Ehut—Man Bilong Bilip na Strongpela Bel

PLANTI yia i lus pinis, kirap long taim ol Israel i kam nupela long Graun Bilong Promis. Moses na senis bilong em, Josua, i bin dai longtaim pinis. I no gat man bilong bilip kain olsem tupela i stap, olsem na ol Israel i no strong moa long mekim klinpela lotu. Ol i bin kirap long lotuim ol god giaman Bal na ol pos ston.a Dispela i mekim na Jehova i larim ol Siria i daunim lain bilong em inap 8-pela yia. Orait nau ol Israel i krai long God i ken helpim ol. Em i marimari long ol na putim gut yau. Jehova i kamapim wanpela jas, Otniel, bilong kisim bek lain bilong Em.​—⁠Hetman 3:​7-11.

Ol dispela samting i mas skulim ol Israel long wanpela as tok i tru​—⁠pasin bilong bihainim tok bilong Jehova i save kamapim ol blesing, tasol pasin bilong sakim tok i save kamapim ol samting nogut. (Lo 11:​26-28) Tasol ol manmeri bilong Israel ol i no larim dispela samting i skulim ol. Gutaim i stap 40 yia, na bihain ol i lusim gen klinpela lotu.​—⁠Hetman 3:⁠12.

Ol Moap i Daunim Ol

Orait nau Jehova i larim King Eklon bilong Moap i daunim ol. Baibel i tok em i “patpela man tru.” Ol Amon na ol Amalek i helpim Eklon, na em i go pait long ol Israel na wokim haus bilong em long Jeriko, em “Taun Bilong Ol Diwai Det.” Em namba wan taun bilong ol Kenan ol Israel i bin daunim, tasol nau em i kamap olsem hetkota bilong dispela man i lotuim god giaman Kemos!b​—⁠Hetman 3:​12, 13, 17.

Eklon i mekim hatpela pasin long ol Israel i go inap 18 yia; em i strong long ol i mas tromoi bikpela takis na dispela i putim bikpela hevi long ol. Olgeta taim em i singaut long takis, na long dispela rot ol Moap i kamap strong long mani samting​—⁠ol gutpela samting bilong Israel i wok long pinis. Olsem na lain bilong God i singaut long em i ken helpim ol, na Jehova i putim yau gen. Em i kamapim narapela man bilong kisim bek ol​—⁠em i bilong lain Benjamin, nem bilong em Ehut. Ehut i gat tingting olsem taim ol i go givim narapela takis long Eklon, em bai pinisim hatpela pasin em Eklon i mekim long ol Israel.​—⁠Hetman 3:​14, 15.

Bilong mekim dispela wok, Ehut i mas i gat strongpela bel, na bilong redi olsem, em i wokim wanpela bainat na sapim tupela sait bilong en; longpela bilong bainat inap wanpela kubit. Sapos dispela kubit i sotpela, orait dispela bainat inap olsem 38 sentimita​—⁠em wanpela sotpela bainat. I no gat samting namel long han na sap bilong bainat. Olsem na Ehut inap haitim dispela liklik bainat aninit long laplap bilong em. Na tu, Ehut em i kaisman, olsem na em inap pasim dispela bainat long han sut bilong em​—⁠han sut i no ples ol man i save putim ol samting bilong pait.​—⁠Hetman 3:​15, 16.

Ehut inap kisim nogut long dispela samting em i laik mekim. Olsem: Olsem wanem sapos ol wokman bilong king i sekim klos bilong Ehut bilong painimaut em i holim samting bilong kilim man i dai? Tasol maski ol i no mekim olsem, ating ol i no ken larim king bilong ol i stap wanpela tasol wantaim wanpela Israel! Tasol sapos ol i larim tupela tasol i stap na Ehut inap kilim Eklon i dai, orait Ehut inap lusim dispela hap olsem wanem? Na taim ol wokman bilong Eklon i no save yet long dispela samting, Ehut inap ranawe i go inap long wanem mak?

Ating Ehut yet i bin wok long tingim tingim ol dispela samting, na ating em i bin tingim sampela hevi em inap painim em. Tasol em i no larim dispela samting i pasim rot long em, nogat; em i strongim bel na bilip long Jehova.

Ehut i Bungim Eklon

De bilong givim takis long Eklon i kamap pinis. Ehut na lain bilong em ol i go insait long haus bilong king. I no longtaim na ol i sanap long ai bilong King Eklon yet. Tasol taim bilong kilim i dai Eklon i no kamap yet. Taim ol i givim pinis takis, Ehut i salim ol i go.​—⁠Hetman 3:​17, 18.

Bilong wanem Ehut i no hariap long kilim Eklon i dai? Em i pret? Nogat tru! Bilong kilim Eklon i dai, Ehut wanpela i mas i stap wantaim king, tasol long dispela namba wan taim em i bin bungim king, em wanpela tasol i no bin i stap. Na tu, Ehut i mas i gat rot bilong lusim haus hariap. Em wanpela tasol bai i no hatwok tumas long lusim haus i go, tasol ol man i bringim takis i kam, olgeta wantaim bai ol i hatwok. Olsem na Ehut i stap isi na wetim wanpela taim na rot i op. Ehut i mekim wok long dispela sotpela taim em i stap wantaim Eklon long em i ken save long ol sekyuriti samting na ol rum bilong haus i stap we.

Taim em i kamap pinis long ples bilong ‘katim ston, klostu long Gilgal,’ Ehut i lusim lain bilong em na i go bek long haus bilong Eklon. Bilong kamap long haus, em i mas wokabaut i go inap tupela kilomita, na dispela i givim hap taim long em bilong tingim dispela wok em i mas mekim na long beten askim Jehova long helpim em.​—⁠Hetman 3:⁠19.

