STADI ATIKOL 23
SINGSING 2 Jehova Em Nem Bilong Yu
Nem Bilong Jehova Em i Bikpela Samting Long Yumi
“Jehova i tok, ‘Yupela i witnes bilong mi.’”—AIS. 43:10.
SKUL YUMI BAI KISIM
Dispela atikol bai stori long hau yumi ken helpim wok bilong mekim holi na stretim bek nem bilong Jehova.
1-2. Hau yumi save olsem nem bilong Jehova i bikpela samting long Jisas?
NEM bilong Jehova i bikpela samting tru long Jisas. Em i nambawan man husat i bin sambai long nem bilong Papa bilong em. Olsem yumi lainim long atikol i go pinis, Jisas i redi long dai bilong kamapim klia olsem Jehova em i holi na olgeta pasin bilong Em i stret. (Mak 14:36; Hib. 10:7-9) Na bihain long Wan Tausen Yia Bilong Krais i Stap King, em bai givim namba bilong em long mekim wok bos i go bek long Papa bilong em bikos em i laik mekim holi nem bilong Jehova. (1 Kor. 15:26-28) Olgeta samting Jisas i mekim long nem bilong Jehova i kamapim klia olsem em i laikim tru Jehova.
2 Jisas i kam long graun long nem bilong Papa bilong em. (Jon 5:43; 12:13) Em i kamapim nem bilong Papa bilong em long ol disaipel bilong em. (Jon 17:6, 26) Taim em i skulim ol manmeri na wokim ol mirakel, em i kamapim klia olsem Jehova i givim em savetingting na strong long mekim ol dispela samting. (Jon 10:25) Jisas i askim Jehova long “tingim nem bilong [Em]” na lukautim ol disaipel bilong em. (Jon 17:11) So sapos Jisas i tingim tru nem bilong Jehova, orait hau na wanpela inap tok olsem em i disaipel tru bilong Krais, tasol em i no save long nem bilong Papa bilong Jisas na em i no yusim dispela nem?
3. Yumi bai stori long wanem samting long dispela atikol?
3 Yumi ol Kristen i wok strong long bihainim lek mak bilong Jisas, olsem na yumi tingim tru nem bilong Papa bilong em. (1 Pita 2:21) Long dispela atikol, yumi bai stori long risen na Jehova i givim nem bilong em long ol man i autim “gutnius bilong Kingdom.” (Mat. 24:14) Na tu, yumi bai stori long olsem wanem nem bilong Jehova i mas stap olsem bikpela samting long yumi wan wan.
“WANPELA LAIN EM NEM BILONG EM I KEN STAP LONG OL”
4. (a) Paslain long Jisas i go bek long heven, em i tokim ol disaipel bilong em long mekim wanem wok? (b) Yumi bai kisim bekim bilong wanem askim?
4 Paslain liklik long Jisas i go bek long heven, em i tokim ol disaipel bilong em olsem: “Yupela bai kisim strong taim holi spirit i kam i stap long yupela. Na yupela bai stap witnes bilong mi long Jerusalem na long olgeta hap bilong Judia na Samaria, na i go inap long olgeta hap bilong graun.” (Apo. 1:8) So ol bai autim gutnius long kantri Israel na long olgeta hap bilong graun. Na dispela bai opim rot long olgeta lain man i ken kamap ol disaipel bilong Jisas. (Mat. 28:19, 20) Tasol Jisas i tok: “Yupela bai stap witnes bilong mi.” So yu ting ol dispela nupela disaipel bai stap olsem witnes bilong Jisas na em tasol, o ol i mas save tu long nem bilong Jehova na tokaut long dispela nem? Ol samting i kamap olsem Aposel 15 i stori long en bai helpim yumi long bekim dispela askim.
5. Hau ol aposel na ol hetman long Jerusalem i soim olsem olgeta manmeri i mas save long nem bilong Jehova? (Lukim tu piksa.)
5 Long 49 C.E., ol aposel na ol hetman long Jerusalem i bung wantaim long stori long ol samting em ol man bilong ol arapela lain em ol i no bin katim skin i mas mekim bilong kamap ol Kristen. Long pinis bilong dispela bung, Jems em hap brata bilong Jisas, em i tok: “[Pita] i stori gut long olsem wanem God i bin tingim ol man bilong ol arapela lain long namba 1 taim. Na God i mekim olsem bilong kisim wanpela lain em nem bilong em i ken stap long ol.” Jems i tok long nem bilong husat? Em i kamapim tok bilong profet Amos, na em i tok moa olsem: “Na bai ol manmeri bilong dispela lain husat i stap yet, na ol manmeri bilong ol arapela lain em nem bilong mi i stap long ol, ol i ken wok strong long painim Jehova. Em tok bilong Jehova.” (Apo. 15:14-18) Ol dispela nupela disaipel bai kisim save long Jehova, na tu, ‘nem bilong em bai stap long ol.’ Dispela i makim olsem ol bai holim nem bilong God na ol man bai save long ol olsem ol i lain bilong God.
Long wanpela miting bilong gavening bodi long taim bilong ol aposel, ol dispela bilipman i luksave olsem ol Kristen i mas stap olsem wanpela lain i holim nem bilong God (Lukim paragraf 5)
6-7. (a) Wai na Jisas i kam long graun? (b) Wanem nambawan bikpela risen na Jisas i kam long graun?
6 Nem bilong Jisas i makim olsem “Jehova Em Man Bilong Kisim Bek Ol Man,” na Jisas i soim klia olsem long rot bilong em Jehova bai kisim bek ol man i bilip. Jisas i kam long graun bilong givim laip bilong em long baim bek ol manmeri. (Mat. 20:28) Taim em i givim pe bilong baim bek ol man, em i opim rot long God i ken kisim bek ol manmeri na ol inap kisim laip oltaim.—Jon 3:16.
7 Tasol wai na God i mas kisim bek ol manmeri? Bikos long samting i bin kamap long gaden Iden. Olsem yumi stori long atikol i go pinis, fes tumbuna papamama bilong yumi, Adam na Iv, ol i bin bikhet long Jehova na ol i lus long kisim laip oltaim. (Stt. 3:6, 24) Olsem na Jisas i mas kam long graun na dai na bai rot i op long God i ken kisim bek ol sinman, tasol dispela i no nambawan bikpela risen na em i kam long graun. Satan i bin krungutim gutnem bilong Jehova. (Stt. 3:4, 5) So nambawan bikpela risen na Jehova i mas kisim bek ol tumbuna pikinini bilong Adam na Iv em long mekim holi nem bilong em yet. Jisas i kam long nem bilong Jehova na em i mekim gut tru olgeta samting Jehova i laik bai em i mekim, olsem na em i stap olsem nambawan man bilong mekim holi nem bilong Jehova.
Hau wanpela inap tok olsem em i disaipel tru bilong Krais, tasol em i no save long nem bilong Papa bilong Jisas na em i no yusim dispela nem?
8. Olgeta disaipel bilong Jisas i mas kliagut long wanem samting?
8 Olgeta man em ol i bilip long Jisas—ol Juda na ol man bilong arapela lain tu—ol i mas kliagut olsem God Jehova em Papa bilong Jisas, em tasol bai kisim bek ol. (Jon 17:3) Na tu, wankain olsem Jisas, nem bilong Jehova bai stap long ol. Na ol i mas luksave tu olsem em i bikpela samting long ol i mekim holi dispela nem. Long dispela rot, God bai kisim bek ol. (Apo. 2:21, 22) So olgeta gutpela disaipel bilong Jisas i mas kisim save long Jehova na long Jisas tu. Em risen na Jisas i mekim ol dispela laspela tok long beten bilong em long Jon sapta 17 olsem: “Mi bin kamapim nem bilong yu long ol na mi bai kamapim moa yet. Bai ol i ken kamapim pasin bilong laikim ol arapela olsem yu bin laikim mi, na bai mi ken pas wantaim ol.”—Jon 17:26.
“YUPELA I WITNES BILONG MI”
9. Sapos yumi laik stap olsem disaipel tru bilong Jisas, orait wanem samting i mas stap olsem bikpela samting long yumi?
9 Olgeta man em ol i laik stap olsem disaipel tru bilong Jisas, ol i mas luksave olsem em i bikpela samting long ol i mekim holi nem bilong Jehova. (Mat. 6:9, 10) Yumi mas tingim olsem nem bilong Jehova i nambawan tru na i winim tru olgeta narapela nem. Na ol samting yumi mekim i mas kamapim klia dispela. Tasol hau yumi ken mekim holi nem bilong Jehova, na kamapim klia olsem ol tok Satan i bin sutim long em ol i no tru?
10. Olsem Aisaia sapta 42 i go 44 i kamapim, wanem samting i kamap na dispela i olsem wanpela kot keis? (Aisaia 43:9; 44:7-9) (Lukim tu piksa.)
