Trastim Ol Tok Jehova i Givim Bilong Kirapim Yumi Long Tingim Gen Ol Samting

1. Long ol miting bilong yumi, planti taim yumi save stadi long wanem ol samting? Taim yumi stadi oltaim long ol dispela samting, dispela i helpim yumi olsem wanem?

TAIM yu redim Wastaua bilong stadi, ating yu bin tingting olsem, ‘I luk olsem mipela i bin stadi pinis long dispela samting.’ Sapos yu bin go long ol miting bilong ol Witnes Bilong Jehova inap sampela haptaim pinis, ating yu luksave olsem i gat sampela samting em ol i save stadi long en planti taim. Planti taim yumi save stadi long Kingdom Bilong God, pe bilong baim bek man, wok autim tok, na ol pasin olsem pasin laikim na pasin bilong bilip. Taim yumi stadi oltaim long ol dispela samting, dispela bai strongim bilip bilong yumi na helpim yumi long “kamap ol man bilong bihainim tok, na no ken kamap man bilong harim nating tasol.”—Jems 1:22.

2. (a) Long Baibel, olsem wanem God i “kirapim [yumi] long tingim gen ol samting”? (b) Olsem wanem ol lo bilong Jehova i narapela kain long ol lo bilong ol man?

² Long Baibel, God i kamapim ol tok na ol lo bilong em na dispela i bilong “kirapim [yumi] long tingim gen ol samting.” Ol lo bilong Jehova i narapela kain tru long ol lo bilong ol man, long wanem, ol lo bilong ol man i no stret na planti taim ol i save senisim. Ol lo bilong God i stret olgeta na yumi ken bilip tru olsem taim yumi bihainim, oltaim dispela bai helpim yumi. Em tru olsem sampela lo em God i bin givim long bipo, ol manmeri bilong em long nau i no gat wok long bihainim. Tasol dispela i no makim olsem ol dispela lo i no stret, nogat. Man bilong raitim song i tok: “Tok bilong yu i stretpela oltaim oltaim.”—Sng. 119:144.

3, 4. (a) Sampela taim Jehova i mekim wanem bilong kirapim lain bilong em long tingim gen ol samting? (b) God bai mekim wanem long lain Israel sapos ol i bihainim ol lo bilong em?

³ Sampela taim, Jehova i givim ol tok lukaut bilong kirapim ol man long tingim gen ol samting. Planti taim God i save yusim ol profet bilong em long givim ol tok lukaut long lain Israel. Olsem: Paslain liklik long lain Israel i go insait long Graun Bilong Promis, Moses i givim tok lukaut long ol olsem: “Yupela i no ken larim ol man bilong ol arapela lain i paulim tingting bilong yupela. Nogut ol i pulim yupela na yupela i givim baksait long Bikpela na mekim lotu long ol giaman god na mekim wok bilong ol. Sapos yupela i bihainim dispela pasin, orait bai Bikpela i kros long yupela.” (Lo 11:16, 17) Baibel i kamapim planti gutpela tok we God i bin givim long lain bilong em long kirapim ol long tingim gen ol samting.

⁴ Planti taim Jehova i kirapim lain bilong em long tingim gen olsem ol i mas i stap daun long em, bihainim tok bilong em, na givim biknem long em. (Lo 4:29-31; 5:28, 29) God i tok promis olsem sapos ol i bihainim ol dispela lo, orait em bai givim planti blesing long ol.—Wkp. 26:3-6; Lo 28:1-4.

GOD I KIRAPIM LAIN ISRAEL LONG TINGIM GEN OL SAMTING

5. Bilong wanem Jehova i helpim King Hesekia?

⁵ Olgeta taim God i save truim ol tok promis bilong em long lain Israel. Olsem: Taim King Senakerip bilong Asiria i kam bilong pait long ol Juda na em i pretim King Hesekia, Jehova i salim wanpela ensel long i go helpim ol manmeri bilong Em. Long 1-pela nait tasol, ensel bilong God i kilim i dai 185 tausen soldia bilong Asiria. Senakerip i sem nogut tru na em i go bek long ples bilong em. (2 Sto. 32:21; 2 Kin. 19:35) Bilong wanem God i helpim King Hesekia? Long wanem, oltaim Hesekia i bin stap gut long God na “bihainim gut olgeta lo” bilong em.—2 Kin. 18:1, 5, 6.

6. Olsem wanem King Josaia i soim olsem em i trastim Jehova?

⁶ Narapela man husat i bin bihainim ol lo bilong Jehova, em King Josaia. Kirap long taim em i liklik yet, em i “mekim gutpela pasin long ai bilong Bikpela.” (2 Sto. 34:1, 2) Josaia i soim olsem em i trastim Jehova taim em i bagarapim olgeta imis na em i helpim ol man long lotuim gen Jehova. Olsem na Jehova i blesim em na kantri olgeta.—Ritim 2 Stori 34:31-33.

