Ol Tok Yu Makim Bilong Kolim

OL WAN wan tok i olsem ol strongpela tul bilong helpim yu long toktok wantaim narapela. Tasol bilong ol tok bilong yumi i ken mekim gut wanpela wok, yumi mas makim gut ol wan wan tok yumi bai kolim. Ating wanpela hap tok i stret long kolim long wanpela taim, i no stret long kolim long narapela taim. Sapos yu kamapim wanpela tok yu bilasim, tasol i no stret long kolim long dispela taim, em inap kamap wanpela tok bilong “rabisim narapela.” Ating yu no tingting gut na yu kolim kain tok olsem, na i kamapim olsem yu no tingim tru narapela. Sampela tok i gat tupela mining bilong en, na wanpela mining i skrapim bel bilong narapela o daunim em. (Snd. 12:18; 15:1) Tasol “gutpela tok”​—em tok i save strongim man—i save amamasim bel bilong man taim narapela i givim kain tok olsem long em. (Snd. 12:25) Maski yu wanpela saveman, i hatwok long painim ol tok i stret long mekim. Baibel i tok olsem Solomon i save i hatwok long painim tok i swit long yau bilong ol man na ol trupela tok i stret long mekim.​—Sav. 12:10.

Long sampela tok ples ol i gat sampela tok ol i kolim long ol manmeri i lapun liklik o ol i gat namba samting, na ol i gat narapela tok ol i kolim long ol wankrismas o ol man krismas bilong ol i liklik long ol. Ol man bai pilim olsem yu mekim pasin i no stret sapos yu no bihainim dispela pasin. Long sampela tok ples i gat sampela tok ol man bai mekim bilong makim olsem ol i daun long wanpela man na ol i kolim dispela tok bilong givim biknem long ol. Olsem na i no stret long kolim dispela tok bilong makim yu yet. Ating lo bilong Baibel long pasin bilong givim biknem long narapela i winim lo bilong gavman o pasin bilong ples. Baibel i tokim ol Kristen long “litimapim nem bilong olgeta manmeri.” (1 Pi. 2:​17, King Jems Nupela Testamen) Ol man i givim bel long mekim olsem bai toktok long ol manmeri long pasin i soim olsem ol i rispektim ol, maski ol i gat hamas krismas.

Planti man em ol i no Kristen tru ol i save mekim ol tok nogut. Ating ol i ting ol kain tok olsem i save strongim tok ol i mekim. O ating dispela i makim olsem ol i no save long planti tok bilong kolim. Sapos wanpela man i bin mekim kain tok olsem long olgeta taim paslain long em i lainim ol pasin bilong Jehova, ating em bai hatwok long lusim dispela kain tok. Tasol em inap lusim. Spirit bilong God inap helpim man long senisim pasin bilong em long toktok. Tasol em i mas i gat laik long kisim save long ol gutpela tok em i ken kolim​—ol gutpela tok i save strongim ol man​—na kolim ol dispela tok long olgeta taim.​—Ro. 12:2; Ef. 4:29; Kl. 3:8.

Ol Tok Ol Man i No Hatwok Long Kisim. Bilong mekim tok i gutpela, wanpela bikpela samting i olsem: I no hatwok long kisim mining bilong tok. (1 Ko. 14:9) Sapos ol man i no save long ol tok yu mekim, i olsem yu mekim tok long wanpela tok ples ol i no save long en.

Sampela tok i gat narapela mining bilong en long ol man bilong wanpela kain wok mani. Ating ol i kolim ol dispela tok long olgeta de. Tasol sapos yu kolim dispela tok long taim i no stret long kolim, dispela inap mekim na i hatwok long toktok wantaim ol narapela. Na tu, maski yu kolim ol tok ol man i save mekim long olgeta de, sapos yu stori planti long ol liklik liklik samting, ol man bai kirap tingim narapela samting.

