Sapta 12
Baptais Bilong Yu i Makim Wanem Samting?
LONG yia 29 C.E. Jisas i kisim baptais long Wara Jodan. Jehova yet i lukim na em i tok, em i amamas long dispela samting. (Mt. 3:16, 17) Tripela yia hap bihain, taim Jisas i kirap bek pinis, em i tokim ol disaipel bilong em: “God i givim mi bikpela namba long heven na long graun. Olsem na yupela i go mekim olgeta lain manmeri i kamap disaipel bilong mi. Na yupela baptaisim ol.” (Mt. 28:18, 19) Yu kisim baptais pinis, olsem Jisas i tok? O yu redi long kisim baptais?
2 Maski yu baptais pinis o yu redi long baptais, tasol yu mas save gut long as bilong baptais. Em bikpela samting. Yu mas tingim ol askim, olsem: Baptais bilong yumi ol Kristen long nau i wankain long baptais bilong Jisas? Olgeta tok Baibel i mekim long baptais, dispela tok i sutim yu tu? Yumi mas mekim wanem na bai yumi bihainim pasin i stret wantaim baptais bilong yumi?
Baptais Bilong Jon
3 Inap 6-pela mun paslain long taim Jisas i kisim baptais, Jon i stap long ples nating bilong Judia na em i autim tok, olsem: “Yupela tanim bel. Kingdom bilong heven em i kam klostu pinis.” (Mt. 3:1, 2) Ol manmeri long dispela hap olgeta ol i harim dispela tok na ol i kam autim sin bilong ol na Jon i baptaisim ol long Wara Jodan. Dispela baptais i bilong ol Juda tasol.—Ap. 13:23, 24; Luk 1:13-16.
4 Ol dispela Juda i mas tanim bel. Long yia 1513 B.C.E., long Maunten Sainai, ol tumbuna i bin kontrak wantaim God Jehova. Tasol ol i brukim dispela kontrak na dispela i makim ol i sinman. Ol i stap nogut long ai bilong Jehova. Bikpela “de bilong Jehova,” em Malakai i bin tok profet long en, em i klostu pinis. Wantu tasol, long yia 70 C.E., dispela de i painim Jerusalem na Jerusalem i bagarap. Jon Bilong Baptais i wok strong long wok bilong Jehova olsem Ilaija i mekim bipo. God i salim Jon i go long ol Juda paslain long taim dispela bagarap i painim ol bambai em i ken ‘redim ol man bilong Jehova.’ Ol Isrel i mas hevi long rong ol i bin mekim long kontrak bilong Lo, na ol i mas redim bel na tingting bilong ol bambai ol i ken bilip long dispela Pikinini bilong God, Jehova i laik salim em long ol. (Mal. 4:4-6, NW; Luk 1:17; Ap. 19:4) Jon i tok, Pikinini Bilong God bai baptaisim ol long spirit holi (ol disaipel i stap gut long wok bilong ol, ol i kisim dispela baptais pastaim long Pentikos 33 C.E.). Na em bai baptaisim ol long paia (long 70 C.E. dispela bagarap i painim ol manmeri i no bin tanim bel). (Luk 3:16) Sapos ol Juda i no laik bagarap long dispela ‘baptais bilong paia,’ ol i mas kisim baptais long wara bilong makim ol i tanim bel. Na ol i mas kamap disaipel bilong Krais Jisas taim rot i op long ol.
5 Jisas tu em i kam long Jon bilong kisim baptais. Tasol bilong wanem Jisas i laik kisim baptais? Jon i save Jisas i no gat sin, olsem na em i tok: “Mobeta mi kisim baptais long yu. Olsem wanem na yu kam long mi?” Tasol baptais bilong Jisas i gat narapela as bilong en. Olsem na em i tokim Jon: “Maski, nau yu mekim olsem mi tok. Em i gutpela long yumi inapim olgeta stretpela pasin.” (Mt. 3:13-15) Baptais bilong Jisas i no makim olsem em i tanim bel, long wanem em i no gat sin. Na i no makim em i tok promis long mekim laik bilong God, olsem dediket long God, long wanem em i bilong lain Isrel na dispela lain olgeta ol i tok promis pinis long mekim laik bilong God; ol i dediket pinis long Jehova. Tasol taim em i gat 30 krismas na em i kisim baptais, dispela i makim em i givim em yet long God bilong mekim ol samting moa God i laik bai em i mekim. God i laik bai “dispela man Krais Jisas” i mekim sampela wok bilong Kingdom. Em i laik bai Krais i givim laip bilong em olsem ofa na kamapim nupela kontrak. (Luk 8:1; 17:20, 21; Hi. 10:5-10; Mt. 20:28; 26:28; 1 Ti. 2:5, 6) Krais Jisas i tingim gut ol samting baptais bilong em long wara i makim, na em i no larim narapela samting i pulim em. Inap long taim em i dai em i pas gut long wok bilong God. Em i bihainim laik bilong God.—Jon 4:34.
Baptais Bilong i Dai
6 Jisas i kisim narapela baptais tu i stret wantaim ol samting baptais bilong em long wara i makim. Em i save long ol samting God i laik bai em i mekim. Em i save em i mas i dai tu, olsem ofa, na long namba tri de bai God i kirapim bek em. Em i tok dispela samting em i mas mekim i olsem em i “kisim wanpela baptais.” Dispela “baptais” i kirap long yia 29 C.E. i go inap long taim em i dai na kirap bek. Olsem na tripela yia bihain long taim em i kisim baptais long wara, i stret em i ken tok: “Mi mas kisim wanpela baptais. Nau mi no kisim yet, na bel bilong mi em i hevi tru.”—Luk 12:50.
7 Ol manmeri ol bai stap king wantaim Krais long Kingdom bilong heven, ol tu i mas kisim dispela “baptais” bilong i dai. (Mak 10:37-40; Kl. 2:12) Taim ol i dai ol i lusim laip bilong ol olsem man o meri bilong graun, olsem Jisas i mekim, na ol i no ken kisim bek. Na taim ol i kirap bek, ol i go bung wantaim em long heven bilong mekim wok king wantaim em. I no wanpela man bilong graun i givim dispela baptais long ol. Nogat. God i givim long ol long rot bilong Pikinini bilong em i stap long heven.
8 Ol manmeri i kisim dispela baptais bilong i dai olsem Jisas i bin kisim, Baibel i tok ol i “pas wantaim Krais Jisas na kisim baptais.” Ol i kisim spirit holi long rot bilong Krais na ol i pas wantaim em. Spirit holi i makim ol na ol i lain bilong em, olsem “bodi” bilong em, na em i Het bilong ol. Spirit holi inapim ol long bihainim ol gutpela pasin bilong Krais, olsem na Baibel i tok, “long Krais Jisas” olgeta ol i “stap wanpela tru.”—Rom 6:3-5; 1 Ko. 12:13; Ga. 3:27, 28; Ap. 2:32, 33.
