Ol Referens Bilong Laip na Wok Autim Tok Miting Wok Buk
© 2024 Watch Tower Bible and Tract Society of Pennsylvania
SEPTEMBA 2-8
GUTPELA SAVE I KAM LONG BAIBEL | BUK SONG 79-81
Soim Olsem Yu Laikim Nem Bilong Jehova i Nambawan Tru
Pe Bilong Baim Bek Man “Presen i Nambawan Tru” i Kam Long Papa
5 Olsem wanem yumi inap soim olsem yumi laikim tru nem bilong Jehova? Yumi inap mekim olsem long rot bilong ol pasin yumi bihainim. Jehova i laik bai yumi stap holi. (Ritim 1 Pita 1:15, 16.) Dispela i makim olsem yumi lotuim Jehova wanpela tasol na yumi givim bel olgeta long bihainim em. Maski ol birua i mekim nogut long yumi, yumi wok strong long bihainim ol stretpela lo na ol stiatok bilong em. Taim yumi bihainim stretpela pasin, yumi larim lait bilong yumi i stap ples klia na dispela i givim glori long nem bilong Jehova. (Mat. 5:14-16) Yumi stap olsem ol manmeri i holi, olsem na stretpela pasin bilong yumi i soim klia olsem ol lo bilong Jehova i gutpela, na tok bilong Satan i no tru. Yumi olgeta i save popaia, olsem na taim yumi mekim rong, yumi tanim bel na lusim ol pasin i bagarapim gutnem bilong Jehova.—Sng. 79:9.
ijwbv 3 par. 4-5
Rom 10:13—“Singaut Long Nem Bilong Bikpela”
Long Baibel, dispela hap tok “singaut long nem bilong Jehova” i no makim tasol pasin bilong save long nem bilong God na kolim bilong mekim lotu, nogat. (Buk Song 116:12-14) Em i makim tu pasin bilong trastim God na askim long kisim helpim.—Buk Song 20:7; 99:6.
Jisas Krais i tingim nem bilong God i bikpela samting. Namba wan tok long beten bilong em: “Papa bilong mipela long heven, nem bilong yu i mas i stap holi.” (Matyu 6:9) Jisas i tok tu olsem yumi mas kisim save, bihainim tok, na laikim Man em dispela nem i makim. Sapos yumi mekim olsem bai yumi inap kisim laip oltaim.—Jon 17:3, 6, 26.
Mekim Wok Painimaut
it-2 111
Josep
Dispela Nem Josep i Kisim Biknem. Josep i gat biknem namel long ol pikinini man bilong Jekop, olsem na i stret sampela taim Baibel i yusim nem bilong em bilong makim olgeta traib bilong Israel (Sg 80:1) o bilong makim ol traib bilong hap not. (Sg 78:67; Am 5:6, 15; 6:6) Nem Josep i stap tu long ol tok profet bilong Baibel. Long visen bilong Esekiel, Josep bai kisim tupela hap graun (Ese 47:13), i gat nem Josep i stap long wanpela geit bilong biktaun ol i kolim “Jehova i Stap Long Dispela Hap” (Ese 48:32, 35), na taim Esekiel i stori long ol manmeri bilong Jehova bai stap wanbel gen, em i kolim Josep olsem hetman bilong wanpela lain na Juda olsem hetman bilong narapela lain. (Ese 37:15-26) Tok profet bilong Obadia i soim olsem “lain bilong Josep” bai kisim bagarap wantaim “lain bilong Iso” (Ob 18), na Sekaraia i tok profet olsem Jehova bai kisim bek “lain bilong Josep.” (Sek 10:6) Baibel i kolim Josep olsem wanpela traib bilong lain Israel bilong God, na i no Efraim.—Re 7:8.
Long lista i stap long Revelesen 7:8, Baibel i kolim tu Josep na dispela i soim olsem tok profet Jekop i mekim paslain long em i dai inap makim ol Israel bilong God. Olsem na i stret long Strongpela Man Bilong Jekop, Jehova God, i makim Krais Jisas olsem Gutpela Wasman husat i givim laip bilong em long helpim “ol sipsip.” (Jon 10:11-16) Krais Jisas i stap tu olsem ston bilong kona bilong faundesen we God i wokim tempel antap long en na lain Israel bilong God i insait long dispela tempel. (Ef 2:20-22; 1Pi 2:4-6) Na dispela Wasman na Ston i stap wantaim God i Gat Olgeta Strong.—Jon 1:1-3; Ap 7:56; Hi 10:12; skelim St 49:24, 25.
SEPTEMBA 9-15
GUTPELA SAVE I KAM LONG BAIBEL | BUK SONG 82-84
Amamas Long Ol Wok Yu Kisim
Skul Yumi Kisim Long Ol Pisin
Ol manmeri long Jerusalem i save olsem ol pisin swalo i save wokim haus bilong ol aninit long ol rup bilong ol haus. Sampela pisin swalo i bin wokim ol haus bilong ol long tempel bilong Solomon. Ating long olgeta yia, ol pisin swalo i save wokim haus bilong ol long ol ples arere long tempel, bikos ol i save olsem em gutpela ples we ol i ken lukautim ol pikinini bilong ol long en.
Man i raitim Song 84 i save lukim ol haus bilong dispela pisin long ol ples arere long tempel. Em i wanpela pikinini man bilong Kora husat i mekim wok long tempel long wanpela wik long olgeta 6-pela mun. Oltaim em i laik stap long haus bilong Jehova, wankain olsem pisin swalo. Em i tok. “Bikpela I Gat Olgeta Strong, mi laikim tumas haus bilong yu. Mi laikim tumas bai mi stap long en. Olgeta laik bilong mi i laikim tumas haus bilong yu. Long bodi na tingting olgeta mi mekim song bilong amamas long yu, God i gat laip. Bikpela I Gat Olgeta Strong, yu king na God bilong mi. Ol liklik pisin i bin wokim haus klostu long alta bilong yu na ol i save lukautim ol pikinini bilong ol.” (Song 84:1-3) Olsem wanem? Oltaim yumi na ol pikinini bilong yumi i amamas na i laik tru long bung wantaim ol bratasista long kongrigesen?—Song 26:8, 12.
