Ol Referens Bilong Laip na Wok Autim Tok Miting Wok Buk
JANUERI 6-12
GUTPELA SAVE I KAM LONG BAIBEL | STAT 1-2
“Jehova i Wokim Ol Samting Long Graun”
(Stat 1:3, 4) Na God i tok: “Lait i mas kamap.” Orait lait i kamap. 4 God i lukim olsem lait i gutpela, na em i brukim tudak na tulait.
(Stat 1:6) Bihain God i tok: “Bikpela spes i mas kamap namel long ol wara na brukim wara i go long 2-pela hap.”
(Stat 1:9) Bihain God i tok: “Wara i stap aninit long skai i mas bung long wanpela hap na ples drai i mas kamap ples klia.” Na dispela samting i kamap.
(Stat 1:11) Na God i tok: “Graun i mas kamapim ol kain kain gras, ol kain kain diwai i gat prut na sid long en, na ol arapela samting i kamap long graun em ol i gat sid.” Na dispela samting i kamap.
it-1 527-528
Ol Samting God i Wokim
Taim God i tok long De Namba 1 olsem, “Lait i mas kamap,” lait i sut i kam ausait long ol klaut maski ol samting i kamapim dispela lait i no stap ples klia yet. I luk olsem dispela samting i kamap isi isi, olsem man bilong tanim tok em J.W. Watts i tok: “Na isi isi lait i kamap ples klia.” (St 1:3, A Distictive Translation of Genesis) God i brukim tudak na tulait, na em i kolim tulait De na tudak Nait. Dispela i makim olsem graun i save tanim tanim raunim san, olsem na i gat taim bilong tulait na tudak long hap is na hap wes bilong graun.—St 1:3, 4.
Long De Namba 2, God i tok bikpela spes i mas kamap “namel long ol wara” na brukim wara i go long tupela hap. Sampela wara i stap long graun, tasol bikpela hap bilong wara i stap antap tru long skai, na bikpela spes i kamap namel long tupela. God i kolim dispela bikpela spes olsem Skai, na graun i stap daunbilo, tasol dispela wara i stap antap long skai i no gat ol sta o ol arapela samting bilong ples antap long en.—St 1:6-8. Lukim BIKPELA SPES.
Long De Namba 3 God i wokim mirakel na ol wara i stap long graun i bung long wanpela hap na ples drai i kamap ples klia, na God i kolim dispela ples drai, Graun. Na long dispela de tu, God i mekim graun i kamapim ol samting olsem ol gras, ol diwai i gat prut na sid long en, na ol arapela samting em ol i gat sid. Ol dispela samting i no kamap nating long rot bilong evolusen, nogat. So graun i kamapim “kain kain” gras na diwai i gat ol prut na ol sid long en, na ol arapela samting em ol i gat sid.—St 1:9-13.
(Stat 1:14) Bihain God i tok: “Ol samting bilong givim lait i mas kamap ples klia long skai bilong brukim de na nait, na ol bai i stap olsem mak bilong ol sisen, ol de, na ol yia.
(Stat 1:20) Bihain God i tok: “Ol samting i gat laip i mas pulap long ol wara, na ol samting i save flai i mas flai antap long graun long bikpela spes long skai.”
(Stat 1:24) Bihain God i tok: “Graun i mas kamapim ol kain kain samting i gat laip, ol kain kain animal bilong ples, ol kain kain wel animal bilong graun, na ol kain kain arapela animal.” Na dispela samting i kamap.
(St 1:27) Orait God i wokim man i kamap olsem em yet. Em i wokim man i kamap olsem God yet. Em i wokim man na meri.
it-1 528 par. 5-8
Ol Samting God i Wokim
Baibel Nupela Taim Trenslesen Bilong Ol Skripsa Holi long Stat 1:16 i tanim tok Hibru ʽa·sahʹ olsem “makim” bilong soim olsem longtaim i go pinis paslain long De Namba 4, God i bin wokim san, mun, na ol sta. Long de namba 4 God i “makim” ol dispela samting bilong givim lait long stap ples klia long skai. Taim Baibel i tok “God i putim ol long skai bilong givim lait long graun,” dispela i makim olsem nau lait bilong ol inap sut i go long olgeta hap bilong graun. Na tu, ol dispela samting bilong givim lait “bai i stap olsem mak bilong ol sisen, ol de, na ol yia,” na long dispela rot ol i stiaim ol man.—St 1:14.
Long De Namba 5 Jehova i wokim ol animal long graun. God i no kamapim ol samting long rot bilong evolusen, nogat, long strong bilong em, em i wokim olgeta animal. Baibel i tok: “God i wokim ol bikpela animal bilong solwara, na ol kain kain samting i gat laip na i save muv na i planti tru long ol wara, na olgeta kain samting i gat wing na i save flai.” God i amamas long ol samting em i wokim na em i blesim ol na tokim ol long “kamap planti.” Dispela samting inap kamap, long wanem, God i wokim ol dispela animal na bai ol inap long kamapim ol pikinini bilong ol yet.—St 1:20-23.
Long De Namba 6, “God i wokim ol kain kain wel animal, na ol kain kain animal bilong ples, na ol kain kain arapela animal,” olgeta dispela samting God i wokim i gutpela, na tu, ol arapela samting em i wokim tu i gutpela.—St 1:24, 25.
Klostu long pinis bilong namba 6 de, God i wokim ol man, ol i winim ol animal tasol strong bilong ol i no olsem bilong ol ensel. God i wokim man i kamap olsem em yet. Long Stat 1:27 i tok, “em [God] i wokim man na meri,” na Stat 2:7-9 i kamapim olsem God Jehova i kisim graun na wokim man, na winim win bilong laip i go insait long nus bilong em, na em i kamap man i gat laip. Na God i wokim wanpela gaden bilong man i ken stap long en na givim em ol kaikai. Jehova i bin kisim graun na wokim man, na Em i kisim wanpela hap bun bilong banis long sait bilong Adam na wokim meri. (St 2:18-25) So nau i gat man na meri.—St 5:1, 2.
Mekim Wok Painimaut
(Stat 1:1) Taim God i stat long wokim ol samting, em i wokim ples antap na graun.
Hau Saiens i Helpim i Stap Bilong Yu
Krismas bilong graun na yunives
Ol saientis i ting graun i stap klostu 4 bilion yia pinis, na ol samting long yunives i bin i stap klostu 13 o 14 bilion yia. Baibel i no stori long taim stret yunives i bin kamap. Na tu, em i no tok graun i stap inap sampela tausen yia, nogat. Namba 1 ves bilong Baibel i tok: “Bipo bipo tru God i mekim kamap skai na graun na olgeta samting i stap long en.” (Stat 1:1) Dispela tok i helpim ol saientis long yusim save bilong saiens long painimaut krismas bilong graun na yunives.
(Stat 1:26) Bihain God i tok: “Nau yumi mas wokim man i kamap olsem yumi yet, na em i mas bosim ol pis long solwara, olgeta samting i flai long skai, ol animal bilong ples, na olgeta hap bilong graun, na ol arapela animal i save muv i go i kam long graun.”
it-2 52
Jisas Krais
Em i No Man Bilong Wokim Olgeta Samting Olsem God. Pikinini i helpim Papa bilong em long wokim ol samting, tasol em i no Man Bilong Wokim olgeta samting olsem Papa bilong em. Long rot bilong holi spirit God i wokim olgeta samting. (St 1:2; Sg 33:6) Na Jehova em i As bilong laip bilong olgeta samting, olsem na laip bilong olgeta samting i kam long em. (Sg 36:9) Jehova, em Man Bilong Wokim olgeta samting, na long rot bilong Pikinini bilong em, em i wokim ol samting. Jisas yet i tokaut olsem God i bin wokim olgeta samting, olsem Baibel i kamapim.—Mt 19:4-6; lukim OL SAMTING GOD I WOKIM.
Baibel Ritim
(Stat 1:1-19) Taim God i stat long wokim ol samting, em i wokim ples antap na graun. 2 Graun i stap nating na i no gat wanpela samting i stap ples klia. Tudak i karamapim bikpela wara. Na strong bilong God bilong mekim wok i go i kam antap long wara. 3 Na God i tok: “Lait i mas kamap.” Orait lait i kamap. 4 God i lukim olsem lait i gutpela, na em i brukim tudak na tulait. 5 God i kolim tulait, De, na em i kolim tudak, Nait. Nait i go pinis na moning i kamap. Em i de namba 1. 6 Bihain God i tok: “Bikpela spes i mas kamap namel long ol wara na brukim wara i go long 2-pela hap.” 7 Orait God i wokim spes na brukim wara, wara i stap daunbilo na wara i stap antap. Na dispela samting i kamap. 8 Na God i kolim dispela spes olsem Skai. Nait i go pinis na moning i kamap. Em i de namba 2. 9 Bihain God i tok: “Wara i stap aninit long skai i mas bung long wanpela hap na ples drai i mas kamap ples klia.” Na dispela samting i kamap. 10 Orait God i kolim dispela ples drai, Graun, na olgeta wara i bung wantaim em i kolim Solwara. Na God i lukim olsem ol dispela samting i gutpela. 11 Na God i tok: “Graun i mas kamapim ol kain kain gras, ol kain kain diwai i gat prut na sid long en, na ol arapela samting i kamap long graun em ol i gat sid.” Na dispela samting i kamap. 12 Na graun i kamapim ol kain kain gras, ol kain kain diwai i gat prut na sid long en, na ol arapela samting i kamap long graun em ol i gat sid. Na God i lukim olsem ol samting em i wokim i gutpela. 13 Nait i go pinis na moning i kamap. Em i de namba 3. 14 Bihain God i tok: “Ol samting bilong givim lait i mas kamap ples klia long skai bilong brukim de na nait, na ol bai i stap olsem mak bilong ol sisen, ol de, na ol yia. 15 Ol bai i stap olsem lait long skai na givim lait long graun.” Na dispela samting i kamap. 16 Na God i makim tupela bikpela lait. Wanpela em i bikpela moa bilong givim lait long de, na narapela, lait bilong en i no strong tumas, em bilong givim lait long nait. Na em i wokim tu ol sta. 17 God i putim ol long skai bilong givim lait long graun, 18 na bilong bosim de na nait, na bilong brukim tudak na tulait. Na God i lukim olsem dispela samting i gutpela. 19 Nait i go pinis na moning i kamap. Em i de namba 4.
JANUERI 13-19
GUTPELA SAVE I KAM LONG BAIBEL | STAT 3–5
“Namba 1 Tok Giaman i Bringim Pen na Hevi”
(Stat 3:1-5) Snek i gat pasin bilong was gut, winim olgeta arapela wel animal Jehova God i bin wokim. Na em i tokim meri: “Tru tru God i tokim yutupela long no ken kaikai prut bilong olgeta diwai bilong gaden, a?” 2 Na meri i bekim tok long snek olsem: “Mitupela i ken kaikai prut bilong ol diwai bilong gaden. 3 Tasol God i tok long prut bilong dispela diwai i stap namel long gaden olsem, ‘Yutupela i no ken kaikai prut bilong en, nogat. Na yutupela i no ken tatsim prut bilong en. Sapos yutupela i mekim, bai yutupela i dai.’” 4 Orait na snek i tokim meri olsem: “Tru tumas, yutupela i no inap i dai.5 God i save olsem long dispela de stret yutupela i kaikai prut bilong en, ai bilong yutupela bai op, na bai yutupela i kamap wankain olsem God, na bai yutupela i save long wanem samting i gutpela na wanem samting i nogut.”
Jehova Bai Kamapim Samting Em i Tingting Pinis Long Mekim!
9 Satan i yusim snek long giamanim Iv na kirapim em long sakim tok bilong Papa bilong em, Jehova. (Ritim Stat 3:1-5; Rev. 12:9) Satan i laik save sapos God i tambuim ol pikinini bilong em long graun long “kaikai pikinini bilong olgeta diwai bilong gaden.” I olsem Satan i tok: ‘Em tru olsem God i tambuim yutupela long bihainim laik bilong yutupela yet?’ Satan i giaman na tok: “Nogat. Yutupela i no inap i dai.” Bihain, Satan i kirapim Iv long kisim tingting olsem i no gat wok long em i harim tok bilong God, na Satan i tok: “Sapos yutupela i kaikai pikinini bilong dispela diwai, bai ai bilong yutupela i op . . . God i save long dispela, olsem na em i tambuim yutupela long kaikai pikinini bilong dispela diwai.” Satan i laik bai Iv i kisim tingting olsem Jehova i no laik bai ol i kaikai dispela prut bikos save bilong ol bai kamap bikpela moa. Satan i mekim gen narapela tok giaman olsem: “Yutupela [bai] kisim save long wanem samting i gutpela, na wanem samting i nogut, na bai yutupela i kamap wankain olsem God.”
(Stat 3:6) Na meri i lukim olsem prut bilong diwai i gutpela bilong kaikai na long ai em i luk nais, yes, dispela diwai i luk nais tru. Olsem na meri i kisim prut bilong en na kaikai. Bihain, taim em i stap wantaim man bilong em, meri i givim sampela long man na man i kaikai.
Pasin Bilong Namba Wan Man na Meri Inap Skulim Yumi
Yu ting Iv i mas mekim dispela sin? Nogat tru! Tingim olsem samting i painim Iv i bin painim yu. Tok bilong snek i paulim tru tok God na Adam i mekim. Bai yu pilim olsem wanem sapos wanpela man yu no save long em na em i sutim tok giaman long wanpela man yu save laikim tru na yu bilip long em? Iv inap kamapim olsem em i nolaik tru na i kros long tok bilong Satan, na em i no laik harim dispela tok. Na tu, em i no stret dispela snek i sutim tok long stretpela pasin bilong God na daunim tok bilong man bilong em, a? Sapos em i daun long wok bos bilong man bilong em, em bai askim em long givim sampela gutpela tok long em paslain long em i mekim wanpela samting. Yumi tu i mas mekim olsem sapos sampela i kamapim wanpela tok i no stret wantaim ol lo God i tok yumi mas bihainim. Tasol Iv i bilipim tok bilong dispela man i traim em, na em yet i laik skelim wanem samting i gutpela na wanem samting i nogut. Taim em i wok long tingim tingim dispela samting, nau dispela i kirapim tru bel bilong em. Em i mekim bikpela rong tru taim em i larim tingting bilong em i pas long wanpela laik nogut—em i mas rausim dispela tingting o toktok wantaim het bilong famili long dispela samting!—1 Korin 11:3; Jems 1:14, 15.
Adam i Harim Tok Bilong Meri Bilong Em
I no longtaim na Iv i pulim Adam long mekim sin. Bai yumi stori olsem wanem long pasin em i mekim long kirap wantu tasol long bihainim tok bilong Iv? (Stat 3:6, 17) Adam i mas skelim olsem em bai bihainim tok bilong husat. Em bai bihainim tok bilong Man i bin wokim em na givim em olgeta samting, na givim em tu dispela poroman em i save laikim tru, em Iv? O bai em i askim God long tokim em long wanem samting em i mas mekim nau? O bai em i bihainim tok bilong meri bilong em? Adam i save olsem dispela samting Iv i tingting long kisim sapos em i kaikai pikinini bilong dispela diwai, em bai i no inap long kisim. Spirit holi i givim tingting long aposel Pol long raitim tok olsem: “Adam i no bilipim tok giaman. Nogat. Meri i bilipim tok giaman, na em i mekim sin.” (1 Timoti 2:14) Olsem na long laik bilong em yet, Adam i bikhet na sakim Jehova. Em i pret, nogut em i mas lusim meri bilong em, na dispela tingting i winim bilip bilong em olsem God em inap long stretim dispela hevi.
(Stat 3:15-19) Na bai mi mekim yu i stap birua bilong meri na meri i stap birua bilong yu. Na lain pikinini bilong yu bai stap birua bilong lain pikinini bilong meri. Em bai krungutim het bilong yu na bai yu kaikaim lek bilong em.” 16 Em i tokim meri olsem: “Taim yu gat bel bai mi mekim yu kisim bikpela pen moa. Na bai yu pilim pen taim yu karim pikinini. Na bai yu gat bikpela laik yet long man bilong yu, na bai em i bosim yu.” 17 Na em i tokim Adam olsem: “Yu bin harim tok bilong meri bilong yu na yu kaikai prut bilong dispela diwai em mi bin tokim yu olsem, ‘Yu no ken kaikai prut bilong en.’ Olsem na mi bai mekim graun i bagarap bikos long yu. Na bai yu wok hat tru long kisim kaikai long graun long laip olgeta bilong yu. 18 Ol rop i gat nil na gras nogut bai kamap long graun bilong yu, na bai yu kaikai ol kaikai em graun i kamapim. 19 Na bai yu wok hat tru long kisim kaikai na tuhat bai kamap long pes bilong yu, i go inap long yu go bek long graun. Long wanem, mi bin wokim yu long graun. Yu kamap long graun na bai yu go bek gen long graun.”
Tru God i Save Tingim Tru Ol Meri?
Yu ting God i bin tok long ol samting nogut bai painim ol meri?
Nogat. God i bin mekim “strongpela tok bilong daunim” Satan em ‘dispela traipela snek bilong bipo yet, ol i kolim em Devil.’ (Revelesen 12:9; Stat 3:14) Taim God i tok long Adam bai “bosim” meri bilong em, God i no tok olsem i orait long ol man i ken daunim ol meri na bosim ol strong, nogat. (Stat 3:16) Em i tokaut tasol long ol samting nogut em sin bai mekim long dispela tupela namba 1 marit.
Sampela Bikpela Tok Bilong Buk Stat—Namba Wan
3:17—Olsem wanem God i bagarapim graun? Dispela strongpela tok God i mekim long graun i stap inap long wanem taim? God i bagarapim graun na dispela i makim olsem bai i hatwok long wokim gaden na kamapim kaikai. Graun i pulap tru long ol rop i gat nil na ol gras nogut na ol tumbuna pikinini bilong Adam i pilim hatwok tru taim ol i wokim gaden, olsem na papa bilong Noa, em Lamek, em i tok olsem “Bikpela i bin mekim strongpela tok bilong bagarapim graun na mipela i mas hatwok tru long mekim kaikai i kamap gut.” (Stat 5:29) Bihain long Bikpela Tait, Jehova i blesim Noa na ol pikinini man bilong em, na em i tokaut long laik bilong em olsem ol i mas pulapim dispela graun. (Stat 9:1) Olsem na dispela i soim olsem God i rausim dispela strongpela tok em i mekim long graun na graun i no bagarap moa.—Stat 13:10.
it-2 186
Pen Bilong Karim Pikinini
Em pen meri i save pilim taim em i laik karim pikinini. Taim Iv, em namba 1 meri, i bin mekim sin pinis, God i tokim em long wanem samting bai painim em taim em i karim pikinini. Sapos em i bihainim tok, God bai blesim em na taim bilong em long karim pikinini em bai taim bilong amamas, long wanem, “ol blesing bilong Jehova i save mekim man i gat planti samting, na ol dispela blesing i no save bringim pen.” (Pr 10:22) Tasol, bodi i no gutpela olgeta, i bringim pen tasol. Olsem na God i tok (ol samting em i save larim i kamap i olsem em i mekim ol dispela samting i kamap): “Taim yu gat bel bai mi mekim yu kisim bikpela pen moa. Na bai yu pilim pen taim yu karim pikinini.”—St 3:16.
Mekim Wok Painimaut
(Stat 4:23, 24) Orait bihain Lamek i mekim dispela tok long tupela meri bilong em, Ada na Silah: “Harim tok bilong mi, yupela ol meri bilong Lamek; Putim yau long tok bilong mi: Wanpela man i paitim mi na mi kilim em i dai, Yes, wanpela yangpela man husat i solapim mi. 24 Sapos wanpela man i kilim i dai Kein i mas kisim panismen inap 7-pela taim, Orait man i kilim i dai Lamek i mas kisim panismen inap 77 taim.”
it-2 192 par. 5
Lamek
Tok Lamek i mekim long tupela meri bilong em (St 4:23, 24) i soim olsem ol manmeri long taim bilong em i gat pasin bilong pait na bagarapim man. Lamek i tok: “Harim tok bilong mi, yupela ol meri bilong Lamek; putim yau long tok bilong mi: Wanpela man i paitim mi na mi kilim em i dai, yes, wanpela yangpela man husat i solapim mi. Sapos wanpela man i kilim i dai Kein i mas kisim panismen inap 7-pela taim, orait man i kilim i dai Lamek i mas kisim panismen inap 77 taim.” Lamek i laik soim olsem em i no gat rong, em i no min long kilim i dai dispela man, olsem Kein i bin mekim. Lamek i tok, em i kilim i dai dispela man, long wanem, dispela man i paitim em na solapim em. Olsem na tok bilong em i bilong sambai long em yet, na bai ol man i no ken bekim bek pasin em i bin mekim.
(Stat 4:26) Na bihain Set tu i gat wanpela pikinini man na em i kolim nem bilong em, Enos. Long dispela taim ol manmeri i stat long singaut long nem bilong Jehova.
it-1 338 par. 2
Tok Bilas
Paslain long Bikpela Tait, long taim bilong Enos “ol manmeri i stat long singaut long nem bilong Jehova,” tasol dispela i no makim olsem ol i mekim stretpela wok long nem bilong Jehova. Dispela em i no fes taim ol i yusim nem bilong Jehova, long wanem, pastaim yet Abel i bin yusim nem bilong God taim em i lotuim em. (St 4:26; Hi 11:4) Olsem sampela saveman i tok, sapos ol manmeri long dispela taim i singaut long nem bilong God long pasin i no stret na ol i givim nem bilong Jehova long ol man o long ol imis, orait dispela i makim olsem ol i tok bilas long God.—Lukim ENOS.
Baibel Ritim
(Stat 4:17–5:8) Bihain Kein i slip wantaim meri bilong em na meri i gat bel na em i karim Enok. Na Kein i kirap wokim wanpela taun na em i givim nem bilong pikinini man bilong em, Enok, long dispela taun. 18 Bihain Enok i kamap papa bilong Irat. Na Irat i kamap papa bilong Mehujael, na Mehujael i kamap papa bilong Metusael, na Metusael i kamap papa bilong Lamek. 19 Na Lamek i maritim tupela meri. Nem bilong namba 1 meri, em Ada, na nem bilong namba 2 meri, em Silah. 20 Bihain Ada i karim Jabal. Jabal em i fes man long stap long ol haus sel na lukautim ol bulmakau na sipsip. 21 Na nem bilong brata bilong em, Jubal. Jubal em i fes man bilong mekim musik long harp na mambu. 22 Na Silah tu i karim Tubal-kein, em man bilong wokim olgeta kain tul long kopa na ain. Na susa bilong Tubal-kein em Nama. 23 Orait bihain Lamek i mekim dispela tok long tupela meri bilong em, Ada na Silah: “Harim tok bilong mi, yupela ol meri bilong Lamek; Putim yau long tok bilong mi: Wanpela man i paitim mi na mi kilim em i dai, Yes, wanpela yangpela man husat i solapim mi. 24 Sapos wanpela man i kilim i dai Kein i mas kisim panismen inap 7-pela taim, Orait man i kilim i dai Lamek i mas kisim panismen inap 77 taim.” 25 Na bihain Adam i slip gen wantaim meri bilong en, na meri i karim wanpela pikinini man. Na meri i kolim nem bilong em, Set, long wanem, meri i tok: “God i givim narapela pikinini long mi bilong kisim ples bilong Abel, long wanem, Kein i bin kilim em i dai.” 26 Na bihain Set tu i gat wanpela pikinini man na em i kolim nem bilong em, Enos. Long dispela taim ol manmeri i stat long singaut long nem bilong Jehova.
5 Dispela em i buk bilong histori bilong Adam. Taim God i bin wokim Adam, God i wokim em i kamap olsem God yet. 2 God i wokim ol i kamap man na meri. Taim em i wokim ol pinis, em i blesim ol na kolim ol olsem Man. 3 Adam i stap 130 yia na em i kamap papa bilong wanpela pikinini man i wankain olsem em yet. Na Adam i kolim nem bilong em, Set. 4 Bihain long Set i bon, Adam i stap 800 yia moa. Na em i gat ol arapela pikinini man na ol pikinini meri. 5 Adam i stap inap 930 yia olgeta na em i dai. 6 Set i stap 105 yia na em i kamap papa bilong Enos. 7 Bihain long Enos i bon, Set i stap 807 yia moa. Na em i gat ol arapela pikinini man na ol pikinini meri. 8 Set i stap inap 912 yia olgeta na em i dai.
JANUERI 20-26
GUTPELA SAVE I KAM LONG BAIBEL | STAT 6-8
“Em i Bihainim Olgeta Tok Bilong God”
(Stat 6:9) Dispela em i histori bilong Noa. Noa em i stretpela man. Em i no gat asua namel long ol man long taim bilong em. Noa i wokabaut wantaim God tru.
(Stat 6:13) Bihain God i tokim Noa olsem: “Mi tingting pinis long bagarapim olgeta manmeri, long wanem, ol manmeri i mekim na pasin bilong pait i pulap long graun. Olsem na mi bai bagarapim ol manmeri na dispela graun.
Bihainim Pasin Bilong Noa, Daniel na Jop Long Bilip na Bihainim Tok
4 Ol hevi Noa i bungim. Long taim bilong tumbuna papa bilong Noa, em Enok, ol manmeri i mekim ol kain kain pasin nogut tru. Ol i mekim ol “tok nogut tru” long Jehova. (Jut 14, 15) Pasin bilong pait na bagarapim man i go bikpela. Long taim bilong Noa, ol man “long olgeta hap bilong graun ol i wok long pait na bikhet tasol.” Ol bikhet ensel i kamap olsem ol man long graun na kisim ol meri na kamapim ol pikinini. Ol dispela pikinini i gat bikpela strong, na ol i save pait na bikhet. (Stt. 6:2-4, 11, 12) Tasol pasin bilong Noa i narapela kain long pasin bilong ol dispela manmeri. “Bikpela i amamas long Noa. . . . Noa em i gutpela man, na wokabaut bilong en i stret long ai bilong God. Em i pren tru bilong God.”—Stt. 6:8-10.
(Stat 6:14-16) Yu mas kisim plang bilong gutpela diwai na wokim wanpela sip. Yu mas wokim ol rum insait long dispela sip na peintim insait na ausait bilong sip long kolta. 15 Yu mas wokim dispela sip olsem, longpela bilong en i mas 300 kiubit, bikpela bilong en 50 kiubit na em i mas i go antap inap 30 kiubit. 16 Yu mas wokim windo long sip bilong larim lait i kam insait, inap 1 kiubit long antap. Yu mas wokim dua bilong sip long sait bilong en. Na dispela sip i mas i gat namba 1, namba 2, na namba 3 floa.
‘Wokabaut Bilong Em i Stret Long Ai Bilong God’
Dispela wok i winim planti yia tru, ating 40 i go inap 50 yia. Ol i mas katim ol diwai, pulim i kam, wokim ol palang samting, sapim long mak bilong sip, na skruim wantaim. Sip i mas i gat 3-pela plua, planti rum, na wanpela dua long sait bilong sip. I luk olsem i gat ol windo antap, na rup i gat liklik sap na bai wara i ken ran i go daun.—Stat 6:14-16.
(Stat 6:22) Orait Noa i mekim olgeta samting em God i tokim em long mekim. Em i bihainim olgeta tok bilong God.
Sanap Strong na Ran Long Resis
13 Wanem samting i helpim ol dispela wokboi bilong Jehova long sanap strong inap long resis i pinis? Tingim tok Pol i raitim i stori long Noa. (Ritim Hibru 11:7.) Noa i no bin lukim wanpela bikpela tait wara i bagarapim ol man na ol animal. (Stt. 6:17) Tait wara i no bin kamap long bipo. Tasol Noa i no ting dispela samting i no inap kamap. Wai? Long wanem, em i bilip olsem, oltaim Jehova i save mekim ol samting em i tokaut long en. So Noa i no bin ting em i hatwok tumas long bihainim tok bilong Jehova. Nogat. “Noa i mekim olgeta samting.” (Stt. 6:22) Noa i gat planti wok long mekim. Em i mas wokim sip, bungim ol animal, bungim kaikai inap long famili na ol animal, givim tok lukaut long ol manmeri, na em i mas helpim famili bilong en long bilip strong long Jehova. I no isi long Noa i “mekim olgeta samting.” Tasol em i bilip long Jehova na em i sanap strong na mekim wok. Na Jehova i bin kisim bek em na famili bilong em na em i givim planti blesing long ol.
Mekim Wok Painimaut
(Stat 7:2) Yu mas kisim man na meri bilong olgeta kain animal i klin, 7-pela 7-pela bilong ol. Na man na meri bilong olgeta animal i no klin, 2-pela 2-pela bilong ol.
Sampela Bikpela Tok Bilong Buk Stat—Namba Wan
7:2—Wanem samting i stap olsem mak bilong soim olsem animal i klin na i no klin? Ol animal ol i save mekim wok long en bilong mekim ofa long lotu, dispela i olsem mak i soim olsem animal i klin o i no klin. Na i no wanem kain animal i bilong kaikai na wanem kain animal i no bilong kaikai. Ol man i no bin kaikai mit bilong animal paslain long Bikpela Tait. Dispela tupela tok “klin” na “i no klin” em ol i kolim long ol kaikai, i kamap taim Lo Bilong Moses i stap, na ol i pinis taim dispela Lo i pinis. (Aposel 10:9-16; Efesus 2:15) Ating Noa i save long wanem kain animal i stret bilong mekim ofa long Jehova. Olsem na taim em i lusim sip, em i “wokim wanpela alta bilong lotu long Bikpela. Na em i kisim wanpela wanpela long olgeta kain animal na pisin i klin long ai bilong Bikpela, na em i kilim ol bilong mekim ofa. Na em i kukim ol antap long alta.”—Stat 8:20.
(Stat 7:11) Long yia Noa i gat 600 krismas, long de namba 17 bilong namba 2 mun, long dispela de bikpela wara long antap i bruk na kapsait na ol dua long skai i op.
Sampela Bikpela Tok Bilong Buk Stat—Namba Wan
7:11—Wara i kamapim Bikpela Tait i kam long we? Long de namba 2 bilong wokim ol samting, God i tok “wanpela banis i mas kamap bilong banisim wara,” long “antap” na long “daunbilo.” (Stat 1:6, 7) Wara “daunbilo” em ol wara i stap pinis long graun. Wara “antap” em i stap antap tru long skai na em i “bikpela wara.” Dispela bikpela wara i stap antap i pundaun long graun long taim bilong Noa.
Baibel Ritim
(Stat 6:1-16) Bihain planti manmeri i kamap long graun, na ol i gat ol pikinini meri tu, 2 na ol pikinini bilong God tru i lukim ol pikinini meri bilong ol man i luk nais tru. Olsem na ol i kirap kisim ol meri long laik bilong ol yet na maritim ol. 3 Bihain long dispela, Jehova i tok: “Mi no inap larim ol man i stap olsem inap oltaim, long wanem, ol i man tasol. Olsem na ol bai stap inap 120 yia tasol.” 4 Long dispela taim na long bihain tu ol Nefilim i bin stap long graun, long wanem, ol pikinini bilong God tru i bin slip wantaim ol pikinini meri bilong ol man na ol dispela meri i karim ol pikinini man. Ol dispela pikinini man em ol Nefilim. Ol i gat bikpela strong, na ol i gat biknem long dispela taim bipo. 5 Jehova i lukim olsem pasin bilong ol manmeri long graun i go nogut tru, na oltaim ol i tingting tasol long mekim pasin nogut. 6 Jehova i bel hevi bikos long ol man em i bin wokim ol long graun. Na bel bilong em i hevi tru. 7 Olsem na Jehova i tok: “Bai mi pinisim ol man mi bin wokim em ol i stap long graun, ol man wantaim ol animal bilong ples, ol samting i save flai long skai na ol arapela animal, long wanem, mi bel hevi long ol man.” 8 Tasol Jehova i amamas long Noa. 9 Dispela em i histori bilong Noa. Noa em i stretpela man. Em i no gat asua namel long ol man long taim bilong em. Noa i wokabaut wantaim God tru. 10 Bihain Noa i kamap papa bilong 3-pela pikinini man, Siem, Ham, na Jafet. 11 Tasol long ai bilong God tru, graun i stap nogut tru na pasin bilong pait na bagarapim man i pulap long en. 12 God i lukluk i kam daun long graun na em i lukim olsem graun i bagarap. Ol manmeri i mekim ol pasin nogut tasol. 13 Bihain God i tokim Noa olsem: “Mi tingting pinis long bagarapim olgeta manmeri, long wanem, ol manmeri i mekim na pasin bilong pait i pulap long graun. Olsem na mi bai bagarapim ol manmeri na dispela graun. 14 Yu mas kisim plang bilong gutpela diwai na wokim wanpela sip. Yu mas wokim ol rum insait long dispela sip na peintim insait na ausait bilong sip long kolta. 15 Yu mas wokim dispela sip olsem, longpela bilong en i mas 300 kiubit, bikpela bilong en 50 kiubit na em i mas i go antap inap 30 kiubit. 16 Yu mas wokim windo long sip bilong larim lait i kam insait, inap 1 kiubit long antap. Yu mas wokim dua bilong sip long sait bilong en. Na dispela sip i mas i gat namba 1, namba 2, na namba 3 floa.
JANUERI 27–FEBRUERI 2
GUTPELA SAVE I KAM LONG BAIBEL | STAT 9-11
“Olgeta Manmeri Bilong Graun i Wok Long Mekim Wanpela Tokples Tasol”
(Stat 11:1-4) Na olgeta manmeri bilong graun i wok long mekim wanpela tokples tasol na ol i yusim ol wankain wed. 2 Na taim ol i go olsem long hap is, ol i painim wanpela bikpela hap graun long veli i stap long graun bilong Sainar, na ol i sindaun long dispela hap. 3 Bihain ol i tokim narapela narapela olsem: “Kamon! Yumi wokim ol brik na kukim long paia.” Olsem na ol i no yusim ol ston. Ol i yusim ol brik na simenim ol brik wantaim kolta. 4 Orait ol i tok: “Kamon! Yumi wokim wanpela taun bilong yumi yet na wanpela taua i go antap long skai na bai yumi gat nem, na bai yumi no ken go nabaut long olgeta hap bilong graun.”
it-1 239
Bikpela Babilon
Ol Pasin Bilong Babilon Bilong Bipo. Ol man i wokim taun Babilon long veli i stap long graun bilong Sainar na long dispela hap ol i wokim Taua Bilong Babel. (St 11:2-9) As na ol i wokim taua na dispela taun, em long wanem ol i laik kisim “nem,” na i no bilong litimapim nem bilong God. Ol taua ol saveman i painim long hap bilong Babilon bilong bipo, na tu, long ol narapela hap bilong Mesopotemia, i kamapim klia olsem dispela taua bilong pastaim ol i wokim bilong lotu. God Jehova i mekim ol samting bilong pasim ol man long wokim tempel long Babel. Dispela i soim olsem Jehova i no orait long dispela taun (Babel), long wanem, long dispela hap lotu giaman i kirap. Long tokples Hibru nem bilong dispela taun, em Babel, mining bilong en, “Paulim,” na long tokples Sumeria nem bilong en (Ka-dingir-ra) na long tokples Akkad nem bilong en (Bab-ilu), mining bilong dispela tupela nem em “Geit Bilong God.” Hap lain i stap yet long dispela taun i senisim nem bilong en na bai kot i painim dispela taun long pastaim i no stap ples klia, maski i olsem, nupela nem bilong en i soim yet olsem dispela taun em hap bilong lotu.
it-2 202 par. 2
Tokples
Buk Stat i stori long ol manmeri bihain long Bikpela Tait em ol i bung wantaim na wokim wanpela taun, em samting i no stret wantaim laik bilong God, olsem God i bin tokim Noa na ol pikinini man bilong em. (Stt. 9:1) Ol i no laik i go “sindaun long olgeta hap bilong graun,” nogat, ol i laik bung wantaim na stap long wanpela hap. Ol i stap long hap ol i kolim veli i stap long graun bilong Sainar long Mesopotemia. Dispela hap i kamap ples bilong lotu, na ol i wokim tu taua bilong lotu.—Stt. 11:2-4.
(Stat 11:6-8) Bihain Jehova i tok olsem: “Lukim! Ol dispela manmeri i stap olsem wanpela lain na ol i gat wanpela tokples tasol, na ol i kirap long mekim dispela samting. Na wanem samting ol i tingting long mekim, ol inap mekim. 7 Kam! Yumi go daun na paulim tokples bilong ol, na bai ol i no inap save long tokples bilong narapela narapela.” 8 Olsem na Jehova i mekim ol i go nabaut long olgeta hap bilong graun, na ol i no wokim moa dispela taun.
it-2 202 par. 3
Tokples
Ol dispela manmeri i stap olsem wanpela lain na ol i wokim taua, tasol God i Gat Olgeta Strong i paulim tokples bilong ol na dispela i pasim ol long mekim samting ol i laik mekim. Dispela i mekim na i hatwok long ol i wok bung wantaim long wokim taua, olsem na ol i go sindaun long olgeta hap bilong graun. Taim tokples bilong ol i paul, dispela bai pasim ol long mekim ol samting we i no stret wantaim laik bilong God. Dispela i mekim na ol man i no inap yusim save na strong bilong ol long mekim ol samting, na tu, em bai hatwok long ol i bungim save bilong ol manmeri bilong narapela narapela tokples—em save i no kam long God, nogat, em save ol man i kisim long rot bilong ol samting i painim ol na wok painimaut ol i mekim. (Skelim Ekl 7:29; Lo 32:5) So, taim God i paulim tokples bilong ol, nau ol manmeri i bruk bruk i go nabaut, na tu, dispela i pasim ol long tingting long mekim ol samting we inap bagarapim na nogutim ol. (St 11:5-9; skelim Ai 8:9, 10) Ol manmeri long nau i gat planti save, tasol ol i yusim dispela save long mekim planti samting nogut. Taim yumi tingim dispela, yumi kliagut olsem God i bin save long dispela, olsem save bilong ol man bai i go bikpela na ol bai mekim ol samting nogut olsem dispela taua, sapos God i no bin pasim ol man long wokim taua long Babel.
(Stat 11:9) Em long dispela as na ol i kolim dispela taun, Babel. Long wanem, long dispela hap Jehova i paulim tokples bilong olgeta manmeri bilong graun, na Jehova i mekim ol i go nabaut long olgeta hap bilong graun.
it-2 472
Ol Lain Manmeri
Ol manmeri i gat narapela narapela tokples, kalsa, kastam, pasin, na lotu—olgeta lain manmeri i gat pasin bilong ol yet long mekim ol samting. (Wkp. 18:3) Ol i stap longwe long God, olsem na planti lain manmeri i wokim ol imis bilong ol god giaman bilong ol.—Lo 12:30; 2 Kin. 17:29, 33.
Mekim Wok Painimaut
(Stat 9:20-22) Bihain Noa i kirap wokim gaden na em i planim gaden wain. 21 Wanpela taim em i dring wain, na em i spak na em i rausim klos bilong em insait long haus sel bilong em. 22 Ham, papa bilong Kenan, i lukim papa bilong em i stap as nating, na em i go ausait na tokim tupela brata bilong em.
(Stat 9:24, 25) Taim Noa i kirap pinis long slip, em i kisim save long samting yangpela pikinini man bilong em i bin mekim. 25 Na Noa i tok olsem: “Bikpela hevi i ken painim Kenan. Em bai kamap wokboi nating bilong ol brata bilong em.”
it-1 1023 par. 4
Ham
Ating Kenan yet i mekim sampela pasin i no stret long Noa tasol papa bilong em Ham i no bin stretim em. O Noa i mekim tok profet long pasin nogut em Ham i gat, na ating pikinini bilong em Kenan i kamapim dispela pasin, na ol tumbuna pikinini bilong Kenan bai kisim dispela pasin. Hap bilong dispela tok profet i kamap tru taim lain Israel, em ol tumbuna pikinini bilong Sem, i daunim lain Kenan. Tasol ol narapela i no kisim bagarap (olsem lain Gibeon [Jos 9]), ol i stap wokboi bilong lain Israel. Planti handret yia bihain, truim bilong dispela tok profet i kamap taim lain Kenan, em ol lain tumbuna pikinini bilong Ham, i stap aninit long wok bos bilong ol lain tumbuna pikinini bilong Jafet, em lain Midia na Persia, Grik, na Rom.
(Stat 10:9, 10) Em i strongpela man bilong painim abus, na man bilong birua long Jehova. Olsem na taim ol man i skelim pasin bilong ol arapela wantaim Nimrot, ol i save tok: “Em i olsem Nimrot, em i strongpela man bilong painim abus, na man bilong birua long Jehova.” 10 Ol fes biktaun bilong kingdom bilong Nimrot, em Babel, Erek, Akat, na Kelna, long graun bilong Sainar.
it-2 503
Nimrot
Ol fes biktaun bilong kingdom bilong Nimrot, em Babel, Erek, Akat, na Kelna, long graun bilong Sainar. (Stt. 10:10) Olsem na i luk olsem em i go pas long stiaim wok bilong sanapim taua long Babel. Dispela i stret wantaim tingting bilong ol Israel long bipo. Josefas i tok: “Isi isi [Nimrot] i kirap long bosim strong ol manmeri, em i ting olsem wanpela rot bilong mekim ol man i no pret moa long God em long mekim ol manmeri i bilip long strong bilong em. Nimrot i laik pait long God sapos God i laik kamapim gen tait wara long graun; em i laik wokim wanpela taua i go antap tru na wara i no inap daunim na bekim bek bagarap i bin painim lain tumbuna bilong ol. Ol manmeri i laik tru long bihainim dispela tingting bilong [Nimrot], na ol i no laik stap aninit long wok bos bilong God; olsem na ol i kirap wokim taua . . . na ol i wokim dispela taua kwiktaim tru i go antap.”—Jewish Antiquities, I, 114, 115 (iv, 2, 3).
Baibel Ritim
(Stat 10:6-32) Ol pikinini man bilong Ham em Kus, Misraim, Put, na Kenan. 7 Ol pikinini man bilong Kus em Seba, Havila, Sapta, Reama, na Sapteka. Ol pikinini man bilong Reama em Seba na Dedan. 8 Kus i kamap papa bilong Nimrot. Nimrot em i fes man long kamap strongpela hetman long graun. 9 Em i strongpela man bilong painim abus, na man bilong birua long Jehova. Olsem na taim ol man i skelim pasin bilong ol arapela wantaim Nimrot, ol i save tok: “Em i olsem Nimrot, em i strongpela man bilong painim abus, na man bilong birua long Jehova.” 10 Ol fes biktaun bilong kingdom bilong Nimrot, em Babel, Erek, Akat, na Kelna, long graun bilong Sainar. 11 Nimrot i lusim dispela hap na em i go long hap bilong Asiria na kamapim biktaun Ninive, Rehobot-Ir, Kala, 12 na Resen, em i stap namel long Ninive na Kala. Dispela em bikpela taun. 13 Misraim i kamap papa bilong Lut, Anam, Lehap, Naptu, 14 Patrus, Kaslu, (ol i tumbuna bilong lain Filistia), na Kefto. 15 Kenan i kamap papa bilong Saidon, em fesbon bilong em, na bihain Het, 16 na tu, Kenan i kamap tumbuna papa bilong lain Jebus, lain Amor, lain Girgas, 17 lain Hivi, lain Arka, lain Sini, 18 lain Arvat, lain Semar, na lain Hamat. Bihain ol lain famili bilong Kenan i go nabaut na sindaun long planti hap. 19 Mak bilong graun bilong ol lain Kenan i stat long Saidon na i go long Gerar, klostu long Gasa, na i go olgeta long Sodom, Gomora, Atma, na Seboim, klostu long Lasa. 20 Ol dispela lain ol i lain pikinini bilong Ham. Olgeta wan wan lain famili bilong ol i sindaun long graun bilong ol yet, long lain bilong ol yet, na ol i gat tokples bilong ol yet. 21 Na Siem, liklik brata bilong Jafet, em tu i kamapim ol pikinini. Em i tumbuna papa bilong lain bilong Eber. 22 Ol pikinini man bilong Siem em Elam, Esur, Arpaksat, Lut, na Aram. 23 Ol pikinini man bilong Aram em Us, Hul, Geter, na Mes. 24 Arpaksat em i papa bilong Sela, na Sela em i papa bilong Eber. 25 Eber i gat tupela pikinini man. Nem bilong wanpela em Pelek, long wanem, long taim bilong em ol manmeri i bruk bruk na i go nabaut. Nem bilong brata bilong Pelek, em Joktan. 26 Joktan em i papa bilong Almodat, Selep, Hasarmavet, Jera, 27 Hadoram, Usal, Dikla, 28 Obal, Abimael, Seba, 29 Ofir, Havila, na Jobap; olgeta dispela man ol i pikinini bilong Joktan. 30 Ples ol i sindaun long en i stat long Mesa i go inap long Sefar, em ples maunten long hap bilong Is. 31 Ol dispela lain ol i lain pikinini bilong Siem. Olgeta wan wan lain famili bilong ol i sindaun long graun bilong ol yet, long lain bilong ol yet, na ol i gat tokples bilong ol yet. 32 Olgeta dispela lain famili, em ol wan wan lain famili bilong ol tumbuna pikinini bilong Noa na lain bilong ol. Ol manmeri i sindaun long olgeta hap bilong graun bihain long Bikpela Tait, ol i tumbuna pikinini bilong ol dispela lain famili.