“Israel Tru Bilong God” na “Planti Manmeri Tru”

“Mi lukim planti manmeri tru ol i bung i stap, na i no inap man i kaunim namba bilong ol.”​—⁠KTH 7:⁠9.

TAIM “Israel tru bilong God” i kamap nupela long yia 33, dispela em i wanpela bikpela samting Jehova i mekim bilong kamapim laik bilong em. (Galesia 6:16) Ol manmeri insait long dispela lain ol i wet long kamap spirit i no inap i dai moa, na ol bai mekim wok king wantaim Krais long Kingdom bilong God long heven. (1 Korin 15:​50, 53, 54) Taim ol i stap king olsem, bai ol i insait tru long wok bilong mekim holi nem bilong Jehova na krungutim het bilong nambawan Birua, em Satan. (Stat 3:15; Rom 16:20) Olsem na Satan i wok strong moa long bagarapim dispela nupela lain​—⁠em i mekim nogut long ol na em i laik bagarapim bilip bilong ol.​—⁠2 Timoti 2:18; Jut 4; KTH 2:⁠10.

² Taim ol aposel i stap yet, Satan i no inap bagarapim bilip bilong dispela lain Israel bilong God. Tasol taim ol aposel i dai pinis, em nau, planti ol i wok long lusim bilip na kisim ol bilip giaman. Dispela pasin i go bikpela tru, olsem na taim Satan i kamapim lotu Kristen giaman​—⁠nau ol i kolim olsem Kristen​—⁠long ai bilong ol man i olsem Satan i bagarapim pinis bilip bilong dispela lain Kristen tru em Jisas i bin kamapim. (2 Tesalonaika 2:​3-8) Tasol lotu Kristen tru i no pinis​—⁠em i stap yet.​—⁠Matyu 28:⁠20.

³ Long tok piksa bilong Jisas long wit na gras nogut, em i tok profet long ol Kristen tru bai go bikpela wantaim ol “gras nogut,” em ol Kristen giaman; na dispela samting i bin kamap tru. Tasol Jisas i tok, long taim bilong las de “ol manmeri bilong kingdom” bai stap narapela na “gras nogut” bai stap narapela, na dispela bai kamap ples klia. (Matyu 13:​36-43) Na dispela samting tu i kamap tru. Long 1919 ol Kristen tru em God i bin makim ol, ol i lusim kalabus bilong lotu giaman olsem bilong Babilon. God i lukim dispela lain em lain “wokboi i gat gutpela tingting, na i save mekim gutpela wok oltaim,” na ol i kirap long autim gutnius bilong Kingdom long ol man, na ol i no pret. (Matyu 24:​14, 45-47; KTH 18:⁠4) Klostu olgeta ol i manmeri bilong ol narapela lain; tasol ol i gat bilip wankain olsem Abraham, olsem na ol i “pikinini tru bilong Abraham.” Ol i insait long lain “Israel tru bilong God.”​—⁠Galesia 3:​7, 26-29.

“Planti Manmeri Tru”

⁴ Ol manmeri i bin harim na bilip long gutnius ol dispela Kristen i bin autim pastaim long ol, ol tu i kamap Israel bilong spirit, em laspela hap bilong dispela lain 144,000 ol i bilong i go long heven. (KTH 12:17) Tasol long 1935 samting, i gat narapela lain i kamap ples klia. Em dispela lain “arapela sipsip” Jisas i bin tok long ol long tok piksa bilong ol banis sipsip. (Jon 10:16) Ol i disaipel bilong Krais na ol i wet long kisim laip i stap oltaim long Paradais long graun. Yumi ken tok piksa olsem ol i pikinini bilong ol Kristen em God i bin makim ol. (Aisaia 59:21; 66:22; skelim wantaim 1 Korin 4:​15, 16.) Ol i bilip olsem dispela lain Kristen God i bin makim ol, em dispela wokboi i gat gutpela tingting, na ol i bihainim pasin bilong ol na ol tu i laikim tru Jehova, na ol i bilip long ofa bilong Jisas, na ol i strong long litimapim nem bilong God, na ol i orait long karim pen na hevi long bihainim stretpela pasin.