Kisim Stretpela Tingting Long Samting Yu Inap Mekim na Stap Amamas
Sapos yumi lapun o yumi gat sik, dispela inap pasim yumi long mekim bikpela wok bilong Jehova. Sapos yu wanpela papa o mama, yu inap tingting olsem pasin bilong stadi o go long ol miting Kristen i no helpim yu tumas, long wanem, yu lusim bikpela hap taim na strong long lukautim ol liklik pikinini bilong yu. Tasol nogut yu tingting tasol long ol samting yu no inap mekim na dispela i pasim yu long tingim ol samting yu inap yet long mekim.
Sampela tausen yia i go pinis, wanpela man Livai i kamapim laik bilong em long samting em i no inap tru long mekim. Em i save wok tupela wik long olgeta yia long tempel. Tasol em i tokaut olsem em i gat laik long i stap oltaim klostu long alta. (Sng. 84:1-3) Wanem samting i helpim dispela gutpela man long i stap belgut? Em i save olsem sapos em inap i stap wanpela de tasol insait long banis bilong tempel, dispela em i wanpela gutpela samting tru em inap mekim. (Sng. 84:4, 5, 10) Na olsem tasol, yumi no ken tingting tasol long ol samting yumi no inap mekim—yumi mas wok strong long tingim ol samting yumi inap mekim na amamas long dispela.
Yu Dia Tru Long Jehova, God Bilong Yu
12 Taim sik i daunim yu, yu ken bilip tru olsem Jehova i save long hevi bilong yu. Askim em strong long helpim yu na bai yu inap kisim stretpela tingting long hevi bilong yu. Yusim Baibel long tingim gen ol gutpela tok Jehova i redim bilong helpim yu. Tingim ol ves we i soim olsem Jehova i tingim tru ol wokman bilong em. Long dispela rot, yu bai luksave olsem Jehova i soim gutpela pasin long olgeta man husat i stap gut long em.—Sng. 84:11.
Mekim Wok Painimaut
it-1 816
Pikinini i No Gat Papa
Bikos em isi long lusim tingting long dispela kain lain i stap bel hevi na i no gat man long sambai long ol, Jehova i yusim dispela hap tok “pikinini i no gat papa” bilong soim pasin bilong lain Israel long bihainim stretpela pasin o long lusim stretpela pasin. Taim lain Israel i stap gut long bilip, ol i lukautim gut pikinini i no gat papa. Tasol taim ol i no bihainim stretpela pasin long mekim kot, ol i lusim tingting long pikinini i no gat papa, na dispela em mak i soim olsem kantri i wok long bagarap. (Sg 82:3; 94:6; Ai 1:17, 23; Jer 7:5-7; 22:3; Ese 22:7; Sek 7:9-11; Mal 3:5) Jehova i tok long bagarap i ken painim ol man i mekim nogut long pikinini i no gat papa. (Lo 27:19; Ai 10:1, 2) Jehova i kolim em yet olsem Man Bilong Difendim (Pr 23:10), Helpim (Sg 10:14), na Papa (Sg 68:5) bilong kain lain olsem. Em bai stap Man bilong harim kot bilong ol (Lo 10:17, 18), mekim pasin marimari (Ho 14:3), helpim ol (Sg 146:9), na lukautim ol na bai ol i stap laip.—Jer 49:11.
Wanpela mak bilong Kristen tru em pasin bilong tingim ol meri em man bilong ol i dai pinis na ol pikinini em papamama bilong ol i dai pinis na ol i stap bel hevi. Disaipel Jems i tokim ol Kristen: “Pasin bilong mekim lotu i klin na i no gat doti long en long ai bilong God Papa bilong yumi i olsem: yumi mas lukautim gut ol pikinini i no gat papamama na ol wido, na helpim ol long karim ol hevi bilong ol. Na yumi mas stap longwe olgeta long pasin doti bilong dispela graun.”—Jem 1:27.
SEPTEMBA 16-22
GUTPELA SAVE I KAM LONG BAIBEL | BUK SONG 85-87
Beten i Helpim Yumi Long Sanap Strong na Karim Hevi
Yu Save Kamapim Glori Bilong Jehova?
10 Sapos yumi laik kamapim glori bilong God, orait yumi gat wok tu long “holim strong pasin bilong beten.” (Rom 12:12) Yumi mas beten askim Jehova long helpim yumi long mekim wok bilong em long pasin em yet i laikim. Yumi ken askim em long givim yumi holi spirit, na mekim bilip bilong yumi i kamap strong moa, na strongim yumi long sakim ol traim. Na tu, yumi ken askim em long helpim yumi long kamap gutpela tisa long ol tok bilong Baibel. (Mat. 6:13; Luk 11:13; 17:5; 2 Tim. 2:15) Yumi mas bilip long helpim yumi kisim long Papa bilong yumi, Jehova, wankain olsem pikinini i save bilip long papa bilong en. Sapos yumi askim Jehova long helpim yumi long mekim gut moa wok bilong em, yumi ken bilip tru olsem em bai helpim yumi. Yumi no ken ting Jehova bai les long ol beten bilong yumi. Olsem na yumi mas mekim ol beten we yumi preisim God, tok tenkyu long em, na askim em long soim rot long yumi, moa yet taim yumi gat hevi. Na tu, yumi ken askim Jehova long helpim yumi long givim glori long em long rot bilong ol wok lotu yumi mekim.—Sng. 86:12; Jems 1:5-7.
Ol Rot Jehova i Bekim Ol Beten Bilong Yumi
17 Ritim Buk Song 86:6, 7. Devit em man bilong raitim song i bilip tru olsem Jehova i harim ol beten bilong em na Em i bekim ol dispela beten. Yu tu i ken holim wankain bilip olsem. Ol eksampel yumi stori long en long dispela atikol i strongim yumi olsem Jehova i ken givim yumi savetingting na strong em yumi nidim bilong sanap strong na karim ol hevi. Long nau, em inap yusim ol wanbilip bilong yumi na ol man i no lotuim em long helpim yumi long sampela rot.
