Yu Save Litimapim Nem Bilong Krais?

“God i litimapim [Jisas] na putim em antap tru. Na God i givim em wanpela nem i winim olgeta arapela nem. Em i givim dispela nem long Jisas, bai olgeta man long heven na long graun na aninit long graun ol i ken kolim nem bilong Jisas na brukim skru long em. Na olgeta man i mas tokaut olsem: ‘Jisas Krais em i Bikpela.’ Na bai nem bilong God Papa em i stap antap tru.”—FILIPAI 2:9-11.

“LONG Filipai 2:9-11 aposel Pol i stori long bikpela nem bilong Krais. Olsem wanem? Yu save litimapim nem bilong Krais? Yu save “brukim skru” long nem bilong Krais? Yu save long dispela nem Jisas “i winim olgeta arapela nem,” dispela nem God i bin givim long em? Olsem wanem long ol milion milion manmeri long nau ol i tok ol i Kristen, yu ting ol i save litimapim nem bilong Jisas na “brukim skru” long nem bilong em? Orait, nau yumi ken skelim dispela samting, na yumi ken skelim ol samting yumi mas mekim na bai yumi “brukim skru” long nem bilong Jisas.

Em Wanem Kain Nem?

Orait, wanem dispela “nem” God i bin givim long Jisas? I no dispela nem Jisas tasol. Nogat. Ol man i bin kolim dispela nem Jisas long sampela man moa hia long graun, olsem na dispela nem i i no wanpela nem “i winim olgeta arapela nem.” Na dispela nem “i winim olgeta arapela nem” i no gutpela nem Jisas i kisim, long wanem em i mekim gutpela pasin. Tru, em i nambawan man bilong autim tok bilong God. (Revelesen 3:14) Tasol gutpela nem em i kisim long dispela wok, em yet i kisim long wok em i mekim. Tasol dispela nem “i winim olgeta arapela nem,” em God i bin givim long em.

Orait, wanem dispela nem? Sampela tok bilong profet Aisaia i helpim yumi long save. Sampela handet yia paslain long taim mama i karim Jisas, profet Aisaia i bin tok: “Long wanem wanpela meri i karim pikinini em bilong yumi, ol i givim wanpela pikinini man long yumi; em bai holim wok gavman. Na ol bai kolim nem. bilong em Gutpela Man Bilong Givim Tingting, Strongpela God, Papa Bilong Oltaim, King Bilong Gutaim.”—Aisaia 9:6, NW.

Long dispela ves, dispela tok “nem” i makim wanem samting? Em i makim bikpela wok na namba God i givim long Jisas bambai Jisas inap kamapim laik bilong God. Ol man i mas save long dispela bikpela namba God i bin givim long Jisas na i mas daun long dispela, olsem “brukim skru” long en. Orait, nau yumi ken skelim dispela fopela bikpela nem em i kisim na Aisaia i bin kolim.

Olsem wanem Jisas em i “Gutpela Man Bilong Givim Tingting” long ol man?

Pastaim Aisaia i tok, ol bai kolim nem bilong Jisas olsem “Gutpela Man Bilong Givim Tingting.” Jisas i kisim namba bilong givim gutpela tingting na gutpela tok tru long ol man. Taim em i no kam daun yet long graun, em i mekim wok olsem “Tok” o maus bilong God. (Jon 1:1) Taim em i stap long graun, em i autim ol tok em inap helpim ol man long kisim laip i stap oltaim^—em gutpela tok tru! Olsem na Pita i tokim em: “Tok bilong yu i givim laip i stap gut oltaim oltaim.” (Jon 6:68) Jisas em i nambawan man bilong givim tok bilong Jehova long ol man. (Revelesen 1:1) Olgeta man i mas harim tok bilong Jisas, em bikpela samting. Jisas em i ‘rot na tok tru na laip.’ (Jon 14:6) Ol man i sakim tok bilong dispela “Gutpela Man Bilong Givim Tingting,” ol i no ken kisim laip.

