nogat. Tasol God i marimari long yumi na long rot bilong Krais ol man i bilip ol inap kisim laip i stap oltaim; ol animal nogat. Planti man bai ol i kirap bek na bai ol inap kisim dispela laip; bai God i givim strong gen long ol bilong i stap laip.

Lu 23:46: “Jisas i singaut strong moa olsem, ‘Papa, mi putim spirit [tok Grik, pneuʹmaʹ] bilong mi long han bilong yu.’ Em i tok olsem, na em i dai.” (Dispela samting i kamap long taim Jisas i dai, a? Olsem na taim spirit bilong em i lusim em, long dispela taim em i no go long heven. Tripela de i lus pastaim na em i kirap bek, na Aposel 1:​3, 9 i tok, i gat 40 de moa na em i go antap long heven. Orait, olsem wanem Jisas inap mekim dispela tok taim em i laik i dai? Dispela i makim olsem em i save, taim em i dai, nau strong bilong givim laip gen long em i stap long han bilong God tasol. Bilong kisim sampela save moa long ‘spirit i go bek long God,’ lukim het-tok “Tewel,” pes 433.)

Sapos Man i Tok​—⁠

‘Yu gat spirit holi o nogat?’

Yu ken tok: ‘Mi gat, na dispela i kirapim mi long i kam long haus bilong yu nau. (Ap 2:​17, 18)’

O yu ken tok: ‘Spirit tasol i helpim mi na mi inap mekim dispela wok Kristen. Tasol mi lukim olsem ol man i gat kain kain tingting long ol samting i makim olsem man i kisim tru spirit bilong God. Yu ting wanem samting i makim olsem?’ Na ating yu ken tok moa olsem: (Kamapim sampela tok bilong pes 410, 411.)

Spirit Bilong Dispela Graun

Stori: Em wanpela strong i bosim tingting bilong ol man i no wokboi bilong God Jehova, na i kirapim ol long bihainim wanpela kain pasin long olgeta toktok na ol samting ol i mekim. Tru, ol man i save bihainim laik bilong ol yet, tasol ol man i bihainim pasin bilong graun, tingting na pasin na laik bilong ol i kamapim klia olsem ol i bilong dispela graun, em Satan i bos na god bilong en.

Bilong wanem yumi mas was gut, nogut yumi bihainim tingting bilong dispela graun?

1 Jo 5:19: “Dispela graun olgeta em i stap aninit long strong bilong Satan.” (Spirit, o strong, bilong Satan i bosim tingting na pasin bilong ol manmeri i no gutpela wokboi bilong Jehova, na i kirapim ol long hambak na tingim ol yet tasol. Dispela kain spirit o tingting i kamap long olgeta hap na i olsem win ol man i pulim. Yumi mas was gut bambai yumi no bihainim dispela kain tingting, nogut yumi stap aninit long strong bilong Satan.)

KTH 12:9: “Ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan . . . Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.” (Dispela i kamap bihain long taim Kingdom i kamap long heven long yia 1914. Bihain long dispela taim Satan na ol spirit nogut i bosim strong moa ol manmeri. Spirit bilong Satan i kirapim ol long tingim ol yet tasol na mekim pait. Satan i wok strong long pulim ol wokboi bilong Jehova long bihainim pasin bilong dispela graun, na pasin bilong ol narapela man, na lusim lotu i tru.)

Wanem sampela pasin em spirit bilong dispela graun i as bilong en na yumi mas was gut long en?

1 Ko 2:12: “Mipela i no bin kisim spirit bilong dispela graun. Nogat. Mipela i kisim Spirit i kam long God.” (Sapos spirit bilong dispela graun i bosim strong tingting na laik bilong man, dispela bai kirapim em long bihainim ol pasin bilong dispela graun. Olsem na bilong lusim spirit bilong dispela graun, yumi mas klia long olgeta pasin i no pasin Kristen, na pasin bilong givim bel tumas long painim ol amamas samting. Na bikpela samting, yumi mas wok long kisim ol tingting em spirit bilong God i as bilong en na yumi mas laikim tumas ol pasin bilong God. Yu mas tingim dispela samting taim yu skelim ol pasin hia i makim ol man i bihainim spirit bilong graun.)

