Nem Bilong Jehova Em i Bikpela Samting Long Jisas

1-2. (a) Jisas i mekim wanem long nait paslain long ol i kilim em i dai? (b) Yumi bai skelim wanem ol askim long dispela atikol?

TINGIM olsem em Fonde apinun long Nisan 14, 33 C.E. Klostu nau, wanpela pren bilong Jisas bai putim em long han bilong ol birua, ol bai jasim em, kotim em, paitim em na mekim nogut tru long em, na kilim em i dai. Nau tasol Jisas i mekim wanpela bikpela kaikai wantaim ol gutpela aposel bilong em long wanpela rum i stap antap. Bihain long dispela kaikai, Jisas i mekim ol laspela tok bilong strongim ol aposel bilong em. Na paslain liklik long ol i lusim dispela rum i stap antap, Jisas i mekim wanpela beten i kolim sampela bikpela samting yumi mas beten long en. Aposel Jon i raitim ol tok bilong dispela beten long Jon sapta 17.

² Dispela beten bilong Jisas i soim olsem em i tingting planti long wanem ol samting long dispela taim? Hau dispela beten i soim samting i bikpela samting tru long em taim em i autim tok hia long graun? Yumi ken stori long ol bekim bilong ol dispela askim.

“MI BIN KAMAPIM NEM BILONG YU LONG OL”

3. Jisas i tok wanem long nem bilong Jehova, na tok bilong em i makim wanem? (Jon 17:​6, 26)

³ Jisas i beten na em i tok: “Mi bin kamapim nem bilong yu long ol.” Inap 2-pela taim, Jisas i tok em i kamapim nem bilong Jehova long ol disaipel bilong em. (Ritim Jon 17:​6, 26.) Tok bilong em i makim wanem? Yu ting em i kamapim wanpela nem em ol disaipel i no save long en? Ol disaipel bilong Jisas ol i bilong lain Juda, so ol i save pinis olsem nem bilong God em Jehova. Dispela nem i stap planti tausen taim long Ol Skripsa Hibru. So tok bilong Jisas i no makim olsem em i skulim ol olsem nem bilong God em Jehova, nogat. Tok bilong em i makim olsem em i skulim ol long Jehova em i wanem kain God tru. Jisas i save gut tru long Jehova, olsem na em i helpim ol disaipel long save gut long Em, olsem ol samting em i tingting pinis long mekim, ol wok bilong em, na ol pasin bilong em tu.

4-5. (a) Hau na nem bilong wanpela inap kamap bikpela samting long yumi? Stori long dispela. (b) Olsem wanem ol disaipel bilong Jisas i kirap long save gut moa long Jehova?

⁴ Tingim olsem wanpela elda long kongrigesen bilong yu em nem bilong em David, na tu, em i dokta bilong mekim operesen long ol sikman. Yu save long dispela brata inap planti yia. Tasol wanpela taim yu insait long wanpela kar eksiden. So ol i hariap long kisim yu i go long haus sik we dispela brata i wok long en, na em i yusim save bilong em olsem dokta long seivim laip bilong yu. Nau taim yu harim nem bilong dispela brata, yu save pilim olsem wanem? Nem bilong em i bikpela samting tru long yu, a? Nau yu no save long David olsem wanpela elda tasol, yu save tu long em olsem dokta husat i bin seivim laip bilong yu.

⁵ Olsem tasol, ol disaipel bilong Jisas i save pinis long nem bilong Jehova. Tasol dispela nem i kamap bikpela samting moa long ol bikos Jisas i helpim ol long save gut moa long Jehova. Wai na yumi inap tok olsem? Bikos Jisas i bihainim gut tru pasin bilong Papa bilong em long olgeta tok na pasin em i mekim. So ol aposel bilong em i “save” gut moa long Jehova long rot bilong putim yau long ol tok Jisas i skulim ol man long en na long rot bilong skelim pasin em i mekim long ol narapela.—Jon 14:9; 17:3.

“NEM BILONG YU, EM YU BIN GIVIM LONG MI”

6. Long wanem rot Jehova i givim nem bilong em long Jisas? (Jon 17:​11, 12)

⁶ Long beten bilong em, Jisas i tingim ol disaipel bilong em na em i tok: “Tingim nem bilong yu, em yu bin givim long mi, na lukautim ol.” (Ritim Jon 17:​11, 12.) Yu ting dispela i makim olsem Jisas i kisim nem bilong Jehova? Nogat. Tingim, long beten Jisas i mekim, em i tokim Jehova olsem “nem bilong yu.” So Jisas i no kisim nem bilong Jehova, nogat. Olsem na yumi laik save, long wanem rot God i givim nem bilong Em long Jisas? Namba 1, Jisas em man God i makim olsem Mausman bilong Em. Em i kam long nem bilong Papa bilong em na em i mekim ol strongpela wok long dispela nem. (Jon 5:43; 10:25) Namba 2, mining bilong nem bilong Jisas em “Jehova Em Man Bilong Kisim Bek Ol Man.” So nem bilong Jehova i insait tu long mining bilong nem bilong Jisas.

7. Hau Jisas inap givim tok long ol manmeri long nem bilong Jehova? Stori long dispela.

⁷ Tingim dispela: Ambasada i save makim maus bilong praim minista, olsem na long nem bilong praim minista em inap givim tok long ol manmeri. So toktok bilong ambasada i gat wankain strong olsem tok em praim minista inap mekim. Olsem tasol, Jisas i stap olsem man Jehova yet i bin makim olsem mausman bilong em, na long nem bilong Jehova em inap givim ol tok long ol manmeri.—Mat. 21:9; Luk 13:35.

8. Long wanem rot nem bilong Jehova i “stap long” Jisas paslain long em i kam long graun? (Kisim Bek 23:​20, 21)

⁸ Jisas i mekim wok olsem Tok, olsem na em i stap olsem Mausman bilong Jehova long givim ol tok na ol instraksen long ol ensel bilong God na long ol man hia long graun. (Jon 1:​1-3) Ating Jisas em dispela ensel Jehova i bin salim i go bilong lukautim lain Israel taim ol i stap long ples drai nating. Jehova i tokim lain Israel long risen na ol i mas bihainim tok bilong dispela ensel, em i tok: “Long wanem, nem bilong mi i stap long em.”a (Ritim Kisim Bek 23:​20, 21.) Nem bilong Jehova i “stap long” Jisas, na dispela i makim olsem Jisas em man God i makim na em i nambawan man bilong sambai long nem bilong Papa na mekim holi dispela nem.

“PAPA, LITIMAPIM NEM BILONG YU”

9. Wai na yumi ken tok nem bilong Jehova i bikpela samting long Jisas? Stori long dispela.

⁹ Olsem yumi stori pinis, paslain long Jisas i kam long graun, em i tingim nem bilong Jehova olsem bikpela samting tru. Em as na taim Jisas i stap long graun, long olgeta samting em i mekim em i soim olsem nem bilong Jehova i bikpela samting long em! Klostu long taim em i pinisim wok autim tok bilong em, Jisas i beten olsem: “Papa, litimapim nem bilong yu.” Na wantu, nek bilong Papa i kam long heven na i tok: “Mi litimapim pinis nem bilong mi na bai mi litimapim gen.”—Jon 12:28.

10-11. (a) Hau na Jisas i litimapim nem bilong Jehova? (Lukim tu piksa.) (b) Wai na yumi mas mekim holi nem bilong Jehova na stretim bek dispela nem?

¹⁰ Jisas tu i bin litimapim nem bilong Papa bilong em. Hau em i mekim olsem? Wanpela rot em olsem, em i stori long ol narapela long ol gutpela pasin na ol nambawan gutpela wok em Papa bilong em i bin mekim. Tasol Jisas i mas mekim sampela samting moa. Em i mas mekim holi nem bilong Jehova na stretim bek gutnem bilong Em.b Long beten Jisas i mekim bilong skulim ol disaipel bilong em, em i helpim ol long luksave olsem em i bikpela samting long mekim holi nem bilong Jehova. Em i tok: “Papa bilong mipela long heven, nem bilong yu i mas i stap holi.”—Mat. 6:9.

