No Ken Lusim Nating Pasin Bilong i Stap Fri God i Givim Long Yumi
‘Sapos spirit bilong Jehova i stap long wanpela man, orait dispela man i stap fri.’—2 KORIN 3:17.
1. Olsem wanem truim bilong Aisaia 65:13, 14 i painim ol Witnes Bilong Jehova?
GOD JEHOVA i helpim ol wokboi bilong em i dediket long em na ol i kamap fri, em gutpela tru! Long nau truim bilong wanpela tok bilong Nambawan Bikpela King Jehova i painim ol, olsem: “Ol wokman bilong mi bai ol i gat planti kaikai na wara. Tasol yupela ol lain i save givim baksait long mi, bai yupela i stap hangre na bai yupela i no gat wara bilong dring. Ol lain bilong mi, ol bai i amamas, tasol yupela bai i sem nogut tru. Bel bilong ol wokman bilong mi bai i pulap long amamas . . . [tasol] yupela bai i krai strong tru.”—Aisaia 65:13, 14.
2. Olsem wanem lain bilong Jehova i stap gutpela long ol samting bilong spirit?
2 Lain bilong God long nau ol i stap gutpela olsem—ol i stap gutpela long ol samting bilong spirit—long wanem, ol i larim spirit o strong bilong God i stiaim ol. Aposel Pol i tok, ‘Sapos spirit bilong Jehova i stap long wanpela man, orait dispela man i stap fri.’ (2 Korin 3:17) Bilong wanem God i bin helpim yumi long kamap fri? Yumi mas mekim wanem na bai yumi mekim gutpela wok long dispela pasin bilong i stap fri em God i givim long yumi?
God i Stap Fri Olsem Wanem?
3. God i stap fri olsem wanem? Bilong wanem i olsem?
3 Jehova wanpela tasol i stap fri olgeta. Em inap mekim olgeta samting long laik bilong em yet, na i no gat wanpela ensel o wanpela man inap pasim laik bilong em, long wanem, em i God I Gat Olgeta Strong na em i bosim heven wantaim graun. I olsem gutpela man Jop i bin tok: “Husat inap askim em, ‘Yu mekim wanem?’ ” (Jop 9:12) God Jehova i mekim save long King Nebukatnesar bilong Babilon na bihain king i tok: “Taim em i laik mekim wanpela samting, i no gat wanpela man inap long pasim em. Na i no gat wanpela man inap long askim em olsem, ‘Yu laik mekim wanem samting?’ ”—Daniel 4:35.
4. Olsem wanem Jehova i daunim sampela laik bilong em?
4 Jehova i no gat wok long harim tok bilong wanpela man, tasol em i gat ol stretpela lo bilong em na dispela i kirapim em long daunim sampela laik bilong em. Dispela pasin bilong em i kamap klia taim Abraham i tingting planti long bagarap i laik painim ol man i stap long taun Sodom na em i tokim Jehova: “Jas bilong olgeta graun, em i mas bihainim stretpela pasin.” Yumi tingim tok Jehova i bekim long Abraham na yumi save, Jehova i laik bihainim stretpela pasin. Sapos i gat sampela stretpela man i stap long taun Sodom, orait Jehova i no ken bagarapim taun. (Stat 18:22-33) Na God i gat pasin bilong sori, na bikpela save tu, olsem na em i save daunim kros bilong em na bosim gut laik bilong em.—Aisaia 42:14.
Ol Man i No i Stap Fri Olgeta
5. I gat wanem sampela samting i mekim na yumi ol man i no i stap fri olgeta?
5 God Jehova i stap fri olgeta, tasol ol narapela nogat, long wanem, ol i no gat olgeta save na strong, na ol i bilong i stap long ples God i makim bilong ol. Na ol man bilong graun i gat sin na ol i save stap sampela yia tasol na ol i dai. Jehova i bin wokim namba wan man Adam i gutpela tru na Jehova i larim Adam i bihainim planti laik bilong em, tasol Jehova i putim mak na bai Adam i no ken bihainim olgeta laik bilong em olsem Jehova i save mekim. Na i gat sampela samting moa i mekim na ol man i no i stap fri olgeta.
6. Yumi mas tokim God long as bilong olgeta pasin yumi mekim na dispela i mekim wanem long pasin bilong yumi long i stap fri?
