Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • rs p. 389-395
  • Satan

No gat vidio bilong dispela seksen.

Sori, popaia kamap long lodim vidio.

  • Satan
  • Toktok Gut Wantaim Ol Man Long Baibel
  • Wankain Infomesen
  • Ol Hetman i Stap Long Ples Spirit
    Wastaua i Tokaut Long Kingdom Bilong Jehova—1995
  • Wanpela Birua Bilong Laip Oltaim
    Yu Inap i Stap Oltaim long Paradais long Graun
  • Yu Mas Was i Stap—Satan i Laik Kaikaim Yu!
    Wastaua i Tokaut Long Kingdom Bilong Jehova—2015
  • Satan
    Kirap!—2013
Lukim Moa
Toktok Gut Wantaim Ol Man Long Baibel
rs p. 389-395

Satan

Stori: Satan em i wanpela spirit, na em i nambawan birua bilong God Jehova na bilong olgeta man i lotuim dispela God tru. Em i kisim dispela nem Satan, long wanem, em i birua long Jehova. Em i krungutim tru gutnem bilong God. Baibel i kolim Satan “snek bilong bipo yet,” long wanem, long Iden em i toktok long Iv long maus bilong snek na giamanim em. Long dispela as, “snek” i makim “man bilong giamanim ol man.” Kamapim Tok Hait i kolim Satan olsem “bikpela snek.”

Olsem wanem yumi ken save dispela spirit em i stap tru?

Baibel em i nambawan rot bilong kisim dispela save. Baibel i kolim nem bilong Satan planti taim. Baibel i stori long wanpela man em i bin lukim Satan. Em i husat? Em Krais Jisas, em i bin i stap long heven taim em i no kam daun yet long graun. Planti taim Jisas i bin kolim nem bilong dispela ensel nogut.​—⁠Lu 22:31; 10:18; Mt 25:⁠41.

Taim yumi skelim ol tok Baibel i mekim long Satan, yumi pilim dispela tok i stret. Ol man i bin mekim pasin nogut tru long ol narapela, tasol dispela i winim tru pasin nogut ol yet inap tingting long mekim. Ol man i gat laik long i stap bel isi wantaim, tasol inap planti tausen yia pinis ol i birua birua, na bagarapim man, na ol bikpela pait i bin kamap, na nau dispela pasin i laik bagarapim olgeta manmeri. Bilong wanem i olsem? As bilong dispela i kamap klia long stori bilong Baibel long Satan na ol wok bilong em.

Sapos yumi bilipim ol tok Baibel i mekim long Satan, tasol Satan i no i stap tru, orait dispela bilip i no inap helpim yumi, a? Tasol planti man, bipo ol i save mekim kain kain wok marila o ol i bin insait long wanpela lain i mekim, ol i tok ol i bin karim bikpela hevi, long wanem, ol i save harim “nek” bilong sampela spirit, o ol i gat spirit nogut i stap insait long ol, o kain samting olsem. Taim ol i kisim save long ol tok bilong Baibel long Satan na lain spirit nogut bilong em, na ol i bihainim tok bilong Baibel na sakim ol kain kain pasin marila samting, na ol i beten askim Jehova long helpim ol, nau i olsem bikpela hevi i tekewe long ol.​—⁠Lukim het-tok “Marila Posin Samting,” pes 251-256.

Man i bilip olsem Satan em i stap, em i no ken ting Satan em i gat tupela kom, na tel i gat sap, na em i holim fok na kukim ol man long bikpaia. Nogat. Baibel i no stori olsem long Satan. Ol piksa bilong god giaman bilong ol Grik, em Pan, na buk bilong wanpela man bilong Itali i stori long bikpaia (Inferno, bilong Dante Aligyeri), dispela i givim tingting long ol man bilong wokim piksa long bipo na ol i wokim piksa bilong Satan olsem. Baibel i no stori long bikpaia; Baibel i tok “ol man i dai pinis, ol i no inap save long wanpela samting.”​—⁠Sav 9:⁠5.

Yu ting Satan em i pasin nogut i stap insait long ol man?

