Kisim Gutpela Helpim Long Stadi Yumi Mekim Long Buk Kisim Skul Long Bikpela Tisa
1. Kirap long wik bilong Epril 13, bai yumi stadi long wanem buk long Baibel Stadi Bilong Kongrigesen?
1 Long wik i kirap long Epril 13, yumi bai kirap stadi long buk Kisim Skul Long Bikpela Tisa long Baibel Stadi Bilong Kongrigesen. Maski ol i wokim dispela buk bilong ol papamama i stadi wantaim ol pikinini, dispela buk i gat planti stiatok bilong Baibel i stret long ol yangpela na ol man i bikpela pinis. Yumi olgeta bai kisim gutpela helpim long rot bilong stadi long dispela buk.
2. Wanem samting i insait long pasin bilong redim gut stadi long olgeta wan wan wik?
2 Em i bikpela samting long redim gut stadi long olgeta wan wan wik. Yumi no ken kisim tingting olsem yumi save pinis long ol dispela tok na i no gat wok long stadi long en. Bilong redi gut, yumi no ken makim tasol ol bekim, nogat. Beten na tingim gut long bel ol tok bilong ol skripsa, dispela bai helpim yumi long redim ol gutpela bekim na moa yet, dispela bai redim bel bilong yumi.—Esr. 7:10.
3. Olsem wanem olgeta wan wan long kongrigesen i ken insait tru long dispela stadi?
3 Sapos yumi givim bel long mekim ol sotpela bekim, ‘bilip bilong yumi i ken helpim narapela na bilip bilong narapela i ken helpim yumi.’ (Ro. 1:11, 12) Stret long krismas bilong ol pikinini, ol papamama i mas helpim ol long kamapim ol bekim long toktok bilong ol yet, na no ken ritim nating ol tok i stap long buk.
4. Brata i lukautim Baibel Stadi Bilong Kongrigesen i mas mekim wanem taim em i lukautim stadi?
4 Em bai gutpela sapos brata bilong lukautim Baibel Stadi Bilong Kongrigesen i larim ol pikinini i insait tru long bekim tok, tasol long wankain taim em i mas tingim tu olsem stadi i no bilong helpim ol pikinini tasol, nogat. Em i bikpela samting long brata i lukautim stadi long kamapim klia olsem long olgeta wan wan de ol brata na sista i bikpela pinis ol i gat wok long bihainim ol stiatok bilong Baibel i stap long dispela buk.
5. Olsem wanem pasin bilong stadi gut long buk Kisim Skul Long Bikpela Tisa bai helpim ol yangpela na ol manmeri i bikpela pinis?
5 Buk Kisim Skul Long Bikpela Tisa i wanpela gutpela buk bilong skulim ol pikinini long bihainim pasin bilong Jisas Krais kirap long taim pikinini i liklik yet. Dispela bai helpim ol long bihainim ol stiatok bilong Baibel taim traim na hevi i painim ol long skul o long ol narapela hap, em ol traim bilong kirapim ol long mekim ol samting God i no orait long en. Na long wankain taim, ol manmeri i bikpela pinis bai kisim helpim long ol stiatok bilong Baibel em buk i kamapim klia na i no hatwok long kisim, na dispela i helpim ol long “wokabaut long pasin i stret long dispela gutnius bilong Krais.”—Fl. 1:27 NW.