Man i save tingim ol narapela taim em i mekim tok, em bai kolim ol tok ol man inap kisim maski ol man i bin skul o nogat. Em i bihainim pasin bilong Jehova na em i save tingim ol man nating. (Jop 34:19) Sapos brata bilong mekim tok i mas kolim wanpela tok ol man i no save long en, orait em i mas kolim wantaim ol tok i no hatwok long save long en bambai ol man i ken kisim klia mining bilong en.

Taim yu skelim gut na kamapim ol tok i no hatwok long ol man i kisim, dispela kain tok i gat bikpela strong. Ol sotpela sentens na ol tok i no hatwok long kisim, dispela kain tok i isi long kisim mining bilong en. Yu ken kolim sampela longpela na sampela sotpela sentens na bai tok i ken ron gut. Tasol long ol tok yu laik bai ol man i tingim, kolim ol tok i no hatwok long kisim na ol sentens i sotpela.

Kolim Kain Kain Tok na Ol Tok i Stret. Yumi gat planti tok i gutpela long kolim. Olsem na yu no ken kolim wankain tok long olgeta taim. Kolim kain kain tok. Olsem bai ol man i gat laik long harim tok bilong yu na tok yu mekim bai i gat as bilong en. Olsem wanem yu ken kisim save long sampela tok moa yu ken kolim?

Taim yu rit, makim ol wan wan tok yu no klia gut long en, na painim mining bilong ol dispela tok long wanpela dikseneri sapos tok ples bilong yu i gat dikseneri. Kisim wan wan bilong ol dispela tok, na wok long kolim long taim i stret long mekim olsem. Wok strong long kolim stret na kolim wantaim ol narapela tok i no hatwok long kisim gut, na dispela tok yet i no pulim tingting bilong man. Taim yu lainim sampela tok moa bilong kolim, dispela bai helpim yu long kolim kain kain tok taim yu toktok. Tasol yu mas was gut​—sapos yu kolim kranki ol tok o yu no kolim long taim stret, ol narapela inap ting olsem yu no save gut long samting yu stori long en.

Yumi laik lainim sampela tok moa bilong mekim bambai yumi ken givim save long ol man i harim tok bilong yumi, i no bilong kirapim ol long tingim yumi. Yumi mas i gat laik long givim gutpela save long ol man na ol i ken amamas long harim. Tingim gutpela tok bilong Baibel olsem: “Sapos man i gat gutpela tingting na em i autim tok, em i mekim ol man i laikim gutpela tingting na save.” (Snd. 15:2) Taim yumi kolim ol gutpela tok i stret long mekim wok long ol na ol i no hatwok long kisim, dispela i mekim na ol man i no les o nolaik long harim tok bilong yumi, nogat, tok bilong yumi bai givim nupela strong long ol na kirapim ol long laikim tok yumi mekim.

Taim yu lainim sampela tok moa, was gut na kolim tok i stret long kolim. Ating tupela tok i klostu wankain tasol mining bilong ol i narakain liklik na yu mas kolim long ol narapela narapela kain taim. Sapos yu save long dispela, bai yu inap kamapim klia moa ol tok na bai yu no mekim sampela tok i bagarapim bel bilong ol man. Putim gut yau long tok bilong ol man i save gut long toktok. Long sampela dikseneri i gat lista i stap aninit long ol wan wan tok i kamapim ol narapela tok i klostu wankain, na narapela lista i kamapim ol tok i no wankain liklik. Olsem na bai yu painim ol narapela narapela tok i makim wankain tingting, na tu ol tok mining bilong ol i narapela narapela liklik. Dispela i helpim yu tru taim yu laik painim wanpela tok i stret tru long kolim. Taim yu laik mekim wok long wanpela tok yu bin lainim, pastaim yu mas save long mining bilong en, pasin bilong kolim, na wanem taim i stret long kolim.

Ol tok i save stori long wanpela samting stret, ol i klia moa, winim ol tok i no stori stret olsem. Man bilong mekim tok inap tok olsem: “Long dispela taim, planti manmeri i kisim sik.” O em inap tok olsem: “Inap sampela mun bihain long Namba Wan Pait, winim 21,000,000 manmeri i dai long bikpela sik kus bilong Spen.” Em nau, taim man i kamapim klia ol tok olsem “long dispela taim,” “planti manmeri,” na “kisim sik,” ol man inap klia gut long stori! Bilong kamapim kain tok olsem, yu mas save gut long ol samting yu stori long en na makim gut ol tok yu bai kamapim.

Taim yu kolim ol tok i stret long kolim, dispela bai helpim yu long kamapim gut ol bikpela tok na yu no kolim planti tok tumas. Tasol taim yu kolim planti tok tumas, ol man i no inap kisim gut ol tingting yu laik kamapim. Taim yu kamapim ol tok i no hatwok long kisim, bai i no hatwok long ol man long kisim ol bikpela tok na holim long tingting. Dispela i helpim yu long givim stretpela save long ol. Wok tisa bilong Jisas Krais em i gutpela tru, long wanem, em i mekim ol tok i no hatwok long man i kisim. Larim pasin bilong em i skulim yu. (Lukim ol tok i stap long Matyu 5:​3-12 na Mak 10:​17-21.) Traim long kolim ol sotpela tok i kamapim tingting bilong yu.

Ol Tok i Gat Strong na i Kamapim Olsem Yu Pilim Tru Long Bel. Taim yu lainim sampela tok moa bilong mekim, no ken tingting long ol nupela tok tasol, nogat, tingting long ol tok i gat kain kain wok bilong ol. Olsem ol tok i makim wok samting yu mekim; ol tok i makim kain kain pasin; ol tok i kamapim pasin sori, gutpela pasin, o strong long mekim samting.

Kain tok olsem i pulap long Baibel. Long rot bilong profet Amos, Jehova i tok: “Yupela i mas bihainim gutpela pasin, na yupela i no ken bihainim pasin nogut. . . . Lusim pasin nogut, na bihainim gutpela pasin tasol.” (Amo. 5:​14, 15) Samuel i bin tokaut long King Sol olsem: “Nau Bikpela i rausim yu long wok king, na yu no inap bosim ol Israel moa.” (1 Sml. 15:28) Taim Jehova i toktok wantaim Esekiel, em i kamapim sampela tok yumi no inap lusim tingting long en, em i tok: “Het bilong ol i strong olsem ston na olgeta i man bilong sakim tok tasol.” (Ese. 3:7) Bilong kamapim strong bikpela rong Israel i mekim, Jehova i tok olsem: “Yupela i save stilim ol samting bilong mi.” (Mal. 3:8) Daniel i stori gut long samting i kamap long Babilon bilong traim bilip na em i tok Nebukatnesar “i belhat moa yet,” long wanem, Satrak, Mesak, na Abetnego i no brukim skru long imis bilong em, olsem na em i tokim ol wokman long tromoi tripela i go long paia i “hat nogut tru.” Bilong helpim yumi long save paia i hat tru, Daniel i tok King i “tokim ol wokman bilong en long mekim paia i kamap hat nogut tru. Bipo ol i no save mekim paia i kamap hat olsem.” Em i hat tru, olsem na taim ol i go klostu long en paia i kukim ol soldia na ol i dai. (Dan. 3:​19-22) Long Jerusalem sampela de paslain long i dai bilong em, Jisas i kamapim tok em i pilim tru long bel, na em i tok: “Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik. Harim. Nau ples bilong yupela bai i bagarap na i stap nating.”​—Mt. 23:​37, 38.

Taim yu makim gut ol tok yu mekim, dispela inap kirapim ol man long lukim ol dispela samting long tingting bilong ol. Sapos yu kolim ol tok em bel bilong man i save pilim, ol man i harim tok bilong yu bai “lukim” na “holim” ol samting yu toktok long en, na pilim “swit” na “smelim” kaikai yu stori long en, na “harim” ol nois yu stori long en na nek bilong ol man yu kamapim tok bilong ol. Ol man bai putim gut yau long tok yu mekim, long wanem, yu helpim ol long pilim olsem ol dispela samting i kamap long ol.