10 Olsem Aisaia sapta 42 i go 44 i kamapim, yumi gat wok long mekim holi nem bilong Jehova. Long ol dispela sapta, Jehova i askim ol man em ol i no lotuim em long pruvim olsem ol god ol i lotuim ol i stap tru. Dispela i olsem wanpela kot keis we Jehova i askim ol long bringim ol witnes bilong ol i kam bilong pruvim olsem tok bilong ol i stret. Tasol i no gat wanpela bilong ol inap mekim olsem!—Ritim Aisaia 43:9; 44:7-9.
I olsem yumi ol witnes insait long wanpela kot keis (Lukim paragraf 10-11)
11. Olsem Aisaia 43:10-12 i kamapim, Jehova i mekim wanem tok long lain bilong em?
11 Ritim Aisaia 43:10-12. Jehova i mekim dispela tok long lain bilong em olsem: “Yupela i witnes bilong mi, . . . na mi God tru.” Jehova i laik bai ol i bekim dispela askim olsem: “Olsem wanem? I gat narapela God olsem mi i stap?” (Ais. 44:8) Olsem na rot i op long yumi inap bekim dispela askim. Long rot bilong ol tok na pasin yumi mekim, yumi pruvim olsem Jehova wanpela tasol em i God tru. Nem bilong em i nambawan tru na i winim tru olgeta narapela nem. Yumi soim olsem yumi laikim tru Jehova long rot bilong ol samting yumi mekim long wan wan de, maski Satan i putim kain kain presa long yumi. Long dispela rot, yumi insait long wok bilong mekim holi nem bilong Jehova.
12. Olsem wanem tok profet long Aisaia 40:3, 5 i kamap tru?
12 Taim yumi sambai long nem bilong Jehova, yumi wok long bihainim pasin bilong Jisas Krais. Aisaia i tok profet tu olsem wanpela man bai go pas long “kliaim [o, “redim,” ftn.] rot bilong Jehova!” (Ais. 40:3) Hau dispela tok profet i kamap tru? Jon Bilong Baptais i redim rot bilong Jisas, em man i kam long nem bilong Jehova na em i autim tok long nem bilong Jehova. (Mat. 3:3; Mak 1:2-4; Luk 3:3-6) Dispela wankain tok profet i tokaut olsem: “Glori bilong Jehova bai kamap ples klia.” (Ais. 40:5) Hau dispela samting i kamap? Taim Jisas i kam long graun, em i bihainim gut tru olgeta pasin bilong Jehova na i olsem Jehova yet i bin kam long graun.—Jon 12:45.
13. Hau yumi ken bihainim pasin bilong Jisas?
13 Olsem Jisas, yumi tu i stap olsem ol witnes bilong Jehova. Yumi holim nem bilong Jehova na yumi save tokim olgeta manmeri yumi bungim long ol gutpela wok bilong em. Tasol bilong mekim gut dispela wok, yumi mas kamapim klia tu bikpela wok Jisas i mekim bilong mekim holi nem bilong Jehova. (Apo. 1:8) Jisas em i nambawan Witnes Bilong Jehova, na yumi bihainim lek mak bilong em. (Rev. 1:5) Tasol yumi wan wan i ken mekim wanem samting moa bilong soim olsem nem bilong Jehova i bikpela samting long yumi?
NEM BILONG JEHOVA I BIKPELA SAMTING LONG YUMI
14. Olsem Buk Song 105:3 i kamapim, yumi pilim olsem wanem long nem bilong Jehova?
14 Yumi amamas long nem bilong Jehova. (Ritim Buk Song 105:3.) Jehova i amamas tru taim yumi apim nem bilong em. (Jer. 9:23, 24; 1 Kor. 1:31; 2 Kor. 10:17) Dispela tok “apim nem bilong Jehova” i makim olsem yumi amamas olsem Jehova em i God bilong yumi. Yumi tingim olsem em blesing long yumi onarim nem bilong em na sambai long gutnem bilong em. Yumi no ken sem long tokim ol wanwok, ol wanskul, ol neiba, na ol narapela olsem yumi ol Witnes Bilong Jehova! Satan i laik bai yumi stop long tokim ol narapela long nem bilong Jehova. (Jer. 11:21; Rev. 12:17) Satan na ol giaman profet bilong em i laik bai ol manmeri i lusim tingting long nem bilong Jehova. (Jer. 23:26, 27) Tasol yumi laikim tru nem bilong Jehova, olsem na yumi wok yet long amamas long dispela nem “long san na long nait.”—Sng. 5:11; 89:16.
