Ol Referens Bilong “Laip na Wok Autim Tok Miting Wok Buk”
© 2024 Watch Tower Bible and Tract Society of Pennsylvania
JULAI 1-7
GUTPELA SAVE I KAM LONG BAIBEL BUK SONG 57-59
Jehova i Save Paulim Ol Man i Birua Long Lain Bilong Em
“I Go Inap Long Olgeta Hap Bilong Graun”
14 Paslain long ol birua i kilim i dai Stiven, em i autim tok na i no pret. (Apo. 6:5; 7:54-60) Taim ol man i “mekim nogut tru” long ol Kristen, olgeta disaipel i go nabaut long ol hap bilong Judia na Samaria, ol aposel tasol nogat. Tasol dispela i no bin stopim wok bilong autim tok. Filip i go long Samaria “na kirap autim tok long ol long Krais,” na wok bilong em i karim planti gutpela kaikai. (Apo. 8:1-8, 14, 15, 25) Na Baibel i tok tu olsem: “Ol manmeri husat i bin ranawe long taim ol man i kilim i dai Stiven na bikpela hevi i kamap, ol i ranawe i go inap long Fonisia, Saiprus, na Antiok, tasol ol i autim tok long ol Juda tasol. Tasol sampela bilong ol, ol i man bilong Saiprus na Sairini, ol i go long Antiok na kirap toktok long ol manmeri i save mekim tok Grik. Ol i autim gutnius bilong Bikpela Jisas long ol.” (Apo. 11:19, 20) Long dispela taim, pasin birua i mekim na tok bilong Kingdom i go long planti hap.
15 Long taim bilong yumi, wankain samting i bin kamap long Soviet Yunion. Namel long 1950 na 1959, ol i bin rausim planti tausen Witnes Bilong Jehova i go long Saibiria. Ol i go stap long narapela narapela hap, olsem na gutnius i go long planti hap bilong dispela bikpela kantri. Planti bilong ol dispela Witnes i no gat mani bilong i go autim gutnius long ol hap i stap longwe olsem 10,000 kilomita! Tasol gavman i salim ol i go long ol dispela hap. Wanpela brata i tok: “Ol bikman bilong gavman yet i opim rot na planti tausen manmeri long Saibiria husat i gat gutpela bel, ol i kisim save long tok i tru.”
Mekim Wok Painimaut
“Yupela i Mas Sanap Strong, na No Ken Surik”
16 Kisim pasin bilong strong long bihainim pasin i stret. King Devit i tok em i no inap tru long lusim pasin bilong em long laikim Jehova, olsem: “O God, long bel bilong mi, mi bilip strong long yu.” (Sng. 57:7) Yumi tu i ken strong long bihainim pasin i stret na trastim tru Jehova. (Ritim Buk Song 112:7.) Skelim hau dispela pasin i bin helpim Bob em yumi stori pinis long em. Taim ol i tokim em olsem ol bai holim sampela blut i stap nogut em i nidim, kwiktaim em i bekim tok long ol olsem sapos ol i laik givim blut long em, wantu tasol em bai lusim haus sik. Bihain Bob i tok: “Mi no surik liklik na mi no wari long wanpela samting.”
17 Bob i tingting strong long bihainim pasin i stret, long wanem, em i mekim disisen pinis long sanap strong paslain long em i go long haus sik. Namba 1, em i tingting strong long amamasim Jehova. Namba 2, em i stadi gut long ol tok em Baibel na ol pablikesen bilong Baibel i mekim long laip na blut em samting i holi. Namba 3, em i bilip tru olsem taim em i bihainim ol daireksen bilong Jehova, em bai kisim ol blesing inap oltaim oltaim. Yumi tu i ken tingting strong long bihainim pasin i stret, maski yumi karim wanem hevi.
JULAI 8-14
GUTPELA SAVE I KAM LONG BAIBEL BUK SONG 60-62
Jehova i Stap Olsem Ples Hait na Em i Save Banisim na Lukautim Yumi
it-2 1118 par. 7
Taua
Tok Piksa: Ol manmeri i bilip na bihainim tok bilong Jehova, ol i no pret long wanpela samting, olsem Devit i tok: “Yu tasol yu ples hait bilong mi, na yu tasol i strongpela taua i banisim mi long ol birua.” (Sg 61:3) Ol lain i save long mining bilong nem bilong em, na trastim na rispektim nem bilong em, ol i no gat wok long pret: “Nem bilong Jehova i olsem wanpela strongpela taua. Ol stretpela man i save ron i go insait long en na em i banisim ol.”—Pr 18:10; skelim 1Sm 17:45-47.
it-2 1084 par. 8
Haus Sel
Planti taim Baibel i yusim dispela tok “haus sel” olsem tok piksa. Haus sel em ples malolo na ples hait bilong man long ol samting we inap givim hevi long em. (St 18:1) Long kastam bilong ol man long bipo, taim ol man i invaitim man i go insait long haus sel, dispela man bai save olsem ol bai lukautim em na rispektim em. Olsem na taim Revelesen 7:15 i tok long bikpela lain manmeri olsem God bai “karamapim ol long haus sel bilong em,” dispela i makim olsem God bai lukautim ol na ol bai i stap gut. (Sg 61:3, 4) Aisaia i stori long ol samting meri bilong God, em Saion, bai redim bilong ol pikinini man bilong en. God i tokim dispela meri long ‘mekim ples bilong haus sel bilong em i go bikpela moa.’ (Ai 54:2) Dispela i makim olsem em i mekim ples bilong lukautim ol pikinini bilong en i go bikpela moa.
