Planti i Tok Ol i Bilip

WANPELA meri bilong lotu long Brasil i tok: “Jisas i gutpela tru! Em i nambawan tru!” Tru tumas, nem bilong Jisas i gat strong. Long bipo yet na i kam inap nau, ol man i redi long kisim planti pen na hevi na i dai bilong bihainim em.

Aposel Pita na Jon ol i bin autim tok ‘long nem bilong Jisas’ long Jerusalem, olsem na ol i holim ol na wipim ol. Tasol ol “i lusim kaunsil na i go ausait. Na ol i amamas long God i ting ol inap long kisim sem long nem bilong Jisas.”​—⁠Aposel 5:​28, 41.

Antipas em narapela Kristen i stap long taim bilong ol aposel na em i tingim tru nem bilong Jisas. Long laspela buk bilong Baibel, em Kamapim Tok Hait, Jisas i tok long Antipas olsem em i “man bilong autim tok bilong mi . . . Em i bihainim tru tok bilong mi, na ol i kilim em i dai long ples bilong yupela, em dispela ples Satan i stap long en.” (KTH 2:13) Antipas na sampela narapela Kristen long Pergamum, ol i no laik lusim bilip bilong ol long Krais. Antipas i stap gut long nem bilong Jisas maski ol i kilim em i dai!

Inap 50 yia bihain, long 155 C.E., wankain traim i painim wanpela man em i tok em i wanpela Kristen, em Polikap. Ol i tokim em olsem em i mas toknogutim Krais. Tasol em i tokim ol: “Inap 86 yia mi bin mekim wok bilong Em, na Em i no bin mekim nogut long mi. Olsem wanem mi inap tok bilas long nem bilong King bilong mi em i bin kisim bek mi?” Em i no laik givim baksait long Krais, olsem na ol i pasim em long pos na kukim em long paia.

Ol aposel, na Antipas, na sampela moa ol i bin autim tok bilong Krais na ol i redi long i dai bilong strongim dispela tok ol i autim! Olsem wanem long ol manmeri long nau?

Nem Bilong Jisas Long Nau

Nem bilong Jisas i wok yet long kirapim tru bel bilong planti man. Long Latin-Amerika, long nau ol lotu i tok ol i bilip long Jisas i wok long kamap planti, winim ol yia bipo. Maski wanpela ples i liklik tasol, ol i gat wanpela haus lotu bilong ol Pentikostal. Na strong bilong ol dispela lotu long ol samting bilong wok politik i wok long kamap bikpela tu. Olsem: Long gavman bilong Brasil, i gat 31 memba ol i insait long ol dispela lotu.

Na Jisas i stap olsem nambawan bikpela samting long wanpela nupela lotu long Amerika long nau. Ol lain bilong dispela lotu ol i kolim nem bilong ol olsem Ol Man Bilong Bihainim Tok Promis. Long 1997 nius Time i tok, namba bilong ol man i go long ol miting bilong dispela lotu i go antap tru​—⁠long 1991 inap 4,200 man i go long ol miting bilong ol na long 1996 inap 1.1 milion man. Tok bilong wanpela singsing bilong ol i tok: “Long rot bilong Jisas mi win, Man bilong kisim bek mi inap oltaim oltaim.”

Tasol i no olgeta man i tingim nem bilong Jisas ol i kisim gutpela tingting. Planti taim ol pait i bin kamap long nem bilong Jisas. Ol i bin bagarapim nating ol Juda, na kilim i dai ol haiden, na givim bikpela pen long ol man i bikhet long misin, na bagarapim skin bilong ol, na pasim ol long pos na kukim ol​—⁠ol i bin mekim ol dispela pasin long nem bilong Jisas. Na nau planti man i mekim wok bisnis long ol samting bilong lotu. Ol dispela pasin ol i mekim long nem bilong Jisas i no stret na i nogut tru na i no makim tru pasin bilong Jisas olsem nem bilong em i makim!

Na dispela i kamapim sampela bikpela askim, olsem: Man i bilip long nem bilong Jisas em i mas mekim wanem? Ol Witnes Bilong Jehova i gat wanem tingting long dispela? Stori i kamap bihain long dispela bai bekim dispela tupela askim.