Ol i bihainim laik bilong ol yet tasol; ol i no tingim laik bilong God

Satan i kirapim Iv long bihainim tingting bilong em yet long wanem pasin i stret na wanem pasin i no stret. (Stt 3:​3-5; skelim wantaim Sindaun 3:​5, 6.) Planti man i bihainim pasin bilong Iv ol i no save long laik bilong God, na ol i no laik save long en. Ol i bihainim laik bilong ol yet tasol. Ol man i save long ol lo bilong God na i wok long bihainim, ol i mas was gut, nogut spirit bilong dispela graun i kirapim ol long sakim tok bilong Baibel long samting ol yet i ting em i “liklik samting.”​—⁠Lu 16:10; lukim tu “Stap Fri.”

Ol i hambak na i gat pasin antap

Satan i namba wan man bilong hambak na litimapim nem bilong em yet, na laik nogut i kamap long bel bilong em. (Skelim wantaim Esekiel 28:17; Sindaun 16:⁠5.) Pasin antap i brukim ol lain bilong dispela graun bilong Satan; ol i ting ol i winim ol man bilong narapela skin o lain o tok ples o sindaun. Sapos hap tingting olsem i stap yet long bel bilong sampela wokboi bilong God, ol i mas rausim. Ol i mas was gut, nogut ol i gat pasin antap na dispela i mekim na ol i kirapim bikpela tok pait long ol liklik samting, o ol i no laik tokaut long rong bilong ol na bihainim tok bilong stretim ol, na ol gutpela samting Jehova i mekim long rot bilong oganaisesen bilong em i no inap helpim ol.​—⁠Ro 12:3; 1 Pi 5:⁠5.

Ol i bikhet long ol man i gat wok long bosim ol

Satan, em “Man Bilong Sakim Tok,” em i kirapim pasin bikhet. Nimrot, ating insait bilong nem bilong em i olsem “Kaman, Yumi Bikhet.” Em i bikhet long Jehova na kamapim klia olsem em i pikinini bilong Satan. Ol manmeri i aninit long God ol i mas sakim dispela kain pasin, na bai ol i no bikhet long ol gavman (Ro 13:⁠1); na bai ol yangpela i no bikhet long wok God i givim long papamama bilong bosim ol (Kl 3:20); na yumi no ken sori liklik long ol man i bikhet na givim baksait long lotu i tru, em ol i no laik daun long ol man God i givim wok long ol bilong lukautim lain bilong em long graun.​—⁠Ju 11; Hi 13:⁠17.

Ol i no daunim liklik ol laik nogut bilong skin

Dispela pasin i kamap ples klia long olgeta hap. Oltaim yumi mas lukaut long en. (1 Jo 2:16; Ef 4:​17, 19; Ga 5:​19-21) Sapos man i no save daunim ol tingting na laik nogut bilong skin, dispela bai kamap ples klia long ol toktok na tok pilai em i mekim, na long ol kain singsing em i save harim, na long kain danis em i mekim, na long ol kain piksa nogut bilong pamuk samting em i save lukim long televisen samting. Dispela pasin bilong spirit bilong graun i kirapim ol man long kisim nating drak, na spak, na bagarapim marit, na pamuk, na mekim pasin sodom. Na em i kamap klia taim man o meri i katim marit, tasol i no stret long lo bilong Baibel, na em i maritim narapela poroman.​—⁠Mal 2:⁠16.