15. Bilong singaut long nem bilong Jehova, yumi mas mekim wanem?
15 Yumi wok yet long singaut long nem bilong Jehova. (Jol. 2:32; Rom 10:13, 14) Bilong singaut long nem bilong Jehova, yumi mas save long dispela nem na yusim dispela nem, na i no dispela tasol. Yumi mas save long God olsem wanpela Man i stap tru, trastim em, na larim em i helpim yumi na stiaim yumi. (Sng. 20:7; 99:6; 116:4; 145:18) Na tu, yumi tokim ol narapela long nem bilong Jehova na ol pasin bilong em, na yumi kirapim ol long tanim bel na mekim ol samting na bai Jehova i ken orait long ol.—Ais. 12:4; Apo. 2:21, 38.
16. Olsem wanem yumi ken pruvim olsem Satan em i man bilong giaman?
16 Yumi redi long karim pen na hevi long nem bilong Jehova. (Jems 5:10, 11) Taim yumi stap gut yet long Jehova long taim yumi karim pen na hevi, yumi pruvim olsem Satan em i man bilong giaman. Long taim bilong Jop, Satan i sutim tok long ol man i lotuim Jehova olsem: “Sapos wanpela man i laik i dai, em bai givim olgeta samting bilong em bilong seivim laip bilong em yet.” (Jop 2:4) Satan i tok ol man bai lotuim Jehova long gutpela taim tasol, na taim hevi i painim ol, ol bai givim baksait long em. Bilipman Jop i pruvim olsem dispela tok i no tru. Olsem tasol, yumi gat rot long pruvim olsem maski wanem hevi Satan i putim long yumi, yumi bai no inap tru givim baksait long Jehova. Yumi ken bilip tru olsem Jehova bai lukautim yumi bikos em i tingim nem bilong em.—Jon 17:11.
17. Olsem 1 Pita 2:12 i kamapim, wanem narapela rot yumi ken givim glori long nem bilong Jehova?
17 Yumi soim rispek long nem bilong Jehova. (Prov. 30:9; Jer. 7:8-11) Nem bilong Jehova i stap long yumi, olsem na ol samting yumi mekim inap preisim nem bilong em o bagarapim dispela nem. (Ritim 1 Pita 2:12.) So long ol tok na pasin yumi mekim, yumi laik mekim olgeta samting bilong preisim Jehova. Long dispela rot, yumi bai givim glori long nem bilong em maski yumi no gutpela olgeta.
18. Wanem narapela rot yumi ken soim olsem nem bilong Jehova i bikpela samting long yumi? (Lukim tu futnot.)
18 Yumi tingim nem bilong Jehova olsem bikpela samting moa winim gutnem bilong yumi yet. (Sng. 138:2) Wai na dispela i bikpela samting? Bikos pasin bilong yumi long laikim tru nem bilong Jehova inap kirapim ol narapela long mekim ol tok i bagarapim gutnem bilong yumi.a Jisas i redi long karim sem na dai olsem wanpela kriminal em ol i bin kotim em na bai em i ken onarim nem bilong Jehova. Jisas “i no wari long sem em bai kisim,” em i no wari long tingting ol narapela i gat long em. (Hib. 12:2-4) Em i putim tingting olgeta long mekim laik bilong God.—Mat. 26:39.
19. Yu pilim olsem wanem long nem bilong Jehova, na bilong wanem?
19 Yumi amamas long lotuim Jehova na yumi pilim olsem em ona long stap olsem ol Witnes Bilong Jehova. Em as na yumi redi long karim olgeta kain hevi ol man i putim long yumi. Nem bilong Jehova em i bikpela samting tru long yumi winim gutnem bilong yumi yet. Olsem na yumi ken tingting strong long wok yet long preisim nem bilong Jehova, maski Satan i putim kain kain hevi long yumi. Long dispela rot, yumi bai soim olsem nem bilong Jehova em i bikpela samting tru long yumi wankain olsem Jisas Krais i bin mekim.
SINGSING 10 Amamas Long Jehova, God Bilong Yumi!
a Bilipman Jop i bin tingting planti taim 3-pela pren bilong em i mekim ol tok i bagarapim gutnem bilong em. Pastaim, taim ol pikinini bilong em i dai na olgeta samting em i gat i lus, “Jop i no mekim sin o sutim tok long God olsem em i putim hevi long em.” (Jop 1:22; 2:10) Tasol taim ol narapela i sutim tok long em olsem em i mekim pasin i no stret, em i mekim “planti toktok nabaut.” Em i tingting strong long difendim gutnem bilong em yet, na em i no mekim holi nem bilong God na sambai long gutnem bilong Em.—Jop 6:3; 13:4, 5; 32:2; 34:5.