6 Namba wan em olsem: God i bin wokim man na bai man i mas mekim laik bilong God. Baibel i tok, God Jehova tasol ‘i stap antap tru na em inap tru long olgeta man i ken litimapim nem bilong em na aninit long em, long wanem, em i bin wokim olgeta samting, na long laik bilong em yet em i bin mekim olgeta samting i kamap.’ (Kamapim Tok Hait 4:11) God i bin wokim ol man, olsem na ol i mas tokim em long as bilong olgeta pasin ol i mekim, na i stret em i ken makim ol lo ol i mas bihainim. Bipo God i bin givim Lo long ol Israel long han bilong Moses na dispela Lo i tok, ol i mas kilim i dai man i toknogutim nem bilong God o brukim lo bilong Sabat. (Kisim Bek 20:7; 31:14, 15; Wok Pris 24:13-16; Namba 15:32-36) Yumi ol Kristen long nau yumi no stap aninit long dispela Lo, tasol yumi no ken mekim olgeta samting yumi laik mekim, long wanem, yumi mas tokim God Jehova long as bilong olgeta pasin yumi mekim, em i Jas bilong yumi, na Man bilong givim lo long yumi, na King bilong yumi.—Aisaia 33:22; Rom 14:12.
7, 8. (a) Ol lo God i putim bilong bosim ol samting long graun, olsem wanem dispela i pasim rot bilong yumi na yumi no inap mekim olgeta samting yumi laik mekim? (b) I gat wanem ol narapela lo bilong God na yumi ol man i no inap mekim olgeta samting yumi laik mekim?
7 Na namba 2 samting em olsem: Ol lo God i putim bilong bosim ol samting long graun, dispela i mekim na yumi no inap bihainim olgeta laik bilong yumi. Olsem: Graun i save pulim ol samting i go daun long en—em lo God i bin putim (lo bilong graviti)—na dispela i pasim yumi na yumi no inap sanap antap long wanpela longpela haus samting na kalap na abrusim bagarap—bai graun i pulim yumi i go daun long en na yumi kisim bagarap. Em nau, ol dispela lo i bosim ol samting long graun, dispela i pasim yumi na yumi no inap mekim olgeta samting yumi laik mekim, nogut yumi kisim bagarap.
8 Na namba 3 samting i olsem: God i tambuim yumi long bihainim sampela pasin, na dispela tu i pasim yumi. Ating yu save, tok bilong Pol long Galesia 6:7, 8 i stret, em Pol i tok: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu. Sapos wanpela man i bihainim ol laik bilong olpela bel bilong em yet, orait dispela pasin bilong olpela bel bai i kamapim kaikai nogut na em bai i bagarap olgeta. Tasol sapos em i bihainim pasin bilong Holi Spirit, orait Holi Spirit bai i kamapim laip long dispela man na em bai i stap gut oltaim oltaim.” Tru tumas, ol tambu God i putim long yumi i pasim yumi na i gat sampela samting yumi no ken mekim, tasol yumi mas bihainim ol dispela tambu bambai yumi inap kisim laip i stap oltaim.
9. Yumi stap wantaim ol narapela man long graun na olsem wanem dispela i pasim yumi na yumi no inap mekim olgeta samting yumi laik mekim?
9 Na namba 4 samting i olsem: Yumi no inap mekim ol laik bilong yumi wan wan, long wanem, yumi mas tingim ol narapela man tu ol i stap long graun wantaim yumi, na nogut yumi mekim sampela samting i save rongim narapela man. Ol Kristen i mas bihainim tok bilong “ol gavman” sapos dispela tok i no kalapim lo bilong God. (Rom 13:1; Aposel 5:29) Olsem: Yumi mas bihainim ol lo bilong gavman i tok yumi mas baim takis, na ol lo bilong rot i tok yumi no ken spit, na ol kain lo olsem. Yumi ol Kristen i mas bihainim ol dispela lo bilong gavman, na dispela i pasim laik bilong yumi liklik. Olsem na tru, God i helpim yumi na yumi stap fri, tasol yumi no stap fri olgeta.—Mak 12:17; Rom 13:7.
Bilong Wanem Yumi No Stap Fri Olgeta?
10, 11. Bilong wanem Jehova i mekim na yumi no i stap fri olgeta, tasol yumi inap bihainim planti laik bilong yumi?