Baptais Bilong Ol Disaipel Kristen
9 Ol disaipel bilong Jisas long pastaim ol i kisim baptais long Jon na em i salim ol i go long Jisas bilong kamap olsem “meri” bilong em o lain bilong em. (Jon 3:25-30) Jisas i tokim ol na ol tu i givim baptais long sampela man, na dispela baptais i gat wankain as olsem baptais bilong Jon. (Jon 4:1-3) Tasol long Pentikos 33 C.E. ol i kirap long baptaisim ol man “long nem bilong Papa na bilong Pikinini na bilong Holi Spirit.” (Mt. 28:19) Bilong kisim save long as tru bilong dispela tok, gutpela sapos yu skelim ol dispela skripsa na askim:
Man i kisim baptais “long nem bilong Papa,” em i mas save long wanem samting bilong Papa? (2 Kin. 19:15; Sam 3:8; 73:28; Ais. 6:3; Rom 15:6; Hi. 12:9; Jems 1:17)
Baptais long nem bilong “Pikinini” i olsem yumi mas save long wanem samting? (Mt. 16:16, 24; Fl. 2:9-11; Hi. 5:9, 10)
Man i mas bilip long wanem samting na bai em i baptais long “nem bilong Holi Spirit”? (Luk 11:13; Jon 14:16, 17; Ap. 1:8; 10:38; Ga. 5:22, 23; 2 Pi. 1:21)
10 Ol namba wan lain i kisim dispela baptais em Jisas i tok long en, ol i bilong lain Juda (na ol man bilong ol narapela lain ol i bihainim lotu bilong ol Juda). Lain Juda i dediket pinis long God na em i mekim gut long ol i go inap long 36 C.E. Tasol bihain rot i op na ol Sameria na ol man bilong ol arapela lain ol i inap kamap disaipel Kristen. Taim ol i no kisim yet baptais ol yet wan wan i mas dediket long Jehova. Ol i mas tok promis long mekim wok bilong Em olsem ol disaipel bilong Pikinini bilong em. Long nau tu, olgeta manmeri i kamap Kristen na kisim baptais long wara, na ol Juda tu, baptais bilong ol i makim dispela samting. Olgeta manmeri i kamap Kristen tru ol i kisim dispela “wanpela baptais.” Olsem na ol i kamap witnes Kristen bilong Jehova, ol wokman bilong God, em God yet i makim ol bilong i stap wokman bilong em.—Ef. 4:5; 2 Ko. 6:3, 4.
11 Dispela kain baptais i gutpela samting tru long ai bilong God. Aposel Pita i stori long Noa i wokim sip na em wantaim lain bilong em i stap gut insait long sip long taim bilong Tait. Na bihain Pita i stori long baptais bilong ol Kristen. Em i tok: “Dispela wara em i olsem piksa bilong baptais, em i save kisim bek yupela. Em i no bilong rausim doti bilong skin. Nogat. Em i bilong mekim bel bilong yupela i kamap klin, na yupela inap long singautim God. Bilong mekim olsem, Jisas Krais i kirap bek pinis.” (1 Pi. 3:21) Noa i wokim sip na dispela i kamapim long ples klia olsem Noa i dediket long God. Em i bihainim laik bilong God na mekim gut ol wok God i givim long em. Ol dispela samting em i mekim i helpim em na em i no bagarap. Olsem tasol ol manmeri i bilip long Krais i kirap bek, na ol i dediket long Jehova na kisim baptais, na ol i mekim ol samting God i laik bai ol wokman bilong em i mas mekim long nau, bai God i tekewe ol long dispela pasin nogut nau i stap long graun. (Ga. 1:3, 4) Ol i no ken bagarap wantaim ol man nogut bilong dispela graun. God i kisim bek ol na mekim bel bilong ol i kamap klin.
Mekim Ol Wok Yumi Mas Mekim
12 Tasol nogut yumi ting, yumi kisim baptais na yumi no ken lus. Nogat. Yumi mas dediket tru long Jehova long rot bilong Krais na mekim laik bilong God i go inap long pinis, na bai dispela baptais bilong yumi i helpim yumi.—Mt. 24:13.
13 Taim Jisas i stap man long graun, God i laik bai Jisas i bihainim laik bilong em long olgeta samting, na em i mas i dai na givim laip bilong em olsem ofa. Na olsem wanem long yumi? Yumi mas givim bodi bilong yumi long God bilong mekim laik bilong Em tasol. Yumi no ken bihainim laik bilong yumi yet. (Rom 12:1, 2) Tasol sapos yumi bihainim pasin bilong graun, maski wan wan taim tasol yumi mekim, na yumi givim bel long mekim ol samting bilong helpim skin bilong yumi yet, na yumi mekim liklik wok tasol bilong God, orait yumi no bihainim tru laik bilong God. (1 Pi. 4:1-3; 1 Jon 2:15-17) Wanpela Juda i givim askim long Jisas na em i tok, ‘Mi mas mekim wanem na bai mi inap kisim laip i stap oltaim?’ Jisas i tok, em i mas bihainim ol stretpela pasin na em i mas tingim wok bilong bihainim Jisas olsem disaipel Kristen em i nambawan bikpela samting. Ol wok bilong skin i mas i stap nambatu.—Mt. 19:16-21.
14 Na yumi no ken lusim tingting: Wanpela wok God i laik bai Jisas i mekim em wok bilong autim tok bilong Kingdom. Spirit bilong God i makim Jisas bilong i stap King. Taim em i stap long graun em i wok strong long autim tok bilong Kingdom. Yumi mas mekim wankain wok long nau, na yumi mas givim bel olgeta long mekim. Taim yumi mekim olsem yumi kamapim bel bilong yumi, yumi amamas tru long Jehova i stap king bilong yumi, na yumi laikim tumas ol narapela man, na yumi wanbel wantaim ol brata Kristen bilong yumi long olgeta hap, em olgeta ol i save autim tok bilong Kingdom. Yumi olgeta yumi wok strong long kisim laip i stap oltaim aninit long dispela Kingdom.
Stori Gen Long Ol Dispela Tok
● Olsem wanem baptais bilong Jisas long wara i wankain olsem baptais long wara long nau? Tasol olsem wanem em i narapela kain tu?
● Husat ol i mas kisim baptais bilong Jon? Husat ol i kisim baptais bilong i dai? Husat ol i “pas wantaim Krais Jisas na kisim baptais”?
● Yumi mas mekim wanem bai yumi bihainim ol samting olsem baptais bilong Kristen long wara i makim?
[Askim Bilong Stadi]
1, 2. (a) Bilong wanem yumi olgeta wan wan i mas tingim baptais long wara? (b) Mekim liklik tok tasol na bekim ol askim i stap long paragraf 2.
3. Husat tasol i mas kisim baptais bilong Jon?
4. (a) Bilong wanem ol Juda i mas hariap tanim bel? (b) Ol i mas mekim wanem bambai ol i no ken kisim ‘baptais bilong paia’?
5. (a) Taim Jisas i kam long Jon bilong kisim baptais, bilong wanem Jon i tingting planti? (b) Taim Jisas i baptais long wara, dispela i makim wanem samting? (c) Jisas i ting olsem wanem long inapim ol wok Papa bilong em i laik bai em i mekim?
6. Jisas i kisim wanem narapela baptais tu? Dispela baptais bilong Jisas i kirap long wanem taim na i pinis long wanem taim?
7. (a) Husat moa ol i kisim baptais bilong i dai? (b) Husat i givim dispela baptais long ol?
8. Wanem insait bilong dispela tok, ol i “pas wantaim Krais Jisas na kisim baptais”?
9. (a) Dispela baptais olsem Matyu 28:19 i tok long en em i kirap long wanem taim? (b) Lukim ol askim na skripsa long dispela paragraf na skelim ol samting Jisas i tok ol man i laik kisim baptais ol i mas save long en.
10. (a) Long nau baptais bilong ol Kristen long wara em i makim wanem samting? (b) Olsem wanem dispela i narapela kain long baptais bilong Jisas? (c) Ol manmeri ol inap kisim baptais olsem Baibel i makim, taim ol i baptais ol i kamap wanem samting?
11. (a) Wanem samting i olsem piksa bilong baptais bilong ol Kristen long wara? Olsem wanem em i piksa bilong dispela samting? (b) Long dispela rot bai God i tekewe yumi long wanem samting?
12. Olsem wanem na baptais tasol i no makim olsem God i mas kisim bek yumi na yumi no ken bagarap?
13. (a) Ol Kristen i baptais pinis, God i laik bai ol i mas mekim wanem? (b) Yumi mas ting olsem wanem long i stap disaipel Kristen?
14. (a) Olgeta Kristen i gat wanem wok bilong Kingdom ol i mas mekim? (b) Olsem piksa long pes 101 i makim, i gat wanem ol gutpela rot bilong mekim dispela wok? (c) Sapos yumi givim bel long mekim dispela wok, dispela i kamapim long ples klia wanem samting?
[Blok/Ol Piksa long pes 101]
Yu Autim Tok Bilong Kingdom Long Wanem Wanem Rot?
Long ol haus?
Go bek lukim ol man i laik harim tok?
Long Baibel-stadi?
Long rot?
Long ol wanskul?
Long ol wanwok?