Ol Popaia Bilong Ol Israel i Mas Skulim Yumi

OL ISRAEL i save long ol samting Jehova i laik bai ol i mas mekim taim ol i go insait long Graun Bilong Promis. Long rot bilong Moses, God i tokim ol: “Yupela i mas rausim olgeta pipel i stap long dispela kantri. Na bagarapim olgeta giaman god ol i bin wokim long ston na ain, na bagarapim olgeta ples lotu bilong ol.”​—Nam. 33:52.

Ol Israel i no ken wokim kontrak wantaim ol lain bilong dispela kantri, na ol i no ken marit long ol. (Lo 7:​2, 3) God i bin givim tok lukaut long lain bilong em olsem: “Lukaut gut, yupela i no ken mekim kontrak wantaim ol manmeri bilong dispela kantri nau yupela i laik i go long en. Nogut ol i pulim yupela na yupela i pundaun na bagarap olgeta.” (Kis. 34:12) Tasol ol Israel i sakim tok bilong God na ol i pundaun. Wanem samting i mekim na ol i pundaun? Ol samting i painim ol inap skulim yumi long wanem samting?​—1 Ko. 10:11.

Bung Wantaim Ol na Bihain Lotuim Ol God Giaman

Taim ol Israel i kisim Graun Bilong Promis, kwiktaim ol i winim planti pait ol i mekim long ol asples. Tasol ol Israel i no bihainim gut tok bilong God. Ol i no rausim ol birua. (Het. 1:1–2:10) Taim ol Israel i sindaun namel long ol “7-pela bikpela lain” i stap long dispela kantri, ol i bung wantaim ol na i no longtaim na ol i kamap pren bilong ol. (Lo 7:1) Orait dispela i mekim wanem long ol Israel? Baibel i tok: “Ol Israel i marit nabaut wantaim ol na i lotu long ol giaman god bilong ol. Ol manmeri bilong Israel i lusim tingting long God, Bikpela bilong ol. Ol i mekim sin na ol i lotu long ol giaman god Bal wantaim ol god meri Astarte.” (Het. 3:​5-7) Em nau, pasin bilong ol Israel long poroman wantaim ol, dispela i mekim na ol i kirap marit long ol dispela lain na lotuim ol god giaman bilong ol. Taim ol Israel i marit long ol dispela lain, nau ol i hatwok long rausim ol haiden long dispela graun. Lotu tru i bagarap, na ol Israel yet i kirap lotuim ol god giaman.

Ol lain bilong Graun Bilong Promis i stap pren bilong ol Israel, na dispela inap bagarapim tru ol Israel long ol samting bilong spirit, winim long taim ol dispela lain i stap birua bilong ol. Na ating i gat narapela samting tu i bin bagarapim lotu bilong ol Israel.

Wok Gaden na Lotuim Bal

Taim ol Israel i go insait long Graun Bilong Promis, ol i no raun raun moa olsem tripman​—planti i kamap man bilong wokim gaden. Ating ol i bihainim wankain pasin bilong wokim gaden olsem ol Kenan i bin mekim. Na i luk olsem ol i bin kisim sampela pasin moa bilong ol Kenan. Ol Israel i poroman wantaim ol asples na dispela i pulim ol na ol i kisim ol bilip bilong ol Kenan i insait long ol pasin bilong wokim gaden.

Ol Kenan i lotuim planti god Bal​—ol i ting ol dispela god i save putim gris long graun na bai kaikai i kamap gut. Bihain, taim ol Israel i wokim gaden na kisim ol kaikai, ol i kirap bung wantaim ol Kenan long lotuim ol god bilong ol olsem god bilong givim planti kaikai samting long ol. Planti Israel i giaman na mekim olsem ol i lotuim Jehova, tasol tru tru ol i lotuim ol god giaman.

Yumi Mas Lukaut Gut

Tru, taim ol Israel i go insait long Graun Bilong Promis na sindaun namel long ol asples, ating ol i no bin tingting long go insait long lotu bilong ol god Bal na bihainim ol pasin nogut bilong en. Tasol ol i bung wantaim ol dispela lain na dispela i pulim ol long mekim ol dispela pasin nogut. Orait wankain samting nogut bai painim yumi tu sapos yumi pren wantaim ol lain i gat gutpela pasin, tasol ol i no bihainim ol bilip na lo Kristen na ol stiatok bilong en. Tru, sampela taim yumi mas bung na toktok wantaim ol man i no bilip, olsem long ples wok, o long skul, o long haus bilong yumi yet. Tasol samting i bin painim ol Israel i mas i stap olsem piksa bilong givim tingting long yumi olsem sapos yumi bung wantaim ol kain lain olsem, hevi bai painim yumi. Baibel i kamapim dispela tok i tru yumi no inap abrusim, olsem: “Sapos yumi poroman wantaim ol man nogut, bai ol i bagarapim gutpela pasin bilong yumi.”​—1 Ko. 15:33.

Long nau i gat planti traim inap painim yumi, em ol i wankain olsem ol traim i bin painim ol Israel. Ol lain bilong nau tu ol i gat planti god giaman bilong ol. Olsem: Mani, ol lain i gat nem long singsing samting, o ol i gat nem long pilai spot, ol samting bilong politik, sampela bikman bilong lotu, na sampela insait long famili yet. Ol dispela samting inap kamap nambawan bikpela samting long laip bilong yumi. Sapos yumi kamap pren bilong ol lain i no save laikim Jehova, dispela inap bagarapim pasin bilong yumi long pas gut wantaim God.

Pasin pamuk i insait long lotu bilong Bal na dispela i bin pulim planti Israel. Na long nau tu, ol wankain traim olsem i save pulim sampela namel long lain bilong God. Olsem: Long haus bilong em yet wanpela Kristen inap lukim ol piksa nogut bilong pasin pamuk long Intenet na nau bel bilong em bai i gat tok. Sori tumas sapos wanpela Kristen i larim ol piksa nogut bilong Intenet i pulim em!

‘Man i Bihainim Tok Bilong God i Ken Amamas’

Em samting bilong yumi wan wan yet long skelim olsem yumi bai bihainim tok bilong Jehova o sakim tok bilong em taim yumi makim ol poroman yumi laik bung wantaim ol. (Lo 30:​19, 20) Olsem na yumi mas askim yumi yet: ‘Long taim bilong malolo o painim amamas, mi save poroman wantaim husat? Ol i gat wanem tingting long ol lo bilong God? Ol i bihainim stretpela pasin o nogat? Ol i save lotuim Jehova? Sapos mi poroman wantaim ol, dispela bai kirapim mi long kamap gutpela Kristen moa?’

Man bilong raitim song i tok: “Ol man i wokabaut stret na i no gat asua, na i save bihainim lo bilong Bikpela, ol i ken amamas. Ol man i bihainim tru olgeta tok bilong God, ol i ken amamas.” (Sng. 119:​1, 2) Tru tumas, “yu wanem man o meri i save pret long Bikpela na i save bihainim tok bilong en, yu ken amamas.” (Sng. 128:1) Olsem na taim yumi laik makim ol poroman bilong yumi, yumi mas larim ol popaia bilong lain Israel i skulim yumi na yumi bihainim tru olgeta tok bilong Jehova.​—Snd. 13:20.

[Piksa long pes 26]

Sapos yumi poroman wantaim ol lain i no save laikim Jehova, dispela inap pulim yumi long lotuim ol god giaman