10 Bilong wanem God i mekim na yumi no stap fri olgeta, tasol yumi inap bihainim planti laik bilong yumi? Wanpela as em olsem: God i laik bai i gat sampela long graun, em ol i gat tingting na ol inap tingim na skelim ol samting ol i laik mekim na long laik bilong ol yet bai ol i mekim ol gutpela tok na pasin i litimapim nem bilong Em. Ol man inap mekim olsem; ol animal nogat. Lo i stap pinis long skin bilong ol animal i kirapim ol long mekim ol samting na ol i mekim tasol—ol i no tingting pastaim. Ol animal i no save wanem pasin i stret o i no stret. Yumi inap lainim dok na bai em i no ken kisim wanpela samting, tasol yumi no inap lainim em na bai em i ken save pasin bilong stil i no stret. Lo i stap pinis long skin bilong animal, dispela i bosim ol samting em i mekim, na em i no inap sakim dispela na tingim ol samting em i laik mekim na kirap mekim pasin i litimapim nem bilong God Jehova. Nogat. Tasol ol man inap mekim ol samting long laik bilong ol yet—ol yet inap tingim na skelim ol samting na long laik bilong ol yet bai ol i bihainim laik bilong Man i bin wokim ol, long wanem, ol i pilim gutpela pasin em i bin mekim long ol na ol i givim bel long em.
11 Na narapela as em olsem: God i larim ol man i bihainim planti laik bilong ol na bai ol i ken i stap amamas. Ol inap tingim na wokim kain kain samting, na long laik bilong ol yet ol inap mekim gutpela pasin long ol narapela man, na wok gut wantaim ol. Ol man i laik mekim wanem wok o sindaun we, em laik bilong ol. Tasol sampela taim long nau, ol samting bilong wok bisnis na wok politik i pasim rot bilong ol na ol i no inap bihainim dispela laik bilong ol. Ating pasin mangal bilong ol man i as bilong dispela; i no laik bilong God. God i bin wokim ol man na bai ol yet inap tingim wanem samting ol i laik mekim na ol inap bihainim laik bilong ol.
12. Olsem wanem na long nau klostu olgeta manmeri i stap olsem kalabus?
12 God Jehova i bin wokim man na bai man i ken bihainim planti laik bilong em, olsem i stap fri, tasol long nau klostu olgeta man i stap olsem kalabus. Dispela pasin i bin kamap olsem wanem? Namba wan man na meri, em Adam na Iv, tupela i lusim nating pasin bilong i stap fri em God i givim long ol. Tupela i stap fri, tasol tupela i kalapim mak Jehova i putim long dispela. God Jehova em i Nambawan Bikpela King na i stret em i ken putim lo bilong bosim tupela, tasol tupela i ting i no stret em i mekim olsem. (Stat 3:1-7; Jeremaia 10:10; 50:31) Tupela i no laik mekim gutpela wok long pasin bilong i stap fri ol i kisim—tupela i no laik i stap aninit long God Jehova na givim biknem long em. Nogat. Tupela i laik helpim ol yet long i stap moa fri—ol yet i laik skelim wanem samting i stret na wanem samting i no stret. Long dispela rot ol i bikhet long God Jehova olsem Satan i bin mekim, na dispela i no helpim ol long i stap moa fri. Nogat. Tupela i kamap sinman na nau kain kain samting i pasim ol na i olsem i kalabusim ol, na bihain tupela i dai. Dispela kalabus i kalap i go long ol lain pikinini tupela i kamapim. Sin na i dai i kalabusim ol. Baibel i tok: “Yumi olgeta man yumi bin mekim sin,” na pe bilong sin “em dai tasol.”—Rom 3:23; 5:12; 6:23.
13. Olsem wanem Satan inap mekim na ol man i kamap wokboi bilong em?
13 Pasin bikhet i kamap long Iden i mekim na Adam wantaim olgeta pikinini na tumbuna pikinini bilong em tu ol i stap kalabus aninit long Satan. Tru yet, “dispela graun olgeta em i stap aninit long strong bilong Satan”! (1 Jon 5:19) Satan i gat bikpela strong na save, winim bilong ol man, olsem na em inap giamanim ol na pulim ol, na em i bin mekim olsem long olgeta man i no stap aninit long God Jehova, na nau ol dispela man i stap kalabus aninit long Satan—ol i kamap wokboi bilong em. Na sampela man i laik kisim planti samting na ol i kirap bosim ol narapela man na mekim nogut long ol. (Saveman 8:9) Olsem na i gat 3-pela samting i save kalabusim ol man: Sin na i dai em wanpela; na Satan wantaim ol spirit nogut em narapela; na ol gavman na wok bisnis na lotu bilong dispela graun, ol tu i kalabusim ol man.