Ehut i Go Bek

Ating ol i amamas long lukim Ehut i kam bek long haus bilong king. Ating ol Israel i bin givim bikpela takis long Eklon na em i stap isi. O ating Ehut i bin toktok gut wantaim king maski em i bin i stap sotpela taim tasol long namba wan taim em i bin go lukim em. Tasol maski wanem wanem samting i mekim, Ehut i stap gen wantaim Eklon.

Ehut i tok: “King, mi gat tok bilong yu wanpela tasol.” Ol samting i kamap pinis em i makim olsem Jehova i wok long stiaim Ehut. Tasol i gat wanpela samting Ehut i tingting planti long en. Dispela “tok bilong [king] wanpela tasol” em Ehut i karim i kam, em i no samting bilong ol wokman bilong king. Sapos Jehova i laik helpim Ehut, orait em i mas mekim kwiktaim. King i tokim ol wokman: “Yupela go. Mitupela tasol bai i stap.” Eklon i no laik bai ol wokman i harim dispela “tok bilong [em] wanpela tasol.” Tingim amamas bilong Ehut taim em i harim king i tok olsem!​—⁠Hetman 3:​19.

Taim Ehut i kamap long Eklon, Eklon i sindaun i stap long rum bilong em antap long rup bilong haus, na Ehut i tok: “Mi gat wanpela tok bilong yu i kam long God.” Taim em i kolim dispela tok “God,” yu ting Ehut i toktok long Kemos? Ating Eklon i ting olsem. Em i laik harim sampela tok moa, olsem na king i lusim sia king na i sanap. Ehut i kam klostu, tasol ating em i wokabaut isi isi, nogut king i kirap na tingting planti. Orait nau, wantu tasol, “Ehut i pulim dispela bainat em i bin haitim aninit long laplap long han sut bilong en, na em i planim long bel bilong king. Ehut i no kamautim dispela bainat long bel bilong king, olsem na sap na han bilong bainat i go insait long bel bilong em olgeta. Na gris bilong bel i karamapim bainat, na sap bilong bainat i kamap long baksait bilong en.”​—⁠Hetman 3:​20-22.

Ol wokman bilong king i stap klostu ol i no kirap mekim wanpela samting. Tasol hevi inap painim yet Ehut. Wantu ol wokman bilong Eklon inap kam insait long rum na lukim bodi bilong king i stap. Ehut i mas hariap lusim dispela haus! Em i lokim ol dua na kalap i go ausait long windo bilong rum na i ranawe i go.​—⁠Hetman 3:​23, 24a.

Painim Pinis na Lus Long Pait

Bihain liklik ol wokman bilong Eklon i laik save, olsem wanem long king. Tasol ol i pret long mekim samting king i no laikim, olsem na ol i no singaut long em. Bihain ol i lukim ol dua bilong dispela rum ol i pas i stap. Ol i toktok long ol yet olsem, “Ating king i go long smolhaus.” Ol i wet longpela taim liklik, na nau ol i kirap na tingting planti. Orait nau ol i no inap wet moa. “Olsem na ol i kisim ki na opim [ol dua bilong rum antap long rup bilong haus], na ol i lukim bikman bilong ol i dai pinis na i slip i stap long plua”!​—⁠Hetman 3:24b, 25.

Taim ol wokman i bin wet i stap yet, Ehut i ranawe pinis. Em i abrusim dispela ples bilong katim ston, long Gilgal, na em i kamap long ples Seira long ples maunten bilong Efraim. Em i singaut long ol man bilong Israel i kam bung na ol i bihainim em i go pait long ol Moap. Baibel i tok, “ol Israel i kilim i dai samting olsem 10,000 strongpela soldia bilong Moap. I no gat wanpela i ranawe.” Ol Israel i winim ol Moap, na bihain, i no gat pait moa i stap long graun bilong ol Israel inap long 80 yia.​—⁠Hetman 3:​26-30.

Pasin Bilong Ehut i Skulim Yumi

Ehut i bilip long God na dispela i kirapim em long mekim wok. Tru, Hibru sapta 11 i no kolim nem bilong Ehut long lista bilong ‘ol man i bilip long God na ol i winim pait na daunim ol ami bilong planti king, na ol i kamap strongpela man tru bilong pait na ranim ol bikpela ami bilong ol arapela lain,’ nogat. (Hibru 11:​33, 34) Tasol Jehova i helpim Ehut taim em i kamapim bilip bilong em na em i kisim bek ol Israel long han bilong King Eklon i bin mekim nogut tru long ol.

Ehut em i man bilong strongpela bel. Em i mas i gat strongpela bel bambai em inap mekim gut wok long bainat. Yumi ol wokboi bilong God long nau, yumi no save mekim wok long bainat tru. (Aisaia 2:4; Matyu 26:52) Yumi save mekim wok long “bainat bilong Holi Spirit,” em Tok Bilong God. (Efesus 6:17) Ehut i save gut long pasin bilong mekim wok long bainat bilong em. Yumi tu i mas lain gut long pasin bilong mekim wok long Tok Bilong God long taim yumi autim gutnius bilong Kingdom. (Matyu 24:14) Sapos yumi stadi long Baibel, go oltaim long ol miting Kristen, givim bel long mekim wok autim tok, na beten na wetim Papa bilong yumi long heven i helpim yumi, ol dispela samting bai helpim yumi long bihainim ol gutpela pasin bilong Ehut, em man bilong bilip na strongpela bel.

[Ol Futnot]

[Piksa long pes 31]

Ehut na lain bilong em ol i givim takis long King Eklon

[Kredit Lain]

Ol i kisim long Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s