18 Em tru olsem oltaim Jehova i no inap bekim ol beten bilong yumi long ol rot we yumi ting long en, tasol yumi save olsem em bai bekim ol beten bilong yumi. Em bai givim yumi helpim yumi nidim na long taim stret yumi nidim. So wok yet long beten na bilip olsem Jehova bai putim yau, na yu ken save tru olsem em bai lukautim yu long nau na em bai “inapim laik bilong olgeta samting i gat laip” long nupela taim bai kamap klostu nau.—Sng. 145:16.
Mekim Wok Painimaut
it-1 1058 par. 5
Bel
Lotuim God Long “Bel Olgeta.” Olgeta hap bilong bel i mas stap na bai bel i wok gut, tasol tingting i stap long bel inap long bruk. Devit i beten: “Kirapim mi long rispek long nem bilong yu long bel olgeta,” na dispela i soim olsem tingting i stap long bel inap bruk long samting em i laikim na rispektim. (Sng. 86:11) Dispela kain man “i no givim bel olgeta”—hot liklik long pasin bilong lotuim God. (Sng. 119:113; Rev. 3:16) Man inap tu long holim “tupela tingting,” mekim wok bilong tupela bosman, o giaman long toktok long wanpela samting tasol em i tingim narapela samting. (1 Sto. 12:33; Sng. 12:2) Jisas i tokaut strong olsem em i no laikim pasin bilong holim tupela tingting na stap man bilong tupela maus.—Mat. 15:7, 8.
SEPTEMBA 23-29
GUTPELA SAVE I KAM LONG BAIBEL | BUK SONG 88-89
Wok Bos Bilong Jehova Em Nambawan Tru
Sapotim Wok Bos Bilong Jehova!
5 I gat narapela risen na i stret long Jehova i stap King bilong yumi. Em i save mekim wok bos long stretpela pasin tasol. God i tok: “Oltaim mi save laikim tumas olgeta manmeri bilong graun na mi save mekim gutpela na stretpela pasin long ol. Mi Bikpela, mi save amamas long mekim dispela kain pasin.” (Jer. 9:24) God i no yusim ol buk bilong lo em ol man i raitim bilong tokaut long wanem ol samting i stret, nogat. God yet i as bilong stretpela pasin, olsem na em i givim ol lo long yumi ken bihainim. “[Em i] stap king na [em i] bosim ol manmeri long stretpela pasin tasol,” olsem na yumi inap bilip tru olsem ol lo, ol stiatok, na ol disisen bilong em i stret olgeta. (Sng. 89:14; 119:128) Satan i sutim tok olsem Jehova i no mekim gut wok bos bilong em, tasol graun Satan yet i bosim i no gat stretpela pasin long en.
Sapotim Wok Bos Bilong Jehova!
10 Jehova i no save mekim wok bos long hatpela pasin. Em i larim yumi stap fri long makim wanem samting yumi laik mekim, na dispela i mekim yumi stap amamas. (2 Kor. 3:17) Devit i stori long pasin bilong God na i tok: “Bikpela i stap long haus bilong en na em i gat biknem na i stap king. Na em i as bilong olgeta strong na olgeta pasin bilong amamas.” (1 Sto. 16:7, 27) Etan em wanpela man i bin raitim Buk Song, na em i tok: “Ol manmeri i save mekim song na lotu long yu, na i save wokabaut long marimari bilong yu olsem ol i wokabaut long lait, ol i ken amamas. Ol i save tingting long gutpela pasin yu bin mekim long ol, na olgeta de long san na long nait ol i save amamas na litimapim nem bilong yu.”—Sng. 89:15, 16.
11 Sapos oltaim yumi tingim tingim ol gutpela pasin bilong Jehova, dispela inap strongim bilip bilong yumi olsem wok bos bilong em i nambawan tru. Yumi bai pilim wankain olsem man bilong raitim song, em i tok: “Sapos mi stap wanpela de tasol long haus bilong yu, em i winim tru 1,000 de long narapela ples.” (Sng. 84:10) Bilong wanem Baibel i tok olsem? Jehova em Man i wokim yumi, olsem na em i save long ol samting yumi nidim bilong i stap amamas tru, na em i save givim yumi ol dispela samting. God i tokaut long samting yumi ken mekim bilong i stap amamas tru, maski yumi mas lusim sampela samting bilong yumi yet.—Ritim Aisaia 48:17.
Bilip Strong Long Kingdom
14 Tingim tok promis em Jehova i bin mekim long King Devit bilong Israel long bipo long rot bilong kontrak namel long God na Devit. (Ritim 2 Samuel 7:12, 16.) Jehova i mekim dispela kontrak wantaim Devit taim Devit i stap king long Jerusalem, na em i tok promis olsem Mesaia bai kamap long lain tumbuna pikinini bilong Devit. (Luk 1:30-33) Long dispela rot, Jehova i tokaut long lain famili em pikinini bai kamap long en, na em i tokaut olsem wanpela long lain bilong Devit bai “i gat rait long kisim” wok King long Kingdom Bilong Mesaia. (Ese. 21:25-27, NW ) Long rot bilong Jisas, i olsem Devit i stap king oltaim oltaim. Dispela pikinini i kamap long lain bilong Devit bai “i stap oltaim” na wok king bilong em bai i stap “longtaim tru inap olsem san i stap.” (Sng. 89:34-37) Yes, wok king bilong Mesaia bai i no gat pasin korapsen long en, na em bai mekim ol gutpela wok we bai stap inap oltaim oltaim!
Mekim Wok Painimaut
‘Yu Wanpela Tasol Yu Stap Gut Long Ol Man i Lotuim Yu’
KIRAP long bipo tru, taim namba wan man i no wokabaut yet long graun, mun i save lait gut long skai long nait. Bipo planti manmeri i bin lotuim mun olsem wanpela god meri. Wanpela man Grik bilong raitim ol buk (em Plutak) i tok, taim gutpela man i dai, tewel bilong em i save go stap long mun. Ol stori nating bilong ol Baltik i tok, mun em wanpela man, na san em meri bilong em. Tupela marit i tok pait na mun i ranawe lusim meri bilong em, na wan wan taim tasol ol man i lukim tupela wantaim i stap long skai!.