Rot i Op Bilong Kamap Fri Tru
14. Wok bilong helpim ol man long kamap fri tru i insait long wanem narapela wok?
14 Wok bilong helpim ol man long kamap fri tru i insait long wok God i laik mekim bilong stretim tok Satan i bin sutim long em, em Satan i tok, i no stret God Jehova i stap nambawan bos bilong heven na graun. Taim Jehova i kirap mekim ol samting em i tingting pinis long mekim bilong stretim dispela tok, nau bai rot i op bilong ol man i ken kamap fri tru, na bai sin na i dai na Satan na dispela graun bilong Satan i no ken kalabusim ol moa. Long dispela as tasol na Jehova i bin larim Satan i stap, olsem em i bin larim king bilong Isip long bipo i stap inap liklik taim. Jehova i mekim olsem bambai em i ken kamapim klia bikpela strong bilong em, na ol manmeri i ken tokaut long biknem bilong em long olgeta hap bilong graun. (Kisim Bek 9:15, 16) Klostu nau bai God i kamapim klia olsem em i Nambawan King bilong heven na graun. Pasin bikhet bilong Satan wantaim Adam tupela Iv i bin bagarapim tru nem bilong God, tasol klostu nau bai God i stretim bek nem holi bilong em. Long dispela taim ol manmeri i save aninit long Jehova bai ol i kamap fri—bai sin na i dai i no kalabusim ol moa. Na bai God i bringim ol i go insait long nupela taim bilong i stap fri.—Rom 8:19-23.
15. Jisas i bin mekim wanem wok bilong helpim ol man long kamap fri?
15 Jehova i salim Pikinini bilong em i kam long graun na bai ol man i ken kamap fri. Long graun Jisas i stap man i gutpela olgeta na em i orait long lusim dispela gutpela laip bilong em, olsem ofa, bilong helpim ol man long lusim kalabus bilong sin na i dai. (Matyu 20:28) Na em i bin autim tok bilong kamap fri. Taim em i kirap mekim wok bilong em long graun, em i bin kolim tok bilong Aisaia na makim em yet, olsem: “Spirit bilong God, Bikpela i kam i stap long mi, long wanem, Bikpela yet [Jehova] i kapsaitim wel long het bilong mi bilong makim mi bilong i go bringim gutpela tok bilong en long ol rabisman. Na em i salim mi i kam . . . long tokaut long ol man i stap long kalabus long ol i ken lusim kalabus na i go fri.”—Aisaia 61:1; Luk 4:16-21.
16. Ol Juda long taim bilong ol aposel i mas mekim wanem ol samting na bai ol inap kamap fri?
16 Olsem wanem ol man inap kamap fri olsem? Jisas i tok: “Sapos yupela i holim strong tok bilong mi, orait yupela bai i stap ol disaipel tru bilong mi. Na yupela bai i save long tok tru, na tok tru bai i mekim yupela i kamap fri.” Long dispela rot ol disaipel bilong Jisas i bin kamap fri long ol samting bilong spirit. (Jon 8:31, 32, 36) Na tu, Jisas i bin tokim namba wan gavman Pontius Pailat olsem: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim. Na olgeta man i bihainim tok tru, ol i save harim tok bilong mi.” (Jon 18:37) Jisas i autim tok i tru na kamapim klia long pasin bilong em na sampela Juda i bilip. Ol dispela Juda i hevi long rong bilong ol na tanim bel, na ol i lusim pasin nogut ol i bin bihainim, na ol i givim ol yet i go long Jehova bilong mekim laik bilong em, na ol i kisim baptais olsem Jisas i bin mekim. (Matyu 3:13-17; Aposel 3:19) Long dispela rot ol i kamap fri liklik.
17. Bilong wanem Jehova i helpim ol wokboi bilong em long kamap fri?
17 I gat tupela samting na Jehova i save helpim ol gutpela wokboi bilong em long kamap fri. Em i mekim olsem bilong kamapim klia olsem em i Nambawan Bikpela, na bilong helpim lain bilong em long i stap gutpela. Lain bilong Jehova long bipo ol i bin stap kalabus long Isip, na em i helpim ol long lusim dispela kalabus bambai ol i ken kamap olsem wanpela lain pris i stap witnes bilong em na ol i ken litimapim nem bilong em. (Kisim Bek 19:5, 6; Aisaia 43:10-12) Na i olsem tu long taim Jehova i helpim lain bilong em long lusim kalabus long Babilon—em i mekim olsem bambai ol i ken wokim gen haus lotu bilong em na kirap gen long lotuim em. (Esra 1:2-4) Tasol ol i kirap wokim ol gutpela haus bilong ol yet bilong helpim ol yet, olsem na Jehova i salim profet Hagai na Sekaraia i go long ol bilong stretim tingting bilong ol na bai ol i tingim wok bilong God ol i mas mekim. Taim ol i tingim gut dispela wok bilong God ol i kamap fri bilong mekim, nau ol i kirap pinisim wok bilong wokim haus lotu, na dispela i givim biknem long God na helpim ol yet long i stap gutpela.
Tingim Gut Dispela Wok Bilong God Yumi Kamap Fri Bilong Mekim
18. Olsem wanem yumi ken tok, ol wokboi bilong Jehova long nau ol i no lusim nating pasin bilong i stap fri em i givim long ol?
18 Olsem wanem long ol wokboi bilong God long nau? God i bin helpim ol tu long kamap fri bilong mekim wok bilong em, na ol i bin mekim dispela wok. Ol i no bin lusim nating pasin bilong i stap fri em God i givim long ol. Bihain long 1870 ol i kirap long lusim ol bilip giaman bilong Babilon i bin kalabusim ol, na ol i wok long kamap fri moa long pasin Kristen. I olsem Sindaun 4:18 i makim, em i tok: “Rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” Lain bilong Jehova long bipo ol i bin kalabus long Babilon inap sotpela taim, na olsem tasol long yia 1918 lain bilong Jehova long nau ol i bin kalabus inap liklik hap taim tasol long Bikpela Babilon. (Kamapim Tok Hait 17:1, 2, 5) Ol lain bilong ol lotu giaman long Bikpela Babilon ol i amamas long lukim “dispela tupela man bilong autim tok” ol i dai pinis long samting bilong spirit. Tasol long marimari bilong God, long yia 1919, i olsem em i kirapim bek ol dispela wokboi em i bin makim ol, na ol i kamap fri long ol samting bilong spirit. (Kamapim Tok Hait 11:3, 7-11) Ol i mekim wok God i laik bai ol i mekim taim ol i kamap fri—ol i kirap long wok strong long autim tok, olsem ol witnes bilong God Antap Tru. Olsem na long 1931 i stret ol i kisim nem olsem ol Witnes Bilong Jehova! (Aisaia 43:10-12) Kirap long 1935 na bihain long dispela taim, ‘bikpela lain manmeri’ ol i wet long kisim laip i stap oltaim long graun ol i bin bung wantaim liklik lain Witnes em God i bin makim ol. Dispela ‘bikpela lain’ tu i no lusim nating pasin bilong i stap fri em God i givim long ol. Ol i mekim gutpela wok long en.—Kamapim Tok Hait 7:9-17.
19, 20. (a) Wanem wanpela gutpela wok lain bilong Jehova i mekim long pasin bilong i stap fri God i givim long ol? (b) Ol Witnes Bilong Jehova i mekim wanem narapela gutpela wok long pasin bilong i stap fri God i givim long ol?
19 Lain bilong Jehova i mekim tupela gutpela wok long pasin bilong i stap fri Em i bin givim long ol. Wanpela em olsem: Ol i wok long bihainim stretpela pasin. (1 Pita 2:16) Long dispela rot ol i kisim gutnem tru! Olsem: Wanpela man i bin kam insait long wanpela Haus Kingdom long taun Surik, long Swiselan, na em i tok em i laik kamap wanpela Witnes Bilong Jehova. Ol i askim em, i gat wanem as na em i laik kamap Witnes. Em i tok, susa bilong em i bin stap Witnes, tasol ol i rausim em, long wanem, em i pamuk. Na dispela man i tok, ‘Mi laik stap insait long kain lain olsem, long wanem, ol i no ken orait long pasin nogut.’ I gat gutpela as na wanpela bikpela buk bilong lotu Katolik (New Catholic Encyclopedia) i tok, ol Witnes Bilong Jehova i gat gutnem long ai bilong ol man, na ‘long olgeta hap bilong graun i no gat planti lain i save bihainim pasin i stret olsem ol Witnes i mekim.’