Olsem wanem Jisas em i wanpela “Strongpela God”?

Aisaia i tok tu, Jisas bai kamap wanpela “Strongpela God.” Taim Jisas i no kam daun yet long graun, em i wanpela “god,” long wanem em i “wankain olsem dispela God yumi no inap lukim. Em i [namba wan] bilong olgeta samting God i wokim.” (Jon 1:1; Kolosi 1:15) Em i dai na kirap bek olsem spirit na nau em i no ken i dai. Em i stap olsem wanpela “god,” long wanem “olgeta laip bilong God em i pulap tru long bodi bilong Krais.”—Kolosi 2:9; 1 Timoti 6:15, 16.

Tasol dispela nem “Strongpela God” i makim namba bilong Krais. Baibel i kolim sampela man bilong graun olsem ol “god.” Bilong wanem? Long wanem ol dispela man i mekim wok olsem jas long lain Isrel. (Sam 82:1-6) Jisas, dispela “Strongpela God,” em i bikpela Jas God i bin makim. Em yet i stori long dispela samting, olsem: “Papa i no save skelim wanpela man long kot. Olgeta wok kot, em i givim pinis long Pikinini. Olsem na bai olgeta man i ken litimapim nem bilong Pikinini, olsem ol i save litimapim nem bilong Papa.”—Jon 5:22, 23.

Wanpela wok kot Jisas i mas mekim em bilong skelim kongrigesen bilong em—ol lain bilong em ol i bin i dai paslain long taim em i kam olsem King bilong Kingdom na ol lain i stap laip yet taim em i kam long ‘taim bilong pinis bilong dispela pasin.’ (Matyu 24:3) Na tu em i save skelim ol lain man long nau. Em i brukim ol i go tupela lain, olsem “ol sipsip” na “ol meme.” Na em bai i stap Jas long bikpela de bilong kot bilong 1,000 yia, long taim bilong skelim olgeta manmeri bihain long Amagedon. Em wanpela “Strongpela God” tru!—Matyu 25:31-46; Revelesen 11:18; 1 Pita 4:17; Revelesen 20:4, 5, 13.

Olsem wanem na i stret Jisas i kisim nem olsem “Papa Bilong Oltaim”?

Jisas i mas kamap tu olsem “Papa Bilong Oltaim.” Dispela bai kamap olsem wanem? Adam em i namba wan papa bilong yumi olgeta manmeri. Tasol em i no kamap olsem “papa bilong oltaim,” long wanem em i mekim rong. Em i no inap givim laip i stap oltaim long ol pikinini bilong em. Tasol Jisas i no mekim wanpela rong. Na em i givim gutpela laip bilong em olsem ofa bambai olgeta manmeri i bilip ol i ken kisim laip i stap oltaim. (Jon 3:16; 1 Jon 2:2) Long dispela rot bai em i givim laip oltaim long ol, em Adam i no inap givim long ol. Olsem na Baibel i kolim em olsem “Adam bilong bihain tru” na “spirit bilong givim laip long man.” (1 Korin 15:45) I stret em i kisim nem olsem “Papa Bilong Oltaim” bilong ol gutpela manmeri bihain bai ol i stap long graun.

Olsem wanem Jisas i mekim wok olsem “King Bilong Gutaim”

Na laspela nem Aisaia i kolim long Jisas, em “King Bilong Gutaim.” Em bai i stap King na kamapim gutaim na olgeta manmeri em i bosim ol bai ol i stap bel isi na wanbel wantaim. (Sam 72:6, 7) Taim Jisas i kirap bek em i tokaut long namba bilong em. Em i tok: “God i givim mi bikpela namba long heven na long graun.” (Matyu 28:18) Em i kirap mekim wok King long kongrigesen bilong em long 33 C.E., na long Kingdom bilong God long 1914. (Kolosi 1:13; Revelesen 11:15) Jisas bai bagarapim ol birua bilong God na bosim ol stretpela manmeri long stretpela pasin, na long dispela rot bai em i kamapim gutaim long graun.—Sam 37:10, 11; 72:7, 8; Danyel 2:44.