Namel long 1960 na 1969, ol saintis i bin tromoi bikpela mani bilong putim ol man long mun na kisim sampela ston i kam bek bilong ol i ken skelim na kisim save. Tasol i gat wanpela samting bilong mun yumi ken save tru long en, olsem: Long olgeta de long taim stret bilong en, mun bai kam antap na i go daun. No gat wanpela taim na mun i bin popaia na i no bin bihainim rot bilong en, na yumi inap save long ol samting mun i bin mekim inap planti tausen yia bipo, olsem: Wanem taim mun i bin lait bikpela na wanem taim mun i bin haitim san na kain samting olsem.
Taim ol Israel bipo ol i lukluk i go long mun ol inap tingim wanpela gutpela samting tru. God i bin tok promis olsem ol king bilong lain bilong Devit i no ken pinis. Em i tok: “Bai ol [pikinini bilong Devit] i stap olsem oltaim, olsem mun i stap long skai, na i soim ol manmeri olsem tok bilong mi i tru olgeta.” (Song 89:35-37) Jisas, em “Pikinini Bilong Devit,” i truim dispela tok promis. (Luk 18:38) Jisas i dai na bihain em i kirap bek olsem wanpela spirit i no inap i dai moa na em i go antap long heven. (Aposel 2:34-36) Bihain em i kamap King bilong Kingdom bilong God long heven. (KTH 12:10) Dispela Kingdom i kirap pinis long mekim wok na em “bai i stap oltaim.” (Daniel 2:44) Long dispela rot, Jisas, em king bilong lain bilong Devit, em bai stap oltaim olsem mun ‘i stap long skai na i soim olsem tok bilong [God] i tru olgeta.’
Olsem na olgeta taim yu lukim mun i lait gut long skai long nait, tingim tok promis God i bin mekim long Devit na tok tenkyu olsem Kingdom bilong Em i kirap pinis long mekim wok na em bai bosim graun i go inap oltaim oltaim, na long dispela rot God bai kisim biknem na ol gutpela man bai kisim blesing inap oltaim oltaim.—KTH 11:15.
SEPTEMBA 30–OKTOBA 6
GUTPELA SAVE I KAM LONG BAIBEL | BUK SONG 90-91
Bilong Stap Longpela Taim, Trastim Jehova
Painim Rot Bilong Stap Longpela Taim
I no olgeta saientis i wanbel olsem ol marasin samting bilong skruim laip inap mekim ol man i stap longpela taim moa winim haptaim man i save stap laip long nau. Tru, kirap long yia 1900 namba bilong ol man i stap laip longpela taim liklik i go antap. Dispela i kamap bikos ol i stap klin, i gat ol marasin bilong stopim sik, na ol i yusim ol antibaiotik na sut. Sampela saientis bilong jin i ting man inap stap laip longpela o sotpela taim winim mak bilong en.
Inap 3,500 yia i go pinis, Moses, man bilong raitim Baibel, i tok: “Mipela i save stap inap 70 yia tasol, na sapos mipela i gat strong, mipela i ken stap inap 80 yia. Tasol long olgeta dispela yia mipela i stap laip, mipela i save karim planti pen na hevi; ol dispela yia i save pinis kwiktaim na mipela tu i go pinis.” (Buk Song 90:10) Maski ol man i painim rot bilong surikim laip bilong yumi, laip i stap wankain olsem tok Moses i bin mekim.
Tasol ol retpela sea urchin na wanpela kain klem sel inap stap winim 200 yia, na ol diwai olsem bikpela diwai sekoia inap stap planti tausen yia. Taim yumi skelim laip bilong yumi wantaim ol dispela na ol narapela samting i gat laip, yumi laik save, ‘Yumi bilong i stap laip 70 o 80 yia na em tasol?’
wp19.1 5, blok
Wanem Nem Bilong God?
Em wanpela askim planti i laik save long bekim bilong en. Ating yu tu i bin tingting long dispela askim. Yumi ken tok: Sapos i gat wanpela samting o wanpela man i bin wokim yunives na olgeta samting i stap long en, orait God i kamap olsem wanem?
Ol saientis i wanbel olsem dispela yunives i gat kirap bilong en. Fes ves bilong Baibel i wanbel long dispela tingting, em i tok: “Taim God i stat long wokim ol samting, em i wokim ples antap na graun.”—Stat 1:1.
Yunives i no inap wokim em yet; na em i no inap kamap nating. Samting i no bin stap i no inap kamapim wanpela samting. Sapos no gat wanpela samting i stap paslain long yunives i kamap, ating yunives bai no inap stap long nau. Tru, i hatwok long yumi kliagut long hau wanpela samting i no gat kirap bilong en na i save stap olsem tasol, em i bin mekim kamap dispela yunives. Jehova God, em wanpela strongpela spirit na i gat savetingting, em As Bilong Olgeta Samting i Kamap.—Jon 4:24.
Baibel i tok long God olsem: “Taim ol maunten i no kamap yet na taim yu no bin wokim yet graun na olgeta samting i stap long en, oltaim oltaim yu stap God.” (Buk Song 90:2) Olsem na, God i bin i stap olsem tasol na i no gat kirap bilong en. Bihain, “God i stat long wokim ol samting,” em i wokim dispela yunives.—Revelesen 4:11.
Pasin Laikim i Helpim Yumi Long Daunim Pasin Bilong Pret
16 Satan i save olsem yumi tingim tru laip bilong yumi. Na em i ting olsem yumi bai lusim olgeta samting yumi gat—na pasin pren bilong yumi wantaim Jehova tu—long lukautim laip bilong yumi. (Jop 2:4, 5) Tasol Satan i popaia tru! Maski i olsem, em “i gat strong bilong kamapim dai,” olsem na em inap yusim pasin bilong pret long dai long mekim na bai yumi lusim Jehova. (Hib. 2:14, 15) Sampela taim, ol man em Satan i stiaim ol, ol i save pretim yumi olsem ol bai kilim yumi dai sapos yumi no lusim bilip. Na long ol narapela taim, Satan inap lukim olsem yumi nidim tru helpim long wanpela bikpela sik yumi gat na em inap yusim dispela long mekim na bai yumi lusim bilip. Ol dokta o ol wanfamili em ol i no Witnes, ol inap putim presa long yumi long kisim blut, na dispela inap brukim lo bilong God. O ating wanpela inap kirapim yumi long kisim wanpela tritmen we i sakim ol stiatok bilong Baibel.
17 Yumi no laik dai, tasol sapos yumi dai, yumi save olsem Jehova bai wok yet long laikim yumi. (Ritim Rom 8:37-39.) Taim ol pren bilong Jehova i dai, em i save tingim ol, i olsem ol i stap laip yet. (Luk 20:37, 38) Em i gat bikpela laik tru long kirapim ol bek. (Jop 14:15) Jehova i bin givim bikpela pe tru so yumi “inap . . . kisim laip oltaim.” (Jon 3:16) Yumi save olsem Jehova i laikim tru yumi na em i tingim yumi. So yumi no laik lusim Jehova taim yumi sik o klostu yumi inap lusim laip bilong yumi, nogat. Yumi laik go long em bilong kisim bel isi, savetingting, na strong. Dispela em samting Valérie na man bilong em i bin mekim.—Sng. 41:3.
Mekim Wok Painimaut
Yu Ting Yu Gat Wanpela Was Ensel?
Baibel i no skulim yumi olsem olgeta wan wan man i gat was ensel. Jisas i tok: “Yupela i mas was gut, yupela i no ken tingim ol dispela man i no gat nem [ol disaipel bilong Krais] i olsem samting nating. Mi tokim yupela, oltaim ol ensel bilong ol long heven i save stap long ai bilong Papa bilong mi husat i stap long heven.” (Matyu 18:10) Tok bilong Jisas i no makim olsem wan wan man i gat was ensel, nogat, em i laik tok ol ensel i tingim tru ol wan wan disaipel bilong em. Ol man i lotu tru long God i no save mekim ol samting we inap kamapim bagarap, na ol i ting olsem ol ensel bilong God bai lukautim ol.
Yu ting dispela i makim olsem ol ensel i no save helpim ol man? Nogat. (Song 91:11) Sampela man i bilip tru olsem God i save lukautim na stiaim ol long rot bilong wanpela ensel. Kenneth em yumi stori long en long kirap bilong atikol, em tu i bin kisim wankain tingting. Yumi no inap tok olsem dispela tingting i kranki. Planti taim ol Witnes Bilong Jehova i luksave long olsem wanem ol ensel i stiaim ol taim ol i mekim wok bilong autim tok. Yumi no inap lukim ol ensel, olsem na yumi no inap save long hau God i yusim ol ensel na inap long wanem mak bilong helpim ol wan wan man long kain kain taim na ples. Maski i olsem, yumi mas tenkyu long God i Gat Olgeta Strong long olgeta helpim em i save givim long yumi.—Kolosi 3:15; Jems 1:17, 18.
OKTOBA 7-13
GUTPELA SAVE I KAM LONG BAIBEL | BUK SONG 92-95
Mekim Wok Bilong Jehova Em Gutpela Samting Tru!
Ol Yangpela, Putim Ol Mak Bilong Bilip Yu Laik Winim
5 Namba 1 risen na yumi laik putim ol mak long sait bilong bilip em olsem, yumi laik soim Jehova olsem yumi tenkyu tru long pasin bilong em long laikim yumi, na ol samting em i mekim bilong helpim yumi. Man bilong raitim song i tok: “Bikpela, . . . i gutpela sapos mi tenkyu long yu . . . . Mi tingting long strongpela wok bilong yu, na mi belgut tru na mi singim song bilong amamas.” (Sng. 92:1, 4) Olsem wanpela yangpela, tingim ol samting i mekim na yu gat dinau long Jehova. Em i givim yu laip, helpim yu long save long en, Baibel, kongrigesen, na ol samting yu bilip na wet long en. Taim yu putim ol samting long sait bilong bilip i stap namba 1, dispela i soim olsem yu tenkyu long ol dispela blesing em God i givim, na dispela i mekim na yu go klostu moa long em.
Husat i Stiaim Tingting Bilong Yu?
8 Jehova i olsem gutpela papa, na em i laik bai yumi stap amamas. (Ais. 48:17, 18) Olsem na em i putim ol lo bilong stiaim pasin yumi yet i bihainim na pasin yumi mekim long ol narapela. I olsem em i kirapim yumi long bihainim tingting na ol lo bilong em. Ol lo bilong em i no kalabusim yumi, nogat, ol i stiaim yumi long skelim gut ol samting paslain long yumi mekim disisen. (Sng. 92:5; Prov. 2:1-5; Ais. 55:9) Yumi inap mekim ol gutpela disisen na stap amamas, na pasin bilong yumi bai kamap gutpela moa. (Sng. 1:2, 3) Tru tumas, tingting bilong Jehova i gutpela na inap tru long helpim yumi!
Yu Dia Tru Long Jehova, God Bilong Yu
18 Taim yumi wok long kamap lapun, yumi ken bilip tru olsem Jehova i gat sampela wok yumi inap mekim. (Sng. 92:12-15) Jisas i skulim yumi olsem maski yumi no gat save bilong mekim wanpela wok o yumi mekim liklik wok tasol, Jehova i pilim tru olgeta wok yumi inap mekim bilong sapotim lotu i tru. (Luk 21:2-4) Olsem na putim tingting i go long samting yu inap mekim. Kain olsem, yu ken stori long ol narapela long Jehova, beten askim God long helpim ol wanbilip, na strongim ol narapela long stap gut long bilip. Jehova i tingim yu olsem wanwok bilong em bikos yu redi long bihainim tok bilong em, na i no olsem em i tingim skel bilong wok yu mekim.—1 Kor. 3:5-9.
Mekim Wok Painimaut
‘Savetingting Bilong God i Daun Tumas Olsem Solwara’
18 Tingim tok aposel Pol i mekim long gutpela savetingting bilong Jehova: ‘Olaman! Ol gutpela pasin bilong God na savetingting bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en.’ (Rom 11:33) Taim Paul i tok “olaman,” em i kamapim bel bilong em—em i kamapim pasin bilong daun na rispek tru long God. Tok Grik em i raitim bilong makim “daun tumas” i kain olsem tok i makim hul i no gat as. Olsem na tok bilong Pol i helpim yumi long wokim piksa long tingting. Taim yumi tingim savetingting bilong Jehova, i olsem yumi lukluk i go insait long wanpela hul i no gat as, long ples i go daun tru na i traipela stret em yumi no inap klia gut long bikpela bilong en, o kamapim ol mak bilong en, o wokim mep bilong olgeta liklik liklik hap bilong en. (Song 92:5) Dispela i kirapim yumi long mekim pasin daun, a?
OKTOBA 14-20
GUTPELA SAVE I KAM LONG BAIBEL | BUK SONG 96-99
“Tokaut Long Gutpela Nius”!
Wanem Dispela Gutnius?
OL KRISTEN i mas autim “gutnius bilong Kingdom.” Bilong mekim olsem, ol i mas tokim ol narapela long en, na helpim ol long save olsem dispela Kingdom em i wanpela gavman na em bai bosim graun long stretpela pasin. Tasol Baibel i mekim wok long dispela tok “gutnius” long ol narapela narapela rot tu. Olsem: “Gutnius long God i kisim bek yupela” (Efesus 1:13); “gutnius bilong God” (Rom 15:16); na “gutnius i stori long Jisas Krais.”—Mak 1:1.
Olgeta tok i tru em Jisas i bin autim na ol disaipel bilong em i bin raitim, olgeta i insait long dispela gutnius. Paslain long Jisas i go long heven, em i tokim ol disaipel bilong em: “Yupela i mas i go na kamapim ol disaipel long olgeta lain man, na baptaisim ol long nem bilong Papa na bilong Pikinini na bilong holi spirit. Skulim ol long bihainim olgeta samting mi tokim yupela long mekim.” (Matyu 28:19, 20) Olsem na wok bilong ol Kristen tru em long autim tok bilong Kingdom, na tu, ol i mas wok strong long kamapim ol disaipel.
Wanem Samting Bai Kamap Long De Bilong Kot?
Olsem piksa long han sut i soim, planti manmeri i ting olsem long De Bilong Kot, planti bilion manmeri bai sanap long ai bilong sia king bilong God na bai God i kotim ol long ol pasin ol i bin mekim bipo—sampela bai kisim laip long heven na sampela narapela bai kisim pen oltaim long hel. Tasol Baibel i soim olsem wok bilong dispela De Bilong Kot em i bilong kisim bek ol manmeri long pasin i no stret. (Song 96:12, 13) God i makim Jisas long stap olsem Jas na kamapim bek stretpela pasin bilong helpim sindaun bilong olgeta man.—Ritim Aisaia 11:1-5; Aposel 17:31.
Bel Isi Bai Stap Inap Wan Tausen Yia—Na Bihain!
18 Dispela pasin wanbel i bagarap taim Satan i kirapim ol man long bikhet long Jehova. Tasol kirap long 1914, Kingdom i bin mekim ol samting bilong kamapim gen dispela bel isi na pasin wanbel. (Efe. 1:9, 10) Long taim bilong Wan Tausen Yia, ol gutpela samting em yumi “no inap lukim long ai,” long wanem, ol i no kamap yet, ol bai kamap tru. Bihain, “pinis i kamap,” em pinis bilong Wan Tausen Yia Bilong Krais i Stap King. Wanem samting bai kamap long dispela taim? Jisas i holim “namba long bosim olgeta samting” long heven na long graun, tasol em i no laik holim wankain namba olsem bilong Jehova. Jisas i mekim pasin daun na “putim kingdom long han bilong God na Papa bilong em.” Jisas bai yusim namba bilong en long mekim ol samting i “givim glori long God Papa.”—Mat. 28:18; Fili. 2:9-11.
19 Long dispela taim, olgeta husat i stap aninit long wok bos bilong Kingdom bai stap gutpela olgeta. Ol bai bihainim pasin bilong Jisas. Ol bai amamas long stap aninit long Jehova, long wanem, ol i gat pasin daun. Sapos ol i kamapim klia olsem ol i laik bai Jehova i stap bos bilong ol, orait ol bai winim laspela traim. (Rev. 20:7-10) Bihain long dispela, ol bikhet lain, maski em ol ensel o ol man, ol bai kisim bagarap na pinis olgeta. Dispela em taim bilong amamas tru! Olgeta lain insait long famili bilong Jehova long heven na long graun bai litimapim nem bilong em. Na Jehova bai i “stap het bilong olgeta samting.”—Ritim Song 99:1-3.
Mekim Wok Painimaut
it-2 994
Song
Buk Song i stori long “nupela song,” tasol i gat ol narapela buk tu i stori long en, em buk Aisaia na buk Revelesen. (Sg 33:3; 40:3; 96:1; 98:1; 144:9; 149:1; Ai 42:10; Re 5:9; 14:3) Taim yumi skelim ol tok i stap paslain na bihain long ol ves i kolim dispela hap tok “nupela song,” dispela i kamapim olsem ol i mekim kain singsing long taim i gat nupela senis long wok bos bilong Jehova olsem king bilong heven na graun. Olsem ol i amamas na singsing long Buk Song 96:10: “Jehova i kamap King pinis!” Nupela samting i kamap long wok bos bilong Jehova, na tu, dispela i kamapim sampela samting long heven na graun, em ol samting we dispela “nupela song” i stori long en.—Buk Song 96:11-13; 98:9; Aisaia 42:10, 13.