⁵ Pastaim ol i no klia gut long ol dispela arapela sipsip ol i gat wanem wok, tasol bihain ol i save. Long 1932, Sosaiti i laik bai ol Kristen God i bin makim ol, ol i ken kirapim ol arapela sipsip long go insait long wok autim tok​—⁠tasol planti ol i kirap pinis long mekim dispela wok. Long 1934 ol i wok long kirapim ol arapela sipsip long kisim baptais long wara. Long 1935 ol i kisim save olsem dispela lain arapela sipsip em dispela “planti manmeri tru” bilong Kamapim Tok Hait sapta 7. Long 1938 ol i singautim ol dispela arapela sipsip long i go long bung bilong tingim dai bilong Krais Jisas, na ol i bilong lukluk tasol. Orait, long 1950 ol i kisim tingting olsem ol man bilong lain arapela sipsip i strong long ol samting bilong spirit, ol i bilong lain ‘pikinini bilong king’ na ol i stap olsem “ples hait ol manmeri i ken i go na hait long en long taim bilong bikpela win na ren.” (Song 45:16; Aisaia 32:⁠1, 2) Long 1953, ol i kisim save olsem oganaisesen bilong God long graun​—⁠long dispela taim planti bilong ol i bilong lain arapela sipsip​—⁠em i as bilong dispela lain manmeri ol bai i stap long graun long nupela taim. Long 1985 ol i kisim save olsem: Long ofa bilong Jisas, God i kolim ol arapela sipsip olsem stretpela man na ol i kamap pren bilong em, na ol i gat rot long abrusim bagarap long Armagedon.

⁶ Long nau, klostu long pinis bilong “taim bilong las de,” klostu olgeta bilong lain 144,000 ol i dai pinis na ol i kisim pinis gutpela prais bilong ol long heven. (2 Timoti 3:1; KTH 6:​9-11; 14:13) Long nau, ol Kristen i gat tingting long i stap oltaim long graun, ol yet i mekim klostu olgeta wok bilong autim gutnius, na ol i ting em i gutpela samting tru long ol inap helpim ol brata bilong Jisas long mekim dispela wok. (Matyu 25:40) Tasol dispela lain God i bin makim ol, ol yet i dispela lain wokboi Jehova i mekim wok long ol bilong givim kaikai bilong spirit long lain bilong em nau long taim bilong las de. Orait, olsem wanem long ol arapela sipsip taim ol dispela man God i bin makim ol i kisim pinis prais bilong ol long heven? Bai i gat wanem samting bilong helpim ol dispela arapela sipsip? Bilong bekim ol dispela askim, yumi ken stori liklik long lain Israel bilong bipo.

Lain i ‘Mekim Wok Olsem Pris’

⁷ Taim Jehova i kisim ol Israel olsem lain stret bilong em, em i wokim kontrak wantaim ol na em i tok: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. . . . Na bai yupela i stap lain manmeri i save mekim wok bilong mi olsem pris, na bai yupela i stap ol manmeri tru bilong mi.” (Kisim Bek 19:​5, 6) God i bin givim Lo long lain Israel, olsem na ol i lain bilong em stret. Tasol olsem wanem dispela tok promis long wanpela lain pris na wanpela lain manmeri bilong God stret bai kamap tru?

