Pas i Kam Long Gavening Bodi
Yes Ol Wanbilip Witnes Bilong Jehova:
Aposel Pol i mekim wok long olgeta rot i op bilong kamapim olsem em i laikim na amamas long ol wanbilip bilong em. Em i raitim pas long ol Kristen long Rom na i tok: “Long olgeta hap graun ol man i save stori long strongpela bilip bilong yupela. Olsem na mi ting long yupela olgeta, na long nem bilong Jisas Krais mi tenkyu long God bilong mi.” (Ro. 1:8) Yes, long olgeta hap em Rom i bosim, ol man i save long strongpela bilip bilong ol Kristen, na tu, long pasin bilong ol long givim bel long autim tok. (1 Te. 1:8) Olsem na yumi no kirap nogut olsem Pol i laikim tru ol brata bilong em!
Wankain olsem Pol, mipela i save tok tenkyu long Jehova long olgeta taim mipela i tingim yupela. Mipela i laikim tru yupela olgeta! Na yupela i ken bilip tru olsem Jehova i laikim yupela olgeta wan wan. Ol man i wok long birua long sampela bilong yupela, tasol yupela i givim bel yet long autim tok. Pasin bilong yupela long i no pret na givim bel yet long autim tok i mekim bel bilong Jehova i amamas!—Snd. 27:11.
Taim yu ritim na tingim tingim long bel ol stori long wok bilong ol Witnes Bilong Jehova long nau, bai yu luksave olsem Bikpela Jisas Krais i “winim pait na em i wok long winim planti pait moa,” na i no gat wanpela samting bilong pait inap bagarapim ol disaipel bilong Krais.—KTH 6:2; Ais. 54:17.
Pol i raitim pas long ol Kristen long Filipai na i tok: ‘Mi tenkyu long God long yupela i bin poroman wantaim mipela long wok bilong autim gutnius.’ (Fl. 1:3-5) Mipela ol memba bilong Gavening Bodi i gat wankain tingting long yupela. Long 2007 sevis yia, inap 6,691,790 pablisa i lusim 1,431,761,554 aua long autim gutnius long 236 kantri. Em bikpela wok tru yupela i mekim bilong autim gutnius long olgeta hap! Tingim wok yumi olgeta i mekim bilong helpim planti handet tausen manmeri, olgeta dispela wok i litimapim nem bilong Jehova!
Long narapela taim, Pol i soim olsem em i pilim tru hevi bilong ol brata bilong em. Em i raitim pas long ol Kristen i stap long Tesalonaika olsem: “Mipela i save tenkyu long God Papa bilong yumi . . . long yupela i save strongim bel na wetim Bikpela bilong yumi Jisas Krais.” (1 Te. 1:2, 3) Tru, laip i gat planti hevi, tasol em i bikpela samting long yumi sanap strong. Yu wok long karim wanem ol hevi? Yu bel hevi long bikpela sik i mekim na yu no inap mekim bikpela wok moa bilong Jehova? Gutpela poroman marit bilong yu i dai pinis? (Snd. 30:15, 16) Yu pilim olsem yu no inap painim wanpela bilong maritim husat i laikim Jehova olsem yu yet i laikim Jehova, na yu wok yet long bihainim tok bilong Baibel long maritim tasol man o meri i bilip long Bikpela? (1 Ko. 7:39) Yu wok strong long mekim bikpela long ol pikinini bilong yu na long wankain taim yu karim hevi bilong mani? Maski yu gat wanem kain sindaun, sapos yu putim wok bilong Kingdom i stap nambawan samting, yu ken bilip tru olsem Jehova bai i no inap ‘lusim tingting long ol gutpela wok yu bin mekim.’ Ol brata na sista, yupela i no ken “les long mekim gutpela pasin”!—Hi. 6:10; Ga. 6:9.
Wanem samting bai helpim yu long sanap strong? Olsem ol Kristen long Tesalonaika, yu mas bilip na “wetim Bikpela bilong yumi Jisas Krais.” Olsem na i gat as na Pol i tok “pasin bilong wetim God i kisim bek” man, em i olsem hat kapa Kristen i mas putim bilong lukautim em na em i no kisim tingting olsem gutpela samting i no inap kamap.—1 Te. 5:8.
Tru tumas, taim yu sanap strong, yu helpim Jehova long bekim tok Satan i sutim tok long husat i mas i stap nambawan bos bilong heven na graun. Satan i bin tok olsem ol wokman bilong God ol i save tingim ol yet tasol na ating ol i amamas long mekim wok bilong God inap liklik taim, tasol taim hevi i painim ol o pinis bilong dispela graun i no kam hariap, ol bai i no givim bel tumas long lotuim God. Yu gat rot bilong kamapim klia olsem Satan em i man bilong giaman! Long olgeta wan wan de, yu wok long i go klostu moa long kisim ol blesing yu wetim.
Pol i redi long tok amamas long ol brata bilong em long strongpela bilip bilong ol, pasin bilong ol long sapotim wok bilong autim tok, na pasin bilong ol long sanap strong, na olsem tasol mipela i laik tok amamas long yupela na tokim yupela olsem mipela i laikim tru yupela. Mekim yet ol gutpela wok bilong yupela!
God i ken blesing ol wok yumi mekim long dispela yia. Mipela i laik bai yupela i stap gut, mipela ol
Brata bilong yupela,
Gavening Bodi Bilong Ol Witnes Bilong Jehova