7. Wanem samting i kamap taim lain Israel i sakim tok bilong Jehova?

⁷ Tasol sori tru, taim Jehova i kirapim lain bilong em long tingim gen ol samting, sampela taim ol i no save trastim tok bilong em. Insait long planti handret yia ol i sakim tok bilong Jehova planti taim. Taim bilip bilong ol i no strong, ol i kirap bihainim ol narapela long lotuim ol giaman god. (Efe. 4:13, 14) Olsem God i bin tok lukaut pinis, ol i no trastim em, olsem na hevi i painim ol.—Wkp. 26:23-25; Jer. 5:23-25.

8. Olsem wanem samting i painim yumi long nau i wankain long samting i bin painim lain Israel?

⁸ Olsem wanem samting i painim yumi long nau i wankain long samting i bin painim lain Israel? Lain bilong God long nau i kisim tok kaunsel na tok bilong stretim ol, wankain olsem lain Israel i bin kisim. (2 Pita 1:12) Long olgeta taim yumi ritim Baibel, yumi save tingim gen ol lo bilong God. Na Jehova i larim yumi long makim olsem yumi bai bihainim ol lo bilong em, o yumi bai mekim ol samting em yumi yet i ting i stret long yumi mekim. (Snd. 14:12) Orait nau yumi ken stori long as na yumi mas putim yau long ol tok Jehova i givim bilong kirapim yumi long tingim gen ol samting, na dispela bai helpim yumi olsem wanem.

BIHAINIM TOK BILONG GOD NA STAP LAIP

9. Taim lain Israel i stap long ples drai nating, olsem wanem Jehova i kirapim ol long tingim gen olsem em i sambai long ol?

⁹ Taim lain Israel i kirapim wokabaut bilong 40 yia long ples drai nating, Jehova i no tokim ol long olgeta liklik samting em bai mekim bilong sambai long ol, stiaim, na lukautim ol. Tasol em i mekim planti samting long soim olsem ol inap stap gut sapos ol i trastim em na bihainim ol tok bilong em. Long san Jehova i yusim klaut na long nait em i yusim paia long soim rot long ol. Jehova i laik kirapim lain Israel long tingim gen olsem em i sambai long ol taim ol i mekim dispela wokabaut we i gat planti hatwok long en. (Kis. 40:36-38; Lo 1:19) Na tu, em i givim olgeta samting ol i nidim, na ol i no sot long wanpela samting. “Klos samting bilong ol i no bin bruk na lek bilong ol i no bin pen o solap.”—Neh. 9:19-21.

10. Olsem wanem Jehova i stiaim lain bilong em long nau?

¹⁰ Klostu nau ol wokman bilong God bai i stap long nupela taim i gat stretpela pasin long en. Olsem wanem? Yumi bilip olsem Jehova i givim olgeta samting yumi nidim bilong abrusim bagarap long taim bilong “traipela hevi tru”? (Mat. 24:21, 22; Sng. 119:40, 41) Em tru olsem long nau Jehova i no yusim klaut o paia long bringim yumi i go long nupela taim. Tasol em i yusim oganaisesen bilong em long kirapim yumi long tingim gen ol samting. Olsem: Yumi kisim ol tok bilong strongim pasin bilong yumi long pas gut wantaim Jehova long rot bilong ritim Baibel, mekim Famili Lotu, go long olgeta miting, na insait long wok autim tok. Olsem wanem? Yumi mekim sampela senis long laip bilong yumi na bai yumi inap bihainim ol dispela tok? Taim yumi mekim olsem, dispela bai strongim bilip bilong yumi na helpim yumi long abrusim bagarap na go insait long nupela taim.

11. Olsem wanem God i soim olsem em i tingim helt bilong yumi na em i laik bai yumi stap amamas?

¹¹ Na tu, oganaisesen bilong God i stiaim yumi long mekim gutpela disisen long ol samting yumi mekim long olgeta wan wan de. Olsem: Oganaisesen i kirapim yumi long holim stretpela tingting long mani kago na no ken bungim planti samting, na long dispela rot yumi no inap wari tumas. Yumi kisim tu ol tok bilong helpim yumi long skelim gut klos yumi werim, pasin bilong bilasim na mekim gut skin, wanem kain amamas i stret, na hamas skul yumi laik winim. Na tu, tingim ol tok yumi kisim bilong kirapim yumi long tingim gen olsem yumi mas lukautim gut ol samting long haus, kar, Haus Kingdom, na mekim ol samting bilong redim yumi yet long bungim ol hevi. Olgeta dispela skultok i soim olsem God i tingim helt bilong yumi na em i laik bai yumi stap amamas.