⁸ Taim ol Israel i stap gut long Jehova, ol i tokaut olsem Jehova i King tru na ol i kisim em olsem King bilong ol. (Aisaia 33:22) Olsem na ol i kamap olsem wanpela kingdom. Tasol i gat sampela samting moa long dispela tok promis long wanpela kingdom, na bihain Jehova i kamapim klia dispela samting. Na tu, taim ol Israel i bihainim Lo bilong Jehova, ol i klinpela lain, na ol i stap narapela kain long ol lain i stap nabaut. Ol i lain manmeri bilong God stret, olsem wanpela lain i holi. (Lo 7:​5, 6) Tasol olsem wanem? Ol i stap lain manmeri i mekim wok pris? Orait tingim dispela: Long Israel God i bin makim lain Livai long mekim wok long haus bilong em, na insait long dispela lain i gat wanpela lain pris i kamap long lain bilong Livai. Taim Lo Bilong Moses i kamap pastaim, ol i kisim ol man bilong lain Livai olsem senis bilong olgeta namba wan pikinini bilong ol famili i no bilong lain Livai.a (Kisim Bek 22:29; Namba 3:​11-16, 40-51) Olsem na long olgeta wan wan famili long Israel, i olsem i gat wanpela i mekim wok pris long haus bilong God. Long dispela rot, i olsem lain Israel i kamap olsem lain pris. Tru, i no olgeta i stap pris, tasol ol i stap olsem lain bilong Jehova long graun, na sapos wanpela man bilong narapela lain i laik lotuim God tru, em i mas bung wantaim lain Israel na mekim.​—⁠2 Stori 6:​32, 33; Aisaia 60:⁠10.

⁹ Taim Solomon i dai pinis, lain bilong God i bruk long tupela bikpela lain, olsem lain Israel long hap bilong not, em King Jeroboam i bosim ol, na lain Juda long hap bilong saut, em King Rehoboam i bosim ol. Haus bilong God, em ples bilong lotuim em, em i stap long hap bilong Juda. Olsem na taim Jeroboam i sanapim ol piksa bilong bulmakau long hap bilong em yet, em i kirapim wanpela kain lotu i brukim lo bilong God. Na “Jeroboam i wokim tu ol ples bilong lotu antap long ol maunten nabaut. Na em i makim ol sampela man long kamap pris. Tasol ol dispela man i no bilong lain Livai.” (1 King 12:31) Bihain dispela lain long hap bilong not i go insait tru long lotu giaman taim King Ahap i larim meri bilong em bilong narapela lain, em Jesebel, i kamapim lotu bilong Bal long Israel. Bihain Jehova i tokaut long strafe bai painim dispela bikhetlain. Long maus bilong Hosea, Jehova i tok: “Ol manmeri i no save bihainim mi, olsem na bai ol i bagarap. Yupela ol pris tu i no save bihainim mi na yupela i sakim pinis tok bilong mi. Olsem na bai mi rausim yupela.” (Hosea 4:⁠6) I no longtaim na ol Asiria i kam bagarapim dispela lain Israel i stap long hap bilong not.

¹⁰ Orait, olsem wanem long lain Juda long hap bilong saut? Long taim bilong Hesekia Jehova i givim tok long ol long maus bilong Aisaia, olsem: “Yupela i witnes bilong mi. Mi bin makim yupela bilong i stap wokman bilong mi. . . . Mi bin mekim ol dispela manmeri i kamap lain manmeri bilong mi yet, bai ol i ken amamas na tokaut long biknem bilong mi.” (Aisaia 43:​10, 21; 44:21) Taim dispela lain bilong saut i stap gut long Jehova, ol i tokaut long ol narapela lain long biknem bilong Jehova, na ol man bilong ol narapela lain i gat stretpela bel ol i laik i kam na lotuim Jehova long haus bilong em, na ol pris tru bilong lain Livai i ken mekim wok bilong helpim ol long ol samting bilong lotu.

Ol Narapela Lain i Stap Long Israel

¹¹ Ol manmeri bilong ol narapela lain i kisim dispela tok na bilip long en, Lo Bilong Moses i givim rot long ol long bung wantaim ol Israel​—⁠meri bilong Moses yet, em Sipora, em i bilong lain Midian. “Planti arapela lain” i lusim Isip wantaim ol Israel na ol i stap taim Jehova i givim Lo long ol Israel. (Kisim Bek 2:​16-22; 12:38; Namba 11:⁠4) Na Jehova i kisim bek Rahap wantaim famili bilong em long Jeriko na bihain lain Juda i kisim ol i kam insait long lain bilong ol. (Josua 6:​23-25) Bihain liklik, ol Gibeon i wokim kontrak long sindaun gut wantaim lain Israel na ol i kisim wok olsem wokboi long haus lotu sel bilong God.​—⁠Josua 9:​3-27; lukim tu 1 King 8:​41-43; Esta 8:⁠17.

¹² Bihain ol man bilong ol narapela lain ol i kisim sampela wok i gat namba. Man bilong Batseba, em Uria bilong lain Hit, na Selek bilong lain Amon, tupela i insait long wanpela lain “strongpela soldia” bilong Devit. (1 Stori 11:​26, 39, 41; 2 Samuel 11:​3, 4) Ebetmelek, em wanpela man bilong Itiopia, em i mekim wok long haus bilong king na em inap i go toktok wantaim king. (Jeremaia 38:​7-9) Taim ol Israel i lusim pinis Babilon na ol i kam bek long ples bilong ol, ol man bilong ol narapela lain i stap olsem wokboi long lain Israel, ol i kisim sampela bikpela wok bilong helpim ol pris. (Esra 7:24) Yumi inap ting, sampela gutpela man bilong dispela lain bilong ol narapela kantri ol i olsem piksa bilong dispela lain “planti manmeri tru” bilong nau, olsem na yumi laik save gut long ol wok samting ol i bin mekim.

¹³ Dispela lain ol i kam insait long lotu bilong ol Israel, na ol i dediket long Jehova na lotuim em aninit long Lo Bilong Moses, na ol i stap narapela kain long ol narapela lain, olsem ol Israel i mekim. (Wok Pris 24:22) Na ol tu i save mekim ofa, na ol i klia long lotu giaman, na ol i no kaikai blut. (Wok Pris 17:​10-14; 20:⁠2) Ol i insait long wok bilong sanapim haus lotu bilong Solomon, na ol i wok wantaim ol Israel aninit long King Asa na King Hesekia long kirapim gen lotu i tru. (1 Stori 22:2; 2 Stori 15:​8-14; 30:25) Taim Pita i mekim wok long namba wan ki bilong Kingdom long Pentikos bilong yia 33, ol ‘Juda wantaim ol arapela man [i no Juda] i bihainim lotu bilong ol,’ i harim tok bilong Pita. Insait long dispela 3,000 manmeri i bin kisim baptais long dispela de, ating sampela ol i bilong ol dispela ‘arapela lain’ ol i bihainim lotu Juda. (Aposel 2:​10, 41) Bihain liklik, Filip i givim baptais long wanpela man bilong Itiopia i bihainim lotu Juda​—⁠long dispela taim Pita i no mekim wok yet long laspela ki bilong Kingdom bilong helpim Kornilius wantaim famili bilong em. (Matyu 16:19; Aposel 8:​26-40; 10:​30-48) Olsem na yumi save, ol dispela man i bihainim lotu Juda, ol Israel i no tingim ol olsem ol man bilong ol narapela lain ol i mas klia long ol, nogat.

¹⁴ Tasol ol dispela lain i no inap mekim olgeta kain wok olsem ol Israel tru i mekim, nogat. Ol i no save mekim wok pris, na namba wan pikinini man bilong ol i no insait long lain pris bilong lain Livai.b Na ol i no kisim graun insait long Israel. Tasol Lo i tok ol Israel i mas mekim gut long ol man bilong ol narapela lain i stap gut long Jehova, na ol i mas tingim ol i olsem brata bilong ol.​—⁠Wok Pris 19:​33, 34.

Israel Bilong Spirit

¹⁵ Wok bilong Lo em i bilong banisim ol Israel na bai ol i stap olsem klinpela lain i narapela kain long ol lain i stap nabaut. Tasol Lo i gat narapela wok tu. Aposel Pol i tok: “Lo i stap olsem waspapa bilong yumi, bilong bringim yumi i kam long Krais, bai yumi ken bilip long gutnius na God i ken kolim yumi ol stretpela manmeri.” (Galesia 3:24) Tasol sori tru, klostu olgeta Israel i no laik bai Lo i bringim ol i kam long Krais. (Matyu 23:15; Jon 1:11) Olsem na God Jehova i rausim dispela lain na em i kamapim “Israel tru bilong God.” Na em i singautim ol manmeri i no Juda long ol i ken kam insait tru long dispela nupela lain Israel. (Galesia 3:28; 6:16) Dispela tok promis bilong Jehova long Kisim Bek 19:​5, 6 i tok long wanpela lain pris, laspela truim bilong en i kamap long dispela nupela lain Israel, na em i wanpela gutpela samting tru. Tasol truim bilong en i kamap olsem wanem long ol?

¹⁶ Pita i kolim tok bilong Kisim Bek 19:6 taim em i tokim ol Kristen God i bin makim ol: “Tasol God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God.” (1 Pita 2:⁠9) Olsem wanem long dispela tok? Ol Kristen God i bin makim ol na ol i stap long graun, ol i stap king? Nogat. Wok king bilong ol i bilong bihain. (1 Korin 4:⁠8) Tasol yumi ken tok ol i “lain bilong king,” long wanem, God i makim ol pinis long mekim wok king long bihain. Long nau tu, ol i wanpela lain i stap aninit long wanpela king, Jisas, em Nambawan King, God Jehova, i bin makim em. Pol i tok: “Yumi bin i stap aninit long strong bilong tudak, na [Jehova] i bin kisim bek yumi na putim yumi insait long lain [olsem kingdom] bilong Pikinini bilong en.”​—⁠Kolosi 1:⁠13.

¹⁷ Olsem wanem? Ol Kristen God i bin makim ol na ol i stap yet long graun, ol i wanpela lain pris? Yumi ken tok, long sampela samting ol i olsem wanpela lain pris. Insait long lain Kristen ol i mekim tru wok pris. Pol i tokaut long dispela olsem: “Yupela tu i . . . kamap haus bilong [God] yet. Olsem bai yupela i ken i stap lain pris God i makim bilong em yet.” (1 Pita 2:5; 1 Korin 3:16) Long nau ol Kristen God i bin makim ol na ol i stap yet long graun, olgeta wantaim em dispela “wokboi i gat gutpela tingting,” em rot bilong tilim kaikai bilong spirit long ol man. (Matyu 24:​45-47) Olsem ol i bin mekim long Israel bipo, sapos wanpela man i laik lotuim Jehova long nau, em i mas mekim wantaim dispela lain Kristen God i bin makim ol.

¹⁸ Na tu, dispela lain Kristen i kisim wok bilong ol Israel long tokaut long biknem bilong Jehova namel long ol narapela lain. Ol tok i stap klostu long 1 Pita 2:9 i soim yumi olsem: Taim Pita i kolim ol dispela Kristen olsem ol pris bilong lain bilong king, em i bin tingim wok bilong autim tok. Long wanpela ves yet em i bungim tok promis bilong Jehova long Kisim Bek 19:6 wantaim tok Em i givim long ol Israel long Aisaia 43:​21; em i tok: “Yupela i stap ol pris bilong lain bilong king . . . , bai yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em, em lait i gutpela moa yet.” (1 Pita 2:⁠9) Tok bilong Pol i stret wantaim dispela, em i bin toktok long wok bilong tokaut long ol gutpela pasin bilong Jehova i olsem wanpela ofa yumi givim long haus bilong God. Pol i tok: “Oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.”​—⁠Hibru 13:⁠15.