OKTOBA 21-27
GUTPELA SAVE I KAM LONG BAIBEL | BUK SONG 100-102
Tenkyu Long Gutpela Pasin Laikim Bilong Jehova
Hau Yu Ken Redi Long Kisim Baptais
18 Pasin bilong yu long laikim Jehova em naispela pasin tru, na em nambawan gutpela pasin yu gat. (Ritim Provep 3:3-6.) Pasin bilong yu long laikim tru God inap helpim yu long sanap strong na karim ol hevi na mekim yet wok bilong em. Planti taim, Baibel i stori long Jehova i mekim gutpela pasin laikim long ol wokman bilong em. Dispela pasin i mekim na Jehova i no save lusim ol wokman bilong em, o givim baksait long ol. (Sng. 100:5) God i wokim yu i kamap olsem em yet. (Stt. 1:26) Olsem wanem yu ken mekim dispela wankain pasin laikim?
19 Fes samting yu ken mekim em tok tenkyu long God. (1 Tes. 5:18) Long olgeta wan wan de, askim yu yet, ‘Long wanem rot Jehova i soim pasin laikim long mi?’ Na bihain, beten na tok tenkyu long Jehova, na kolim stret ol samting em i bin mekim bilong helpim yu. Aposel Pol i pilim olsem Jehova i laikim em, na yu tu i ken lukim ol samting Jehova i mekim bilong soim olsem em i laikim yu. (Ritim Galesia 2:20.) Askim yu yet, ‘Mi ken mekim wanem bilong soim olsem mi laikim em?’ Pasin bilong yu long laikim Jehova bai helpim yu long wok yet long sakim ol traim na sanap strong na karim ol hevi. Em bai helpim yu long wok yet long mekim ol wok lotu bilong yu, na oltaim soim long Papa bilong yu olsem yu laikim em long olgeta wan wan de.
“Yupela i Mas Holimpas Gutpela Tingting na Was i Stap!”
10 Sampela samting nogut em yumi mas abrusim em pasin bilong tok gris, dring planti, kaikai planti, mekim ol tok nogut, lukim ol piksa i gat pasin pait, ponografi, na ol kain samting olsem. (Sng. 101:3) Satan em dispela birua bilong yumi, oltaim em i save painim ol rot long bagarapim pasin pren bilong yumi wantaim Jehova. (1 Pita 5:8) Sapos yumi no was gut, Satan inap planim sid bilong ol pasin nogut insait long bel na tingting bilong yumi, em ol pasin olsem pasin mangal, tok giaman, gridi pasin, heitim narapela, pasin hambak, na pasin bilong bel nogut. (Gal. 5:19-21) Pastaim, ating ol dispela pasin nogut i no strong tumas long tingting bilong yumi. Tasol sapos yumi no mekim ol samting wantu tasol bilong rausim ol dispela pasin nogut, ol bai wok yet long gro olsem gras nogut insait long bel bilong yumi na nogutim yumi.—Jems 1:14, 15.
Bai Yu Bihainim Ol Tok Lukaut Bilong Jehova?
7 Hau bai yumi stap longwe long ol giaman tisa? Yumi no ken toktok wantaim ol o singautim ol i kam long haus bilong yumi. Yumi no ken ritim ol buk bilong ol, o ritim o bekim ol tok bilong ol long Intenet, o lukim ol long TV. Bilong wanem yumi strong long stap longwe long ol? Long wanem, yumi laikim dispela “God bilong mekim pasin tru tasol.” Yumi no laik putim yau long ol tok giaman i pait wantaim tok i tru bilong Baibel. (Sng. 31:5; Jon 17:17) Na tu, yumi laikim oganaisesen em Jehova i yusim bilong skulim yumi long ol tok i tru. Oganaisesen bilong Jehova i skulim yumi long nem bilong Jehova na mining bilong en, ol samting em i laik mekim long graun, na samting i painim yumi taim yumi dai, na long kirap bek. Yu tingim yet bikpela amamas yu kisim long namba wan taim yu harim ol dispela tok i tru? Sapos olsem yu no ken larim tok bilong ol giaman tisa i kirapim yu long givim baksait long oganaisesen i bin lainim yu long ol dispela tok i tru.—Jon 6:66-69.
8 Maski ol giaman tisa i mekim wanem kain tok, bai yumi no bihainim ol! I no gat as na yumi putim yau long tok bilong ol man i olsem ol hulwara i drai pinis. Ol man i harim tok bilong ol, ol bai bel hevi. Yumi strong long stap gut long Jehova na oganaisesen bilong em. I no gat wanpela taim dispela oganaisesen i bin mekim yumi bel hevi, na oltaim em i givim yumi planti klinpela wara bilong tok i tru i kam long Baibel.—Ais. 55:1-3; Mat. 24:45-47.
Mekim Wok Painimaut
it-2 596
Peliken
Taim peliken i kaikai na i pulap tru, planti taim em i save flai i go long hap we em bai stap em yet, em i luk sore, putim het i go daun na em i no muv, olsem na sapos wanpela i stap longwe na lukluk em bai ting olsem em i lukim wanpela waitpela ston. Dispela pisin bai stap olsem inap planti aua, olsem na taim man bilong raitim song i pilim olsem strong bilong em i pinis na em i wari tru, em i tok long em yet: “Mi olsem pisin peliken i save stap long ples nating.” (Sg 102:6) Dispela tok “ples nating” long hia i no makim deset, nogat, em i makim wanpela hap we i no gat man i save stap long en, ating ples tais. Insait long sampela sisen, ol peliken i save stap long ples tais long hap not long Veli Bilong Jordan. I gat 3-pela kain peliken i save stap long Israel. Wanpela em planti man i save long en em waitpela peliken bilong hap is (Pelecanus onocrotalus); planti taim ol man i no lukim peliken bilong Dalmasia (Pelecanus crispus) na pink peliken (Pelecanus rufescens).
Peliken i laikim ples we ol man i no inap mekim gaden long en bikos em i no laik bai ol man i distebim em. Em bai stap long dispela ples na wokim haus, brukim kiau na bai ol pikinini i kamaut, na em i go stap long dispela hap bihain long em i painim pis. Dispela pisin i laikim tru pasin bilong i stap em yet long hap ol man i no laik stap long en, olsem na Baibel i save yusim dispela pisin bilong makim samting bai bagarap olgeta. Bilong makim bagarap bai painim Idom, Aisaia i tok profet olsem pisin peliken bai stap long dispela ples. (Ai 34:11) Sefanaia i tok profet olsem ol peliken bai slip namel long ol pos bilong taun Ninive, dispela i soim olsem taun bai bagarap olgeta na ol man i no inap stap long dispela ples.—Sef 2:13, 14.