GOD I KIRAPIM OL KRISTEN BILONG PASTAIM LONG TINGIM GEN OL SAMTING

12. (a) Planti taim Jisas i tokim ol disaipel long wanem samting? (b) Pita i bin kisim wanem skul long pasin daun na em i no bin lusim tingting long en? Yumi inap kisim wanem skul long pasin bilong Jisas?

¹² Long taim bilong ol aposel, oltaim ol manmeri bilong God i save kisim ol tok bilong kirapim ol long tingim gen ol samting. Planti taim Jisas i tokim ol disaipel olsem ol i mas bihainim pasin daun. Em i tokim ol long ol samting ol i mas mekim. Na tu, em yet i mekim ol samting bilong soim pasin daun. Long nait paslain long Jisas i dai, em i stap wantaim ol aposel long bung bilong Pasova. Taim ol aposel i kaikai i stap, Jisas i kirap na em i wasim lek bilong ol. Dispela em wok bilong ol wokboi. (Jon 13:1-17) Samting Jisas i mekim long dispela nait i skulim ol aposel long wanpela bikpela samting we ol i no lusim tingting long en. Aposel Pita i bin stap long dispela bung, olsem na inap 30 yia bihain, em i kirapim ol arapela Kristen long bihainim pasin daun. (1 Pita 5:5) Eksampel bilong Jisas i mas kirapim yumi olgeta long bihainim pasin daun long ol samting yumi mekim long narapela narapela.—Fili. 2:5-8.

13. Jisas i bin skulim ol disaipel olsem em i bikpela samting long ol i mas i gat wanem pasin?

¹³ Narapela samting em planti taim Jisas i tokim ol disaipel long en em olsem, ol i mas i gat strongpela bilip. Wanpela taim ol disaipel i no inap long oraitim wanpela boi em spirit nogut i bosim em. Ol i askim Jisas olsem: “Bilong wanem mipela i no inap rausim dispela spirit nogut?” Jisas i bekim tok olsem: “Bilip bilong yupela i liklik.” Na em i tokim ol olsem sapos bilip bilong ol i kain olsem sais bilong “sid mastet,” orait ol inap mekim olgeta samting. (Mat. 17:14-20) Taim Jisas i bin mekim wok autim tok hia long graun, em i skulim ol disaipel olsem em i bikpela samting tru long ol i mas i gat bilip. (Ritim Matyu 21:18-22.) Olsem wanem? Oltaim yumi save go long olgeta kibung na ol miting na bai dispela i ken strongim bilip bilong yumi? Ol dispela bung i no bung bilong kisim amamas tasol, nogat. Ol dispela bung i opim rot long yumi ken soim olsem yumi trastim Jehova.

14. Long nau, bilong wanem em i bikpela samting long yumi mas daunim laik bilong yumi yet na laikim tru ol arapela?

¹⁴ Ol Skripsa Grik i kamapim planti tok bilong kirapim yumi long tingim gen olsem yumi mas soim pasin laikim long narapela narapela. Jisas i tok namba 2 bikpela lo em olsem: “Yu mas laikim ol arapela man olsem yu laikim yu yet.” (Mat. 22:39) Jems, em brata bilong Jisas, em i kolim pasin laikim olsem “dispela lo i gutpela tru.” (Jems 2:8) Aposel Jon i tok: “Ol pren tru, mi no rait na stori long yupela long wanpela nupela lo, nogat, mi stori long wanpela olpela lo em yupela i bin kisim long pastaim.” (1 Jon 2:7, 8) Taim Jon i tok “olpela lo,” dispela i makim wanem samting? Dispela tok i makim lo i tok long yumi mas laikim narapela narapela. Dispela lo i “olpela,” long wanem, Jisas i bin givim dispela lo planti yia i go pinis, i olsem em i bin givim “long pastaim” yet. Tasol dispela lo i “nupela” tu, long wanem, bihain ol hevi i kamap na ol disaipel i mas daunim laik bilong ol yet na laikim tru ol arapela. Long nau, yumi amamas long kisim ol tok lukaut we i helpim yumi long daunim laik bilong yumi yet na laikim tru ol arapela, na yumi no tingim yumi yet tasol olsem ol manmeri bilong graun i save mekim.

15. Wanem bikpela risen bilong Jisas long kam long graun?

¹⁵ Jisas i tingim tru ol manmeri. Em i soim dispela pasin taim em i oraitim ol sikman na kirapim bek ol man i dai pinis. Tasol bikpela risen bilong Jisas long kam long graun em i no bilong oraitim sik bilong ol man, nogat. Wok autim tok na wok tisa bilong em i bin helpim tru ol man. Em tru olsem ol manmeri em Jisas i bin oraitim na kirapim bek ol, bihain ol i kamap lapun na ol i dai. Tasol ol manmeri husat i bilipim tok em Jisas i bin autim, ol inap kisim laip oltaim.—Jon 11:25, 26.