Ol i aigris long planti samting na ol i laik kisim na dispela pasin i bosim wokabaut bilong ol

Satan i kirapim kain laik olsem long bel bilong Iv na pulim em long mekim pasin i bagarapim em long ai bilong God. (Stt 3:6; 1 Jo 2:16) Jisas i sakim kain traim olsem. (Mt 4:​8-10) Ol man i laik bai Jehova i amamas long ol, ol i mas was gut bambai ol bisnis bilong dispela graun i no kirapim kain laik olsem long bel bilong ol. Ol man i laik kisim planti samting, dispela inap mekim na bai ol i karim planti hevi o lusim bilip.​—⁠Mt 13:22; 1 Ti 6:​7-10.

Ol i hambak long kago o save o wok bilong ol

Dispela pasin tu em i “pasin bilong graun” na ol man i laik kamap wokboi bilong God ol i mas lusim. (1 Jo 2:16) Pasin antap i as bilong en na dispela pasin i no helpim ol narapela long kamap strong long bilip; em i pulim ol na ol i laik kisim ol samting bilong skin na bikpela save o bikpela wok bilong graun.​—⁠Ro 15:⁠2.

Taim ol i belhat, ol i save mekim ol tok nogut na mekim pait

Em ol “pasin bilong olpela bel” na planti man i hatwok long lusim. Tasol bilip tru na spirit bilong God inap helpim man long lusim, na bai em i no larim strong, o spirit, bilong dispela graun i winim em.​—⁠Ga 5:​19, 20, 22, 23; Ef 4:31; 1 Ko 13:​4-8; 1 Jo 5:⁠4.

Ol i bilip o pret long ol samting ol man inap mekim

Man i tingim ol samting bilong skin tasol em i ting ol samting em inap lukim o holim em samting i tru. Em i bilip long ol tok promis bilong ol man, na em i pret long tok bilong ol long mekim nogut long em. Em i ting ol bikman bilong graun inap helpim em, na taim ol i no mekim, em i bel hevi. (Sng 146:​3, 4; Ais 8:​12, 13) Em i ting em i bilong i stap nau tasol. Olsem na sapos ol man i tok long kilim em i dai, em bai pret nogut tru, na i olsem pret i kalabusim em. (Skelim wantaim Matyu 10:28; Hibru 2:​14, 15.) Tasol ol man i kisim save long Jehova na ol tok promis bilong em, tingting bilong ol i kamap nupela na ol i lain long wetim em i helpim ol long olgeta taim bilong hevi.​—⁠Ef 4:​23, 24; Sng 46:1; 68:⁠19.

Ol i givim biknem long sampela man o sampela samting, olsem god bilong ol

God i putim laik long skin bilong ol man long mekim lotu, tasol Satan, em “god bilong dispela graun,” i paulim dispela na kirapim kain kain pasin bilong lotuim ol god giaman. (2 Ko 4:⁠4) Ol i putim sampela hetman bilong graun i stap olsem god bilong ol. (Ap 12:​21-23) Planti milion i brukim skru long ol piksa na god giaman. Planti milion moa i putim sampela manmeri bilong piksa wokabaut o bilong pilai spot i stap olsem god bilong ol. Ol i save wokim bikpela bung o kaikai bilong givim biknem long man. Ol manmeri i givim bel tru long Jehova na i laik lotuim em wanpela tasol, ol i mas was gut oltaim long dispela kain pasin.

Stap Fri

Stori: Pasin bilong i stap fri em olsem: Man i no larim ol narapela i bosim em, o em i tok i no gat man i bosim em. God i wokim yumi bambai yumi yet inap tingim ol samting yumi laik mekim, olsem na yumi gat laik long i stap fri liklik. Tasol yumi mas was gut, nogut dispela laik i mekim na yumi sakim tok na bikhet.

Ol man i sakim ol lo bilong Baibel, yu ting ol i stap fri tru?

Ro 6:​16, 23: “Sapos yupela i givim yupela yet long wanpela man na bihainim tok bilong em, orait yupela bai i stap wokboi bilong em. Olsem tasol, yupela i ken i stap wokboi bilong sin, na dispela bai i mekim yupela i dai. O yupela i ken