Ol Referens Bilong Laip na Wok Autim Tok Miting Wok Buk
© 2024 Watch Tower Bible and Tract Society of Pennsylvania
NOVEMBA 4-10
GUTPELA SAVE I KAM LONG BAIBEL | BUK SONG 105
“Em i Tingim Kontrak Bilong Em Inap Oltaim”
Hau Yumi Ken Strongim Bilip Bilong Yumi Long Tok Promis Bilong Jehova Long Nupela Taim?
Tingim sampela bilong ol narakain samting em Jehova i bin promisim ol manmeri bilong em long bipo. Em i tokim Abraham na Sara olsem tupela bai gat pikinini man taim ol i lapun pinis. (Stt. 17:15-17) Na tu, em i tokim Abraham olsem em bai givim graun bilong Kenan long ol tumbuna pikinini bilong em. Lain Israel em ol tumbuna pikinini bilong Abraham, ol i bin stap olsem sleiv long Isip inap planti yia na ating i luk olsem dispela tok promis i no inap kamap tru. Tasol em i bin kamap tru. Bihain, Jehova i tokaut olsem lapun Elisabet bai karim wanpela pikinini. Na tu, em i tokim Maria, em meri husat i no bin slip wantaim man, olsem em bai karim Pikinini bilong Em, em dispela Pikinini em Jehova i bin tok promis long em inap planti tausen yia i go pinis long gaden Iden. Dispela em narapela tok promis i bin kamap tru!—Stt. 3:15.
Taim yumi tingim olgeta tok promis Jehova i bin mekim na hau em i truim ol dispela tok promis, yumi kliagut olsem em i gat bikpela strong, na dispela bai strongim bilip bilong yumi long nupela taim em i promis long kamapim. (Ritim Josua 23:14; Aisaia 55:10, 11.) Long dispela rot yumi redi gut long helpim ol narapela long kliagut olsem tok promis bilong nupela taim em i no wanpela driman tasol, o stori nating. Jehova yet i tok long promis em i mekim long kamapim nupela skai na nupela graun olsem: “Ol man inap bilip tru long ol dispela tok na ol dispela tok i tru olgeta.”—Rev. 21:1, 5.
it-2 1201 par. 2
Tok
Olgeta samting God i wokim—ol samting i gat laip na ol samting i no gat laip—i stap aninit long tok bilong God, na em inap yusim ol dispela samting long inapim samting em i tingting pinis long mekim. (Sg 103:20; 148:8) Yumi ken bilip long tok bilong God; ol samting God i promis em i save tingim na mekim ol dispela samting. (Lo 9:5; Sg 105:42-45) Olsem em yet i tok, tok bilong em “i save stap oltaim oltaim”; tok bilong em bai truim ol samting em i tingting pinis long en na i no inap go bek nating long em.—Ai 40:8; 55:10, 11; 1Pi 1:25.
Mekim Wok Painimaut
Ol Yangpela—Samting Yu Inap Mekim na Bai Famili i Stap Amamas na Wanbel
“Ol i pasim ol sen long lek bilong [Josep], ol i pasim ol ain long nek bilong em; em i stap olsem inap long tok bilong God i kamap tru, ol tok bilong Jehova i mekim em i kamap klin.” (Buk Song 105:17-19) Inap 13 yia, Josep i karim hevi olsem wanpela sleiv na kalabusman i go inap long promis bilong Jehova i kamap tru. Ol dispela samting i painim em i mekim em i kamap klin. Tru, maski Jehova i no kamapim ol dispela hevi, i gat risen na em i larim ol dispela hevi. Olsem wanem? Josep bai lukautim bilip bilong em long “tok bilong God” maski ol bikpela hevi i painim em? Em bai strong long kisim ol gutpela pasin, na kisim ol pasin we em i mas i gat olsem pasin bilong i no les kwik, pasin daun, kamap strong long bilip, na holim strongpela tingting long mekim asainmen we bai i gat hatwok bilong en? Tru tumas, nau Josep i kamap olsem gol ol i kukim na rausim pipia long en—em i klin na dia tumas long God, na bihain God i yusim em long mekim bikpela wok moa.—Stat 41:14, 38-41, 46; 42:6, 9.
NOVEMBA 11-17
GUTPELA SAVE I KAM LONG BAIBEL | BUK SONG 106
“Ol i Lusim Tingting Long God, Em Seivia Bilong Ol”
“Husat Man i Laik Bihainim Bikpela?”
Lain Israel i pret taim ol i lukim blakpela klaut, laitning, na ol narapela sain em God i kamapim. Olsem na ol i askim Moses long kamap mausman bilong ol na toktok wantaim Jehova long Maunten Sainai. (Kis. 20:18-21) Moses i stap antap long maunten inap longpela taim. Ating lain Israel i ting olsem ol bai stap long ples drai na ol i no gat wanpela man bilong lidim ol. I luk olsem lain Israel i save bilip taim ol i lukim Moses. Ol i tingting planti na ol i tokim Aron: “Mipela i no save wanem samting i bin kamap long Moses, dispela man i bin kisim yumi long Isip na bringim yumi i kam. Olsem na yu mas wokim wanpela god bai i go paslain long mipela na bringim mipela long rot.”—Kis. 32:1, 2.
Mekim Wok Painimaut
Sampela Bikpela Tok Bilong Buk 3 na 4 Bilong Buk Song
106:36, 37. Long tok Hibru bilong pastaim, ves 36 na 37 i stori long pasin bilong lotu long ol imis, olsem ol giaman god, na givim ofa long ol spirit nogut. Dispela i soim olsem ol spirit nogut inap mekim wok long man husat i mekim wok long ol imis. Baibel i tok: “Stap longwe long olgeta giaman god.”—1 Jon 5:21.
NOVEMBA 18-24
GUTPELA SAVE I KAM LONG BAIBEL | BUK SONG 107-108
“Tok Tenkyu Long Jehova, Long Wanem, Em i Gutpela”
Kongrigesen i Bilong Litimapim Nem Bilong Jehova
Kongrigesen i no ples bilong bung wantaim na amamas, na em tasol. Na tu, em i no ples we ol man bilong komiuniti i ken bung wantaim, o wanpela klap we ol man bilong wankain sindaun o ol man i gat laik long wankain spot o amamas ol i save bung wantaim. Nogat. Namba wan wok bilong kongrigesen em bilong litimapim nem bilong God Jehova. Inap longpela taim pinis kongrigesen i bilong mekim dispela samting, olsem Buk Song i kamapim klia. Long Song 35:18, Baibel i tok: “Bai mi tenkyu long yu namel long planti lain manmeri i bung wantaim. Tru tumas, bai mi litimapim nem bilong yu namel long bikpela lain manmeri.” Na Song 107:31, 32 i tok: “Ol i mas tenkyu long Bikpela, oltaim em i save laikim ol tumas, na em i save mekim gutpela wok tru bilong helpim ol. Taim ol i bung wantaim ol manmeri bilong God ol i mas tokaut long biknem bilong em.”
Tok Tenkyu Long Jehova na Kisim Blesing
Sapos yumi laik kisim pasin bilong tok tenkyu na holim yet dispela pasin, orait yumi mas luksave long ol blesing yumi kisim long Jehova, na tingim tingim na tok tenkyu long ol dispela blesing, na tingim ol samting God i mekim bilong lukautim yumi. Man bilong raitim song i mekim olsem, na em i pilim tru planti gutpela wok Jehova i bin mekim.—Ritim Song 40:5; 107:43.
Mekim Wok Painimaut
it-2 420 par. 4
Moap
Bihain, taim Devit yet i mekim wok olsem king, i gat pait tu i kamap namel long Israel na Moap. Ol Israel i daunim ol Moap na ol i larim ol long baim takis long Devit. I klia tru olsem taim pait i laik pinis, ol Israel i kilim i dai 67 pesen bilong ol soldia bilong Moap. I luk olsem Devit i tokim ol long lain na slip long graun na em i mesarim wan wan lain na kilim i dai 67 pesen bilong ol na larim 33 pesen i stap laip. (2Sm 8:2, 11, 12; 1St 18:2, 11) Ating long dispela seim pait, Benaia em pikinini man bilong Jehoiada i “kilim i dai tupela pikinini man bilong Ariel bilong Moap.” (2Sm 23:20; 1St 11:22) Dispela pait Devit i winim i truim tok profet Balam i bin mekim winim 400 yia i go pinis: “Wanpela sta bai kamap long lain pikinini bilong Jekop, stik bilong king bai kamap long lain pikinini bilong Israel, na em bai brukim poret bilong Moap, na bun bilong het bilong ol pikinini man husat i save kamapim bagarap.” (Nam 24:17) Na tu, i klia tru olsem man bilong raitim song i tingim dispela pait na i tok olsem, God i tingim Moap olsem “dis waswas” bilong Em.—Sg 60:8; 108:9.
NOVEMBA 25–DISEMBA 1
GUTPELA SAVE I KAM LONG BAIBEL | BUK SONG 109-112
Sapotim Jisas, Em King!
Sampela Bikpela Tok Bilong Buk 5 Bilong Buk Song
110:1, 2—“Bikpela bilong [Devit],” Jisas Krais, i mekim wanem taim em i sindaun long han sut bilong God? Taim Jisas i kirap bek em i go bek long heven na sindaun long han sut bilong God na wet i stap inap long 1914 long kirap mekim wok king. Long dispela taim, Jisas i bosim ol lain bilong em, em God i bin makim ol, em i stiaim ol long wok bilong ol long autim tok na kamapim disaipel, na tu, redim ol long mekim wok king wantaim em long Kingdom bilong em.—Matyu 24:14; 28:18-20; Luk 22:28-30.
Ol Man i Pait Long God Ol i No Inap Win!
Bihain liklik long yia 1900 na i kam inap nau, ol birua i bin pait long ol manmeri bilong Jehova. Long planti kantri, ol man i gat tingting nogut ol i bin wok strong long pasim wok bilong autim gutpela tok bilong Kingdom bilong God. Nambawan Birua bilong yumi, Satan, i bin kirapim ol long mekim olsem—em i ‘olsem wanpela laion i save raun bilong painim ol manmeri bilong kaikai.’ (1 Pita 5:8) ‘Taim bilong ol arapela lain man’ i pinis long 1914, na God i putim Pikinini bilong em i stap nupela King bilong graun, na em i tokim em: “Yu bosim ol birua bilong yu.” (Luk 21:24; Song 110:2) Krais i mekim wok long namba em i bin kisim na em i rausim Satan long heven na kalabusim em i stap long hap klostu long graun. Satan i save em i gat sotpela taim tasol bilong i stap, olsem na em kamapim belhat bilong em long ol Kristen God i bin makim ol long spirit holi, wantaim ol poroman bilong ol. (KTH 12:9, 17) Ol dispela birua i pait long God ol i bin pait planti taim long lain bilong em, olsem na wanem samting i bin kamap?
Wok Long Kamap Gutpela Moa
Dispela tok long yusim presen bilong yumi em bilong kirapim yumi long i go pas long mekim samting. Olsem wanem? Yu save go pas long wok wantaim ol narapela long autim tok? Yu save wok long painim rot bilong helpim ol nupela, o yangpela, o ol lain i no gat strong long kongrigesen bilong yu? Yu save volantia long klinim Haus Kingdom o long helpim sampela wok bilong ol kibung? Yu inap mekim wok painia haptaim long sampela mun? Yu inap mekim wok painia oltaim o helpim wanpela kongrigesen i sot long ol pablisa? Sapos yu wanpela brata, yu save wok long winim ol mak Baibel i kolim bilong holim wok kongrigesen sevan o wok elda? Taim yu amamas long givim helpim na yu orait long holim wok, dispela i makim olsem yu wok long kamap gutpela moa.—Sng. 110:3.
Mekim Wok Painimaut
it-1 524 par. 2
Kontrak
Kontrak Bilong Mekim Wok Pris Olsem Melkisedek. Buk Song 110:4 i stori long dispela kontrak, na man i raitim buk Hibru i stori long dispela skripsa taim em i stori long Krais long Hibru 7:1-3, 15-17. Jehova i mekim dispela kontrak wantaim Jisas Krais wanpela tasol. I klia tru olsem Jisas i tok long dispela kontrak taim em i mekim kontrak bilong kingdom wantaim ol disaipel bilong em. (Lu 22:29) Jehova i mekim tok tru antap olsem Jisas Krais, Pikinini Bilong God long heven, bai mekim wok pris wankain olsem Melkisedek. Melkisedek em wanpela king na pris bilong God long graun. Jisas Krais bai mekim wok olsem King na Hetpris wantaim long heven, na i no long graun. Jisas i mekim wok olsem hetpris bilong i stap oltaim oltaim bihain long em i go long heven. (Hi 6:20; 7:26, 28; 8:1) Dispela kontrak bai stap oltaim bikos Jisas bai bihainim daireksen bilong Jehova long wok King na Hetpris inap oltaim oltaim.—Hi 7:3.
DISEMBA 2-8
GUTPELA SAVE I KAM LONG BAIBEL | BUK SONG 113-118
Yumi Bai Bekim Bek Wanem Samting Long Jehova?
Kamap Strong Long Rot Bilong Laikim Tru Ol Narapela
Ol tok bilong Jisas i kamapim long ples klia olsem pasin bilong laikim tru Jehova em i nambawan bikpela samting. Tasol taim mama i karim yumi, yumi no save laikim tru Jehova. Yumi mas wok long kisim dispela laik. Taim yumi kisim save long em long namba wan taim, ol samting yumi harim i kirapim yumi long i go klostu long em. Isi isi yumi bin kisim save long olsem wanem em i bin redim dispela graun bilong ol man i ken sindaun long en. (Stat 2:5-23) Yumi kisim save long pasin em i mekim long ol man, em i no bin lusim yumi taim Adam na Iv i mekim sin, nogat, em i stretim rot bilong kisim bek yumi. (Stat 3:1-5, 15) Em i mekim gutpela pasin long ol man i stap gut long em, na bihain em i givim dispela wanpela Pikinini bilong em bilong tekewe sin bilong yumi. (Jon 3:16, 36) Taim yumi kisim ol dispela save, yumi amamas moa long ol samting Jehova i mekim bilong helpim yumi. (Aisaia 25:1) King Devit i tok em i laikim tumas Jehova, long wanem, long pasin sori Jehova i lukautim em. (Song 116:1-9) Long nau, Jehova i save lukautim yumi, na soim rot long yumi, na strongim yumi, na strongim bel bilong yumi. Taim yumi wok long kisim save long em, yumi save laikim em moa yet.—Song 31:23; Sefanaia 3:17; Rom 8:28.
Tenkyu Taim Yu Kisim—Amamas Taim Yu Givim
Man bilong raitim song i bin tingting olsem: “Bikpela i bin mekim gut tru long mi. Olsem na bai mi givim wanem samting long em?” (Sng. 116:12) Jehova i bin mekim gut long em long wanem ol rot? Jehova i bin strongim em taim em i ‘pret nogut tru na wari moa yet.’ Na Jehova i bin ‘kisim bek em na em i no bin i dai.’ Orait nau em i laik bekim na “givim” samting i go bek long Jehova. Em inap mekim wanem? Em i tok: “Mi bai mekim olsem mi bin promis.” (Sng. 116:3, 4, 8, 10-14) Em i pasim tok long bel olsem em bai bihainim olgeta promis em i bin mekim long Jehova na inapim tru olgeta wok bilong Jehova em i mas mekim.
Yu tu inap mekim olsem. Long wanem rot? Oltaim yu mas mekim ol samting i stret wantaim ol lo na ol stiatok bilong God. Olsem na pasin bilong yu long lotuim Jehova i mas i stap nambawan bikpela samting long i stap bilong yu na yu mas larim spirit bilong God i stiaim yu long olgeta samting yu mekim. (Sav. 12:13; Ga. 5:16-18) Em tru olsem ol samting yu mekim bai i no inapim skel bilong olgeta samting Jehova i bin mekim bilong helpim yu. Tasol Jehova i save amamas na “belgut tru” taim em i lukim olsem yu givim bel olgeta long mekim wok bilong em. (Snd. 27:11) Em i gutpela samting tru long yumi inap mekim bel bilong Jehova i amamas olsem, a?
Skul Yumi Inap Kisim Long Buk Wok Pris
Lesen 2: Yumi lotuim Jehova bikos yumi tenkyu tru long em. Yumi bai kisim save long dispela lesen taim yumi skelim ofa bilong kamap wanbel wantaim God, em narapela bikpela samting long lotu i tru long bipo. Long Buk Wok Pris, yumi kisim save olsem man Israel inap mekim ofa bilong kamap wanbel wantaim God sapos em “i laik givim tenkyu long God.” (Wkp. 7:11-13, 16-18) Em i mekim dispela ofa long laik bilong em yet, na i no olsem ol narapela i tokim em long mekim. Em i mekim dispela ofa bikos em i laikim God bilong em, Jehova. Sampela lain tasol inap kaikai mit bilong animal em dispela man i ofaim—em yet, famili bilong em, na ol pris. Taim ol i ofaim animal, sampela hap bilong en i bilong Jehova tasol. Em wanem ol hap?
Lesen 3: Pasin laikim i kirapim yumi long givim ol nambawan samting long Jehova. Long ai bilong Jehova, gris em nambawan gutpela hap bilong animal. Em i tokaut klia olsem sampela hap bilong animal, olsem kidni, ol i spesel tru long ai bilong em. (Ritim Wok Pris 3:6, 12, 14-16.) Jehova i save amamas tru taim wanpela man Israel i mekim ofa long laik bilong em yet na givim gris na ol dispela nambawan hap bilong animal long em. Dispela man i kamapim klia bikpela laik bilong em long givim ol nambawan samting tru long God. Long wankain pasin, Jisas i laikim tru Jehova na long laik bilong em yet em i givim ol nambawan samting tru long Em. (Jon 14:31) Jisas i amamas long bihainim laik bilong God; em i laikim tru ol lo bilong God. (Sng. 40:8) Jisas i mekim wok bilong Jehova long laik bilong em yet, na dispela i bin amamasim tru Jehova!
Wankain olsem ol sakrifais bilong kamap wanbel wantaim Jehova, wok lotu bilong yumi i kamapim klia tingting i stap long bel bilong yumi. Yumi givim ol nambawan samting long Jehova bikos yumi laikim em tru long bel olgeta bilong yumi. Jehova i amamas tru long lukim planti milion manmeri i lotuim em bikos ol i laikim em tru na ol i laikim tu ol pasin bilong em! Yumi stap bel isi taim yumi tingim olsem Jehova i lukim na tingim tru ol wok yumi mekim na risen bilong yumi long mekim ol dispela wok. Sapos yu lapun na yu no inap moa long mekim bikpela wok olsem yu bin mekim long pastaim, yu ken bilip tru olsem Jehova i luksave long skel bilong yu. Ating yu pilim olsem yu no inap mekim planti wok, tasol Jehova i lukim olsem pasin laikim i kirapim yu long mekim wok yu inap long mekim. Em i amamas taim yu givim ol nambawan gutpela samting long em.
Mekim Wok Painimaut
Askim
Man bilong raitim song i tok: “Dai bilong ol manmeri i stap gut long Jehova em samting i dia tumas long ai bilong en.” (Sng. 116:15, NW ) Laip bilong olgeta wan wan manmeri i lotu tru long Jehova i dia tumas long en. Tasol tok bilong Song 116 i no stori long indai bilong wan wan man tasol, nogat.
Taim wanpela brata i mekim fiuneral bilong wanpela Kristen, i no stret long yusim Song 116:15 bilong makim man i dai, maski em i stap gut long Jehova i go inap long em i dai. Bilong wanem yumi tok olsem? Long wanem tok bilong man i raitim song i gat bikpela mining moa. Tok bilong em i makim olsem God i no inap larim ol manmeri i stap gut long em, olsem lain olgeta, i dai, long wanem, ol i dia tumas long ai bilong en.—Lukim Song 72:14; 116:8.
DISEMBA 9-15
GUTPELA SAVE I KAM LONG BAIBEL | BUK SONG 119:1-56
‘Hau Bai Yangpela Man i Wokabaut Long Klinpela Pasin?’
Yu Stap Klin Long Olgeta Samting?
Pol i tok lukaut long Efesus 5:5 olsem: “Long wanem, yupela i save long dispela, yes, yupela i save gut olsem, ol manmeri bilong mekim pasin pamuk o pasin i no klin o gridi pasin, dispela i wankain olsem pasin bilong lotuim imis, ol i no inap i go insait long Kingdom bilong Krais na bilong God.” Maski i olsem, insait long wan wan yia planti tausen i kisim strongpela tok bilong stretim ol o raus long kongrigesen bikos ol i mekim pasin pamuk—“mekim sin long bodi.” (1 Korin 6:18) Planti taim dispela hevi i kamap bikos man i no “lukaut gut long pasin bilong em na bihainim ol tok bilong [God].” (Buk Song 119:9) Olsem, planti bratasista i no lukaut gut long taim ol i go holide. Ol i no bung wantaim ol wanbilip na ol i kirap long prenim ol manmeri husat i go tu bilong holide. Ol i tingim olsem ‘ol dispela manmeri i gat gutpela pasin,’ na sampela i bung wantaim ol long mekim ol samting we i no stret. Sampela i holim wankain tingting na ol i pas gut wantaim ol wanwok bilong ol. Wanpela elda Kristen i bin lusim bikpela haptaim wantaim wanpela meri wanwok na dispela i mekim na em i lusim famili bilong em na i go stap wantaim dispela meri! Olsem na em i raus long kongrigesen. Tok bilong Baibel i stret, “Ol poroman nogut i save bagarapim ol gutpela pasin bilong man”!—1 Korin 15:33.
“Mi Laikim Tumas Tok Yu Givim Mi”
JEHOVA i save givim ol tok long lain bilong em bilong helpim ol long karim ol hevi bilong dispela taim nogut. Sampela bilong ol dispela tok yumi save kisim taim yumi yet i ritim Baibel, na sampela tok yumi save kisim long rot bilong ol tok na bekim long ol miting Kristen. Planti samting yumi ritim na harim long dispela kain taim i no nupela samting long yumi. Ating yumi bin harim kain tok olsem pinis. Yumi save lusim tingting long ol samting, olsem na long olgeta taim yumi mas kirapim gen tingting bilong yumi long ol lo na tok bilong Jehova na ol samting em i tingting pinis long mekim. Yumi mas tenkyu long ol tok bilong God. Ol i helpim yumi long tingim as na yumi kirap wokabaut long pasin God i makim, na dispela i strongim yumi. Olsem na man bilong raitim song i tok long Jehova: “Mi laikim tumas tok yu givim mi bilong stiaim lek bilong mi.”—Song 119:24.
Givim Baksait Long Lukim Ol Samting i No Gutpela!
Tasol tu, samting yumi lukluk long en, em inap nogutim yumi. Samting yumi lukim inap mekim bikpela samting long tingting bilong yumi, olsem em inap kirapim o strongim tru laik i stap long bel bilong yumi. Yumi stap long graun em Satan i bosim na ol man i save bihainim laik bilong ol yet tasol na mekim ol kain kain pasin nogut, olsem na planti taim yumi lukim ol samting em inap pulim yumi long mekim ol samting nogut—maski yumi lukim dispela samting inap sotpela taim tasol. (1 Jo. 5:19) Olsem na i gat as na man bilong raitim song i askim God: “Helpim mi long givim baksait long ol samting i no gutpela. Mekim gut long mi olsem yu bin promis long mi.”—Sng. 119:37.
Mekim Wok Painimaut
Bilip Long Tok Bilong Jehova
Wanpela bikpela poin Song 119 i kamapim em olsem: Ol tok bilong God i bikpela samting tru. Bilong helpim ol long tingim tok bilong song, man i raitim dispela song i bihainim ol 22 leta bilong ABC bilong tok Hibru. Long tok Hibru bilong bipo ol i bin brukim dispela 176 ves long 22 hap na olgeta hap i gat 8-pela lain long en. Long ol wan wan hap, olgeta 8-pela lain bai kirap long wankain leta tasol. Dispela song i stori long tok na lo bilong God, stretpela tok na stretpela lo bilong God, pasin bilong Bikpela, ol samting God i laik yumi mekim, na stretpela pasin bilong Em. Long dispela stadi na narapela stadi i kamap bihain long en, bai yumi skelim tok bilong Song 119 em ol i bin kisim long Baibel Hibru na tanim stret. Taim yumi tingim ol samting i bin painim ol wokman bilong Jehova long bipo na long nau dispela inap mekim yumi amamas moa long tok bilong dispela song na long Tok Bilong God, em Baibel.
DISEMBA 16-22
GUTPELA SAVE I KAM LONG BAIBEL | BUK SONG 119:57-120
Rot Bilong Karim Hevi
“Mi Laikim Tru Lo Bilong Yu”
I gutpela yu askim yu yet, “Olsem wanem lo bilong God inap mekim gut bel bilong man bilong raitim song?” Em i bilip strong olsem Jehova i tingim em na dispela i strongim em. Man bilong raitim song i save sapos em i bihainim ol lo bilong God dispela bai helpim em na i mekim em i amamas, maski ol birua i givim planti hevi long em. Em i luksave olsem Jehova i bin mekim gut long em. Na pasin bilong larim ol lo bilong God i stiaim em i mekim na save bilong man bilong raitim song i winim tru save bilong ol birua bilong em na i helpim em long abrusim bagarap. Pasin bilong bihainim dispela lo i mekim na em i stap bel isi na bel bilong em i no gat tok.—Song 119:1, 9, 65, 93, 98, 165.
Yu Save Laikim Tumas Ol Tok Bilong Jehova?
Ol tok bilong God bilong kirapim gen tingting i gutpela samting tru long man bilong raitim Song, em i tok: “Mi no ken wet. Mi hariap long bihainim lo bilong yu. Ol man nogut i traim long pasim mi bilong pulim mi i go long pasin bilong ol, tasol mi no lusim tingting long lo bilong yu.” (Song 119:60, 61) Taim ol man i mekim nogut long yumi, ol tok bilong Jehova i save helpim yumi long sanap strong na karim hevi, long wanem, yumi bilip tru olsem Papa bilong yumi long heven em inap rausim ol samting ol birua i save putim bilong pasim yumi na i olsem rop ol i pasim long skin bilong yumi. Long taim em yet i makim, em i save rausim ol dispela samting i pasim yumi, bambai yumi inap mekim wok bilong autim tok bilong Kingdom.—Mak 13:10.
Sampela Bikpela Tok Bilong Buk 5 Bilong Buk Song
119:71—Olsem wanem i gutpela long hevi i painim yumi? Ol hevi inap skulim yumi long bilip na wetim Jehova i helpim yumi, beten strong long em, na stadi gut long Baibel na wok strong long bihainim tok bilong en. Na tu, pasin yumi mekim long taim hevi i painim yumi, dispela inap kamapim sampela pasin kranki bilong yumi we yumi inap stretim. Sapos yumi larim hevi i helpim yumi long stretim pasin bilong yumi, dispela bai strongim yumi.
“Krai Wantaim Ol Man i Krai”
Jehova em gutpela Papa bilong yumi long heven, na yumi ken bilip tru olsem em tasol inap mekim isi bel bilong ol man. (Ritim 2 Korin 1:3, 4.) Jehova em Man i save mekim gut bel bilong yumi, em i tok: “Mi yet mi save strongim bel bilong yupela na mekim olgeta hevi bilong yupela i pinis.”—Ais. 51:12; Sng. 119:50, 52, 76.
Yumi inap bilip tru olsem Jehova bai mekim gut bel bilong yumi. Olsem na yumi mas beten na kamapim bel na tingting bilong yumi long em. Yumi amamas long save olsem Jehova i pilim tru bel hevi bilong yumi na givim ol gutpela tok bilong mekim gut bel bilong yumi long taim stret! Em i save helpim yumi olsem wanem?
Mekim Wok Painimaut
Sampela Bikpela Tok Bilong Buk 5 Bilong Buk Song
119:96—Wanem mining bilong dispela tok ‘i no gat wanpela samting i gutpela’? Man bilong raitim song i toktok long tingting bilong man long wanem samting i gutpela olgeta. Ating em i tingim tingting bilong ol man i sot long samting i gutpela tru. Tasol ol lo bilong God i no olsem. Lo bilong God i gutpela olgeta na em i stret long olgeta samting long i stap bilong man.
DISEMBA 23-29
GUTPELA SAVE I KAM LONG BAIBEL | BUK SONG 119:121-176
Abrusim Ol Samting We Inap Mekim Yu Bel Hevi
Larim Ol Lo na Stiatok Bilong God i Skulim Maus Bilong Bel
Sapos yumi laik bai ol lo bilong God i stiaim yumi, yumi mas ritim ol dispela lo, kliagut long en, na laikim na rispektim ol dispela lo. Baibel i tok: “Lusim pasin nogut, na bihainim gutpela pasin tasol.” (Amo. 5:15) Olsem wanem yumi inap mekim olsem? Yumi mas holim wankain tingting olsem bilong Jehova long ol samting. Yumi ken tok piksa olsem: Yu hatwok long slip long nait. Dokta i tokim yu long eksasais, skelim kaikai yu kisim, na senisim pasin bilong yu long mekim ol samting. Taim yu bihainim tok bilong dokta, yu luksave olsem dispela i helpim yu! Ating yu amamas tru olsem dokta i helpim yu long mekim ol senis bambai helt bilong yu i kamap gutpela.
Olsem tasol, Krieta bilong yumi i givim yumi ol lo bilong lukautim yumi na bai yumi abrusim ol hevi, na laip bilong yumi bai kamap gutpela. Yumi stap gut taim yumi bihainim ol lo bilong Baibel na sakim pasin giaman, pasin pamuk, kros pait, wok bilong ol spirit nogut, na rausim tingting bilong mekim pasin nogut. (Ritim Sindaun 6:16-19; Rev. 21:8) Taim yumi luksave long ol blesing yumi kisim long pasin bilong bihainim ol lo bilong Jehova, pasin bilong yumi long laikim Jehova na ol lo bilong em bai kamap strong moa.
Ol Yangpela—Yupela Wok Long Kisim Wanem Samting?
Na bikpela samting tru em olsem: Yu mas lain long givim baksait olgeta long pasin nogut. (Song 97:10) Tasol olsem wanem yu inap givim baksait long samting em pastaim ating yu laikim na kisim amamas long en? Yu mas tingim kaikai em inap kamapim! “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu. Sapos wanpela man i bihainim ol laik bilong olpela bel bilong em yet, orait dispela pasin bilong olpela bel bai i kamapim kaikai nogut.” (Galesia 6:7, 8) Taim laik bilong bel i pulim yu long mekim pasin pamuk, tingim kaikai nogut em inap kamap, olsem dispela bai mekim Jehova i bel hevi. (Lukim Song 78:41.) Na ating bai yu kamapim nating pikinini o kisim sik bilong pamuk, olsem AIDS. Na sapos yu pundaun olsem, dispela inap bagarapim tru bel bilong yu, na bai yu no amamas moa long yu yet. Na ating bihain bihain bai yu kisim hevi yet long dispela pasin yu bin mekim. Wanpela meri Kristen i tok: “Taim mitupela i no marit yet, mitupela i bin pamuk wantaim ol narapela. Nau mitupela wantaim i Kristen, tasol dispela pasin mipela mekim bipo i stap as yet bilong kros na tingting nogut namel long mitupela.” Narapela kaikai nogut em olsem: Bai ol i pinisim yu long ol wok bilong God yu holim na ating bai ol i rausim yu long kongrigesen! (1 Korin 5:9-13) Em pe bilong kisim amamas inap liklik taim, olsem na yu ting i gutpela yu pamuk?
Mekim Wok Painimaut
Bilip Tru Olsem ‘Tok Bilong God Em i Tru Tasol’
Yumi olgeta wokman bilong Jehova, yumi bilip tru olsem em i “God bilong mekim pasin tru tasol” na oltaim em i laik bai gutpela samting i painim yumi. (Buk Song. 31:5; Ais. 48:17) Yumi save olsem yumi ken trastim ol tok yumi ritim long Baibel na yumi bilip olsem “as bilong tok bilong [God] em i tru tasol.” (Ritim Buk Song 119:160.) Yumi wanbel long tok em wanpela saveman bilong Baibel i raitim, em i tok: “I no gat wanpela tok em God i mekim em i tok giaman o i no inap kamap tru, nogat. Ol manmeri bilong God i ken trastim ol tok em i mekim bikos ol i trastim God husat i mekim ol dispela tok.”
DISEMBA 30–JANUERI 5
GUTPELA SAVE I KAM LONG BAIBEL | BUK SONG 120-126
Ol i Krai na Planim Kaikai, Tasol Ol i Amamas na Kisim Kaikai
Ol Man i Givim Glori Long God Ol i Kisim Blesing
Taim yumi kisim plang olsem wok bilong i stap disaipel, yumi mekim pait bilong sakim Satan. Jems 4:7 i tok: “Sakim Satan, na em bai i lusim yupela na ranawe.” Tasol long mekim olsem i no isi. Bilong mekim wok bilong God i gat hatwok bilong en. (Luk 13:24) Tasol Baibel i tok promis long Song 126:5: “Ol man i wok long krai na planim kaikai, bai ol i ken amamas na kisim ol kaikai i mau.” Em nau, yumi no lotuim wanpela God i no save tingim wok yumi mekim. Em “i save mekim gut tru long ol man i wok long painim em,” na em i blesim ol man husat i givim glori long em.—Hibru 11:6.
Bilip Bilong Yu Bai Stap Strong?
Olsem wanem? Yu wok long krai sori long wanpela long famili i dai? Lusim haptaim long strongim bilip bilong yu long kirap bek long rot bilong ritim ol stori bilong kirap i stap long Baibel. Yu bel hevi long wanpela wanfamili i raus long kongrigesen? Stadi long Baibel bilong strongim bilip bilong yu olsem rot Jehova i makim bilong stretim man, dispela em gutpela rot tru. Maski wanem wanem hevi i painim yu, yusim dispela olsem rot bilong strongim bilip bilong yu. Tokim Jehova long ol samting yu pilim long bel. Na no ken stap wanpis, oltaim stap klostu long ol bratasista bilong yu. (Prov. 18:1) Yu ken mekim ol wok samting we bai helpim yu long karim hevi i painim yu, maski bel hevi inap mekim yu krai sampela taim. (Sng. 126:5, 6) Oltaim wok yet long mekim ol samting yu save mekim olsem go long ol miting, autim tok, na ritim Baibel. Na oltaim putim tingting olgeta long ol gutpela blesing Jehova i laik givim long yu long bihain. Taim yu lukim hau Jehova i helpim yu, bilip bilong yu long em bai kamap strong moa.
Wok Yet Long Bungim Kaikai Bilong Gaden!
Tok bilong Song 126:5, 6 i mekim gut bel bilong ol wokman bilong God, na moa yet long ol wokman em ol man i mekim nogut long ol. Em i tok: “Ol man i wok long krai na planim kaikai, bai ol i ken amamas na kisim ol kaikai i mau. Tru tumas, ol man i krai na karim pikinini kaikai i go bilong planim, bihain bai ol i singim song bilong amamas, na kisim ol kaikai i mau na i kam.” Tok bilong man bilong raitim Song long wok bilong planim na kisim kaikai em i makim wok bilong Jehova long lukautim na mekim gut long liklik hap lain i lusim kalabus long Babilon na kam bek long kantri bilong ol. Ol i amamas tru long ol i stap fri, tasol ating ol i krai taim ol i planim pikinini kaikai long strongpela graun ol i no bin brukim na planim kaikai long en insait long 70 yia ol i stap kalabus. Tasol ol lain i kirap na planim pikinini kaikai na wokim haus lotu samting, ol i kisim bikpela amamas long ol gutpela samting i kamap long hatwok bilong ol.
Ating yumi wok long krai taim hevi i painim yumi o taim yumi o ol narapela i karim pen long mekim stretpela pasin. (1 Pita 3:14) Long wok bilong yumi long bungim kaikai bilong gaden, ating yumi hatwok pastaim, long wanem, i olsem i no gat wanpela gutpela samting i kamap long dispela wok. Tasol sapos yumi wok i go yet long planim pikinini kaikai na givim wara long en, God bai mekim kaikai i kamap, ating winim tru ol samting yumi bin tingting long kisim. (1 Korin 3:6) Ol gutpela samting i kamap long wok bilong tilim ol Baibel na ol buk bilong Baibel i kamapim klia dispela samting.
Mekim Wok Painimaut
Strong Bilong Lukautim Ol Man—“God Em i Ples Hait Bilong Yumi”
Pastaim tingim pasin bilong Jehova long lukautim yumi. Yumi save lotuim Jehova, olsem na yumi save Jehova bai lukautim yumi olsem wanpela lain na dispela lain i no ken bagarap. Sapos em i no mekim olsem, Satan bai no hatwok long bagarapim lain bilong yumi. Tingim dispela: Satan, em i “hetman i save bosim dispela graun,” na em bai amamas tru long pinisim lotu i tru. (Jon 12:31; KTH 12:17) Sampela strongpela gavman bilong dispela graun i bin tambuim wok bilong yumi long autim tok na ol i bin traim long pinisim lain bilong yumi olgeta. Tasol lain bilong Jehova i bin sanap strong na ol i no bin lusim wok autim tok! Bilong wanem ol strongpela kantri i no inap pasim wok bilong dispela liklik lain Kristen i luk olsem ol i no gat helpim bilong lukautim ol? Long wanem, Jehova i bin lukautim yumi long strongpela wing bilong em!—Song 17:7, 8.