Ol tok i kamapim gut tru sampela tingting inap mekim na man bai lap o em bai krai. Kain tok olsem inap kirapim man i bel hevi tru long wetim gutpela samting, na kirapim em long i gat laik long i stap laip na long laikim tru Man i bin wokim em. Tok i stap long Song 37:​10, 11, 34; Jon 3:16; na Kamapim Tok Hait 21:​4, 5, em ol i stori long ol gutpela samting bai kamap bihain, i bin helpim tru planti manmeri long olgeta hap.

Taim yu ritim Baibel na ol buk samting bilong “wokboi i gat gutpela tingting,” bai yu lukim olsem i gat kain kain tok na kain kain hap tok. (Mt. 24:45) No ken ritim tasol. Makim ol tok yu laikim, na yusim taim yu toktok wantaim ol narapela.

Ol Tok i Stret Wantaim Ol Lo Bilong Tok Ples. Sampela manmeri i save olsem sampela taim toktok ol i mekim i no save bihainim ol lo bilong kolim tok. Tasol ol i ken mekim wanem bilong stretim dispela?

Sapos yu skul yet, orait lain gut long ol lo bilong kolim tok ples yu skul long en na makim gut ol wan wan tok yu laik kolim. Sapos yu no klia gut long as bilong wanpela lo bilong tok ples, orait askim tisa long dispela. No ken skelim liklik tasol ol dispela lo. Samting i kirapim yu long mekim gutpela tok, em yu laik mekim gut wok bilong yu long autim gutnius.

Olsem wanem sapos yu lapun liklik na taim yu liklik yet i kam inap yu bikpela pinis yu bin mekim narapela tok ples, i no dispela tok ples nau yu mekim? O ating yu no bin kisim sampela skul long tok ples bilong yu yet. Yu no ken bel hevi. Wok strong long mekim pasin bilong yu long toktok i kamap gutpela moa, long wanem, yu laik helpim gutnius. Planti save yumi kisim long lo bilong kolim ol tok bilong wanpela tok ples, em yumi kisim long rot bilong putim yau long ol tok ol narapela man i mekim. Olsem na putim gut yau long tok bilong ol man i save gut long mekim ol tok. Taim yu ritim Baibel na ol buk samting em Baibel i as bilong en, skelim pasin bilong ol long kamapim ol sentens, wanem ol wan wan tok ol i kolim wantaim, na ol i kolim olsem wanem. Bihainim ol dispela gutpela pasin taim yu toktok.

Ol man i gat nem long ol video na musik i save kolim ol kain kain tok i no save bihainim ol lo bilong kolim tok. Planti man i save bihainim toktok bilong ol kain man olsem. Ol man bilong salim ol drak na sampela man moa husat i bihainim pasin raskol o pasin pamuk, ol i gat sampela tok bilong ol yet. Na mining bilong ol dispela tok i narapela olgeta long mining em planti man i save long en. Em i no gutpela long ol Kristen i bihainim pasin bilong ol dispela lain. Sapos yumi mekim olsem, dispela bai makim olsem yumi insait long lain bilong ol na yumi bihainim pasin bilong ol long i stap bilong yumi.​—Jon 17:16.

Kisim pasin bilong kolim stret ol tok long olgeta de. Sapos yu kolim nabaut ol tok taim yu toktok long olgeta de, bai yu no inap mekim gutpela tok long taim yu mas mekim ol bikpela pablik-tok samting. Tasol sapos yu save bihainim gutpela pasin bilong kolim ol tok long olgeta taim, orait em bai isi long yu long kolim kain tok olsem taim yu sanap long pletfom o taim yu autim tok i tru long ol man.