¹¹ Bilong wanem yumi mas mekim holi nem bilong Jehova na stretim bek dispela nem? Long wanem, long gaden Iden, Satan dispela Devil i mekim ol tok giaman bilong krungutim gutnem bilong God Jehova. Satan i sutim tok long Jehova olsem em i Man bilong giaman na em i pasim Adam na Iv long kisim ol gutpela samting. (Stt. 3:​1-5) Satan i tok tu olsem pasin bilong Jehova long mekim ol samting i no stret. Em i sutim ol tok giaman long Jehova na dispela i bagarapim gutnem na nem bilong Jehova. Na long taim bilong Jop, Satan i sutim tok long ol man olsem ol i lotuim Jehova bikos long ol gutpela samting ol i kisim long Em. Satan i tok moa olsem i no gat wanpela man bai laikim tru Jehova na ol bai lusim Jehova taim hevi i painim ol. (Jop 1:​9-11; 2:4) Olsem na sampela haptaim i mas lus bilong pruvim husat tru i man bilong tok giaman, Jehova o Satan.

“MI LUSIM LAIP BILONG MI”

12. Jisas i laikim tru nem bilong Jehova, olsem na em i redi long mekim wanem?

¹² Jisas i laikim tru Jehova, olsem na em i laik mekim olgeta samting bilong mekim holi nem bilong Jehova na stretim bek dispela nem. Jisas i tok: “Mi lusim laip bilong mi.” (Jon 10:​17, 18) I klia tru olsem Jisas i redi long dai long nem bilong Jehova.c Fes tupela man na meri i gutpela olgeta em Adam na Iv, ol i bin givim baksait long Jehova na ol i sapotim Satan. Tasol Jisas i no olsem tupela, em i redi long kam long graun na pruvim olsem em i laikim tru Jehova. Jisas i mekim olsem long rot bilong bihainim olgeta tok bilong Jehova na stap gut long em. (Hib. 4:15; 5:​7-10) Em i holimpas pasin bilong stap gut long God long laip olgeta bilong em i go inap long em i dai long diwai pos. (Hib. 12:2) Long dispela rot, em i kamapim klia olsem em i laikim Jehova na nem bilong Em.

13. Wai na Jisas em i nambawan man husat inap pruvim olsem Satan em i man bilong giaman? (Lukim tu piksa.)

¹³ Long olgeta samting Jisas i mekim, em i pruvim olsem Satan em i man bilong giaman, na i no Jehova! (Jon 8:44) Jisas i save gut tru long Jehova winim olgeta narapela man i bin stap laip. Sapos ol tok em Satan i sutim long Jehova ol i tru, orait Jisas bai save long dispela. Tasol Jisas i sanap strong yet na em i difendim gutnem bilong Jehova. Na maski i luk olsem Jehova i bin givim baksait long Jisas klostu long taim em i laik dai, Jisas i redi yet long dai na em i no tingting liklik long givim baksait long gutpela Papa bilong em.—Mat. 27:46.d

“MI PINISIM DISPELA WOK YU BIN GIVIM MI”

14. Jisas i stap gut long Jehova, olsem na Jehova i givim wanem gutpela pe long em?

¹⁴ Long nait paslain long Jisas i dai, em i beten olsem: “Mi pinisim dispela wok yu bin givim mi long mekim.” Em i bilip tru olsem Jehova bai givim gutpela pe long em bikos long pasin bilong em long stap gut long Papa. (Jon 17:​4, 5) Na tru tumas, Jehova i bin mekim olsem. Em i no larim Jisas i stap long matmat. (Apo. 2:​23, 24) Em i kirapim bek Jisas na givim bikpela namba moa long em long heven. (Fili. 2:​8, 9) Bihain, Jisas i kirap mekim wok olsem King long Kingdom Bilong God. Dispela Kingdom bai mekim wanem? Long namba tu hap bilong beten Jisas i mekim bilong skulim ol disaipel, em i tok: “Kingdom bilong yu i mas i kam. Laik bilong yu [Jehova] i mas kamap long graun olsem em i save kamap long heven.”—Mat. 6:10.

