Pas i Kam Long Gavening Bodi
Yes Ol Wanwok Witnes Bilong Jehova:
Em i gutpela samting tru long raitim pas long yupela ol brata! Mipela i pilim wankain olsem aposel Jon, em i tok olsem em i ‘laikim tru’ ol wanbilip na em i amamas long ol i “bihainim tok tru.” (2 Jo. 1, 4) Tok i tru em i bikpela samting tru long yumi olgeta, laka? Tok i tru i bin helpim yumi long lusim Bikpela Babilon na ol bilip na pasin bilong en i bagarapim nem bilong God. Pasin bilong bihainim gut tok i tru i bin helpim yumi long kamap ol man bilong pasin laikim, mekim gut long narapela, na mekim pasin marimari. Na tu, tok i tru i bin opim rot long yumi inap i stap klin long ai bilong God, na yumi gat rot bilong kisim laip i stap gut oltaim oltaim.
Yumi amamas tu long holi spirit bilong Jehova i save stiaim na strongim yumi long olgeta wan wan de! Mipela i save olsem yupela i bin amamas long harim ol tok i skelim ol narapela narapela pasin bilong dispela gutpela samting Jehova i givim long yumi, long rot bilong “Holi Spirit i Stiaim Yumi” Kibung Distrik i kamap i no longtaim i go pinis. Ol pasin bilong graun bai go nogut moa yet, olsem na em i bikpela samting long yumi larim dispela strongpela spirit bilong Jehova i stiaim wokabaut bilong yumi long dispela taim bilong ol bikpela hevi tru bai kamap.
Mipela i save olsem yupela i pilim tru long bel ol gutpela stori bilong ol Yearbook, long ol brata bilong yumi em ol i bin sanap strong long bilip na ol i karim hevi. Yumi kirap nogut olsem planti bilong ol dispela gutpela brata ol i bin baptais sotpela taim tasol o ol i no bin baptais yet taim ol hevi i bin painim ol. Yumi laikim tumas pasin bilong ol long stap gut long God na holimpas stretpela pasin! Tru tumas, gutpela pasin bilong ol i strongim bel bilong yumi na yumi tingting strong long stap gut yet long Kingdom maski wanem wanem hevi bai painim yumi.—1 Te. 1:6-8.
Yes ol brata na sista, mipela i save olsem yupela i karim planti hevi bilong mani na ol narapela hevi bilong laip, tasol yupela i mekim olsem bambai yupela i ken helpim famili bilong yupela long pas gut yet wantaim long pasin laikim. Long sampela bilong yupela, em i hatwok tu long mekim wok autim tok bilong Kingdom na go olgeta taim long ol miting. Long dispela as mipela i bin kamapim sampela senis long ol miting bilong kongrigesen kirap long Janueri 1, 2009. Mipela i bin beten planti taim na toktok long dispela samting, na bihain mipela i mekim olsem. Mipela i save olsem yupela bai mekim gutpela samting long ol senis i kamap na lusim bikpela hap taim moa long mekim stadi bilong yupela yet na bilong famili.
Long ol kibung sekit na kibung distrik long yia i go pinis, yumi amamas tru long lukim planti pablisa em ol i winim mak na kisim baptais. Sampela namel long ol em ol yangpela pikinini. Mipela i tok amamas long yupela ol papamama long mekim bikpela long ol pikinini bilong yupela na helpim ol long laikim tok i tru, na long strongim ol long givim ol yet long Jehova bilong mekim wok bilong em taim ol i yangpela. Ol dispela yangpela i karim planti hevi long skul, tasol ol i wok strong na winim ol mak bilong kisim baptais, na dispela i kamapim klia gutpela wok yupela i bin mekim long skulim ol.—Sng. 128:1-6.
Mipela i laik tok amamas tu long planti man moa i kirap stadi long Baibel—na bikpela hap bilong dispela wok em ol misineri na ol painia salim bilong yumi i mekim. Mipela olgeta long lain Gavening Bodi i amamas tru long bikpela wok ol bratasista bilong yumi long olgeta hap i mekim long tok “Yu kam” long ol man i gat gutpela bel, na yupela i singautim olgeta man husat i nek drai long kam na “kisim wara bilong givim laip, em i olsem presen i kam long God.” (KTH 22:17) Yumi laik tok welkam long 289,678 bratasista long olgeta hap em ol i bin dediket long Jehova na kisim baptais long las yia!
I gutpela long olgeta taim yumi tingim tok bilong aposel Jon, em i tok: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” (1 Jo. 2:17) Na tingim olsem yumi stap klostu tru long dispela taim we pasin bilong dispela graun “bai i pinis”! Em i savetingting long putim wok bilong mekim laik bilong God i stap nambawan samting long laip bilong yumi na “was” i stap. (Mt. 24:42) Bai yumi no bel hevi sapos yumi mekim olsem, na bai yumi kisim ol gutpela samting tru long rot bilong gutpela-pasin-sori bilong Jehova.—Ais. 63:7.
Mipela i laik bai ol gutpela stori bilong planti kantri i stap long Yearbook bilong 2009 bai strongim yupela olgeta long putim ol samting bilong Kingdom i stap namba wan samting long laip bilong yupela. Mipela i laik bai yupela i save olsem mipela i save beten na tingim yupela long olgeta taim, na mipela i laikim tru yupela. Jehova i ken givim planti blesing long yupela.
Ol brata bilong yupela,
Gavening Bodi Bilong Ol Witnes Bilong Jehova