Askim
Long Filipai 2:9, Pol i stori long Jisas na em i tok: “God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem.” Wanem dispela nupela nem? Na sapos Jisas i stap aninit long Jehova, olsem wanem nem bilong em i winim olgeta arapela nem?
Filipai 2:8, 9 i tok: “Na ol man i lukim em i stap man tru. Na em i daunim em yet na i bihainim tok bilong God, i go inap long em i dai, yes, inap long em i dai long diwai [pos]. Long dispela as tasol God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem.”
Yumi save, Jehova wanpela tasol i gat wanpela nem i winim tru olgeta arapela nem, tasol dispela skripsa i no makim olsem Jisas na Jehova i wanpela tasol. Ol ves i stap klostu long Filipai ves 8 na 9 long Filipai sapta 2 i kamapim klia olsem, Jisas i kisim dispela nem i antap moa bihain long em i kirap bek. Paslain long dispela taim, em i no gat dispela nem. Tasol Jehova i stap antap tru long olgeta taim, na dispela i no bin senis liklik. Tru Jisas i kisim wanpela nem i winim tru nem em i bin holim paslain long em i kam long graun, tasol dispela i no makim olsem Jisas i wankain olsem Jehova. Taim Pol i tok olsem Jisas i kisim wanpela nem i winim olgeta arapela nem, dispela i makim olsem nau Jisas i holim wanpela nem i winim nem bilong olgeta arapela samting Jehova i wokim na i gat laip.
Wanem dispela nem bilong Jisas i antap moa? Aisaia 9:6 i helpim yumi long bekim dispela askim. Dispela ves i tok profet long Mesaia Jisas bai kam, na i tok: “Em bai i stap king bilong yumi, na em bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim oltaim’ na ‘King bilong kamapim gutpela sindaun na bel isi.’ ” Long dispela ves, “nem” bilong Jisas i makim bikpela namba bilong em, na i gat wankain insait bilong dispela hap tok long Filipai 2:9, “wanpela nem i gutpela tru na i winim olgeta arapela nem.” Olgeta i mas brukim skru long Jisas na tingim bikpela namba Jehova i bin givim long em—em wanpela namba i winim namba Jehova i bin givim long olgeta arapela samting Em i wokim na i gat laip. Dispela ves long tok Grik i no kamapim klia dispela tok “arapela” olsem i stap long Baibel Pisin, tasol ol arapela tok bilong dispela ves i makim olsem i mas i gat dispela tok. “Nem” bilong Jisas i no winim nem bilong em yet, nogat; em i winim nem bilong olgeta arapela samting Jehova i wokim na i gat laip.
Yumi amamas tru long bung wantaim olgeta gutpela ensel na ol manmeri long brukim skru na tingim dispela nem bilong Jisas! Yumi mekim olsem taim yumi daun long Jisas, em Jehova i givim bikpela nem na namba long em, “na long dispela pasin [yumi] bai i givim biknem long God Papa.”—Filipai 2:11; Matyu 28:18.