15. Jisas bai mekim wanem samting moa?

¹⁵ Klostu nau, Jisas bai pait long ol birua bilong God na pinisim ol man nogut long pait bilong Armagedon. (Rev. 16:​14, 16; 19:​11-16) Bihain long dispela, Jisas bai tromoi Satan i go daun long “hul i no gat as”—Satan bai no gat strong long mekim wanpela samting, i olsem em i dai pinis. (Rev. 20:​1-3) Insait long Wan Tausen Yia Bilong Krais i Stap King, em bai kamapim bek bel isi na helpim ol manmeri long kamap gutpela olgeta gen olsem long bipo. Em bai kirapim bek ol daiman. Em bai mekim graun olgeta i kamap Paradais. Samting Jehova i tingting pinis long mekim bai kamap tru!—Rev. 21:​1-4.

16. Wanem samting bai kamap long pinis bilong Wan Tausen Yia?

¹⁶ Laip bai olsem wanem long pinis bilong Wan Tausen Yia Bilong Krais i Stap King? Ol man bai no gat sin moa, ol bai kamap gutpela olgeta. Yumi no inap askim God moa long fogivim ol sin bilong yumi long rot bilong pe bilong baim bek man, na tu, Jisas bai i no stap moa olsem namelman bilong yumi na Jehova, na lain 144,000 tu bai i no mekim wok moa olsem ol pris bilong helpim yumi. Na “dai [yumi kisim long Adam], dispela laspela birua, [God] bai pinisim olgeta.” Ol matmat bai emti. Ol daiman bai kirap bek pinis na stap laip gen. Olgeta manmeri i stap long graun ol bai gutpela olgeta.—1 Kor. 15:​25, 26.

17-18. (a) Wanem samting bai kamap long pinis bilong Wan Tausen Yia Bilong Krais i Stap King? (b) Jisas bai mekim wanem long pinis bilong Wan Tausen Yia? (1 Korin 15:​24, 28) (Lukim tu piksa.)

¹⁷ Wanem samting moa bai kamap long pinis bilong Wan Tausen Yia? Long dispela taim, wanpela gutpela samting tru bai kamap. Bikpela tok i bin kamap we i krungutim gutnem bilong Jehova, dispela tok bai pinis olgeta. Hau em bai pinis? Long gaden Iden, Satan i sutim tok long Jehova olsem em i Man bilong giaman na em i no save mekim wok bos long pasin laikim. Stat long dispela taim na i kam, ol man husat i onarim na rispektim Jehova i wok yet long mekim holi nem bilong em. So long pinis bilong Wan Tausen Yia, Jehova bai kamapim klia olsem olgeta tok Satan i sutim long em ol i no tru. Long dispela taim, olgeta bai save tru olsem Jehova em i gutpela Papa bilong yumi long heven.

¹⁸ Long pinis bilong Wan Tausen Yia, olgeta man bai save olsem olgeta tok Satan i sutim long Jehova, ol i tok giaman. Jisas bai mekim wanem long pinis bilong Wan Tausen Yia? Yu ting em bai bihainim pasin bilong Satan na bikhet long Jehova? Nogat tru, em i no inap mekim olsem! (Ritim 1 Korin 15:​24, 28.) Jisas bai putim Kingdom i go bek long han bilong Papa bilong em. Na em bai daun long wok bos bilong Jehova. Tru tumas, Jisas i redi long lusim olgeta samting bikos em i laikim tru Jehova, em samting Satan i no inap tru long mekim.

19. Olsem wanem nem bilong Jehova i bikpela samting long Jisas?

¹⁹ Nau yumi save long risen na Jehova i redi long givim nem bilong Em long Jisas! Olsem man God i makim, Jisas i kamapim gut tru ol pasin bilong Papa bilong em long ol narapela. So nem bilong Jehova i bikpela samting olsem wanem long Jisas? Dispela nem i bikpela samting tru long Jisas winim olgeta narapela samting. Jisas i redi long dai long dispela nem, na em bai redi long givim olgeta samting i go bek long Jehova long pinis bilong Wan Tausen Yia. Hau yumi ken bihainim eksampel bilong Jisas? Yumi bai skelim bekim bilong dispela askim long neks atikol.