20 Na narapela gutpela wok ol Witnes Bilong Jehova i mekim long pasin bilong i stap fri em God i givim long ol, em olsem: Ol i mekim wok bilong autim gutpela tok bilong Kingdom, olsem Jisas i bin mekim. (Matyu 4:17) Long maus bilong ol na long rot bilong ol buk na nius, long taim ol i go long ol haus na long kain kain taim na ples, ol i tokaut long Kingdom bilong Jehova. Dispela wok ol i mekim em i strongim bilip bilong ol na helpim ol long tingim gut samting ol i bilip long en na wetim i kamap. Na dispela wok ol i mekim i helpim ol yet na ol man i harim tok bilong ol long kisim laip i stap oltaim. (1 Timoti 4:16) Wanpela buk (Dynamic Religious Movements) i stori long dispela wok ol i mekim na buk i tok: “Ol Witnes i save givim bel long lotu bilong ol, na ating i no gat narapela lain i save wok strong olsem.”
21. I gat wanem samting na yumi ken save, Jehova i mekim gut tru long lain bilong em taim ol i mekim wok bilong em?
21 Na God Jehova i mekim gut tru long yumi taim yumi mekim wok long dispela pasin bilong i stap fri em i bin givim long yumi! Yumi inap lukim dispela samting taim yumi skelim ripot bilong wok autim tok bilong 1991—lain pablisa i kamap planti, winim 4 milion, na winim 10 milion i bin kam long bung bilong Memorial bilong tingim i dai bilong Jisas. Long kantri Aialan, lain pablisa i go bikpela bikpela long olgeta mun inap 29 mun; na long Meksiko ol i bin mekim olsem inap 78 mun insait long 80 mun; na long Japan ol i bin mekim olsem long olgeta mun inap 153 mun!
Mekim Gutpela Wok Long Pasin Bilong i Stap Fri God i Givim Long Yu
22. Wanem bikpela tok bilong sampela askim yumi ken givim long skin bilong yumi bilong kirapim tingting bilong yumi?
22 Olsem wanem? Yu wanpela Witnes i dediket pinis long God Jehova? Yu mekim gutpela wok long pasin bilong i stap fri em God i givim long yu? Gutpela sapos yumi olgeta wan wan i givim askim long skin bilong yumi yet olsem: ‘God i mekim mi kamap fri, orait mi save was gut bambai mi no ken mekim pasin i no stret na pundaunim narapela man? Mi save bihainim gut ol lo bilong gavman, tasol mi putim lo bilong God i stap namba wan? Mi save bihainim tok bilong ol elda long kongrigesen na wok gut wantaim ol? Mi stap fri na mi save mekim wok long dispela inap tru long skel bilong mi long wok bilong autim tok? Mi save mekim liklik wok tasol bilong autim tok, o mi save “wok strong long mekim wok bilong Bikpela”? Mi wok strong tru long mekim wanpela wok mani, tasol mi inap mekim bikpela wok moa long autim tok, o kisim sampela wok insait long kongrigesen, o mekim wok painia o wok long Betel samting?’—1 Korin 15:58.
23. Yumi mas mekim wanem na bai yumi no lusim nating pasin bilong i stap fri em God i givim long yumi?
23 Yumi olgeta yumi mas “traim na lukim” na bai yumi save Jehova “i gutpela tru.” (Buk Song 34:8) Yumi mas bilip long em, na bihainim ol lo bilong em, na wok strong long tokaut long Kingdom bilong em bilong litimapim nem holi bilong em. Yumi no ken lusim tingting olsem ol man ‘i planim planti, ol bai i kisim planti.’ (2 Korin 9:6) Olsem na yumi mas givim bel olgeta long mekim wok bilong Jehova na bai yumi kamapim klia olsem yumi no lusim nating pasin bilong i stap fri em God i givim long yumi—yumi mekim wok bilong en.
Bai Yu Bekim Wanem Tok?
◻ God i stap fri olsem wanem?
◻ Wanem ol samting i mekim na ol man i no stap fri olgeta?
◻ Wanem samting i opim rot bilong kamap fri tru?
◻ Yumi mas mekim wanem na bai yumi no lusim nating pasin bilong i stap fri em God i givim long yumi?
[Piksa long pes 9]
Kain samting olsem lo bilong graviti i pasim ol man na ol i no inap mekim olgeta samting ol i laik mekim