16. Long nau, olsem wanem ol Witnes Bilong Jehova i bihainim tok bilong Jisas long kamapim ol disaipel?

¹⁶ Jisas i tokim ol disaipel olsem: “Yupela i mas i go na kamapim ol disaipel long olgeta lain man.” (Mat. 28:19) Ol Kristen long taim bilong ol aposel i mekim wok em Jisas i bin kirapim, na long nau yumi autim tok long planti manmeri moa na long planti ples winim long bipo. Winim 7 milion Witnes Bilong Jehova i givim bel tru long skulim ol narapela long Kingdom Bilong God long winim 230 kantri, na ol Witnes i stadi long Baibel wantaim planti milion manmeri. Dispela wok bilong autim tok i kamapim klia olsem yumi stap long taim bilong las de.

TRASTIM JEHOVA LONG NAU

17. Pita na Pol i bin givim wanem tok long ol Kristen long taim bilong ol aposel?

¹⁷ Long taim bilong ol aposel, God i bin kirapim ol Kristen long tingim gen ol samting, na dispela i bin strongim bilip bilong ol. Olsem: Taim Pol i stap kalabus long Rom, em i kirapim gen tingting bilong Timoti, na em i tok: “Bihainim yet astingting bilong ol gutpela tok yu bin harim long mi.” (2 Tim. 1:13) Ating ol dispela tok i bin strongim tru Timoti. Na tu, bihain long Pita i kirapim ol Kristen long soim pasin bilong sanap strong, laikim ol brata, na bosim bel, em i tok moa olsem: “Oltaim mi redi long kirapim yupela long tingim gen ol samting mi raitim long yupela, na mi mekim olsem maski yupela i save pinis long ol dispela samting na yupela i stap strong long tok i tru.”—2 Pita 1:5-8, 12.

18. Ol Kristen long taim bilong ol aposel i gat wanem tingting long ol tok ol i bin kisim?

¹⁸ Em tru olsem tok em Pol na Pita i raitim i go long ol kongrigesen i wankain long “ol tok ol profet holi i bin mekim.” (2 Pita 3:2) Yu ting ol brata long taim bilong ol aposel i bel hevi taim ol i kisim dispela tok? Nogat. Ol i save olsem God i givim dispela tok, long wanem, em i laikim ol na em i laik helpim ol long holimpas bilip.—2 Pita 3:18.

19, 20. Bilong wanem yumi ken bilip tru olsem sapos yumi bihainim ol tok Jehova i givim long yumi, dispela bai helpim yumi? Olsem wanem yumi kisim helpim long ol tok Jehova i givim bilong kirapim yumi long tingim gen ol samting?

¹⁹ Long nau, i gat planti risen long yumi ken bilip tru olsem sapos yumi bihainim ol tok em Jehova i givim long yumi long rot bilong Baibel, dispela bai helpim yumi. Tok Bilong God long Baibel i stret olgeta na i no save popaia. (Ritim Josua 23:14.) Baibel i stori long ol samting God i bin mekim long ol manmeri insait long planti tausen yia i go pinis. Ol dispela stori i stap bilong helpim yumi. (Rom 15:4; 1 Kor. 10:11) Na tu, yumi lukim truim bilong ol tok profet bilong Baibel long taim bilong yumi. Ol tok profet i olsem ol tok bilong kirapim yumi long tingim gen ol samting we bai kamap planti yia bihain. Olsem: Tok profet i bin makim olsem “wanpela taim bai i kamap bihain” na planti milion manmeri bai kam lotuim Jehova, na dispela tok i kamap tru. (Ais. 2:2, 3) Pasin bilong dispela graun i wok long i go nogut moa. Dispela tu i truim tok profet bilong Baibel. Na olsem yumi stori pinis, wok autim tok long olgeta hap bilong graun i truim tok profet bilong Jisas.—Mat. 24:14.

²⁰ Inap planti handret yia pinis, Man Bilong Wokim yumi i bin kamapim klia olsem yumi ken trastim em. Olsem wanem? Yumi kisim helpim long ol tok God i givim bilong kirapim yumi long tingim gen ol samting? Wanpela sista nem bilong em Rosellen i tok: “Taim mi trastim tru Jehova, mi luksave olsem em i bin helpim na strongim mi.” Yumi tu inap kisim helpim long pasin bilong putim yau long ol tok Jehova i givim bilong kirapim yumi long tingim gen ol samting.