Pinis Bilong Tok i Mekim Gutpela Wok

ATING yu bin skelim gut ol buk samting na stretim gut ol tok yu laik kamapim. Na tu, ating yu redim wanpela kirap bilong tok i save kirapim tru tingting bilong ol man. Tasol i gat wanpela samting moa yu mas mekim​—redim wanpela pinis bilong tok i mekim gutpela wok. Dispela i no liklik samting. Planti taim ol tok yu mekim long pinis bilong tok em ol tok ol man i save tingim longpela taim moa, winim ol narapela tok yu mekim. Sapos pinis bilong tok i no gat strong, ating ol narapela tok yu bin mekim paslain bai i no gat bikpela strong.

Tingim ol dispela samting: Klostu long taim em i laik dai, Josua i mekim wanpela gutpela tok long ol hetman bilong Israel. Taim em i stori pinis long ol samting Jehova i bin mekim long lain Israel kirap long taim bilong Abraham, yu ting Josua i bin kolim gen ol bikpela tok tasol? Nogat. Em i pilim tru tok em i mekim na em i tokim ol: “Orait nau yupela harim. Yupela i mas lotu long Bikpela na oltaim yupela i mas mekim wok bilong en long olgeta strong bilong yupela.” Ritim tok Josua i mekim bilong pinisim tok bilong em, i stap long Josua 24:​14, 15.

Narapela bikpela tok i stap long Aposel 2:​14-36, em aposel Pita i bin mekim long wanpela bikpela lain long Jerusalem long Pentikos 33 C.E. Pastaim em i kamapim klia olsem samting nau ol i lukim i truim tok profet bilong Joel olsem God bai kapsaitim spirit bilong em long ol man. Bihain em i soim olsem wanem dispela i stret wantaim ol tok profet bilong Mesaia long Buk Song i tok profet long Jisas Krais i kirap bek na i go antap na sindaun long han sut bilong God. Na long pinis bilong tok, Pita i kamapim klia bikpela samting olgeta lain i stap long odiens bilong em i mas tingim. Em i tok: “Olsem na yupela olgeta lain Israel, yupela i mas save gut olsem, dispela Jisas yupela i nilim em long diwai kros, God i makim em i stap Bikpela, na man bilong kisim bek ol manmeri bilong en.” Ol i askim olsem: “Ol brata, bai mipela i mekim wanem nau?” Pita i bekim olsem: “Yupela olgeta wan wan i mas tanim bel na kisim baptais long nem bilong Jisas Krais.” (Ap. 2:​37, 38) Long dispela de stret, 3,000 manmeri em bel bilong ol i kirap tru long tok ol i bin harim, ol i kisim tok i tru bilong Jisas Krais.

Ol Samting Bilong Tingim. Tok yu mekim long pinis bilong tok i mas stret wantaim tim bilong tok. Pinis bilong tok i mas kamapim ol bikpela tok yu bin mekim insait long tok bilong yu. Ating yu laik kolim sampela bikpela tok i stap long tim, na sapos yu laik, yu ken kolim tim olgeta.

As na yu kamapim ol tok em bilong kirapim ol man long mekim sampela samting i stret long ol tok yu kamapim. Wanpela bikpela wok bilong pinis bilong tok em bilong soim ol man long ol samting ol i mas mekim. Olsem wanem? Taim yu makim tim na ol bikpela tok, yu bin tingim gut as na dispela tok em i bikpela samting long odiens na wanem wok bilong dispela tok? Sapos olsem, yu save long samting yu laik bai ol i mas mekim. Orait nau yu mas stori gut long samting ol i mas mekim na ol i ken mekim olsem wanem.

Pinis bilong tok i save soim odiens long samting ol i mas mekim, na tu pinis bilong tok i mas kirapim ol long mekim samting. Em i mas kamapim ol gutpela as bilong bihainim ol tok yu mekim na wanem gutpela samting inap kamap sapos ol i mekim olsem. Sapos yu bin tingim gut ol tok bai yu mekim long laspela sentens na yu kamapim gut, dispela bai strongim tru gutpela wok em tok bilong yu i bin mekim.

Tingim, tok i laik pinis. Tok yu mekim i mas makim olsem. Na yu mas mekim toktok long spit i stret. No ken toktok hariap i go inap long pinis na wantu tasol tok i pinis. Na tu, yu no ken larim krai bilong nek i go liklik isi isi na ol man i no inap harim. Strong bilong nek i mas stret long ol man i ken harim, tasol em i no ken antap tumas. Ol laspela sentens yu kolim i mas makim olsem tok i laik pinis. Pasin bilong yu long kolim ol dispela sentens i mas soim olsem yu givim bel na bilipim tru dispela tok. Taim yu wok long redim tok, no ken lusim tingting long mekim mekim planti taim pinis bilong tok.

Pinis bilong tok i mas longpela olsem wanem? Yu no ken skelim dispela samting long klok tasol. Nogut odiens i pilim olsem pinis bilong tok i go longpela tumas. Bilong save olsem longpela bilong pinis bilong tok i stret, yumi ken skelim olsem pinis bilong tok i mekim wanem long odiens. Ol man i save laikim ol pinis bilong tok i isi long kisim, na i kamapim klia na stret ol tok. Narapela kain pinis bilong tok em inap mekim gutpela wok sapos yu redim gut, i olsem: Mekim wanpela sotpela tok piksa i makim gut tok yu laik kamapim. Skelim sotpela tok bilong pinisim Buk Saveman, i stap long Saveman 12:​13, 14, wantaim pinis bilong sotpela tok Jisas i bin mekim antap long maunten, i stap long Matyu 7:​24-27.

Long Autim Tok. Long wok autim tok, planti taim yu mas kamapim pinis bilong tok. Taim yu redim gut ol tok na yu gat laik long helpim ol man, tok bilong yu inap mekim planti gutpela wok. Sapos yu bihainim ol tok kaunsel yumi stori pinis long en long dispela stadi, dispela bai helpim yu maski yu toktok wantaim wanpela man tasol.

Ating yu bai toktok wantaim man inap sotpela taim ating wanpela minit tasol, long wanem, man i bisi. Sapos i stret long mekim olsem, yu ken tok: “Mi save. Tasol mi laik stori liklik tasol long wanpela gutpela samting yu ken tingim. Baibel i soim olsem Man bilong wokim yumi i laik mekim wanpela gutpela samting tru​—em i laik mekim dispela graun i kamap wanpela ples we ol man i ken amamas oltaim long en. Yumi inap stap long dispela Paradais, tasol yumi mas lain long ol samting God i laik bai yumi mekim.” O yu ken tokim man olsem yu laik kam bek long narapela taim.

Sapos man i no amamas long toktok wantaim yu na em i katim tok bilong yu na yu no inap stori longpela taim, yu inap mekim yet gutpela wok. Tingim ol gutpela tok kaunsel i stap long Matyu 10:​12, 13 na Rom 12:​17, 18. Pasin bilong yu long bekim tok isi em inap senisim tingting bilong em long ol Witnes Bilong Jehova. Dispela em i wanpela gutpela wok.

O ating yu bin toktok gut wantaim man bilong haus. I gutpela long kolim gen bikpela tok yu laik bai em i holim long tingting, a? Mekim sampela tok i save kirapim em long mekim samting long tok em i harim.

Sapos yu lukim olsem yu inap toktok wantaim dispela man long narapela taim, orait mekim sampela tok long em na bai em i gat laik long yu kam bek lukim em. Kamapim wanpela askim​—olsem i stap long Buk Toktok Gut o long wanpela buk ol i wokim bilong mekim stadi long en. Tingim as na yu laik mekim olsem, olsem Jisas i kamapim long Matyu 28:​19, 20.

Olsem wanem? Yu save mekim Baibel-stadi wantaim man? Sapos yu kolim gen tim bilong tok, dispela bai helpim em long putim long tingting ol samting yu bin toktok long en. Taim yu kamapim ol riviu askim, dispela bai helpim sumatin long tingim gut ol bikpela tok, na em i gutpela moa sapos yu no mekim riviu hariap tumas. Sapos yu kamapim wanpela askim i stori long olsem wanem ol dispela tok yupela i stadi long en inap helpim sumatin yet, o olsem wanem em inap kamapim ol dispela tok long ol narapela, dispela inap helpim em long tingting long olsem wanem em inap mekim wok long ol samting em i lainim.​—Snd. 4:7.

Tingim​—ol tok yu kamapim long pinis bilong tok, dispela bai mekim na tok bilong yu bai mekim gutpela wok o nogat.