. Long taim bilong ol man i raitim Baibel, sampela man i save tok hambak long ol i ken daunim planti dring na dring i no inap longlongim ol, na ol i bin dring planti tumas na resis wantaim ol narapela o ol i bin dring i go i go bambai ol i ken save husat inap daunim planti dring moa. Aposel Pita i tok olsem dispela kain pasin em i “pasin nogut,” em ol Kristen i tanim bel pinis ol i no save insait moa long en.​—⁠1 Pita 4:​3, 4.

Yu ting i stret long Kristen i ken ting, sapos em i no dring spak, i no bikpela samting long em i dring we o long wanem taim o hamas dring em i kisim? Yumi ken askim olsem, Dispela tingting em i tingting bilong God? Baibel i tok: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.” (1 Korin 10:31) Taim ol man i bung wantaim long ai bilong ol man na ol i daunim planti dring, ating i no olgeta bilong ol i dring spak, nogat; tasol yu ting pasin ol i mekim i givim biknem long Jehova? Baibel i tok: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.”​—⁠Rom 12:⁠2.

No Ken Pundaunim Ol Narapela

Sampela lain i orait long pasin bilong dring planti tumas, tasol ol i no orait long en taim man i dring planti tumas i tok em i man bilong God. Long wanpela liklik ples long hap bilong Saut Pasifik, wanpela man i tok: “Mi laikim tru pasin bilong yupela. Yupela i autim tok i tru. Tasol mipela i lukim long lain bilong yupela ol man i save dring planti tumas.” Ating ol dispela man i no spak, tasol planti man long dispela ples ol i no tingim dispela samting. Ol inap ting ol Witnes i wankain olsem planti ol narapela man em ol i sindaun longpela taim na dring, na bihain ol i spak. Sapos wokman Kristen i sindaun longpela taim na dring, yu ting em inap holim gutpela nem na mekim wok autim tok bilong em na no ken pret?​—⁠Aposel 28:⁠31.

Wanpela kantri long Yurop i kamapim ripot i makim olsem, sampela taim, sampela brata na sista i kamap long Haus Kingdom na ol narapela inap harim smel bilong dring long ol. Dispela i bin bagarapim bel bilong ol. Baibel i tok: “Sapos yu kaikai mit o yu dring wain o yu mekim narapela samting, na dispela i mekim brata bilong yu i pundaun, orait mobeta yu no mekim dispela pasin.” (Rom 14:21) Strongpela Kristen i bihainim tingting bilong God long dring, dispela bai kirapim em long tingim maus bilong bel bilong ol narapela, na sampela taim em bai stap longwe long dring.

Ol Kristen i Narapela Kain Tru

Sori tru, ol man bilong dispela graun i bin mekim planti samting Jehova i no laikim; ol i bin mekim nabaut long ol gutpela samting em i bin givim long ol, na bia na wain samting tu. Olgeta wan wan Kristen i dediket pinis ol i mas wok strong bambai ol i no ken bihainim ol tingting God i no laikim, em planti man long nau i save bihainim. Long dispela rot ol man inap save “stretpela man i narapela kain long man nogut, na man i mekim wok bilong God i narapela kain long man i no mekim wok bilong God.”​—⁠Malakai 3:​18, NW.

Olsem na long ol samting bilong dring, ol Witnes Bilong Jehova i mas i stap “narapela kain” tru long ol man bilong dispela graun. Pasin bilong dring i no namba wan samting long i stap bilong ol Kristen tru. Ol i no traim hamas dring ol inap daunim na ol i no ken spak, na ol i no larim dring i mekim na tingting bilong ol i no wok gut na ol i no givim bel olgeta long mekim wok bilong God.

Lain Witnes Bilong Jehova i bihainim tingting bilong God long ol samting bilong dring. Olsem wanem long yu? Olgeta wan wan bilong yumi i ken bilip olsem Jehova bai mekim gut long yumi taim yumi bihainim ol tok bilong Baibel i laik skulim yumi “long lusim pasin bilong givim baksait long God na long lusim olgeta laik nogut bilong dispela graun, na . . . i skulim yumi long tingting gut na wokabaut stret. Tru, yumi stap namel long ol manmeri bilong dispela graun, tasol marimari bilong God i skulim yumi long bihainim pasin bilong God.”​—⁠Taitus 2:​12.

[Futnot]

a “Taim man i dring i go i go em i save pinisim 5-pela botol o sampela moa, na meri i save pinisim 4-pela botol o sampela moa.”​—⁠The Journal of the American Medical Association.

[Blok long pes 28]

Harim Tok Bilong Ol Man i Laikim Tumas Yu

Man i dring planti tumas, ating ol narapela i save em i gat hevi, tasol em yet i no save. Ol wanblut, ol pren, na ol elda Kristen, ol i no ken surik long tokim man em ol i laikim em tumas olsem ol i laik helpim em. Tasol sapos ol man i laikim tumas yu i tokim yu olsem ol i bel hevi long pasin bilong yu long dring, ating i gat gutpela as na ol i tok olsem. Tingim gut tok ol i laik givim long yu.​—⁠Sindaun 19:20; 27:⁠6.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim