Ol Referens Bilong Laip na Wok Autim Tok Miting Wok Buk
© 2023 Watch Tower Bible and Tract Society of Pennsylvania
NOVEMBA 6-12
GUTPELA SAVE I KAM LONG BAIBEL | JOP 13-14
“Sapos Wanpela Man i Dai, Em Inap Kisim Laip Gen?”
Yumi Laik Painim Rot Bilong Stap Longpela Taim Moa
MASKI ol i raitim dispela tok olsem 3,500 yia i go pinis, klostu olgeta man long nau ol i wanbel long dispela tok olsem yumi save stap sotpela taim tasol. Long bipo yet na i kam inap nau, ol man i tingim olsem taim bilong i stap yangpela na skin i strong em i save stap sotpela taim tasol na bihain ol i go lapun na dai, na ol i no amamas long dispela. Olsem na kirap long bipo yet na i kam inap nau, ol man i bin traim kain kain rot bilong helpim ol long i stap planti yia moa.
Long taim bilong Jop, ol Isip i save kaikai bol bilong animal, long wanem, ol i ting long dispela rot bai ol inap kamap yangpela gen, tasol dispela i no bin helpim ol liklik. Sampela handet yia paslain long taim bilong yumi, ol man i laik wokim wanpela kain marasin bilong helpim ol long i stap planti yia. Na sampela i bin bilip olsem, sapos ol man yet inap wokim gol, orait dispela gol bai helpim ol long kisim laip i no save dai, na ol i ting sapos ol i kisim kaikai long plet gol dispela bai helpim ol long i stap longpela taim. Ol man bilong lotu Tao long Saina long bipo ol i bilip olsem sapos ol i sindaun longpela taim na tingting strong long wanpela samting, o bihainim sampela kain pasin bilong pulim win, o tambuim sampela kaikai, orait dispela bai kamapim sampela senis insait long skin na long dispela rot ol inap kisim laip i no save dai.
Juan Ponsa de Leon bilong Spen em i wanpela man bilong raun na painim ol narapela kantri, na em i bin wok strong tru long painim wanpela kain wara ol man i ken dring long en na stap yangpela oltaim. Inap olsem 200 yia samting bipo, wanpela dokta i raitim buk (Hermippus Redivivus) na em i tok sapos ol i putim ol yangpela nupela meri long wanpela liklik rum na kisim win ol i winim na putim long botol, orait ol inap mekim wok long dispela win olsem wanpela kain marasin bilong helpim man long i stap planti yia moa. Tasol yumi save pinis, ol dispela samting hia i no bin helpim man liklik.
Diwai Ol i Katim Inap Gro Gen?
TAIM yumi skelim naispela diwai sida bilong Lebanon wantaim diwai oliv we i krungut na i gat planti buk long en, ating planti man bai laikim diwai sida na ol i no inap laikim diwai oliv. Tasol diwai oliv inap gro long kain kain graun. Sampela diwai oliv i save gro na stap inap 1,000 yia. Ol rop bilong diwai oliv i save i go i kam long planti hap aninit long graun, olsem na maski diwai i bagarap pinis, em inap gro gen. Sapos ol rop bilong diwai i stap laip yet, diwai bai gro gen.
Bilipman Jop i save olsem maski em i dai, em inap kisim laip gen. (Jop 14:13-15) Ating em i yusim diwai oliv long stori long bilip bilong em olsem God inap kirapim em bek long indai. Jop i tok: “Mi save, sapos man i katim diwai, i gat rot long nupela kru inap kamap gen long en.” Sapos ren i pundaun bihain long taim bilong traipela san, as bilong diwai oliv i drai pinis inap gro gen, na kamapim ol nupela “han bilong en olsem nupela diwai.”—Jop 14:7-9.
“Bai Yu Laikim Tumas”
Tok bilong Jop i skulim yumi long gutpela pasin marimari bilong Jehova: Jehova i laikim tru ol manmeri olsem Jop, em ol i givim ol yet long em na larim em i stretim stretim ol na mekim ol i kamap ol gutpela samting tru long ai bilong em. (Aisaia 64:8) Jehova i save tingim tru ol man i stap gut long lotuim em. I gat samting em Jehova i “laikim tumas” long mekim long ol gutpela wokman bilong em husat i dai pinis. Wanpela saveman i tok, long tok Hibru dispela hap tok em i “wanpela strongpela tok bilong makim bikpela laik tru i stap long bel long mekim wanpela samting.” Yes, Jehova i tingim ol man husat i bin lotuim em na ol i dai pinis—em i gat strongpela laik long kirapim ol bek na givim laip long ol.
Mekim Wok Painimaut
it-1 191
Sit Bilong Paia
Sit bilong paia inap makim samting nating o i no bikpela samting, Abraham i tokim Jehova olsem, “Mi das tasol na mi olsem sit bilong paia.” (St 18:27; lukim tu Ai 44:20; Jop 30:19) Na Jop i tok long tok bilong lain i giaman long mekim isi bel bilong em olsem “samting nating olsem sit bilong paia.”—Jop 13:12.
NOVEMBA 13-19
GUTPELA SAVE I KAM LONG BAIBEL | JOP 15-17
“No Ken Bihainim Pasin Bilong Elifas Long Taim Yu Mekim Gut Bel Bilong Narapela”
Sakim Ol Tingting Kranki!
Long olgeta tripela tok Elifas i mekim, em i kamapim tingting olsem God i laik bai olgeta samting i mas stret tasol, olsem na ol samting ol wokboi bilong em i mekim i no gutpela inap long em i ken amamas long en. Elifas i tokim Jop: “God i save lukim sampela pasin bilong ol ensel i no stret.” (Jop 4:18) Bihain Elifas i tok long God olsem: “Ol ensel i winim yumi man, tasol God i save lukim sampela pasin bilong ol i no stret. Na ol samting bilong heven tu i no klin long ai bilong en.” (Jop 15:15) Na em i askim olsem: “Yu ting stretpela pasin bilong yu bai i helpim God I Gat Olgeta Strong long mekim wok bilong en, a?” (Jop 22:3) Bildat i wanbel long dispela tok, em i tok: “Yumi save lukim lait bilong mun i bikpela, tasol long God, em i liklik tru, na ol sta tu i no klin long ai bilong en.”—Jop 25:5.
Yumi mas was gut, nogut kain tingting olsem i stiaim yumi. Em inap kirapim yumi long ting olsem ol samting God i laik bai yumi mas mekim i antap tumas. Dispela tingting inap bagarapim pasin bilong yumi long pas gut wantaim Jehova. Na tu, sapos yumi kisim dispela kain tingting, bai yumi mekim wanem taim wanpela i stretim yumi? Ating bai yumi no daunim yumi yet na harim tok bilong stretim yumi, nogat, ating bel bilong yumi bai ‘kros long God,’ na yumi bel nogut long em. (Sindaun 19:3) Dispela inap bagarapim yumi tru long sait bilong spirit!
Bihainim Jisas na Mekim Pasin Daun na Pasin Isi
16 Toktok bilong yumi. Pasin isi bai kirapim yumi long kamapim ol tok i “mekim gut bel bilong ol man i bel hevi.” (1 Tes. 5:14) Yumi inap mekim wanem kain tok bilong strongim bel bilong ol man i bel hevi? Yumi inap tokim ol olsem yumi tingim ol na yumi wari tru long ol. Yumi inap tok amamas long ol bambai ol inap luksave olsem ol i gat ol gutpela pasin na gutpela save bilong mekim sampela wok. Yumi ken kirapim ol long tingim gen olsem Jehova i bringim ol i go klostu long Pikinini bilong em, olsem na dispela i makim olsem ol i gutpela samting tru long ai bilong God. (Jon 6:44) Yumi ken strongim bel bilong ol na tokim ol olsem Jehova i wari tru long ol wokman bilong em husat “i gat hevi” na “bilip bilong ol i bagarap.” (Sng. 34:18) Taim yumi mekim ol gutpela tok, dispela inap mekim gut bel bilong ol man i stap bel hevi.—Snd. 16:24.
Mekim Wok Painimaut
Sampela Bikpela Tok Bilong Buk Jop
7:9, 10; 10:21; 16:22—Yu ting ol dispela tok i makim olsem Jop i no bilip long kirap bek? Ol dispela tok i stori long ol samting em klostu bai painim Jop. Olsem na wanem mining bilong dispela tok em i mekim? Ating wanpela mining i olsem sapos em i dai, ol man long taim bilong em i no inap lukim em. Long ai bilong ol, em i no inap go long haus bilong en na ol man i no inap luksave long em gen inap long taim God i makim. O ating Jop i laik tok olsem i no gat wanpela man inap kirap bek long strong bilong em yet. Yumi save Jop i bilip long kirap bek taim yumi ritim Jop 14:13-15.
NOVEMBA 20-26
GUTPELA SAVE I KAM LONG BAIBEL | JOP 18-19
“No Ken Givim Baksait Long Ol Wanbilip Bilong Yu”
Skul Yumi Ken Kisim Long Aiwara Bilong Jisas
9 Yu ken helpim ol lain i krai sori. Jisas i krai wantaim Marta na Maria, na tu, em i putim yau na mekim ol tok bilong strongim ol. Yumi ken mekim wankain long ol lain em ol i krai sori. Dan, em wanpela elda long Australia, em i tok: “Bihain long meri bilong mi i dai, mi nidim helpim. Sampela marit i redi long helpim mi, na long de na long nait ol i save kam bilong putim yau long mi. Ol i save larim mi krai sori, na ol i no sem taim mi krai long ai bilong ol. Na tu, ol i save redi long helpim mi long ol narapela samting olsem wasim kar bilong mi, go baim ol kaikai long stua, na kukim kaikai bilong mi taim mi yet i hatwok long mekim ol dispela samting. Na planti taim ol i save beten wantaim mi. Ol i kamapim klia olsem ol i pren tru na ol i stap ‘olsem ol brata long taim bilong hevi.’”—Prov. 17:17.
Taim Wanpela Long Famili i Lusim Jehova
16 Wok yet long sapotim ol narapela insait long famili em ol i stap gut long God. Long nau em taim we ol i nidim tru pasin laikim na ol tok yu bai mekim bilong strongim ol. (Hib. 10:24, 25) Sampela taim, ol narapela insait long famili bilong wanpela i raus, ol i pilim olsem kongrigesen i mekim pasin long ol olsem ol tu i raus. No ken larim dispela samting i kamap! Ol yangpela em papamama bilong ol i lusim tok i tru, ol i nidim yupela long mekim gutpela tok bilong strongim ol. Maria, em man bilong em i bin raus na lusim famili bilong ol, em i tok: “Sampela pren bilong mi i save kam long haus na ol i save kukim kaikai wantaim mipela na helpim mipela long taim bilong famili stadi. Ol i pilim bel hevi bilong mi na ol i krai wantaim mi. Na ol i sambai long gutnem bilong mi taim ol tok win i raun na i bagarapim gutnem bilong mi. Pasin bilong ol i bin strongim mi tru!”—Rom 12:13, 15.
Yu Gat Laik Long Kisim Wok Insait Long Kongrigesen?
20 Lain elda i mas save, sapos ol i pinisim wanpela elda o wanpela wokman bilong kongrigesen long wok, long wanem em i bin mekim pasin kranki o em yet i laik lusim wok, ating bai em i bel hevi. Sapos ol i no bin rausim em long kongrigesen na ol i lukim em i stap bel hevi, orait ol i mas wok long helpim em na strongim em long spirit. (1 Tesalonaika 5:14) Ol i mas helpim em long save i gat planti wok em i ken mekim bilong helpim kongrigesen. Na sapos ol i bin givim sampela tok long em bilong stretim em, orait sapos em i gat pasin daun na em i bihainim gutpela tok ol i givim long em, ating i no longtaim na bai em inap kisim gen sampela wok insait long kongrigesen.
Mekim Wok Painimaut
Strong Bilong Gutpela Tok
Tasol taim Jop yet i gat hevi, Elifas na ol poroman bilong em i no mekim gutpela tok long Jop. Ol i tok, em i bin mekim rong na haitim na nau em i kisim hevi. (Jop 4:8) Wanpela Baibel (The Interpreter’s Bible) i stori olsem: “Jop i sot long man bilong sori long em, tasol ol i kolim nating planti tok bilong lotu na bilong stretpela pasin i olsem ‘i tru’ olgeta na i gutpela olgeta.” Bel bilong Jop i bagarap tru long ol tok bilong Elifas na ol poroman bilong em na Jop i tok: “Tok bilong yupela i givim bikpela pen long mi na i bagarapim mi tru. Wanem taim bai yupela i lusim dispela kain tok?”—Jop 19:2.
Yumi mas tingting gut na yumi no ken tru mekim tok nogut na givim bikpela pen long ol narapela wokboi bilong God. (Lukim Lo 24:15.) Baibel i tok: “Toktok bilong yu inap helpim man i stap gut o bagarapim em. Yu gat bikpela wok long dispela na yu mas karim hevi bilong en.”—Sindaun 18:21, Baibel TEV.
NOVEMBA 27–DISEMBA 3
GUTPELA SAVE I KAM LONG BAIBEL | JOP 20-21
“Mani Kago i No Mekim Man i Kamap Stretpela Man”
Yu Stap Gut Long Ai Bilong God?
12 Jisas i tok olsem nogut yumi hipim hipim planti samting bilong skin, tasol yumi stap rabis long ai bilong God. Jisas i laik tok olsem pasin bilong bungim planti mani kago na amamas long ol dispela samting, dispela i no ken i stap nambawan tingting bilong yumi. Samting yumi mas mekim i olsem: Yumi mas mekim wok long ol dispela samting long strongim pasin bilong yumi long pas gut wantaim Jehova. Dispela bai helpim yumi long stap gut long ai bilong God. Orait nau rot bai op long yumi kisim planti blesing long em. Baibel i tok: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”—Sindaun 10:22.
Mekim Wok Painimaut
Win Tru Long Sakim Satan na Ol Wok Bilong Em
19 “Kain kain tingting” i bin kamap long Jop na mekim em i pret na tingting planti. Satan i givim ol dispela tingting long em long rot bilong Elifas na Sofar. (Jop 4:13-18; 20:2, 3) Olsem na Jop i “bel hevi” na em i “mekim planti toktok nabaut” long ol dispela tingting i “pretim” em. (Jop 6:2-4; 30:15, 16) Elihu i laik tru long helpim Jop, olsem na em i stap isi na harim ol tok Jop i mekim, na em i helpim Jop long kisim gutpela tingting bilong Jehova long ol samting. Olsem tasol long nau, ol elda i save sori long ol manmeri i gat kain hevi olsem, na ol i no save putim sampela “hevi” moa long ol. Ol i save mekim pasin olsem Elihu—ol i stap isi na putim yau na givim gutpela tok bilong Baibel long ol, olsem ol i putim wel long skin bilong ol. (Jop 33:1-3, 7; Jems 5:13-15) Olsem na sapos bel bilong wanpela i bagarap, long wanem, em i tingting planti long samting nogut i bin kamap tru long em o em i ting dispela i bin kamap, o em i pret olsem Jop long “olkain driman” samting em i lukim, orait insait long kongrigesen em inap kisim save long sampela tok bilong Baibel bilong mekim isi bel bilong em.—Jop 7:14; Jems 4:7.
DISEMBA 4-10
GUTPELA SAVE I KAM LONG BAIBEL | JOP 22-24
“Yu Ting Ol Man Inap Mekim Ol Samting Bilong Helpim God?”
Sakim Ol Tingting Kranki!
Dispela tingting olsem God i laik bai olgeta samting i mas stret tasol i wankain tingting olsem God i ting ol man i no inap mekim wanpela gutpela wok. Namba tri tok bilong Elifas i gat dispela askim: “Ating yumi man nating inap mekim ol samting bilong helpim God, a? Nogat tru. Ol saveman tu i no inap. Ol inap helpim ol yet tasol.” (Jop 22:2) Elifas i laik tok olsem man i no inap mekim wanpela samting bilong helpim wok bilong God. Bildat tu i tok: “Olsem wanem na bai yumi man bilong graun inap long kamap stretpela na klin long ai bilong God?” (Jop 25:4) Sapos man i gat kain tingting olsem, olsem wanem Jop—wanpela man bilong graun tasol—inap ting em i stap stret long ai bilong God?
Sampela man long nau i tingting nogut long ol yet. Ol samting inap kirapim ol man long kisim dispela kain tingting i olsem: Pasin bilong famili ol i go bikpela long en, ol hevi bilong laip, o pasin birua ol man i bin mekim long ol, long wanem, ol i bilong narapela skin o lain. Tasol Satan na ol spirit nogut tu i amamas long daunim man. Sapos ol inap kirapim man long ting olsem ol samting em i mekim i no gutpela inap God i Gat Olgeta Strong i ken amamas long en, orait em bai isi moa long man i stap bel hevi. Isi isi kain man olsem inap i go longwe long God i gat laip.—Hibru 2:1; 3:12.
Taim yumi go lapun na kisim sik, dispela i mekim na yumi no inap mekim bikpela wok tumas. Ating wok yumi mekim bilong autim tok bilong Kingdom i liklik tasol taim yumi skelim wantaim wok yumi bin mekim taim yumi yangpela, na taim yumi gat gutpela helt na bikpela strong moa. Em i bikpela samting long save olsem Satan na ol spirit nogut i laik bai yumi ting olsem wok yumi mekim i no gutpela inap God i ken amamas long en! Yumi mas sakim kain tingting olsem.
Olsem Wanem Yumi Ken Stretim Ol Hevi
Tripela pren bilong Jop i kamapim tingting bilong ol yet—ol i no kamapim gutpela save na tingting bilong Jehova, na dispela tu i bagarapim bel bilong Jop. Elifas i bin tok, ‘God i no bilip long ol wokboi bilong em,’ na Jehova i no tingim Jop em i stretpela man o nogat. (Jop 4:18; 22:2, 3) Dispela tok i no stret liklik na i bagarapim tru bel bilong Jop! Elifas na ol poroman bilong em i tok bilas long God, olsem na yumi no ken kirap nogut long Jehova i stretim ol. Em i tok: “Yupela i no bin autim tok tru long pasin bilong mi.” (Jop 42:7) Tasol bihain ol i kamapim sampela tingting nogut moa yet.
Ol Yangpela Husat i Mekim Jehova i Belgut Tru
10 Olsem Baibel i kamapim, Satan i sutim tok long pasin bilong Jop long stap gut long God, tasol em i sutim tok tu long olgeta man i mekim wok bilong God—na long yu tu. Satan i stori long olgeta man bilong graun taim em i tokim Jehova: “Sapos wanpela man [i no Jop tasol, em i tok long olgeta man] i laik i stap gut, em inap givim olgeta samting bilong en bilong baim bek laip bilong en.” (Jop 2:4) Yu luksave long olsem wanem yu insait long dispela bikpela tok? Olsem Sindaun 27:11 i kamapim, Jehova i tok i gat wanpela samting yu inap givim long em—samting i stap olsem bekim em i ken mekim long man i sutim tok long em, Satan. Tingim, King bilong heven na graun i askim yu long insait long wok bilong stretim wanpela bikpela tok i winim tru olgeta narapela bikpela tok i bin kamap long graun. Em wanpela bikpela wok tru yu inap mekim! Yu ting yu inap mekim samting Jehova i askim yu long mekim? Jop i bin mekim. (Jop 2:9, 10) Jisas i mekim, wankain olsem planti ol narapela lain bilong bipo tru na i kam inap long nau, na i gat planti yangpela i insait long dispela lain. (Filipai 2:8; KTH 6:9) Yu tu inap mekim wankain samting. Tasol yu mas save gut long wanpela samting—i no olsem yu no insait long dispela bikpela tok. Pasin bilong yu i kamapim klia yu sapotim tok bilas bilong Satan o dispela bekim Jehova i mekim long em. Bai yu helpim tok bilong husat?
Jehova i Laikim Yu Tru!
11 Yu ting samting yu laik mekim i bikpela samting long Jehova? Ating planti man pinis i bin stap gut long em na bai em inap bekim tok long Satan, a? Tru, Satan i tok pasin bilong laikim tru Jehova i no as na ol man i lotu long Em, dispela em i wanpela tok ol samting i kamap pinis i soim olsem em i tok giaman. Tasol Jehova i laik bai yu stap long sait bilong em long dispela bikpela tok long nambawan wok bos, long wanem, em i laikim yu tru. Jisas i tok: “Papa bilong yupela i stap long heven em i no laik bai wanpela bilong ol dispela liklik pikinini i lus.”—Matyu 18:14.
12 Tru tumas, Jehova em i tingim rot yu makim bilong bihainim. Tasol dispela i mekim bikpela samting long em tu. Baibel i kamapim klia olsem pasin ol man bilong graun i bihainim olsem gutpela pasin o pasin nogut, dispela i save mekim bikpela samting long bel bilong Jehova. Olsem: Taim ol Israel i sakim tok bilong God klostu klostu, Jehova i pilim “bel hevi.” (Song 78:40, 41) Paslain long Bikpela Tait long taim bilong Noa “pasin bilong ol manmeri . . . i nogut tru,” na dispela i mekim Jehova “i bel hevi tru.” (Stat 6:5, 6) Tingim olsem wanem dispela em i bikpela samting long yu. Sapos yu kirap insait long ol pasin i no stret, yu inap mekim Man i wokim yu i pilim pen. Dispela i no makim olsem God em i no gat strong o samting em i pilim long bel i bosim ol samting em i mekim, nogat. Dispela i makim olsem em i laikim yu tru na em i laik bai yu stap gut. Tasol taim yu bihainim stretpela pasin, Jehova i save belgut. Em i amamas, long wanem, em i gat sampela tok moa long givim long Satan, na rot i op bilong em i ken kamap Man bilong mekim gut long yu. Na dispela em i samting Jehova i laik mekim. (Hibru 11:6) Jehova em i gutpela papa i save laikim yu tru!
Mekim Wok Painimaut
Putim Ol Mak Bilong Spirit Bilong Givim Biknem Long God
Tingim olsem wanem Jehova i wokim heven na graun. Long dispela tok “nait i go pinis na moning i kamap,” Jehova i makim ol wan wan de, o haptaim, em i bin wokim ol samting. (Stat 1:5, 8, 13, 19, 23, 31) Long kirap bilong ol wan wan de, em i save gut long samting em bai mekim insait long dispela haptaim. Na God inapim tru dispela laik bilong em long wokim ol samting. (KTH 4:11) Jop i tok, taim Jehova “i laik mekim wanpela samting, orait em i save mekim tasol.” (Jop 23:13) Yumi ken save olsem Jehova i amamas tru taim em i lukim “olgeta dispela samting [em i bin wokim] i gutpela”!—Stat 1:31.
Bilong winim ol mak yumi putim, yumi tu i mas i gat strongpela laik long inapim. Wanem samting bai helpim yumi long kisim dispela strongpela laik? Taim graun i stap nating yet, Jehova i save wanem samting bai kamap—graun bai kamap wanpela naispela ples i givim biknem na glori long em. Na olsem tasol, yumi inap strongim laik bilong yumi long inapim samting yumi tingting long mekim, long rot bilong tingim tingim ol gutpela samting yumi inap kisim long winim dispela mak. Tony i gat 19 krismas i bin mekim olsem. Em i no lusim tingting long namba wan taim em i go long wanpela brens ofis bilong ol Witnes Bilong Jehova long Westen Yurop. Kirap long dispela taim na i go, Tony i wok long tingim dispela askim, ‘Sapos mi go sindaun na mekim wok long kain ples olsem, i stap bilong mi bai i olsem wanem?’ Oltaim Tony i tingim tingim dispela samting, na em i wok strong long winim dispela mak. Em i amamas tru taim sampela yia bihain ol i orait long aplikesen bilong em long wok long brens ofis!
DISEMBA 11-17
GUTPELA SAVE I KAM LONG BAIBEL | JOP 25-27
“Pasin Bilong Stap Gut Long God i No Makim Olsem Yu Mas Kamap Stretpela Man Olgeta”
it-1 1210 par. 4
Stap Gut Long God
Jop. Jop, em man husat i bin stap bihain long taim Josep i dai na paslain long taim bilong Moses. Baibel i tok “em i stretpela man na em i save stap gut long God [Hib., tam]; em i save pret long God na em i no save mekim wanpela pasin nogut.” (Jop 1:1) Taim ol ensel i bung i stap long ples bung long heven na toktok i kamap namel long Jehova God na Satan long Jop, i kamapim klia olsem pasin bilong man long stap gut long God i bikpela samting. Satan i sutim giaman tok long risen na Jop i lotuim God, em i tok Jop i lotuim God bikos em i tingim ol samting em bai kisim na i no bikos em yet i laik mekim. I olsem em i sutim tok long pasin bilong Jop long stap gut long God. God i larim Satan long tekewe planti mani kago, na tu, ol pikinini bilong Jop, tasol dispela i no mekim na em i lusim pasin bilong em long stap gut long God. (Jop 1:6–2:3) Na bihain Satan i tok, Jop i redi long lusim mani kago na ol pikinini bilong em, tasol em i no inap mekim olsem sapos em yet i kisim hevi long bodi bilong em. (Jop 2:4, 5) Bihain long Jop i karim bikpela pen, sik we i bagarapim bodi bilong em, meri bilong em i tokim em long tok nogutim God, na ol pren bilong em husat i no save bihainim lo bilong God na mekim laik bilong em i mekim ol tok bilong daunim em (Jop 2:6-13; 22:1, 5-11), ol samting Jop i mekim i soim olsem em man bilong stap gut long God. “I go inap long taim mi dai, mi no inap lusim pasin bilong mi long i stap gut long God! Na mi tok strong olsem mi man bilong bihainim stretpela pasin na mi bai wok yet long mekim olsem, na bel bilong mi bai i no inap kotim mi long laip olgeta bilong mi.” (Jop 27:5, 6) Pasin bilong Jop long stap gut i soim olsem Birua Bilong God em man bilong giaman.
Stap Gut Yet Long God!
3 Yumi ol wokman bilong God, olsem na sapos yumi laik stap gut long em, yumi mas givim bel olgeta long laikim tru Jehova na pas gut wantaim em, na oltaim yumi mas tingim em taim yumi laik mekim ol disisen. Yumi ken skelim tokples ol i bin yusim bilong raitim tok bilong Baibel long pastaim. Tok Hibru ol i trensletim olsem “stap gut long God” i gat dispela mining: olgeta, o gutpela. Lain Israel i save givim animal olsem ofa long Jehova, na Lo i tok ol i mas givim ol gutpela animal. (Wkp. 22:21, 22) Ol manmeri bilong God i no ken tru givim animal em wanpela lek, yau, o ai i bagarap, na tu, ol i no ken givim animal i gat sik. Em i bikpela samting long ol i mas givim animal em olgeta hap bilong bodi bilong en i gutpela. (Mal. 1:6-9) I stret long Jehova i laikim sakrifais i gutpela olgeta. Taim yumi laik baim wanpela prut, buk, o tul, yumi no laik bai planti hul i stap long en o sampela hap bilong en i no stap. Yumi laikim prut, buk, o tul i gutpela na i no gat bagarap long en. Jehova i pilim wankain long pasin bilong yumi long stap gut long em. Yumi mas givim bel olgeta long mekim olsem.
4 Yu ting yumi no inap tru long i stap gut long God? Em tru olsem yumi save mekim planti popaia. Tasol skelim 2-pela samting. Namba 1: Jehova i no save putim ai long ol popaia bilong yumi. Baibel i tok: “O Ja, sapos yu save putim was long olgeta sin bilong mipela, orait, Jehova, husat inap winim kot bilong yu?” (Sng. 130:3) Em i save olsem yumi sinman na yumi save mekim ol popaia, na em i redi oltaim long fogivim yumi. (Sng. 86:5) Namba 2: Jehova i save long skel bilong yumi, na em i no ekspektim yumi long mekim ol samting i winim skel bilong yumi. (Ritim Buk Song 103:12-14.) Hau bai yumi inap givim bel olgeta long em na stap gut long em?
5 Pasin laikim bai kirapim yumi long i stap gut long Jehova. Yumi mas givim bel olgeta long laikim tru na stap gut long Papa bilong yumi long heven. Sapos yumi holim yet dispela pasin laikim bihain long hevi i painim yumi, dispela i soim olsem yumi stap gut long God. (1 Sto. 28:9; Mat. 22:37) Tingim gen eksampel bilong 3-pela Witnes yumi stori long ol long kirap bilong dispela stadi. Wanem samting i stiaim pasin ol i mekim? Yu ting yangpela gel i no laikim pasin bilong kisim amamas long skul? O, yu ting yangpela man i laik bai wanskul i semim em? O, yu ting famili man i laik bai bos i pinisim em long wok? Nogat tru. Ol i save olsem Papa bilong ol, Jehova, i gat ol stretpela lo, na ol i holim wanpela tingting tasol long mekim em i belgut. Ol i laikim em tru, olsem na oltaim ol i tingim ol lo bilong em paslain long ol i mekim disisen. Dispela i soim olsem ol i stap gut long em.
Mekim Wok Painimaut
Bihainim Buk Bilong God na Oganaisim Ol Samting
3 Ol samting God i wokim i soim olsem em i Man bilong oganaisim gut ol samting na i no gat narapela man i olsem em. Baibel i tok: “Long gutpela tingting na save bilong Bikpela yet, . . . em i bin wokim graun na skai.” (Snd. 3:19) Yumi save long “liklik hap tasol” bilong ol pasin bilong God, na save bilong em “i winim save bilong yumi.” (Jop 26:14) Yumi gat liklik save tasol long ol planet, ol sta, na ol galaksi, na dispela i kirapim yumi long luksave olsem i gat Man i oganaisim gut ol dispela samting. (Sng. 8:3, 4) Planti milion sta i bung na kamapim ol galaksi, na olgeta dispela sta i save bihainim stret rot bilong ol na ol i no paul nabaut. Ol planet long sola sistem bilong yumi i save bihainim gut rot bilong ol taim ol i raunim san, na i olsem ol i bihainim ol lo bilong trafik! Ol dispela samting i soim klia olsem “long save bilong [God] yet em i wokim skai na ol samting antap” na long graun, olsem na i stret long yumi preisim em, stap gut long em, na lotuim em.—Sng. 136:1, 5-9.
DISEMBA 18-24
GUTPELA SAVE I KAM LONG BAIBEL | JOP 28-29
“Yu Gat Gutnem Olsem Jop?”
Mekim Gutpela Pasin Sori Long Ol Man i Sot Long Sampela Samting
19 Ol stori bilong Baibel yumi toktok pinis long en ol i kamapim klia olsem yumi mas mekim gutpela pasin sori long ol man i sot long sampela samting na ol i no inap helpim ol yet. Bilong lain famili bilong em i ken i stap yet, Abraham i mas kisim helpim long Betuel. Bilong bodi bilong Jekop i ken i go long Kenan, Josep i mas helpim em. Na bilong kamapim wanpela pikinini, Naomi i mas kisim helpim long Rut. Abraham, Jekop, na Naomi ol i no inap helpim ol yet long ol dispela samting. I mas i gat narapela bilong helpim ol. Na i wankain tu long nau, yumi mas mekim gutpela pasin sori moa yet long ol man i sot long sampela samting. (Sindaun 19:17) Yumi mas bihainim pasin bilong Jop, em i bin helpim ‘ol rabisman taim ol i singaut bilong kisim helpim; na ol pikinini, papa bilong ol i dai pinis, na i no gat man bilong helpim ol; na ol manmeri long taim ol i laik bagarap.’ Na tu, Jop i bin mekim gut bel bilong “ol meri, man bilong ol i dai pinis,” na em i bin stap olsem ‘ai bilong soim rot long ol aipas, na olsem lek bilong helpim ol lek nogut long wokabaut.’—Jop 29:12-15.
it-1 655 par. 10
Klos
Planti taim klos inap makim narapela narapela samting. Olsem yunifom o wanpela spesel klos i makim man i bilong wanpela oganaisesen o i sapotim wanpela kain grup, Baibel i tok piksa long klos bilong makim man na wok em i mekim, olsem tok piksa Jisas i mekim long klos bilong marit. (Mt 22:11, 12.) Long Revelesen 16:14, 15, Bikpela Jisas Krais i tok lukaut long pasin bilong slip long sait bilong bilip na wanpela i rausim mak i soim olsem em wanpela gutpela witnes bilong God tru. Samting em mekim inap kamapim bikpela bagarap long em long “dispela bikpela de bilong God i Gat Olgeta Strong.”
Mining Bilong Sampela Nem
Taim mama i karim yumi, yumi no makim nem yumi kisim. Tasol yumi kisim gutnem o nogat, em samting yumi yet tasol inap makim. (Sindaun 20:11) Askim yu yet: ‘Sapos Jisas o ol aposel inap mekim, ol bai givim wanem nem long mi? Wanem nem i gutpela bilong makim nambawan pasin bilong mi?’
I stret yumi tingim gut dispela askim. Bilong wanem? Saveman King Solomon i tok: “Sapos ol man i ting yu gutpela man na ol i givim biknem long yu, orait dispela i winim tru olgeta mani samting bilong ol maniman.” (Sindaun 22:1) Tru tumas, sapos yumi kisim gutnem long komiuniti yumi stap long en, yumi holim wanpela gutpela samting tru. Tasol samting i bikpela samting moa em olsem: Sapos yumi kisim gutnem long ai bilong God, bai yumi kisim samting bilong i stap oltaim oltaim. Long wanem rot? God i tok promis olsem em bai raitim long “wanpela buk” nem bilong ol man i stap aninit long em, na em bai givim laip i stap oltaim oltaim long ol.—Malakai 3:16; KTH 3:5; 20:12-15.
Mekim Wok Painimaut
Lap—Em i Gutpela Long Helpim Skin Bilong Yu!
Olsem wanem? Pasin bilong lap inap helpim yumi tru tru? Ating yu inap tingim wanpela taim bipo pasin bilong narapela long lap i bin helpim yu long kisim bel isi, a? O ating yu inap tingim taim wanpela man i bin stap pes drai tasol na dispela i mekim na yu bin tingting planti, a? Tru tumas, pasin bilong lap na pes i lait em i bikpela samting—em i gutpela long man i mekim dispela pasin na long man i lukim. Wanpela man Baibel i stori long en, em Jop, em i bin tok olsem long ol birua bilong em: “Taim mi tok gude long ol man nating, ol i save kirap nogut long lukim wanpela bikman i toktok long ol. Na mi bin luk amamas na toktok na lap wantaim ol, na long dispela pasin mi bin strongim bel bilong ol.” (Jop 29:24) Ating pasin bilong Jop long “luk amamas” i makim olsem pes bilong em i lait taim em i toktok wantaim ol dispela man.
DISEMBA 25-31
GUTPELA SAVE I KAM LONG BAIBEL | JOP 30-31
“Hau Jop i Lukautim Tingting Bilong Em Long Stap Klin”
Givim Baksait Long Lukim Ol Samting i No Gutpela!
8 Pasin bilong aigris na bel i kirap inap pulim tu ol trupela Kristen. Olsem na Tok Bilong God i kirapim yumi long bosim gut bel bilong yumi long ol samting yumi lukluk long en na yumi laikim. (1 Ko. 9:25, 27; ritim 1 Jon 2:15-17.) Gutpela man Jop i luksave olsem samting man i lukim dispela inap kirapim laik bilong bel. Em i tok: “Mi bin mekim strongpela promis pinis olsem, mi no ken aigris long ol meri.” (Jop 31:1) Jop i nolaik tru long aigris long wanpela meri na holim em, na em i no tingting liklik long mekim maritpasin wantaim em. Jisas i kamapim strong olsem man i no ken tingting long ol pasin nogut olsem pamuk samting, em i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.”—Mt. 5:28.
Tingim Gut ‘Samting Bai Kamap Bihain’
Taim yu no kirap yet long wokabaut long kain rot olsem, askim yu yet: ‘Dispela rot bai bringim mi i go we?’ Sapos yu tingting gut pastaim long ‘samting bai kamap bihain,’ dispela inap pasim yu long bihainim wanpela rot em bai givim bikpela hevi long yu. Sik AIDS na ol narapela sik bilong pamuk, meri i kisim bel nating, rausim bel, marit i bruk, na bel i gat tok, ol dispela samting i pulap long rot bilong ol manmeri em ol i givim baksait long ol toksave God i putim bilong soim rot. Aposel Pol i tokaut klia long pinis bilong rot em ol manmeri bilong mekim pasin pamuk i bihainim. Ol “bai i no inap i go insait long kingdom bilong God.”—1 Korin 6:9, 10.
Ol Yangpela—Larim Tok Bilong God i Stiaim Yupela
15 Yu ting long wanem kain taim bai yu no strong long sakim samting i traim pasin bilong yu long stap gut long God—taim yu stap wantaim ol arapela o taim yu wanpela i stap? Taim yu stap long skul o long wok, ating yu save was gut na bihainim stretpela pasin. Tasol taim yu wanpela i stap na yu malolo, ating yu no was gut na taim traim i kamap, yu no strong long bihainim stretpela pasin.
16 I gat wanem as na yu mas i gat laik long bihainim tok bilong Jehova, maski yu wanpela i stap? Tingim: Yu inap mekim Jehova i bel hevi o yu inap mekim em i belgut tru. (Stt. 6:5, 6; Snd. 27:11) Ol samting yu mekim em inap mekim sampela samting long Jehova, long wanem, em ‘i save wari long yu.’ (1 Pi. 5:7) Em i laik bai yu harim tok bilong em na bai yu ken i stap gut. (Ais. 48:17, 18) Taim sampela wokboi bilong Jehova long bipo i sakim tok bilong em, dispela i mekim em i bel hevi. (Sng. 78:40, 41) Tasol Jehova i laikim tru profet Daniel. Wanpela ensel i tokim Daniel olsem, “God i laikim yu tumas.” (Dan. 10:11) Bilong wanem? Daniel i save stap gut long God long taim em i stap long ai bilong ol man, na tu, long taim em wanpela i stap.—Ritim Daniel 6:10.
Mekim Wok Painimaut
Pasin Bilong Putim Gut Yau
Ol pren bilong Jop i bin harim 10-pela narapela narapela tok em i bin mekim. Maski i olsem, Jop i tok: “Sori tumas, mi laik bai wanpela man i stap bilong putim yau long tok bilong mi.” (Jop 31:35) Bilong wanem Jop i tok olsem? Long wanem, pasin bilong ol pren bilong em long putim yau long em i no mekim gut bel bilong em. Ol i no tingim tru Jop na ol i no laik pilim tingting bilong em. Ol i no gat pasin bilong sori, olsem na ol i no pilim bel hevi bilong em taim ol i harim toktok bilong em. Tasol aposel Pita i tok: “Yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol, na lusim pasin bilong bikhet.” (1 Pita 3:8) Olsem wanem yumi ken soim olsem yumi sori long narapela? Wanpela rot em yumi mas pilim tingting bilong em. Yumi ken mekim kain tok olsem, “sori, ating dispela i bin bagarapim bel bilong yu stret,” o “ating ol i no kisimgut tok bilong yu.” Narapela rot em yumi ken kamapim gen tok bilong em na mekim long toktok bilong yumi yet, na dispela bai soim olsem yumi klia long tok bilong em. Pasin bilong putim gut yau i makim olsem yumi putim yau long toktok bilong narapela na yumi pilim bel hevi bilong em.