Jop 1:​6-12 na Jop 2:​1-7 i stori long God Jehova na Satan i toktok wantaim. Sapos Satan em i pasin nogut i stap insait long man na em i toktok wantaim Jehova, bai i olsem pasin nogut i stap insait long Jehova. Tasol Baibel i tok, “i no gat rong” i stap long Jehova. (Sng 92:15; KTH 4:⁠8) Hap tok Hibru (has·Sa·tanʹ olsem dispela Satan) ol i tanim olsem “Satan” long Buk Jop, dispela i kamapim klia olsem Satan em i nambawan birua bilong God.​—⁠Lukim tu tok i stap daunbilo bilong Sekaraia 3:​1, 2 long “NW” Reference edition.

Luk 4:​1-13 i stori long Satan i traim Jisas bilong kirapim Jisas long bihainim tok bilong em. Baibel i kolim ol tok Satan i bin mekim na bekim bilong Jisas. Yu ting i gat pasin nogut i stap insait long Jisas na dispela i traim em? Nogat, a? Long wanem Baibel i tok, “i no gat wanpela rong i stap long em.” (Hi 7:26; 1 Pi 2:22) Tru, long Jon 6:​70, Baibel i kolim wanpela hap tok Grik (di·aʹbo·losʹ) bilong makim pasin nogut i kamap insait long bel bilong Judas Iskariot. Tasol hap tok Grik (ho di·aʹbo·los) Baibel i kolim long Luk 4:3 i makim dispela spirit nogut yet, em Satan.

Pasin bilong sutim asua i go long Satan, ating em i rot bilong ol man bilong abrusim asua bilong ol hevi i kamap?

Sampela man i save sutim asua i go long Satan long ol pasin nogut ol yet i mekim. Tasol Baibel i makim olsem ol hevi i painim ol man long han bilong ol narapela o long rot bilong pasin nogut ol yet i mekim, planti hevi olsem em asua bilong ol yet. (Sav 8:9; Ga 6:⁠7) Tasol Baibel i tokim yumi, dispela spirit nogut em i stap tru; em i birua bilong yumi na em i putim planti hevi long yumi. Na Baibel i tokim yumi tu long ol wok bilong em, na i makim rot yumi mas bihainim bambai Satan i no ken bosim yumi moa.

Satan i bin kamap olsem wanem?

Olgeta wok bilong Jehova i gutpela olgeta; em i no as bilong pasin nogut; olsem na em i no bin wokim wanpela spirit nogut. (Lo 32:4; Sng 5:⁠4) Dispela spirit em i bin kamap Satan, pastaim em i gutpela pikinini spirit bilong God. Tasol em i no laik i stap gut long wok God i givim long em. (Ese 28:15) God i wokim olgeta man na ensel i gat tingting na ol inap tingim ol samting ol i laik mekim, tasol Satan i mekim wok nogut long dispela. Laik nogut i kamap long bel bilong em na em i larim dispela laik i kamap strong​—⁠em i hambak na em i laik kisim biknem. Ol man i mas lotuim God tasol, tasol Satan i laik bai ol i lotuim em, olsem na em i pulim Adam tupela Iv bai ol i sakim tok bilong God na bihainim tok bilong em. Long dispela pasin em i mekim em yet i kamap Satan, olsem “birua.”​—⁠Je 1:​14, 15; lukim tu het-tok “Sin,” pes 406, 407.

Taim Satan i bikhet, bilong wanem God i no bagarapim em wantu tasol?

Satan i kamapim sampela bikpela askim olsem: (1) I stret Jehova i stap nambawan king? Na em i mekim stret wok king o nogat? Olsem wanem? Jehova i pasim ol man long mekim samting em inap helpim ol long i stap amamas? Tru ol man i mas bihainim tok bilong God bambai ol inap bosim gut ol samting ol i laik mekim na i stap oltaim? Yu ting God i giaman taim em i putim lo i tok, sapos ol i sakim tok bai ol i dai? (Stt 2:​16, 17; 3:​3-5) Olsem na i stret Jehova i stap bos o nogat? (2) Ol ensel na ol man, em ol i gat tingting, ol inap i stap gut long Jehova o nogat? Adam tupela Iv i lusim God na dispela i kamapim askim olsem: Ol wokboi bilong God Jehova i laikim em tru na dispela i kirapim ol long bihainim tok bilong em, o olgeta bai bihainim Satan na lusim God? Bihain, long taim bilong Jop, Satan i kamapim strong moa dispela askim. (Stt 3:6; Jop 1:​8-11; 2:​3-5; lukim tu Luk 22:31.) Sapos God i kilim i dai ol bikhetman, dispela i no ken stretim ol dispela bikpela tok i bin kamap.

God i save pinis, wok bilong em i stret. Tasol em i makim bikpela hap taim bilong stretim ol dispela askim bambai ol i no ken kamap gen na bagarapim bel isi na gutpela i stap bilong ol ensel na ol man. Adam na Iv i sakim tok bilong God na bihain bihain tupela i dai, olsem God i bin tok. (Stt 5:⁠5) Tasol i gat sampela samting moa insait long ol tok Satan i sutim long Jehova. Olsem na Jehova i larim Satan na ol man i traim save bilong ol na kamapim kain kain gavman. Tasol i no gat wanpela i bin helpim ol long i stap amamas oltaim. Na God i bin larim ol man i mekim ol samting ol yet i laik mekim, na ol i mekim kain kain pasin i kalapim ol stretpela lo bilong Em. Ol samting i bin kamap long dispela rot i kamapim klia olsem pasin bilong ol i nogut. Baibel i tok stret olsem: “Mipela man i no inap bosim wokabaut bilong mipela yet.” (Jer 10:23) Tasol long dispela rot God i mekim na ol wokboi bilong em inap kamapim klia olsem ol i stap gut long em, long wanem, ol i laikim em tumas na bihainim tok bilong em, maski Satan i putim planti samting bilong pulim ol na em i mekim nogut long ol. God i tokim ol wokboi bilong em: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Snd 27:11) Ol man i stap gut long God, ol i kisim planti blesing long nau, na bihain bai ol inap kisim laip oltaim na i stap gutpela olgeta. Long dispela taim bai ol i bihainim laik bilong God, em ol i laikim tru ol pasin bilong em.

Yu ting Satan i gat strong long nau?

Jisas i kolim Satan “hetman i save bosim dispela graun.” Ol man i larim em i kirapim ol long sakim ol lo bilong God, na dispela i makim olsem ol i save bihainim tok bilong em. (Jo 14:30; Ef 2:⁠2) Na Baibel i tok, em i “god bilong dispela graun.” Ol pasin lotu ol man bilong dispela graun i mekim i givim biknem long em.​—⁠2 Ko 4:4; 1 Ko 10:20.

Bilong traim Jisas, Satan i soim olgeta kingdom bilong graun long em na tok long givim long em. Satan i tok: “Olgeta dispela samting ol i bilong mi pinis. Na sapos mi laik givim long wanpela man, orait mi ken givim. Sapos yu brukim skru na lotu long mi, orait bai mi givim yu dispela olgeta samting.” (Lu 4:​5-7) Kamapim Tok Hait 13:​1, 2 i kamapim klia olsem Satan i givim ‘wok king na bikpela strong’ long ol gavman politik bilong dispela graun. Daniel 10:​13, 20 i tok, i gat ol ensel bilong Satan i bosim ol bikpela kantri bilong graun. Efesus 6:12 i tok, ol i “strongpela spirit na ol gavman . . . i save bosim graun long dispela taim bilong tudak,” na ol i “spirit nogut i stap antap.”

Olsem na 1 Jon 5:19 i tok: “Dispela graun olgeta em i stap aninit long strong bilong Satan.” Tasol dispela strong i bilong liklik taim tasol, na i gat wanpela as tasol na Satan i holim dispela strong, em olsem: Jehova, em God i Gat Olgeta Strong, i larim em i holim.

God bai larim Satan i giamanim ol man i go inap long wanem taim?

Bilong save olsem yumi stap long las taim bilong pasin nogut Satan i bin kamapim, lukim “Ol Yia Ol Samting i Bin Kamap,” pes 341-343, na bikpela het-tok “Taim Bilong Las De.”

Baibel i stori long strong bilong Satan bai pinis olsem: “Mi lukim wanpela ensel i lusim heven na i kam daun. . . . Em i holimpas [Satan] . . . Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na . . . Satan bai i no inap giamanim moa ol manmeri bilong olgeta lain. Em i mas wetim 1,000 yia i pinis pastaim, na bihain ol i mas lusim em, na long sotpela taim tasol em i ken i go nabaut.” (KTH 20:​1-3) Na bihain “God bai i tromoi [Satan] i go daun long bikpela hul i gat hatpela paia bilong ol ston salfa.” (KTH 20:10) Wanem insait bilong dispela tok? Kamapim Tok Hait 21:8 i tok: “Dispela em i namba 2 dai.” Bai Satan i pinis olgeta!

Taim ol i kalabusim Satan ‘long hul i no gat as,’ yu ting dispela i makim olsem em bai kalabus inap 1,000 yia long dispela graun i bagarap na i stap nating na i no gat man bilong Satan i traim ol?

Sampela man i tok, Kamapim Tok Hait 20:3 (tok bilong en i stap long pes 393) i makim olsem. Ol i tok “hul i no gat as” i makim dispela graun i bagarap na i stap nating. Tasol dispela tok i no stret. Kamapim Tok Hait 12:​7-9, 12 i tok, taim Satan i no kalabus yet long hul, ol i tromoi em i lusim heven na i kam daun long graun na em i putim bikpela hevi moa long ol man. Olsem na taim Kamapim Tok Hait 20:3 i tok, “ensel i tromoi em i go daun long hul i no gat as,” i no olsem em bai stap tasol long dispela graun ol i tromoi em pinis i kam daun long en. Ensel bai rausim em i go longwe bambai em “i no inap giamanim moa ol manmeri bilong olgeta lain. Em i mas wetim 1,000 yia i pinis pastaim.” Na tu Kamapim Tok Hait 20:3 i tok, taim dispela 1,000 yia i pinis, Satan bai lusim hul i kam ausait; i no ol manmeri bai lusim. Taim Satan i lusim hul, bai em i lukim ol manmeri i stap pinis long graun, em bipo ol i bilong olgeta lain.

Sampela taim ol man i kolim tok bilong Aisaia 24:​1-6 na Jeremaia 4:​23-29 bilong helpim dispela bilip. Ol dispela ves i tok: “Bikpela bai i bagarapim tru graun na graun bai i stap nating. . . . Graun bai i bagarap olgeta na i stap nating. Bikpela i tok pinis long mekim ol dispela samting i kamap.” “Mi lukim graun i bagarap na i stap nating na . . . mi no lukim wanpela man i stap. . . . Bikpela i tok olsem, ‘Dispela graun olgeta bai i kamap ples nating . . . Na olgeta taun i stap nating, na i no gat man i stap long ol moa.” Wanem insait bilong ol dispela tok profet? Namba wan truim bilong en i painim Jerusalem na graun bilong Juda. Jehova i laik givim strafe long ol Israel na em i larim ol Babilon i kam bagarapim kantri Israel na bihain graun bilong ol i stap nating. (Lukim Jeremaia 36:29.) Tasol long dispela taim bipo God i no bin pinisim olgeta manmeri i stap long olgeta hap bilong graun. Nogat. Na nau tu em i no ken mekim olsem. (Lukim “Graun,” pes 147-150, na bikpela het-tok “Heven.”) Tasol em bai bagarapim tru dispela samting em bikhet Jerusalem bilong bipo i makim, em ol misin i holim nating nem Kristen​—⁠ol i mekim pasin nogut na bagarapim nem bilong em. Na em bai bagarapim olgeta narapela lain bilong Satan long graun.

Taim Satan i stap long hul i no gat as na Krais i bosim graun inap 1,000 yia, graun i no ken bagarap na i stap nating. Nogat. Em bai kamap gutpela ples paradais. (Lukim “Paradais.”)

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim