Ol Man I Dai Pinis Ol I Stap we?

1-3. Ol manmeri i save mekim wanem ol askim long dai? Ol narapela narapela lotu i bekim ol dispela askim olsem wanem?

BAIBEL i tok promis olsem wanpela taim bai i kamap na “bai i no gat dai moa.” (Revelesen 21:4) Long Sapta 5, yumi bin skelim olsem wanem ofa bilong baim bek ol man i opim rot long yumi kisim laip oltaim. Tasol ol man i save dai. (Eklisiastis 9:5) Olsem na wanpela bikpela askim yumi gat em olsem, ‘Wanem samting bai painim yumi taim yumi dai?’

² Bekim bilong dispela askim i bikpela samting taim wanpela yumi laikim tru i dai. Ating yumi tingting: ‘Wanem samting i painim em? Em i save lukluk long yumi? Em inap helpim yumi? Bai yumi lukim em bihain?’

³ Ol lotu i save kamapim kain kain bekim long ol dispela askim. Sampela i skulim ol man olsem, sapos yu gutpela man bai yu go long heven, tasol sapos yu man nogut, paia bai kukim yu long hel. Sampela narapela lotu i tok taim yu dai yu kamap wanpela spirit na go stap wantaim ol famili bilong yu i dai pinis. Na sampela lotu i tok taim yu dai pinis yu bai sanap long kot, na bihain yu bai kamap nupela long narapela bodi, o ating yu senis na kamap olsem narapela man o animal.

4. Planti lotu i gat wanem tingting long dai?

⁴ Ol lotu i skulim ol man long narapela narapela samting long dai. I gat wanpela tingting i olsem as bilong olgeta dispela bilip bilong ol lotu. Ol i skulim ol man olsem taim man i dai, wanpela hap bilong em i save stap laip yet. Yu ting dispela i stret?

WANEM SAMTING I PAINIM YUMI TAIM YUMI DAI?

5, 6. Wanem samting i painim yumi taim yumi dai?

⁵ Jehova i save long wanem samting i painim yumi taim yumi i dai na em i tokim yumi olsem taim man i dai laip bilong em i pinis. Olsem na taim wanpela i dai, i no gat wanpela hap bilong em i save stap laip yet.a Taim yumi dai pinis, yumi no inap lukluk, harim toktok, o wokim tingting.

⁶ King Solomon i tok olsem “ol man i dai pinis ol i no save long wanpela samting.” Ol man i dai pinis i no kamapim moa pasin laikim o pasin bilong heitim narapela, na “i no gat wok o pasin bilong mekim plen o save o savetingting long Matmat.” (Ritim Eklisiastis 9:5, 6, 10.) Na long Buk Song 146:4, Baibel i tok olsem taim man i dai, “tingting bilong em” i pinis olgeta.

OL TOK JISAS I MEKIM LONG INDAI

7. Jisas i stori olsem wanem long dai?

⁷ Taim gutpela pren bilong em, Lasarus, i dai pinis, Jisas i tokim ol disaipel bilong em: “Pren bilong yumi Lasarus, em i slip.” Tasol ol disaipel i ting Jisas i tok olsem em i slip i stap na malolo. Olsem na Jisas i tok: “Lasarus i dai pinis.” (Jon 11:11-14) So Jisas i tok dai i olsem man i slip tasol. Em i no tok Lasarus i stap long heven o i stap wantaim ol famili bilong em i dai pinis. Na em i no tok Lasarus i karim pen i stap long hel o kamap nupela gen long narapela bodi olsem narapela man o animal. Nogat. I olsem Lasarus i slip i dai. Ol narapela skripsa tu i tok dai i olsem slip tasol. Baibel i tok taim ol i kilim i dai Stiven, “em i slip.” (Aposel 7:60, futnot) Aposel Pol i tok sampela Kristen i “slip pinis.”—1 Korin 15:6, futnot.

8. Olsem wanem yumi save God i no bin wokim ol man bilong i dai?

⁸ Olsem wanem? God i bin wokim Adam na Iv na bai bihain tupela i dai? Nogat tru! Jehova i wokim tupela bilong stap oltaim long graun na i no gat sik. Taim Jehova i wokim ol man, em i putim laik bilong i stap oltaim long bel bilong ol. (Eklisiastis 3:11) Ol papamama i no laik lukim ol pikinini bilong ol i go lapun na dai, nogat, na Jehova tu i gat wankain tingting long yumi. Tasol sapos God i wokim yumi bilong i stap oltaim, orait bilong wanem yumi save dai?