OKTOBA 28–NOVEMBA 3
GUTPELA SAVE I KAM LONG BAIBEL | BUK SONG 103-104
“Em i Tingim Yumi i Olsem Das Tasol”
Bihainim Pasin Bilong Jehova Long Bihainim Gutpela Tingting
5 Pasin daun na pasin sori bilong Jehova i kirapim em long bihainim gutpela tingting. Olsem, pasin daun bilong Jehova i stap ples klia long taim em i laik bagarapim ol man nogut bilong taun Sodom. Jehova i salim ol ensel bilong em i go bilong tokim stretpela man Lot long ranawe i go long ples maunten. Tasol Lot i pret long go long dispela hap. Olsem na em na famili bilong em i askim Jehova sapos em orait long ol i ranawe i go hait long Soar, em wanpela liklik taun Jehova i tok long bagarapim. Jehova inap long tokim Lot olsem ol i mas bihainim ol instraksen em i givim long ol. Tasol Jehova i orait long dispela askim bilong Lot maski em i tingting pinis long bagarapim Soar. (Stt. 19:18-22) Planti handret yia bihain, Jehova i mekim pasin sori long ol manmeri i stap long Ninive. Em i salim profet Jona i go long ol bilong tokaut long bagarap bai painim dispela biktaun na ol manmeri nogut i stap long en. Tasol ol Ninive i tanim bel, olsem na Jehova i sori long ol na em i no bagarapim biktaun bilong ol.—Jna. 3:1, 10; 4:10, 11.
Wetim Jehova Long Helpim Yu, Olsem Samson i Bin Mekim
16 Samson i karim bikpela hevi tru long rong em i bin mekim, tasol em i no larim dispela i pasim em long mekim laik bilong Jehova. Maski yumi mekim wanpela rong na yumi nidim tok bilong stretim yumi o yumi lusim wanpela wok insait long kongrigesen, yumi no ken givap. Yumi mas tingim olsem Jehova i no save givap long yumi. (Sng. 103:8-10) Maski yumi mekim ol popaia, Jehova i ken yusim yumi yet long mekim wok bilong em wankain olsem em i mekim long Samson.
17 Tingim stori bilong wanpela yangpela brata nem bilong em Michael. Em i bisi tru long mekim ol wok bilong Jehova, em i mekim wok olsem wanpela kongrigesen sevan na painia oltaim. Tasol sori tru, em i mekim wanpela rong, olsem na em i no holim moa ol wok bilong em insait long kongrigesen. Em i tok: “Paslain long dispela, mi bisi tru long mekim ol wok bilong Jehova. Na wantu tasol mi pilim olsem mi no inap mekim wanpela wok bilong Jehova. Mi save olsem Jehova i no inap lusim mi, tasol mi bin tingting planti olsem pasin pren bilong mi wantaim em bai kamap strong gen olsem long bipo o nogat, o mi bai kirap gen long mekim ol wok bilong em insait long kongrigesen olsem mi bin mekim, o nogat.”
18 Gutpela tru olsem Michael i no givap. Em i tok: “Mi putim tingting olgeta long strongim gen pasin pren bilong mi wantaim Jehova long rot bilong kamapim bel na tingting bilong mi long em long beten, stadi, na tingim tingim ol tok long bel.” I no longtaim, Michael i kisim gen ol wok em i bin mekim insait long kongrigesen. Nau em i mekim wok olsem wanpela elda na painia oltaim. Em i tok: “Ol helpim na ol tok bilong strongim mi em mi kisim, moa yet long ol elda, dispela i helpim mi long luksave olsem Jehova i laikim mi yet. Nau mi ken mekim gen wok insait long kongrigesen na maus bilong bel bilong mi i stap klin. Dispela ekspiriens i skulim mi olsem Jehova bai fogivim ol man em ol i tanim bel tru.” Sapos yumi bin mekim ol rong, orait yumi mas mekim olgeta samting bilong stretim ol popaia bilong yumi na wok yet long bilip na wet long Jehova i helpim yumi, na yumi ken save tru olsem Jehova bai yusim yumi long mekim wok bilong Em na blesim yumi.—Sng. 86:5; Prov. 28:13.
Yu Ken Winim Ol Mak Bilong Bilip Yu Putim
2 Sapos yu no winim yet wanpela mak yu putim, orait no ken bel hevi long dispela. Planti taim yu mas givim taim na strong bilong yu long winim wanpela liklik mak yu putim. Tasol tingim, yu wok strong yet long winim dispela mak na dispela i soim olsem yu tingim tru pasin pren bilong yu wantaim Jehova na yu laik givim bes bilong yu long em. Jehova i tingim tru ol hatwok bilong yu. Em i no ekspektim yu long mekim planti samting moa winim ol samting yu inap mekim. (Sng. 103:14; Mai 6:8) Olsem na yu mas putim mak em yu inap long winim. Taim yu mekim olsem, orait yu ken mekim wanem bilong winim dispela mak? Yumi ken stori long sampela rot yu ken bihainim.
Mekim Wok Painimaut
Strong Bilong Wokim Ol Samting—“God i Bin Mekim Kamap Heven na Graun”
18 Pasin bilong Jehova long yusim strong bilong em long wokim ol samting i lainim yumi long wanem samting? Yumi kirap nogut long ol samting em i bin wokim i kain kain. Wanpela man bilong raitim song i tok: “Bikpela, yu bin wokim planti samting. . . . Ol samting yu bin wokim i pulap tru long dispela graun.” (Song 104:24) Dispela tok i tru olgeta! Ol saveman i bin kisim save long winim wan milion narapela narapela kain animal samting long dispela graun, tasol sampela i ting i gat 10 milion, na sampela i ting i gat 30 milion o moa. Ating sampela taim man bilong penim piksa i sot long tingting, em bai wokim wanem kain piksa. Tasol tingting bilong Jehova i no sot long kamapim na wokim ol nupela samting i narapela narapela kain.