Bilong Wanem i Hatwok Long Mekim Gutpela Pasin?

TAIM Sol i bin mekim ol pasin nogut, husat i amamas?— Satan i bin amamas. Tasol ol bikman bilong lotu Juda, ol tu i amamas. Bihain, taim Sol i kamap wanpela disaipel bilong Bikpela Tisa na ol i kolim em Pol, ol dispela bikman bilong lotu ol i birua long em. Olsem na ating yu inap klia gut nau long as na i hatwok long wanpela disaipel bilong Jisas i mekim gutpela pasin, a?—

Wanpela taim hetpris Ananaias i tokim ol man long solapim pes bilong Pol. Na Ananaias i traim tu long kalabusim Pol. Pol i kisim planti pen na hevi taim em i kamap wanpela disaipel bilong Jisas. Olsem: Ol man nogut i paitim em na ol i bin tromoi ol bikpela ston long em bilong kilim em i dai.—Aposel 23:​1, 2; 2 Korin 11:​24, 25.

Planti man bai traim long pulim yumi long mekim ol samting God i no laikim. Olsem na tingim dispela askim: Yu laikim tru ol gutpela pasin? Yu laikim tru inap long yu bai mekim gutpela pasin maski ol narapela i birua long yu taim yu mekim olsem? Yu mas i gat strongpela bel bilong mekim olsem, a?—

Ating yu tingting olsem, ‘Bilong wanem ol man bai birua long yumi taim yumi mekim gutpela pasin? Ol i mas amamas long dispela, a?’ Yes, bai yumi ting olsem. Planti taim ol man i laikim Jisas long ol gutpela samting em i mekim. Wanpela taim, olgeta manmeri bilong taun ol i go bung long dua bilong haus Jisas i stap long en. Ol i kam, long wanem, Jisas i bin oraitim ol sikman.—Mak 1:​33.

Tasol sampela taim ol man i no laikim tumas ol tok Jisas i skulim ol long en. Maski oltaim em i skulim ol man long ol trupela tok, sampela i bin birua tru long em, long wanem, em i mekim tok tru. Wanpela taim dispela samting i kamap long Nasaret, em taun Jisas i bin go bikpela long en. Em i go insait long haus lotu, em ples we ol Juda i save bung bilong lotu long God.

Jisas i yusim ol Skripsa na em i mekim wanpela gutpela tok. Pastaim ol manmeri i laikim tok em i mekim. Ol i kirap nogut tru long ol gutpela tok em i autim. Ol i hatwok long tingim olsem dispela yangpela man i bin go bikpela long taun bilong ol yet.

Tasol bihain Jisas i mekim narapela tok. Em i stori long sampela haptaim em God i bin mekim gut tru long ol man i no Juda. Taim Jisas i tok olsem, ol manmeri long haus lotu ol i kros. Yu save bilong wanem ol i kros?— Ol i ting God bai mekim gut long ol tasol. Ol i ting ol i winim ol narapela. Olsem na ol i birua long Jisas long tok em i mekim. Na yu save long samting ol i laik mekim long em?—

Baibel i tok: ‘Ol i holim Jisas na rausim em i go ausait long taun. Ol i bringim em i go antap long wanpela maunten na ol i laik tromoi em i go daun na kilim em i dai! Tasol Jisas i lusim ol na i go.’—Luk 4:​16-​30.

Sapos dispela samting i bin kamap long yu, bai yu inap go bek na tokim ol dispela manmeri long God?— Yu mas i gat strongpela bel bilong mekim olsem, a?—Tasol wanpela yia bihain, Jisas i go bek long Nasaret. Baibel i tok: “Em i go long haus lotu bilong ol na i givim tok bilong God long ol manmeri.” Jisas i no larim pasin bilong pret long ol man i no laikim God i pasim em long autim tok i tru.—Matyu 13:54.

Long narapela taim, long de Sabat, Jisas i bungim wanpela man han bilong em i dai pinis. Jisas i gat strong i kam long God bilong oraitim dispela man. Tasol sampela man i laik putim hevi long Jisas. Bikpela Tisa bai mekim wanem?— Pastaim em i askim: ‘Sapos yupela i gat wanpela sipsip na em i pundaun long wanpela bikpela hul long de Sabat, bai yupela i holim em na pulim em i kam antap?’

Yes, ol bai holim sipsip na pulim em i kam antap, maski em de Sabat, em de ol i mas malolo long en. Olsem na Jisas i tok: ‘I gutpela moa long helpim wanpela man long de Sabat, long wanem, man i winim tru sipsip’! Em i klia tru olsem Jisas i mas helpim dispela man na oraitim em!

Jisas i tokim dispela man long stretim han bilong em. Wantu tasol han bilong em i kamap orait. Dispela man i amamas tru! Tasol olsem wanem long ol dispela arapela man? Ol i amamas?— Nogat. Ol i birua moa yet long Jisas. Ol i go na stretim rot bilong kilim em i dai!—Matyu 12:​9-​14.

Na i wankain long nau tu. Maski yumi mekim wanem samting, i no olgeta man bai amamas long yumi. Olsem na yumi mas wokim tingting long yumi laik amamasim husat. Sapos yumi laik amamasim God Jehova na Pikinini bilong em, Jisas Krais, orait oltaim yumi mas bihainim tok ol i skulim yumi long en. Tasol sapos yumi mekim olsem, husat bai birua long yumi? Husat bai mekim na i hatwok long yumi mekim gutpela pasin?—

Satan bai mekim. Tasol husat tu bai mekim olsem?— Em ol man Satan i bin giamanim ol na ol i bilip long ol samting i no stret. Jisas i tokim ol hetman bilong lotu long taim bilong em: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela.”—Jon 8:​44.

I gat planti manmeri em Satan i laikim ol. Jisas i kolim ol olsem “graun.” Yu ting dispela “graun” Jisas i tok long en em wanem samting?— Orait, yumi ken lukim Jon sapta 15, ves 19 na painimaut dispela samting. Long dispela skripsa, yumi lukim tok bilong Jisas: “Sapos yupela i stap olsem ol man bilong dispela graun, orait ol manmeri bilong graun ol inap laikim yupela olsem ol lain bilong ol yet. Tasol yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela.”

Olsem na dispela graun i birua long ol disaipel bilong Jisas i makim olgeta manmeri i no bihainim Jisas. Bilong wanem ol i birua long ol disaipel bilong Jisas?— Tingim dispela: Husat i bosim dispela graun?— Baibel i tok: “Dispela graun olgeta em i stap aninit long strong bilong Satan.”—1 Jon 5:​19.

Olsem wanem? Yu inap save nau long as na i hatwok long mekim gutpela pasin?— Satan na lain bilong em i mekim na i hatwok. Tasol i gat narapela as tu. Yu inap tingim?— Long Sapta 23 bilong dispela buk, yumi bin kisim save olsem sin i stap pinis long yumi taim mama i karim yumi. Em bai gutpela tru taim sin, na Satan, na lain bilong em i pinis olgeta, a?—

Baibel i tok promis olsem: “Dispela graun bai i pinis.” Dispela i makim olsem olgeta man i no bihainim Bikpela Tisa ol bai pinis olgeta. Ol bai i no inap i stap oltaim. Yu save husat bai i stap oltaim?— Baibel i tok moa: “Man i bihainim tok bilong God, em bai i stap oltaim.” (1 Jon 2:​17) Yes, ol man i mekim gutpela pasin, ol i bihainim “tok bilong God,” ol tasol bai i stap oltaim long nupela taim God bai kamapim. Olsem na maski i hatwok, yumi laik mekim gutpela pasin, a?—