BILONG WANEM YUMI SAVE DAI?

9. Bilong wanem i no hatwok long Adam na Iv long bihainim tok Jehova i givim long ol?

⁹ Long gaden Iden Jehova i tokim Adam olsem: “Long olgeta diwai bilong gaden, yu ken kaikai prut bilong en bilong inapim laik bilong yu. Tasol yu no ken kaikai prut bilong diwai bilong givim save long wanem samting i gutpela na wanem samting i nogut. Long de yu kaikai prut bilong en, tru tumas bai yu dai.” (Stat 2:9, 16, 17) I no hatwok long bihainim dispela tok, na Jehova i gat rait long tokim Adam na Iv long wanem pasin i gutpela long bihainim na wanem pasin ol i no ken bihainim. Taim ol i bihainim tok bilong Jehova ol i soim olsem ol i daun long wok bos bilong em. Na ol i soim tu olsem ol i tenkyu tru long olgeta samting em i givim tupela.

10, 11. (a) Olsem wanem Satan i giamanim Adam na Iv? (b) Bilong wanem pasin Adam na Iv i mekim i no stret liklik?

¹⁰ Sori tru, Adam na Iv i no laik bihainim tok bilong Jehova. Satan i tokim Iv: “Tru tru God i tokim yutupela long no ken kaikai prut bilong olgeta diwai bilong gaden, a?” Iv i bekim tok olsem: “Mitupela i ken kaikai prut bilong ol diwai bilong gaden. Tasol God i tok long prut bilong dispela diwai i stap namel long gaden olsem, ‘Yutupela i no ken kaikai prut bilong en, nogat. Na yutupela i no ken tatsim prut bilong en. Sapos yutupela i mekim, bai yutupela i dai.’”—Stat 3:1-3.

¹¹ Orait Satan i tok: “Tru tumas, yutupela i no inap i dai. God i save olsem long dispela de stret yutupela i kaikai prut bilong en, ai bilong yutupela bai op, na bai yutupela i kamap wankain olsem God, na bai yutupela i save long wanem samting i gutpela na wanem samting i nogut.” (Stat 3:4-6) Satan i laik bai Iv i bilip olsem em yet i ken makim wanem samting i stret na wanem samting i no stret. Na tu, em i tok giaman long wanem samting bai kamap sapos Iv i sakim tok bilong God. Satan i tok olsem Iv bai i no inap i dai, olsem na Iv i kaikai sampela hap bilong prut na givim hap long man bilong em. Adam na Iv i save olsem Jehova i tokim tupela long no ken kaikai dispela prut. Taim ol i kaikai, ol i bikhet na sakim lo i no hatwok long bihainim. Na tu, taim ol i kaikai, ol i bikhet long gutpela Papa bilong ol long heven. I no stret liklik long ol i mekim olsem!

12. Adam na Iv i sakim tok bilong Jehova na bilong wanem dispela i no gutpela?

¹² Namba wan papamama bilong yumi i no soim rispek long Krieta bilong ol na dispela i no gutpela! Yu bai pilim olsem wanem sapos yu bin lukautim gut na mekim bikpela long wanpela pikinini man na wanpela pikinini meri na bihain tupela i bikhet long yu na i no bihainim tok bilong yu? Ating dispela bai bagarapim tru bel bilong yu, a?

13. Taim Jehova i tok “bai yu go bek gen long graun,” wanem mining bilong dispela tok?

¹³ Adam na Iv i sakim tok bilong Jehova, olsem na tupela i no inap i stap oltaim moa. Jehova i tokim Adam: “Yu kamap long graun na bai yu go bek gen long graun.” (Ritim Stat 3:19.) Dispela i makim olsem Adam bai kamap graun gen na i olsem em i no bin kamap. (Stat 2:7) Adam i mekim sin, na bihain em i bin dai na em i no stap moa.

14. Bilong wanem yumi save dai?

¹⁴ Sapos Adam na Iv i bin bihainim tok bilong God, tupela inap i stap laip long nau. Tasol taim ol i sakim tok bilong em, ol i mekim sin, na bihain ol i bin dai. Sin i olsem wanpela sik nogut em yumi kisim long namba wan papamama bilong yumi. Yumi gat sin pinis taim mama i karim yumi, olsem na yumi save dai. (Rom 5:12) Tasol dispela i no laik bilong God long ol man. God i no laik bai ol man i dai, na Baibel i tok dai em i wanpela “birua.”—1 Korin 15:26.

STRETPELA SAVE LONG INDAI I MEKIM YUMI KAMAP FRI

15. Olsem wanem stretpela save long indai i mekim yumi i kamap fri?

¹⁵ Stretpela save yumi kisim long indai i mekim yumi i kamap fri long ol giaman tingting. Baibel i tok ol man i dai pinis ol i no pilim pen o bel hevi. Yumi no inap toktok wantaim ol, na ol i no inap toktok wantaim yumi. Yumi no inap helpim ol, na ol i no inap helpim yumi. Ol i no inap mekim nogut long yumi, olsem na i no gat as na yumi mas pret long ol. Tasol planti lotu i tok ol man i dai pinis i stap long wanpela hap na yumi inap helpim ol sapos yumi givim mani long ol pris o ol arapela bikman bilong lotu. Tasol taim yumi kisim stretpela save long indai, ol kain tok giaman olsem i no inap giamanim yumi.

16. Wanem tok giaman em planti lotu i skulim ol man long en long dai?

¹⁶ Satan i yusim ol lotu giaman long giamanim yumi na mekim yumi ting ol man i dai, ol i stap laip yet. Olsem, sampela lotu i skulim ol man olsem taim yumi dai, wanpela hap bilong yumi i stap laip yet long narapela hap. Olsem wanem? Lotu bilong yu i skulim yu olsem, o lotu bilong yu i skulim yu long tok Baibel i mekim long ol samting i painim ol man i dai pinis? Satan i yusim ol tok giaman bilong pulim ol man i go longwe long God Jehova.

17. Bilong wanem dispela tingting long paia bai kukim ol man long hel i bagarapim nem bilong Jehova?

¹⁷ Samting em planti lotu i skulim ol man long en i no stret. Olsem, sampela i skulim ol man olsem ol man nogut bai go long hel na paia bai kukim ol inap oltaim oltaim. Dispela tok i bagarapim nem bilong Jehova. Em i no inap larim ol manmeri i karim bikpela pen olsem! (Ritim 1 Jon 4:8.) Yu bai ting olsem wanem long wanpela i mekim save long pikinini i no harim tok na kukim han bilong em long paia? Yu bai ting em i wanpela man nogut tru. Yu bai i no laik save long em. Satan i laik bai yumi i gat dispela kain tingting long Jehova!

18. Bilong wanem yumi no ken pret long ol man i dai pinis?

¹⁸ Sampela lotu i tok olsem taim ol man i dai pinis ol i kamap spirit. Ol kain lotu olsem i tok yumi mas rispek na yumi mas pret long ol, long wanem, ol inap stap olsem pren i gat bikpela strong o birua nogut. Planti i bilipim dispela tok giaman. Ol i pret long ol man i dai pinis na ol i lotuim ol, na ol i no lotuim Jehova. Tingim, ol man i dai pinis ol i no inap pilim wanpela samting, olsem na yumi no ken pret long ol. Jehova, em Man Bilong Wokim yumi. Em dispela wanpela God tru, na yumi mas lotuim em wanpela tasol.—Revelesen 4:11.

19. Taim yumi kisim stretpela save long indai, dispela i helpim yumi olsem wanem?

¹⁹ Taim yumi save long wanem samting tru i painim ol man i dai pinis, dispela i mekim na yumi no stap kalabus moa long ol tok giaman bilong ol lotu. Na em i helpim yumi tu long bilip tru olsem Jehova bai mekim planti gutpela samting long yumi long bihain.

20. Long sapta i kamap bihain, bai yumi stori long wanem samting?

²⁰ Long bipo yet, wanpela wokman bilong God, nem bilong em Jop, i mekim dispela askim: “Sapos wanpela man i dai, em inap kisim laip gen?” (Jop 14:14) Olsem wanem? Man i dai pinis em inap kirap bek na stap laip gen? Long Baibel, God i bekim dispela askim na dispela i mekim yumi amamas. Long sapta i kamap bihain, bai yumi stori long dispela samting.