Daun long Nem Bilong Jisas

Olsem na dispela nem “i winim olgeta arapela nem” i makim bikpela wok na namba God i givim long Jisas. Dispela “nem” em i bikpela nem tru, winim nem bilong olgeta arapela. No gat narapela man o ensel i kisim bikpela namba olsem. Olsem na Baibel i tok long Jisas tasol, olsem: “I no gat narapela man inap long helpim yumi. Long olgeta hap God i no soim narapela nem long yumi bilong kisim bek yumi.” (Aposel 4:12) Na Jisas tasol inap tok: “Olgeta samting yupela i askim long nem bilong mi, bai mi mekim.”—Jon 14:14.

Olsem na Pol i tok moa, olsem: “Em i givim dispela nem long Jisas, bai olgeta man long heven na long graun na aninit long graun ol i ken kolim nem bilong Jisas na brukim skru long em.” (Filipai 2:10) Yes, ol ensel long heven ol tu i mas daun long bikpela nem na namba bilong Jisas. (Hibru 1:4-6) Ol man i stap “aninit long graun,” bihain bai ol i kirap bek na bai ol i lain na kisim save long dispela “nem” bilong Jisas. Na sapos ol i tingim gut dispela bikpela wok na namba God i givim long em na ol i “brukim skru” long em, orait, bai ol inap kisim laip i stap oltaim. Bai ol i “kirap bek na i stap laip.”—Jon 5:29; Revelesen 20:12.

Ol man i stap “long graun”—em yumi ol manmeri nau yumi stap—yumi tu yumi mas “brukim skru” long nem bilong Jisas bambai yumi inap kisim laip i stap oltaim. Olsem na yumi mas harim gut ol tok bilong dispela Gutpela Man Bilong Givim Tingting long yumi, na yumi mas bihainim ol tok bilong em. (Matyu 7:24, 25) Yumi mas bilip long em bambai sin bilong yumi i ken tekewe. Long dispela rot, bihain bai em i kamap olsem Papa Bilong Oltaim bilong yumi.

Bikpela samting em olsem: Nau yumi mas litimapim nem bilong dispela Jas na King em God i bin makim em, na yumi mas daun long em. Yumi mas mekim gut long ol “brata” bilong em na soim olsem yumi “sipsip,” yumi no “meme.” Na yumi mas autim gutpela tok bilong Kingdom bilong dispela “King Bilong Gutaim.” (Matyu 24:14; 25:34-40) Na yumi mas bihainim ol lo bilong Kingdom bilong em na yumi no ken insait long ol wok bilong ol lain bilong dispela graun.—Jems 2:8; 1 Korin 6:9, 10; Jon 15:19.

Jehova i tokim ol hetman bilong graun ol i mas daun long Jisas. (Sam 2:10-12) Tasol ol i no laik mekim olsem, na planti taim ol i birua long ol Kristen, em ol i save daun long em. Olsem na hevi i save painim ol manmeri i “brukim skru” long nem bilong Jisas. Jisas yet i bin toksave, olsem: “Olgeta lain manmeri bai ol i bel nogut tru long yupela. Long wanem nem bilong mi em i stap long yupela.”—Matyu 24:9.

Taim ol gutpela Kristen i litimapim nem bilong Jisas, long wanem ol i tingim bikpela wok na namba bilong em, nau dispela hevi i painim ol. Tasol ol i amamas long mekim ol wok bilong litimapim nem bilong em. Na ol manmeri ol i “tokaut olsem: ‘Jisas Krais em i Bikpela.’ Na bai nem bilong God Papa em i stap antap tru,” ol dispela manmeri bai kisim gutpela pe —Filipai 2:11.