Truim Bilong En i Kamap Long Heven

¹⁹ Tasol Kisim Bek 19:​5, 6 i gat wanpela truim i gutpela moa yet. Long Buk Kamapim Tok Hait, aposel Jon i harim sampela bilong heven i kolim dispela tok bilong Baibel taim ol i litimapim nem bilong Jisas, em i kirap bek pinis. Ol i tok: “Ol i bin kilim yu i dai, na long blut bilong yu yu bin baim bek ol manmeri . . . bilong olgeta lain man, na bilong olgeta tok ples, na bilong olgeta kain skin, na bilong olgeta kantri. Yu bin mekim ol i kamap ol pris bilong lain bilong king, na ol i stap lain pris bilong God bilong mipela. Na bai ol i stap king na bosim ol manmeri bilong graun.” (KTH 5:​9, 10) Olsem na bihain dispela lain pris bai stap olsem Kingdom bilong God long heven, em Jisas i bin lainim yumi long beten askim God long kamapim. (Luk 11:⁠2) Olgeta 144,000 Kristen God i bin makim ol na ol i stap gut long em i go inap long taim ol i dai, ol bai mekim wok insait long dispela Kingdom. (KTH 20:​4, 6) Em i gutpela truim moa yet bilong dispela tok promis God i bin mekim long bipo tru long maus bilong Moses!

²⁰ Tasol olsem wanem long dispela lain planti manmeri tru long bihain, taim olgeta Kristen God i bin makim ol ol i kisim pinis dispela nambawan gutpela prais bilong ol long heven? Dispela bai kamap klia long laspela stori i kamap bihain long dispela.

[Ol Futnot]

Yu Inap Stori Long Dispela?

◻ Isi isi ol i bin kisim wanem save long wok bilong ol arapela sipsip?

◻ Bilong wanem Jehova i rausim lain Israel i stap long hap bilong not na ol i no inap i stap moa olsem pris bilong em?

◻ Taim lain Juda long hap bilong saut i stap gut long Jehova, olsem wanem ol i stap olsem maus bilong em long ol narapela lain?

◻ Ol narapela lain i lotuim Jehova long Israel ol i stap olsem wanem?

◻ Ol Kristen God i bin makim ol, olsem wanem ol i stap olsem wanpela lain pris?

[Askim Bilong Stadi]

1-3. (a) Ol Kristen God i bin makim ol, ol inap wetim wanem ol gutpela samting ol bai kisim long heven? (b) Satan i mekim wanem bilong bagarapim lain Kristen bilong pastaim? (c) Wanem samting i kamap long 1919 na i kamapim klia olsem wok bilong Satan long bagarapim pasin bilong ol Kristen God i bin makim ol em i lus nating?

4. Long 1935 samting, wanem lain Kristen i kamap ples klia?

5. Isi isi ol i kisim wanem save long wok bilong ol arapela sipsip?

6. Olsem wanem long wok bilong ol Kristen God i bin makim ol na ol arapela sipsip long nau? I gat wanem ol askim long dispela?

7, 8. Olsem wanem yumi ken tok, lain Israel bilong bipo em i wanpela lain pris na lain holi i stap aninit long kontrak bilong Lo?

9. Wanem samting i mekim na Jehova i rausim lain Israel i stap long hap bilong not na ol i no inap i stap moa olsem pris bilong em?

10. Taim lain Juda long hap bilong saut i stap gut long Jehova, olsem wanem ol i stap olsem maus bilong em long ol narapela lain?

11, 12. Kolim nem bilong sampela manmeri bilong ol narapela lain ol i kirap lotuim Jehova wantaim ol Israel.

13, 14. (a) Ol man bilong ol narapela lain i lotuim Jehova long Israel, ol i gat wanem ol wok? (b) Ol Israel i mas ting olsem wanem long ol dispela narapela lain i stap gut long Jehova?

15. Taim lain Israel i no laik kisim Mesaia, wanem samting i kamap?

16, 17. Olsem wanem yumi ken tok, ol Kristen God i bin makim ol na ol i stap yet long graun ol i olsem “king”? Olsem wanem ol i olsem “pris”?

18. Lain Kristen God i bin makim ol, ol i wanpela lain pris, olsem na wanem namba wan wok bilong ol?

19. Wanem laspela gutpela truim bilong dispela tok promis olsem Israel bai kamap wanpela lain pris?

20. I gat wanem askim i stap yet na yumi laik save long bekim bilong en?

[Piksa long pes 16]

Ol Kristen God i bin makim ol, ol i wanpela lain pris na king, na long graun ol i tokaut long biknem bilong Jehova

[Piksa long pes 18]

Laspela truim bilong Kisim Bek 19:​6, em Kingdom