Yu Gat Wanem Kain Nem?

LONG Baibel, dispela tok “nem” sampela taim em i makim pasin bilong man. Olsem: Saveman King Solomon i bin tok: “Sapos ol man i ting yu gutpela man, orait dispela i gutpela tru, na i winim sanda i gat bikpela pe bilong en. Na de yu dai i winim de mama i bin karim yu.” (Saveman 7:1; skelim wantaim Sindaun 22:⁠1.) Olsem Solomon i tok, taim mama i karim pikinini, dispela pikinini i no gat gutnem. Tasol taim em i stap laip, nau em inap mekim ol samting na kisim gutnem. Gutnem bilong em i makim em i wanem kain man, olsem em i man bilong givim samting long ol narapela o tingim em yet tasol, em i gat pasin sori o nogat, em i man bilong daunim em yet o hambak, em i stretpela man o man nogut.

Tingim Devit. Long taim em i stap king, em i kamapim klia olsem em i strongpela man na i no save pret. Na tu, long pasin daun Devit i kamapim popaia bilong em na em i pilim tru bikpela rong em i bin mekim na em i tanim bel. I gat gutpela as na profet bilong Jehova i kamapim olsem Devit em “man i save bihainim pasin [Jehova] i laikim.” (1 Samuel 13:14) Yangpela Devit i gat gutnem pinis long ai bilong God.

Tasol king bilong ol Juda, em Jehoram i narapela kain​—⁠em i kisim nem nogut. Em i pulim ol manmeri na ol i no lotuim Jehova moa, na em i mekim na ol i kilim i dai 6-pela brata bilong em na sampela bikman bilong Juda. Olsem na Jehova i mekim wanpela sik nogut tru i kamap long Jehoram na bihain em i dai. Baibel i tok olsem taim Jehoram i dai “i no gat wanpela man i sori long em.”​—⁠2 Stori 21:⁠20.

Stori bilong i stap bilong Devit na Jehoram i kamapim olsem tok bilong Baibel long Sindaun 10:7 i tru: “Taim wanpela gutpela man i dai, ol manmeri i save tingim em na amamas moa yet. Tasol taim ol man nogut i dai, ol manmeri i save lusim tingting long ol kwiktaim.” Olsem na yumi wan wan i mas tingim gut dispela askim, ‘Mi gat wanem kain nem long ai bilong God na ol narapela?’