Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w98 12/1 p. 4-7
  • Wanpela Nem i Bringim Man Long Trupela Bilip

No gat vidio bilong dispela seksen.

Sori, popaia kamap long lodim vidio.

  • Wanpela Nem i Bringim Man Long Trupela Bilip
  • Wastaua i Tokaut Long Kingdom Bilong Jehova—1998
  • Ol Liklik Het Tok
  • Wankain Infomesen
  • Nem Bilong Jisas i Makim Wanem Samting
  • Bilip Long Jisas o Long Sisar?
  • Bihainim Pasin Bilong Ol Kristen Bilong Bipo
  • Yumi Mas Mekim Wanem Bilong Bilip Long Nem Bilong Jisas
  • Yu Save Litimapim Nem Bilong Krais?
    Wastaua i Tokaut Long Kingdom Bilong Jehova—1984
  • Askim
    Wastaua i Tokaut Long Kingdom Bilong Jehova—1995
  • Nem Bilong Jehova Em i Bikpela Samting Long Yumi
    Wastaua i Tokaut Long Kingdom Bilong Jehova (Stadi—2025
  • Nem Bilong God
    Kirap!—2017
Lukim Moa
Wastaua i Tokaut Long Kingdom Bilong Jehova—1998
w98 12/1 p. 4-7

Wanpela Nem i Bringim Man Long Trupela Bilip

WANPELA meri i tokim wanpela Witnes Bilong Jehova: “Yupela i no save bilip long Jisas na long blut bilong em bilong baim bek ol man.” Wanpela man i tok: “Yupela i tok yupela i Witnes Bilong Jehova, tasol mi wanpela witnes bilong Jisas.”

Planti man i ting ol Witnes Bilong Jehova i no bilip long Jisas o ol i no givim biknem long em. Tasol olsem wanem? Dispela tok i stret?

Tru, ol Witnes Bilong Jehova i gat strongpela tingting long nem bilong God, em Jehova.a Itamar, wanpela Witnes long Brasil, em i tok: “I stap bilong mi i senis olgeta taim mi kisim save long nem bilong God. Taim mi kaunim dispela nem long namba wan taim, i olsem mi kirap long slip. Dispela nem Jehova i bin kirapim tru bel bilong mi; mi pilim tru insait long lewa bilong mi.” Tasol em i tok moa: “Tasol bel bilong mi i laikim tumas Jisas tu.”

Tru tumas, ol Witnes Bilong Jehova i save, bilong kisim laip oltaim, ol i mas bilip long “nem bilong Pikinini Bilong God,” em Jisas. (1 Jon 5:​13) Tasol wanem insait bilong dispela tok ‘long nem bilong Jisas’ ?

Nem Bilong Jisas i Makim Wanem Samting

“Long nem bilong Jisas,” na kain tok olsem i stap planti taim long Ol Skripsa Grik, o long “Nupela Testamen.” Tru tumas, dispela hap tok “nem” bilong makim wok bilong Jisas i stap inap 80 taim long Baibel​—⁠inap 30 taim long Buk Aposel. Ol Kristen long taim bilong ol aposel ol i bin baptaisim ol man long nem bilong Jisas, na oraitim ol man long nem bilong em, na skulim ol man long nem bilong em, na singaut long nem bilong em, na kisim planti pen na hevi long nem bilong em, na litimapim nem bilong em.​—⁠Aposel 2:​38; 3:​16; 5:​28; 9:​14, 16; 19:⁠17.

Wanpela dikseneri bilong Baibel i tok, planti taim Baibel i mekim wok long dispela hap tok Grik ol i tanim olsem “nem” bilong makim “olgeta samting wanpela nem i makim, olsem namba, pasin, biknem, strong, nambawan olgeta, na ol kain samting olsem.” Olsem na nem bilong Jisas i makim bikpela namba na strong God Jehova i bin givim long em long bosim ol samting. Jisas yet i tok: “God i givim mi bikpela namba na strong bilong bosim olgeta samting long heven na long graun.” (Matyu 28:18) Taim Pita na Jon i oraitim pinis wanpela man i gat lek nogut, ol bikman bilong lotu Juda i tok: “Yupela i kisim wanem kain strong na yupela i mekim dispela samting? Yupela i mekim long nem bilong husat?” Orait nau Pita i autim strong bilip bilong em long bikpela namba na strong em nem bilong Jisas i makim taim em i tokim ol olsem “long nem bilong Jisas Krais bilong Nasaret, dispela man lek nogut i bin kamap orait na nau em i sanap long ai bilong yupela.”​—⁠Aposel 3:​1-10; 4:​5-10.

Bilip Long Jisas o Long Sisar?

Tasol bai i gat hatwok long tokaut olsem ol i bilip long nem bilong Jisas. Olsem Jisas i bin tok profet, ‘olgeta lain manmeri bai ol i bel nogut tru long ol disaipel bilong em, long wanem, nem bilong em i stap long ol.’ (Matyu 24:⁠9) Bilong wanem ol man bai bel nogut tru long ol? Long wanem, nem bilong Jisas i makim namba God i bin givim em olsem King, olsem em i King bilong olgeta king, na olgeta lain manmeri i mas daun long em, em samting ol i no redi long mekim o ol i no laik mekim.​—⁠Song 2:​1-7.

Ol bikman bilong lotu long taim bilong Jisas ol tu i no laik daun long Jisas. Ol i tok: “Mipela i no gat narapela king. Sisar wanpela tasol!” Long dispela rot ol i bin sakim Pikinini bilong God. (Jon 19:​13-15) Ol i bilip long nem​—⁠olsem strong na namba​—⁠bilong Sisar na gavman bilong em. Na ol i bin pasim tok long bel olsem Jisas i mas i dai bambai ol i ken holimpas strong na namba bilong ol.​—⁠Jon 11:​47-53.

Jisas i dai pinis na insait long ol handet handet yia bihain, planti man i tok ol i Kristen ol i kisim wankain tingting olsem ol bikman Juda. Ol dispela Kristen giaman ol i bilip long strong na namba bilong gavman na ol i insait long ol pait bilong en. Olsem: Long yia 1000 samting, taim misin i kisim ol soldia i no gat wok long pait na bungim ol i kamap olsem ol soldia bilong Krais (militia Christi), orait nau “em i no wok moa bilong gavman long ol kantri i gat nem Kristen long mekim stretpela pait, nogat; nau em wok bilong misin long mekim long rot bilong ol soldia bilong Krais.” (Buk The Oxford History of Christianity) Na stori i tok moa olsem sampela tokaut bilong ol pop i kirapim planti soldia long bilip olsem sapos ol i insait long pait “ol i mekim wanpela kontrak wantaim God na bai ol inap i stap long Paradais.”

Sampela i tok ol inap i stap gut long Jisas, na tu, ol inap i stap insait long wok politik na ol pait bilong kantri. Ating ol i ting em wok bilong ol Kristen long pait bilong pinisim ol samting nogut maski em i kamap we, na bilong mekim olsem sampela taim ol i mas pait. Tasol olsem wanem? Ol Kristen long taim bilong ol aposel ol i gat wankain tingting?

Wanpela stori i kamap long nius The Christian Century i tok: “Ol Kristen bilong pastaim tru ol i no save insait long ami.” Nius i tok, i go inap long ol yia namel long 170 na 180 C.E., i no gat liklik hap stori long ol Kristen i bin insait long ami. Na stori i tok moa: “Isi isi tasol ol Kristen i lusim pasin bilong sakim wok bilong ami.”

Wanem samting i kamap long dispela? Nius The Christian Century i tok: “Wanpela samting i bin nogutim tru nem bilong lotu Kristen long tingting bilong ol man, em pasin bilong ol long mekim pait. Long ol samting bilong pait ol i wankain long ol lain i no Kristen, na yumi no inap save, husat i Kristen na husat i no Kristen. Long maus ol Kristen i tok long yumi mas bilip long dispela Man bilong mekim pasin isi, tasol ol i givim bel long helpim ol pait bilong lotu o pait bilong ol gavman, na dispela i bagarapim tru bilip Kristen.”

Bihainim Pasin Bilong Ol Kristen Bilong Bipo

Olsem wanem? Long nau ol Kristen inap bihainim gutpela pasin tru bilong ol Kristen bilong bipo? Ol Witnes Bilong Jehova long nau ol i kamapim olsem yumi inap mekim olsem. Edita bilong buk Holocaust Educational Digest, em i tok: “I no gat wanpela Witnes Bilong Jehova em bai go long pait. . . . Sapos olgeta man i holim namba bilong bosim ol man bilong dispela graun ol i bin stap long dispela lotu, bai [Namba Tu Pait] i no inap kamap.”

Yumi inap mekim wankain tok long ol pait long nau i save kamap long ol kantri yet, olsem pait bilong Noten Aialan. Sampela yia i go pinis, wanpela Witnes Bilong Jehova i autim tok long ol haus long hap ol man bilong lotu Talatala i sindaun long en long taun Belfas. Taim wanpela man bilong haus i kisim save olsem dispela Witnes bipo em i wanpela Katolik, em i askim em: “Olsem wanem? Taim yu Katolik, yu bin helpim lain IRA [Irish Republican Army]?” Dispela Witnes i luksave olsem dispela man inap mekim nogut long em, long wanem, polis i bin kalabusim em taim em i bin holim wanpela gan na wokabaut i go bilong kilim i dai wanpela Katolik, na nau tasol em i lusim kalabus. Olsem na Witnes i bekim tok long em olsem: “Nau mi no wanpela Katolik. Mi wanpela Witnes Bilong Jehova. Olsem Kristen tru, mi no inap kilim i dai wanpela man bilong helpim wanpela gavman o wanpela man.” Orait nau man bilong haus i sekan long em na em i tok: “Olgeta pasin bilong kilim man i dai i no stret. Yupela i save mekim gutpela wok. Mekim yet i go.”

Yumi Mas Mekim Wanem Bilong Bilip Long Nem Bilong Jisas

Sapos yumi no insait long pait, dispela tasol i no makim olsem yumi bilip long nem bilong Jisas, nogat. Yumi mas bihainim olgeta lo bilong Krais, long wanem, Jisas i tok: “Sapos yupela i mekim olsem mi bin tokim yupela, orait yupela i stap pren bilong mi.” Na wanpela lo bilong em i tok, yumi “wan wan i mas laikim tru ol arapela.” (Jon 15:​14, 17) Pasin bilong laikim tru ol narapela bai kirapim yumi long mekim gutpela pasin long ol. Dispela i mekim na yumi no tingim skin, o lotu, o sindaun bilong man. Jisas i soim yumi olsem wanem yumi ken mekim olsem.

Ol Juda long taim bilong Jisas i no bin laikim ol Samaria. Tasol Jisas i bin toktok wantaim wanpela meri Samaria, olsem na dispela meri na planti narapela man i bilip long nem bilong em. (Jon 4:39) Na tu, Jisas i tok ol disaipel bilong em bai autim tok bilong em long “Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:⁠8) Ol i no inap autim dispela tok bilong givim laip long ol Juda tasol. Olsem na God i tokim Pita long autim tok long Kornilius, em wanpela kepten bilong ami bilong Rom. Tru, lo i tambuim wanpela Juda long go long haus bilong wanpela man bilong ol narapela lain, tasol God i tokim Pita olsem em i “no ken kolim wanpela man i no klin long ai bilong God.”​—⁠Aposel 10:⁠28.

Ol Witnes Bilong Jehova i bihainim pasin bilong Jisas na ol i amamas long helpim olgeta man long kisim save long pasin bilong kisim bek ol man long nem bilong Jisas, maski ol i bilong wanem lain, o lotu, o ol i gat wanem kain sindaun. Bilip long nem bilong Jisas i kirapim ol long “tokaut klia long Jisas em i Bikpela.” (Rom 10:​8, 9) Mipela i laik kirapim yu long kisim helpim bilong ol bambai yu tu inap lain long bilip long nem bilong Jisas.

Nem bilong Jisas i mas kirapim yumi long pilim olsem yumi mas givim biknem long em na bihainim tok bilong em. Aposel Pol i tok: “Em i givim dispela nem long Jisas, bai olgeta ensel na olgeta man na ol arapela samting i stap long heven na long graun na aninit long graun ol i ken brukim skru long ai bilong Jisas na i stap aninit long em. Na olgeta bilong ol i ken tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.” (Filipai 2:​10, 11) Tru, planti man bilong dispela graun i no laik daun long wok king bilong Jisas, tasol tok bilong Baibel i kamapim long ples klia olsem klostu nau olgeta man i mas daun long wok king bilong em, sapos ol i no mekim olsem ol bai bagarap. (2 Tesalonaika 1:​6-9) Olsem na nau em taim bilong bilip long nem bilong Jisas long rot bilong bihainim ol lo bilong em.

[Futnot]

a Bilong kisim sampela save moa long dispela, lukim buklet The Divine Name That Will Endure Forever, pes 28-31, em Sosaiti Wastaua Bilong Nu Yok i wokim long 1984.

[Piksa long pes 6]

Long nem bilong Jisas, planti milion man i bin kilim i dai ol narapela man na planti milion man i bin dai long han bilong ol narapela man

[Piksa long pes 7]

Jisas i no bin bel nogut long ol narapela lain. Olsem wanem long yu?

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim