STADI 2

Mekim Olsem Yu Toktok Wantaim Man

2 Korin 2:17

OL BIKPELA TOK: Mekim tok long pasin we yu save mekim na pasin i soim olsem yu pilim tru long bel na yu tingim ol man i harim tok bilong yu.

Beten na redim gut tok. Yu mas beten askim God long helpim yu long tingim tok yu bai mekim na i no long yu yet. Tingim ol bikpela tok yu laik kamapim. Kamapim ol tingting long tok bilong yu yet; no ken kolim olgeta wan wan tok olsem i stap long buk o magasin.

Sapos yu bai ritim tok bilong Baibel o narapela buk o nius, yu mas kisim save long ol tok i stap insait na bai yu ken rit gut. Sapos buk o nius i kamapim tok bilong wanpela man, orait ritim gut tok bilong ol long nomol wei bilong toktok.
Kamapim ol tok olsem yu pilim tru long bel. Tingim as na ol man i mas harim tok yu kamapim. Tingim ol. Orait pasin bilong yu long sanap, mekim han, na pes bilong yu bai kamapim olsem yu tingim tru ol.

Pasin bilong mekim tok long pasin bilong yu yet i no makim olsem yu ken mekim kain kain tok. Yu mas mekim wok long ol tok i klia na bihainim stret lo bilong kolim tokples na bai dispela i givim biknem long tok yu mekim.
Lukluk long ol man i harim tok. Lukluk long ai bilong man taim yu toktok wantaim em. Taim yu mekim tok, no ken lukluk long odiens olgeta, lukluk long ol man wan wan.