Ol Lo Bilong God i Bilong Helpim Yumi
14 Lo bilong God i no save senis. Long dispela taim nogut yumi stap long en, Jehova i sanap strong olsem bikpela ston, na em i save stap oltaim oltaim. (Song 90:2) Em i tok long em yet olsem: “Mi tasol mi Bikpela na mi no save senisim tingting bilong mi.” (Malakai 3:6) Yumi inap bilip tru long ol lo bilong God i stap long Baibel, em ol dispela lo i no olsem tingting bilong ol man i save senis senis oltaim. (Jems 1:17) Olsem: Inap planti yia ol saveman i bin tokim ol papamama long ol i no ken stretim pikinini, ol i mas larim em tasol. Tasol bihain sampela i bin senisim tingting bilong ol na tokaut olsem dispela tok bilong ol i kranki. Ol lo na tok bilong ol man bilong graun long dispela samting i save senis senis, olsem win i save sakim nabaut ol samting. Tasol Tok bilong Jehova i no save senis. Inap planti handet yia Baibel i bin kamapim ol tok long pasin bilong mekim bikpela long ol pikinini long pasin sori. Aposel Pol i tok: “Yupela papa, yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas mekim gutpela pasin long ai bilong Bikpela, na stretim gut ol pikinini bilong yupela na skulim ol long tok bilong Bikpela.” (Efesus 6:4) Em i gutpela samting tru long save olsem yumi ken bilip long ol lo bilong Jehova, ol bai no senis!
Mekim Wok Painimaut
Sampela Bikpela Tok Bilong Buk 2 Bilong Buk Song
62:11. I no gat wok long God i kisim strong long narapela. Em i as tru bilong olgeta strong. ‘Em i gat bikpela strong.’
JULAI 15-21
GUTPELA SAVE I KAM LONG BAIBEL BUK SONG 63-65
“Gutpela Pasin Laikim Bilong Yu i Gutpela Moa Winim Laip”
Husat Inap Tekewe Yumi Long Sori Bilong God?
17 Pasin sori bilong God i bikpela samting long yu o nogat? Yu gat wankain tingting olsem bilong Devit? Em i tok: “Laip bilong dispela graun i gutpela, tasol marimari bilong yu i nambawan tru. . . . Bai mi tenkyu long yu na litimapim nem bilong yu inap mi dai. Bai mi litimapim han bilong mi na prea long yu.” (Song 63:3, 4) Tru tumas, yu ting ol samting dispela graun inap givim long yumi i winim pasin bilong God long laikim yumi na stap olsem gutpela pren bilong yumi? Olsem: Yu ting gutpela wok mani i winim pasin bilong stap bel isi na amamas em yumi save kisim taim yumi pas gut wantaim God? (Luk 12:15) Ol traim i bin painim sampela Kristen na ol i mas wokim tingting na skelim ol samting ol bai mekim, olsem ol bai lusim Jehova o ol bai stap gut long em na ol i mas i dai. Dispela samting i bin painim planti Witnes Bilong Jehova long kalabus nogut bilong ol Natsi long taim bilong Namba Tu Pait. Klostu olgeta brata Kristen bilong yumi ol i stap gut long God, na ol i redi long i dai tu sapos ol i mas mekim olsem bilong stap gut long God. Ol man i stap insait long sori bilong God ol i ken bilip tru olsem bihain ol bai kisim laip oltaim, em samting ol man bilong dispela graun i no inap givim long yumi. (Mak 8:34-36) Tasol i no laip oltaim tasol bai yumi kisim.
18 Tru, yumi no inap i stap oltaim sapos Jehova i no stap bilong helpim yumi, tasol sapos Man bilong wokim yumi i no stap, bai yumi les tru long i stap oltaim. I stap bilong yumi bai i no gat as bilong en. Jehova i bin givim gutpela wok long lain bilong em bilong mekim long dispela taim bilong las de. Olsem na yumi ken bilip tru olsem taim Jehova, em Bikpela Man bilong kamapim tru ol samting em i laik mekim, i givim laip oltaim long yumi, bai yumi gat planti gutpela samting bilong mekim na kisim save long en. (Saveman 3:11) Maski yumi bai kisim save long kain kain samting insait long planti tausen yia, bai yumi no inap save olgeta long “ol gutpela pasin bilong God na tingting na save bilong en.”—Rom 11:33.
“Tok Tenkyu Long God Long Olgeta Samting”
I stret tru long yumi tok tenkyu long God. Ating sampela taim yu tingim planti blesing em i givim long yumi long sait bilong bilip na long sait bilong skin. (Lo 8:17, 18; Apo. 14:17) Ating yumi save lusim sotpela haptaim long tingim ol gutpela samting God i mekim long yumi, tasol mobeta yumi lusim sampela haptaim moa long tingim na skelim ol blesing em God i kapsaitim long yumi. Taim yu tingim tingim ol gutpela pasin bilong Krieta bilong yu, dispela bai kirapim yu long amamas moa yet long em, na dispela bai strongim tingting bilong yu olsem em i laikim yu na amamas long yu.—1 Jon 4:9.
Tingim Tingim Tok Bilong God
7 Taim yumi rit, yumi no inap yusim tingting olgeta long rit, olsem na tingting inap senis kwik na tingim ol narapela samting. Tasol taim yumi laik tingim tingim ol tok yumi ritim, yumi mas yusim tingting olgeta bilong yumi. Gutpela taim bilong tingim tingim ol tok yu ritim em long taim yu malolo na yu stap long wanpela hap i no gat planti nois. Man bilong raitim song i luksave olsem, taim em i slip long bet long nait, dispela em gutpela taim bilong tingim tingim ol samting. (Sng. 63:6) Jisas i gutpela olgeta, olsem na em i save olsem taim em i stap long hap i no gat nois, em inap tingim tingim gut ol samting na beten.—Luk 6:12.
Bihainim Pasin Bilong Jisas—Skulim Ol Man Wantaim Pasin Laikim
6 Yumi save amamas long toktok long ol samting yumi laikim, na taim yumi mekim olsem, ol man i ken lukim bikpela amamas bilong yumi na lukim olsem yumi pilim tru dispela samting. Dispela em i tru moa yet taim yumi toktok long wanpela man yumi laikim tru. Yumi save amamas long tokim ol narapela long ol samting yumi save long dispela man. Yumi litimapim nem bilong em, givim ona, na sambai long em. Yumi mekim olsem, long wanem, yumi laik ol narapela i laikim dispela man na pasin bilong em, olsem yumi save laikim.
Mekim Wok Painimaut
Yu Save Givim Nupela Strong Long Ol Narapela?
Em isi tru long brukim wanpela haus, tasol bilong wokim wanpela nupela haus em i hatwok tru. Pasin bilong brukim na wokim nupela haus i wankain long pasin bilong yumi long toktok. Yumi olgeta manmeri i gat sin na yumi gat pasin kranki. King Solomon i tok: “I no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.” (Saveman 7:20) I no hatwok long luksave long ol pasin kranki bilong narapela na mekim ol tok bilong bagarapim na daunim em. (Song 64:2-4) Tasol bilong mekim tok i strongim man, yumi mas skelim na tingim gut tok yumi laik mekim.
JULAI 22-28
GUTPELA SAVE I KAM LONG BAIBEL BUK SONG 66-68
Jehova i Save Karim Hevi Bilong Yumi Long Olgeta De
Ol Rot Jehova i Bekim Ol Beten Bilong Yumi
Jehova i no save mekim ol mirakel long bekim ol beten bilong yumi. Tasol ol bekim yumi kisim, ol i helpim yumi long stap gut yet long Papa bilong yumi long heven. So luksave long hau Jehova i bekim ol beten bilong yu. Wanpela sista nem bilong em Yoko, em i pilim olsem Jehova i no bekim ol beten bilong em, tasol bihain em i kirap long raitim wanpela lista bilong ol samting em i bin askim Jehova long en. Bihain long sampela haptaim i lus, em i lukim gen notbuk bilong em na em i luksave olsem Jehova i bin bekim planti beten bilong em, sampela bilong ol dispela beten em i lusim tingting pinis long ol. Sampela taim, i gutpela long yumi lusim haptaim long tingim ol rot Jehova i wok long bekim ol beten bilong yumi.—Sng. 66:19, 20.
Tingim Gut Ol Papa na Mama Wanpis
Jehova i bin kirapim ol man long raitim ol song holi em lain Israel inap singim long taim bilong lotu. Tingim ol gutpela tok bilong strongim bel em ol wido na ol pikinini em papa bilong ol i dai pinis i bin kisim taim ol i singim ol song em holi spirit bilong Jehova i bin kirapim ol man long raitim. Ol dispela song i kirapim ol long tingim olsem Jehova em i stap olsem wanpela “papa” na “jas” long ol, na em bai helpim tru ol. (Song 68:5, NW; 146:9) Yumi tu inap mekim ol tok bilong strongim papa o mama wanpis, em ol i ken tingim yet long ol yia i kam. Maski 20 yia i go pinis, Ruth em wanpela mama wanpis, em i tingim yet tok bilong wanpela papa olsem: “Yu mekim gutpela wok tru long mekim bikpela long tupela pikinini man bilong yu. Mekim yet dispela gutpela wok.” Ruth i tok: “Taim mi harim ol dispela tok bilong em, dispela i mekim sampela bikpela samting long mi.” Tru tumas, ‘gutpela tok i olsem diwai bilong givim laip’ na inap strongim wanpela papa o mama wanpis. (Sindaun 15:4) Yu inap tingim sampela gutpela tok yu ken givim long wanpela papa o mama wanpis?
Papa Bilong Ol Pikinini i No Gat Papa
“GOD i save stap long ples bilong em yet, na em i save lukautim ol pikinini, papa bilong ol i dai pinis.” (Song 68:5) Dispela tok bilong Baibel i skulim yumi long wanpela gutpela samting long God Jehova—em i save tingim ol tarangu lain. Lo em i givim long lain Israel i kamapim klia olsem em i tingim tru ol pikinini em papa o mama bilong ol i dai pinis. Orait yumi ken skelim namba wan tok bilong Baibel i stori long “pikinini, papa [bilong em] i dai pinis,” long Kisim Bek 22:22-24.
Jehova i Helpim Yu Long Kamap Gutpela Moa
17 Ritim Buk Song 40:5. Wanpela man bilong kalapim maunten i save putim mak olsem em bai i go antap long het bilong maunten. Tasol i gat planti hap long rot we em i ken stop na lukim ol naispela samting. Wankain olsem, planti taim yu ken lusim haptaim long stop na tingim hau Jehova i wok long helpim yu taim yu karim wanpela hevi. Long pinis bilong olgeta wan wan de, askim yu yet: ‘Long wanem rot mi lukim blesing bilong Jehova long nau? Maski mi karim yet hevi, hau Jehova i wok long helpim mi long sanap strong na karim hevi?’ Tingim wanpela blesing i kam long Jehova we i helpim yu long sanap strong.
Mekim Wok Painimaut
Sampela Bikpela Tok Bilong Buk 2 Bilong Buk Song
68:18—“Ol presen bilong ol bikhetman” em wanem samting? Em ol man ol i bin kisim i go kalabus taim ol i rausim ol birua long Graun Bilong Promis. Bihain ol i makim ol kain man olsem long helpim ol Livai long wok bilong ol.—Esra 8:20.
JULAI 29–OGAS 4
GUTPELA SAVE I KAM LONG BAIBEL BUK SONG 69
Buk Song 69 i Tok Profet Long Ol Samting Bai Painim Jisas
Ol i Wetim Mesaia
17 Ol man bai heitim nating Mesaia. (Sng. 69:4) Jisas i tok: “Sapos mi no bin stap namel long ol na mekim ol dispela wok em narapela man i no bin mekim bipo, orait ol bai i no gat sin. Tasol ol i lukim pinis ol wok bilong mi, na ol i heitim mi na Papa bilong mi tu. Tasol dispela i bilong truim tok i stap long Lo bilong ol olsem, ‘Ol i heitim mi nating.’” (Jon 15:24, 25) Dispela tok “Lo” Jisas i stori long en, em ol hap bilong Rait Holi i stap long dispela taim. (Jon 10:34; 12:34) Stori bilong Jisas yumi ritim long 4-pela Gutnius i kamapim klia olsem ol man i bin heitim em, na ol hetman bilong lotu Juda i heitim em moa yet. Na tu, Jisas i tok: “I no gat as long ol manmeri i heitim yupela. Tasol ol i heitim mi, long wanem, mi tokaut long ol olsem ol samting ol i mekim i nogut.”—Jon 7:7.
Givim Bel Tru Long Lotu i Tru
7 Wanpela samting long laip bilong Jisas i bin kamapim klia tru pasin bilong em long givim bel tru. Em long taim Jisas i kirap long mekim wok autim tok, long taim bilong Pasova 30 C.E. Jisas na ol disaipel i kam long Jerusalem na insait long banis bilong tempel em i lukim “ol man i wok bisnis long salim ol bulmakau na sipsip na pisin. Na em i lukim ol man bilong senisim mani ol i sindaun i stap.” Jisas i mekim wanem? Na dispela i mekim wanem long ol disaipel bilong em?—Ritim Jon 2:13-17.
8 Samting Jisas i bin mekim, na tok em i mekim long dispela taim, i bin kirapim ol disaipel long tingim wanpela tok profet bilong Devit, olsem: “Mi laikim tru haus bilong yu, olsem na mi wok strong long mekim dispela haus i stap gut.” (Sng. 69:9) Jisas inap kisim hevi o bagarap long samting em i mekim. Long wanem, ol bikman bilong tempel—ol pris, ol saveman bilong lo, na ol narapela man—ol i insait long wok nogut bilong kisim win mani long wok bisnis i kamap insait long banis bilong tempel. Taim Jisas i kamapim na bagarapim wok nogut bilong ol, dispela i mekim na ol dispela bikman bilong lotu i birua long em. Ol disaipel i bin luksave long pasin bilong Jisas olsem em i ‘laikim tru haus bilong God,’ olsem givim bel long lotu i tru. Pasin bilong laikim tru, o givim bel tru, i makim wanem samting? Olsem wanem? Pasin bilong givim bel tru, dispela i narapela long pasin bilong tingim olsem taim i sot pinis?
g95 10/22 31 par. 4
Yu Inap Dai Sapos Wanpela i Bagarapim Bel Bilong Yu?
Sampela man i tok olsem Jisas Krais i dai bikos ol man i bagarapim tru bel bilong em, na Baibel i tok profet long em olsem: “Tok nogut bilong ol i bagarapim stret bel bilong mi.” (Buk Song 69:20) Yu ting tok bilong Baibel i makim olsem tru tru bel bilong em i bagarap? Ating i olsem, long wanem, long ol aua paslain long em i dai, em i pilim bikpela pen tru long bodi, na bel na tingting bilong em i no stap isi. (Matyu 27:46; Luk 22:44; Hibru 5:7) Na tu, bihain tasol long em i dai, “blut na wara” i kapsait taim ol i sutim em long spia, na dispela i soim klia olsem bel bilong em i bin bagarap tru. Taim lewa i bruk o ol bikpela rop bilong blut i bruk, blut bai kapsait i go aninit long bros o long wanpela kain karamap bilong lewa i save holim wara o blut samting. Sapos ol i sutim man aninit long bros o karamap bilong lewa, dispela bai mekim na samting i luk olsem “blut na wara” bai kapsait.—Jon 19:34.
it-2 650
Plaua Samting i Gat Posin
Tok profet i stori long Mesaia i tokaut olsem ol bai givim em “wanpela plaua samting i gat posin” olsem kaikai. (Sg 69:21) Dispela samting i kamap paslain long ol i sutim Jisas Krais. Ol i givim em wain ol i bin miksim wantaim marasin i pait, olsem na taim em i teistim, em i no laik dring dispela narakain wain we ating ol i wokim bilong mekim pen i go daun. Taim Matyu (27:34) i raitim truim bilong dispela tok profet, em i yusim tok Grik kho·leʹ (marasin i gat pait), em seim tok i stap long Buk Song 69:21 long Grik Septuagint. Tasol Gutnius Bilong Mak i kolim olsem mer (Mk 15:23), olsem na ol man i ting olsem dispela “plaua samting i gat posin” o “wain ol i bin miksim wantaim marasin i gat pait” i makim “mer.” Na tu, sampela i ting olsem ating ol i miksim marasin i pait na mer bilong wokim dispela wain i gat drak long en.
Mekim Wok Painimaut
Apim Han Bilong Yu Long Mekim Beten
11 Planti man i save beten taim ol i laik askim God long kisim wanpela samting, na ol narapela taim nogat. Tasol pasin bilong yumi long laikim tru God Jehova i mas kirapim yumi long tok tenkyu long Jehova na litimapim nem bilong em taim yumi mekim beten bilong yumi yet na long ai bilong ol man. Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Yes, yumi mas beten askim Jehova long helpim yumi, na yumi mas tenkyu long Jehova long ol gutpela samting em i givim long yumi, em ol samting bilong spirit na bilong skin. (Sindaun 10:22) Man bilong raitim Song i tok: “Mobeta yupela i tenkyu tru long mi. Em kain ofa yupela i mas mekim. Olgeta presen yupela i tok pinis long givim long mi, God Antap Tru, em yupela i mas givim long mi.” (Song 50:14) Na wanpela gutpela song i olsem beten bilong Devit i tok: “Bai mi mekim song na litimapim nem bilong God, na bai mi tenkyu long em na tokaut long biknem bilong em.” (Song 69:30) Gutpela yumi kamapim kain tok olsem long ol beten yumi mekim long ai bilong ol man na ol beten bilong yumi yet, a?
OGAS 5-11
GUTPELA SAVE I KAM LONG BAIBEL BUK SONG 70-72
Tokaut Long Strong Bilong God Long “Lain i Kamap Bihain”
Ol Yangpela—Skulim Tingting Bilong Yupela!
17 Bilong abrusim ol samting bilong Satan i laik holimpas yumi, oltaim yu mas was gut—na sampela taim yu mas strongim bel tu. Ating sampela taim ol wanlain bilong yu, na ol man bilong dispela graun tu, ol i birua long yu. Devit, man bilong raitim Song, em i beten: “Bikpela, mi save bilip long yu tasol. Mi yangpela yet na mi bilip long yu, na mi bilip yet inap long nau. God, yu bin skulim mi long taim mi liklik yet na i kam inap long nau, na mi save tokaut yet long ol gutpela gutpela samting yu bin mekim.” (Song 71:5, 17) Devit i gat nem olsem man i gat strongpela bel. Tasol wanem taim em i bin wok long kisim dispela pasin? Taim em i stap yangpela yet! Taim em i no pait yet wantaim Goliat, em i kamapim olsem em i gat strongpela bel—em i kilim wanpela laion na wanpela bea i laik bagarapim lain sipsip bilong papa bilong em. (1 Samuel 17:34-37) Tasol Devit i save em i no mekim dispela samting long strong bilong em yet—Jehova yet i bin strongim em long mekim, na em i tok: “Mi yangpela yet na mi bilip long yu, na mi bilip yet inap long nau.” Devit i bilip na wetim Jehova i helpim em na dispela i strongim em long karim olgeta hevi i painim em. Sapos yu tu yu wetim Jehova i helpim yu, em bai strongim yu long “winim strong bilong dispela graun.”—1 Jon 5:4.
Yumi Mas Soim Wanem Kain Pasin Long Ol Lapun?
Man bilong raitim song i beten olsem: “Taim mi kamap lapun, yu no ken rausim mi i go; taim strong bilong mi i pinis, yu no ken givim baksait long mi.” (Buk Song 71:9) God i no save “rausim” ol gutpela wokman bilong em, maski ol yet i pilim olsem ol i no inap mekim ol wok olsem long pastaim. Man bilong raitim song i luksave olsem Jehova i tingim em na em i nidim moa yet helpim bilong Man i wokim em long taim em i wok long go lapun. Jehova i save givim helpim long ol lain i stap gut long em long laip olgeta bilong ol. (Buk Song 18:25) Planti taim dispela kain helpim i kam long rot bilong ol wanbilip Kristen.
Mekim Wok Bilong Jehova Paslain Long Taim Nogut
4 Sapos yu stap laip inap planti yia pinis, orait askim yu yet olsem, ‘Bai mi mekim wanem nau long laip bilong mi taim mi gat strong i stap yet?’ Yu stap Kristen inap planti yia pinis, olsem na rot i op long yu inap mekim ol samting em ol narapela i no inap mekim. Olsem: Yu inap skulim ol yangpela long ol samting Jehova i bin skulim yu long en. Yu inap stori long ol narapela long ol gutpela ekspiriens yu bin kisim taim yu mekim wok bilong God. King Devit i bin beten askim Jehova long opim rot long em i ken mekim olsem. Em i tok: “God, yu bin skulim mi long taim mi liklik yet . . . Nau mi lapun pinis na gras bilong mi i waitpela olgeta, tasol God, yu no ken lusim mi. Yu mas i stap wantaim mi na bai mi autim tok bilong bikpela strong bilong yu long ol lain manmeri i kamap bihain.”—Sng. 71:17, 18.
5 Olsem wanem yu inap skulim ol narapela long ol gutpela tingting na save em yu bin lainim insait long ol yia i go pinis? Yu ting yu inap singautim ol yangpela long kam bung long haus bilong yu na yupela inap strongim narapela narapela? Yu ting yu inap pasim tok long autim tok wantaim ol na rot i op long ol inap lukim amamas bilong yu long mekim wok bilong Jehova? Elihu i tok: “Yupela i gat planti krismas na yupela tasol i mas toktok na autim gutpela tingting na save bilong yupela.” (Jop 32:7) Aposel Pol i tokim ol meri em ol i stap Kristen inap planti yia olsem toktok na pasin bilong ol i mas strongim ol arapela. Em i tok: “Ol meri i gat bikpela krismas . . . ol i mas skulim ol arapela long ol gutpela samting.”—Tai. 2:3.
Mekim Wok Painimaut
it-1 768
Yufretis
Baundri Bilong Graun Bilong Israel. Taim God i mekim kontrak na tok promis long Abraham, em i tok graun bilong ol tumbuna pikinini bilong em bai “kirap long wara bilong Isip i go inap long bikpela wara, em Wara Yufretis.” (St 15:18) Bihain God i kolim gen dispela promis long lain Israel. (Ki 23:31; Lo 1:7, 8; 11:24; Jos 1:4) Long 1 Stori 5:9, Baibel i stori olsem paslain long taim Devit i mekim wok king, sampela tumbuna pikinini bilong Ruben i skruim mak bilong graun bilong ol “i go inap long stat bilong ples nating klostu long Wara Yufretis.” Tasol Yufretis i stap longwe inap 800 kilomita samting long “hap is bilong Gileat” (1St 5:10), dispela inap makim olsem lain Ruben i skruim mak bilong graun bilong ol long hap is bilong Gileat i go inap long kirap bilong Deset Bilong Siria, em dispela deset we i go na pinis long Yufretis. I luk olsem namba 1 taim promis bilong Jehova i kamap tru em long taim Devit na Solomon i mekim wok king. Long dispela taim, ol Israel i bosim graun bilong ol Aram long Soba we i stap klostu long Yufretis, em i klia tru olsem dispela em graun i katim i go olsem long hap not bilong Siria. (2Sm 8:3; 1Ki 4:21; 1St 18:3-8; 2St 9:26) Yufretis em wara i gat biknem, olsem na planti taim ol i save kolim bilong soim sais o baundri bilong graun samting.—Jos 24:2, 15; Sg 72:8.
OGAS 12-18
GUTPELA SAVE I KAM LONG BAIBEL BUK SONG 73-74
Olsem Wanem? Yumi Mangal Long Sindaun Bilong Ol Lain i No Lotuim God?
“Jehova . . . i Save Kisim Bek Ol Manmeri Bel Bilong Ol i Bagarap”
14 Man i raitim Song 73 em wanpela Livai. Olsem na em i kisim gutpela blesing long mekim wok long haus bilong Jehova. Tasol wanpela taim em i bin bel hevi tru. Wai? Em i aigris long i stap bilong ol man nogut na ol man i gat pasin antap—i no olsem em i laikim pasin nogut bilong ol—em i laikim gutpela sindaun bilong ol. (Sng. 73:2-9, 11-14, BB) I luk olsem ol i gat olgeta samting—mani kago, gutpela laip, na ol i no wari long wanpela samting. Gutpela sindaun bilong ol i mekim dispela Livai i bel hevi tru, na em i tok: “Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a?” I klia tru olsem dispela kain tingting inap kirapim em long lusim Jehova.
“Jehova . . . i Save Kisim Bek Ol Manmeri Bel Bilong Ol i Bagarap”
15 Ritim Buk Song 73:16-19, 22-25. Dispela Livai i “go insait long haus holi bilong God.” Long haus bilong God, em i bung wantaim ol narapela em ol i lotuim Jehova, olsem na em i stap isi, skelim gut ol samting, na em i beten long God. Dispela i helpim em long luksave olsem em i bin holim longlong tingting, na sapos em i no was gut em inap long lusim pasin bilong em long pas gut wantaim Jehova. Em i kliagut olsem ol man nogut “i wokabaut long graun i wel” na “pinis bilong ol em i nogut tru!” Dispela Livai i mas holim wankain tingting olsem bilong Jehova bambai em i ken daunim pasin bilong bel hevi na aigris long sindaun bilong ol man nogut. Taim em i mekim olsem, em i stap isi na em i amamas. Em i tok: “I no gat wanpela samting long graun mi laikim, mi laikim [Jehova] wanpela tasol.”
16 Ol skul yumi inap kisim. Yumi no ken tru aigris long gutpela sindaun bilong ol man nogut. Amamas bilong ol i no amamas tru na em i bilong sotpela taim tasol, na ol i no inap stap laip oltaim. (Ekl. 8:12, 13) Sapos yumi aigris long sindaun bilong ol, yumi bai bel hevi, na tu, yumi inap lusim pasin bilong yumi long pas gut wantaim Jehova. So sapos yu luksave olsem yu wok long aigris long gutpela sindaun bilong ol man nogut, orait bihainim pasin bilong dispela Livai. Yu mas bihainim ol gutpela tok bilong God, na bung wantaim ol manmeri em ol i mekim laik bilong Jehova. Taim yu laikim tru Jehova winim olgeta narapela samting, yu bai stap amamas tru. Na yu bai wokabaut yet long rot i go long “laip em i laip tru.”—1 Tim. 6:19.
Kisim Pasin Bilong Moses Long Bilip
5 Olsem wanem yu inap sakim “pasin bilong sin na kisim amamas bilong sotpela taim tasol”? No ken lusim tingting olsem amamas bilong sin i save pinis kwiktaim. Yu mas bilip na tingim olsem “ol manmeri i stap longwe long God, ol bai pinis na laik bilong ol tu bai pinis.” (1 Jon 2:15-17) Tingim hevi bai painim ol man i bihainim pasin bilong sin na ol i no tanim bel. Ol i “wokabaut long rot i wel moa yet” na ol bai “bagarap kwiktaim tumas”! (Sng. 73:18, 19) Sapos traim i painim yu, orait askim yu yet, ‘Mi laik kisim wanem kain laip long bihain?’
No Ken Larim Wanpela Samting i Pasim Yu Long Kisim Glori
3 Man bilong raitim Song i save olsem Jehova inap givim biknem long em. (Ritim Song 73:23, 24.) Olsem wanem Jehova i save givim biknem long ol man? Em i mekim olsem taim em i orait long ol na blesim ol long kain kain rot. Olsem, em i save helpim ol long kliagut long laik bilong en, na em i larim ol i pas gut wantaim em.—1 Kor. 2:7; Jems 4:8.
4 Na tu, Jehova i larim yumi i autim gutnius na long dispela rot em i givim biknem long yumi. (2 Kor. 4:1, 7) Taim yumi litimapim nem bilong Jehova long rot bilong wok autim tok, Jehova i save givim biknem long yumi na yumi helpim ol narapela. Na Jehova i tok promis olsem: “Man i litimapim nem bilong mi, orait bai mi givim biknem long em.” (1 Sml. 2:30) Jehova i save givim biknem long ol man husat i mekim wok autim tok long rot bilong givim gutnem long ol, olsem em i orait long ol. Na ol arapela insait long kongrigesen i mekim gutpela tok long ol.—Snd. 11:16; 22:1.
5 Wanem samting bai painim ol manmeri husat i bihainim tok bilong Jehova? Baibel i tok promis olsem: “Bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.” (Sng. 37:34) Ol wokman bilong God i bilip na wet long kisim gutpela samting, em laip oltaim.—Sng. 37:29.
Mekim Wok Painimaut
it-2 240
Leviatan
Buk Song 74 i stori long God i kisim bek ol manmeri bilong em, na ves 13 na 14 i mekim tok piksa long God i kisim bek lain Israel long Isip. Long Ves 13, Baibel i yusim dispela tok “bikpela animal bilong solwara” olsem narapela nem bilong “Leviatan,” na God i brukim het bilong Leviatan inap makim pait God i mekim na daunim Fero na ol ami bilong em long taim Em i kisim bek lain Israel. Ol Rait Arameik i kolim “het bilong Leviatan” olsem “strongpela bilong Fero.” (Skelim Ese 29:3-5 we Baibel i kolim Fero olsem “traipela animal bilong solwara” i stap namel long ol baret wara bilong Nail; lukim tu Ese 32:2.) Long Aisaia 27:1, Baibel i tok long Leviatan olsem piksa i makim wanpela oganaisesen we i stap long graun olgeta na man i bosim em Baibel i kolim em olsem “snek.” (Re 12:9) Dispela tok profet i stori long stretim gen Israel, olsem na dispela tok long Jehova bai “mekim save” long Leviatan i mas makim tu Babilon. Tasol ves 12 na 13 i stori tu long Asiria na Isip. Olsem na i klia tru olsem Leviatan long Buk Song 74 i makim oganaisesen i stap long graun olgeta we i birua long Jehova na ol manmeri i lotuim em.
OGAS 19-25
GUTPELA SAVE I KAM LONG BAIBEL BUK SONG 75-77
Wai na Yu No Ken Apim Nem Bilong Yu Yet?
Pasin Bilong Ol Stretpela Man na Ol Man Nogut
4 Pol i tok olsem ol man bai laikim ol yet tasol na ol bai laikim tumas mani. Bihain em i tok moa olsem, ol man bai litimapim nem bilong ol yet, ol bai i gat pasin antap, na ol bai pulap long pasin antap. Ol man i bihainim ol dispela pasin i pilim olsem ol i nambawan long save ol i gat, gutpela lukluk bilong ol, mani kago, na biknem ol i holim. Ol man i gat ol dispela pasin i laik tru long ol narapela i mas laikim ol na givim ona long ol. Wanpela saveman i stori long pasin bilong man husat i pulap long pasin antap, na em i tok: “Long tingting bilong em, i olsem i gat wanpela liklik alta i stap na em i save nildaun long ai bilong alta na lotu long em yet.” Ol man i pulap long pasin antap, ol tu i no amamas taim ol i lukim ol narapela i mekim pasin antap.
5 Jehova i heitim ol man i gat pasin antap na “pasin bilong hambak.” (Snd. 6:16, 17) Ol man i gat pasin antap i no laik save long God. (Sng. 10:4) Dispela em wanpela pasin bilong Satan. (1 Tim. 3:6) Sori tru, sampela gutpela wokman bilong God long pastaim i kisim pasin antap. Usia, king bilong lain Juda, i stap gut long God inap planti yia. Tasol Baibel i tok: “Taim King Usia i kamap strong na em i gat biknem, orait em i ting em i strongpela king tru, olsem na em i bagarap. Em i no bihainim tok bilong God, Bikpela bilong en, na em i go long alta i stap insait long haus bilong Bikpela, na em yet i laik mekim ofa bilong kamapim smok i gat gutpela smel.” Bihain, King Hesekia tu i pundaun na em i mekim pasin antap, tasol bihain em i stretim pasin bilong em.—2 Sto. 26:16; 32:25, 26.
Sampela Bikpela Tok Bilong Buk 3 na 4 Bilong Buk Song
75:4, 5, 10—Bilong wanem yumi mas abrusim pasin bilong bikhet na litimapim nem bilong yumi yet? Jehova bai pinisim strong bilong ol man i mekim kain pasin olsem, tasol em bai “givim bikpela strong moa long ol stretpela man.” Jehova em man bilong givim strong na litimapim nem bilong man, olsem na yumi mas ting olsem ol wok yumi kisim insait long kongrigesen i kam long em.—Song 75:7.
Mekim Wok Painimaut
Sampela Bikpela Tok Bilong Buk 3 na 4 Bilong Buk Song
76:10—Taim “ol man i save belhat,” olsem wanem dispela i save litimapim nem bilong Jehova? Taim God i larim ol man i kamapim belhat bilong ol long yumi long wanem yumi wokman bilong em, gutpela samting inap kamap long dispela. Ol hevi yumi karim dispela inap skulim yumi. Jehova i save larim ol hevi i painim yumi inap long mak we ol i ken skulim yumi. (1 Pita 5:10) Tasol olsem wanem sapos ol man i mekim nogut long yumi i go inap long yumi dai? Dispela tu inap givim biknem long Jehova, long wanem, ol man i lukim yumi i stap gut long Jehova, ating ol tu bai kirap na givim biknem long God.
OGAS 26–SEPTEMBA 1
GUTPELA SAVE I KAM LONG BAIBEL BUK SONG 78
Ol Israel i No Stap Gut Long God—Eksampel Nogut
“Tingim Gen Dispela Taim Bipo”—Bilong Wanem?
Tasol sori tumas, planti taim ol Israel i bin lusim tingting—em wanpela sin ol i bin mekim. Wanem samting i bin kamap? “Ol i no lusim pasin bilong traim God bilong Israel, em God bilong mekim gutpela na stretpela pasin olgeta. Ol i traim em na mekim em i kros tru long ol. Ol i no tingim bikpela strong bilong em, na ol i no ting long dispela taim em i bin kisim bek ol long han bilong ol birua.” (Song 78:41, 42) Bihain pasin bilong ol long lusim tingting long ol lo bilong Jehova i mekim na em i bin lusim ol.—Matyu 21:42, 43.
Man bilong raitim Song i bin makim gutpela pasin yumi ken bihainim, em i tok: “God, bai mi tingting gen long ol bikpela wok bilong yu. Yes, bai mi tingting bek long ol kain kain bikpela samting bipo yu bin mekim. Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.” (Song 77:11, 12) Kain pasin bilong tingim tingim ol gutpela wok ol man i bin mekim long bipo na ol gutpela pasin bilong Jehova, dispela bai kirapim yumi, na strongim yumi, na helpim yumi long pilim tru ol samting. Na tu, sapos yumi tingim ol “samting i bin kamap bipo,” dispela bai helpim yumi long i no ken les na em inap kirapim yumi long mekim ol samting bilong sanap strong yet na karim ol hevi.
“No Ken Toktok Planti”
16 Pasin bilong toktok planti i mekim na yumi tingting long yumi yet na ol hevi bilong yumi na yumi no tingim ol gutpela samting yumi ol Witnes Bilong Jehova i gat. Yumi mas kirapim yumi yet long tingim ol dispela gutpela samting bambai yumi ken daunim pasin bilong komplein. Olsem: Yumi olgeta wan wan i gat wanpela gutpela blesing—yumi holim nem bilong God, Jehova. (Aisaia 43:10, NW ) Yumi ken pas gut wantaim em, na yumi inap toktok long Man bilong “harim beten” long olgeta taim. (Song 65:2; Jems 4:8) I stap bilong yumi i gat as tru bilong en, long wanem, yumi kliagut long bikpela tok long husat i mas i stap nambawan bos bilong heven na graun, na tu, wanpela gutpela samting yumi inap mekim em yumi ken bihainim tru God. (Sindaun 27:11) Yumi inap autim tok oltaim long gutnius bilong Kingdom. (Matyu 24:14) Sapos yumi bilip long ofa bilong Jisas Krais long baim bek ol man, maus bilong bel bilong yumi no inap kotim yumi. (Jon 3:16) Yumi gat ol dispela gutpela samting maski yumi mas karim wanem kain hevi.
Yu Ting Jehova i Save Pilim Ol Samting Long Bel?
Man bilong raitim song i tok: “Planti taim ol i bikhet na ol i sakim tok bilong em long ples drai.” (Ves 40) Ves i kamap bihain i tok moa: “Ol i no lusim pasin bilong traim God.” (Ves 41) Man bilong raitim song i kamapim klia olsem ol i no bin lusim pasin bikhet. Dispela pasin bikhet i bin kirap taim lain Israel i stap long ples drai nating, bihain tasol long God i bin kisim bek ol long Isip. Ol manmeri i kirap toktok planti long God na sutim tok long em olsem em i no redi long helpim na lukautim ol. (Namba 14:1-4) Wanpela buk bilong ol man bilong tanim Baibel i tok olsem dispela tok “ol i bikhet na ol i sakim tok bilong em,” ol inap “tanim tu olsem ‘bel bilong ol i pas strong na ol i no laik harim tok bilong God’ o ‘ol i tok “Nogat” long God.’” Maski i olsem, Jehova i save marimari long ol manmeri bilong em na lusim rong bilong ol taim ol i kamapim klia olsem ol i tanim bel tru. Tasol bihain ol i save go bek long ol olpela pasin bilong ol na bikhet gen, na ol i mekim olsem i go i go.—Song 78:10-19, 38.
Lain Israel i save hambak na senisim nabaut tingting bilong ol, na Jehova i pilim olsem wanem taim ol i bikhet long em? Ves 40 i tok: “Ol i mekim em i bel hevi.” Narapela Baibel i tok olsem ol i “mekim ol samting bilong givim bel hevi long em.” Wanpela dikseneri bilong Baibel i tok: “Mining bilong dispela tok i makim olsem pasin bilong ol Hibru i nogut tru na i kamapim bel pen—olsem pasin bilong wanpela bikhet pikinini i no save bihainim tok.” Olsem wanpela bikhet pikinini i mekim papamama bilong em i bel hevi, ol bikhetlain Israel i “mekim [God] i kros tru long ol,” olsem mekim em i bel hevi.—Ves 41.
Mekim Wok Painimaut
Sampela Bikpela Tok Bilong Buk 3 na 4 Bilong Buk Song
78:24, 25—Bilong wanem ol dispela ves i tok mana em i “kaikai bilong heven” na em i “kaikai bilong ol ensel”? Dispela tupela tok i no makim olsem mana em i kaikai bilong ol ensel, nogat. Em “kaikai bilong heven,” long wanem, em i kam long heven. (Song 105:40) Ol ensel i stap long heven, olsem na ating dispela tok “kaikai bilong ol ensel” i makim olsem God em i stap long heven i givim dispela kaikai. (Song 11:4) Na tu, ating Jehova i mekim wok long ol ensel bilong givim mana long ol Israel.