Ol Referens Bilong Laip na Wok Autim Tok Miting Wok Buk
© 2024 Watch Tower Bible and Tract Society of Pennsylvania
ME 6-12
GUTPELA SAVE I KAM LONG BAIBEL | BUK SONG 36-37
“Yu No Ken Bel Hevi Long Ol Man Nogut”
Wanem Ol Samting Bai Pinis Taim Kingdom Bilong God i Kam?
4 Ol manmeri nogut i mekim wanem long yumi? Aposel Pol i bin tok profet long haptaim bilong yumi na em i tok “taim nogut bai kamap na dispela bai givim hatwok long ol man.” Em i tok tu olsem, “ol man nogut na ol man bilong giaman bai i go nogut moa.” (2 Tim. 3:1-5, 13) Yu ting dispela tok profet i kamap tru? Planti bilong yumi i bin karim hevi long han bilong ol man i gat pasin bilong buli, pasin bikhet, na pasin raskol. Pasin nogut bilong sampela i stap ples klia, na pasin nogut bilong sampela i stap hait—ol i giaman long mekim stretpela pasin bilong haitim pasin nogut bilong ol. Ating ol i no mekim nogut long yumi, tasol pasin nogut bilong ol i save putim hevi long yumi. Yumi save bel hevi tru taim yumi harim ol stori nogut long pasin ol i mekim. Yumi save pret taim yumi harim olsem ol man nogut i mekim hatpela pasin tru long ol pikinini, ol lapun, na ol narapela we i no gat wanpela bilong sambai long ol. Pasin bilong ol dispela man nogut i olsem ol animal na ol spirit nogut. (Jems 3:15) Tasol yumi ken amamas olsem Baibel i tokim yumi long gutpela samting bai kamap.
Jehova i Save Blesim Ol Man Husat i Fogivim Ol Narapela
10 Pasin bilong bel nogut bai nogutim yumi. Jehova i laik bai yumi stap bel isi na amamas, olsem na em i tokim yumi long rausim pasin bilong bel nogut bikos dispela pasin i olsem wanpela hevipela samting yumi karim. (Ritim Efesus 4:31, 32.) Jehova i tok yumi “no ken belhat, na [yumi] mas lusim pasin bilong belhat nogut tru.” (Sng. 37:8) Em savetingting long bihainim dispela edvais. Taim yumi bel nogut long narapela, dispela inap nogutim helt bilong yumi na tingting bilong yumi. (Prov. 14:30) Sapos yumi bel nogut long man i rongim yumi, yumi putim hevi long yumi yet. I olsem yumi dring posin na yumi laik bai posin i nogutim em, tasol tru tru yumi nogutim yumi yet na i no dispela man. Olsem na taim yumi fogivim ol narapela, yumi helpim yumi yet. (Prov. 11:17) Bel na tingting bilong yumi bai stap isi, na yumi bai amamas yet long mekim wok bilong Jehova.
Yu Mas Amamas Long Jehova
20 Orait nau “ol manmeri i daunim nem bilong ol yet, bai God i givim olgeta graun long ol.” (Song 37:11a) “Ol manmeri i daunim nem bilong ol yet” em ol man i save wet long Jehova long stretim olgeta hevi i bin kamap long ol. “Bai ol i sindaun gutpela tumas na amamas i stap.” (Song 37:11b) Long nau tu yumi sindaun gutpela tumas long paradais bilong spirit insait long kongrigesen Kristen tru.
Mekim Wok Painimaut
it-2 445
Maunten
Stap strong, stap oltaim, o i antap moa. Ol man i tingim ol maunten olsem samting bilong stap strong na ol i bilong stap oltaim. (Ai 54:10; Hab 3:6; skelim Sg 46:2.) Olsem na taim man bilong raitim song i tok stretpela pasin bilong Jehova i olsem “ol bikpela maunten” (Sg 36:6) tok bilong em inap makim olsem stretpela pasin bilong Jehova bai stap oltaim. O, bikos ol maunten i antap moa, dispela inap makim olsem stretpela pasin bilong God i winim tru bilong ol man. (Skelim Ai 55:8, 9.) Baibel i stori long ensel i kapsaitim namba 7 dis bilong belhat bilong God na long Revelesen 16:20, em i tok: “Ol maunten i no stap moa.” Dispela i soim olsem ol samting ol man i ting i antap moa olsem ol maunten bai i no inap abrusim belhat bilong God.—Skelim Jer 4:23-26.
ME 13-19
GUTPELA SAVE I KAM LONG BAIBEL | BUK SONG 38-39
Rausim Pasin Bilong Bel i Kotim Yu Longpela Taim
“Lukluk i Go Stret” Long Ol Samting Bai Kamap Bihain
12 Ritim 1 Jon 3:19, 20. Sampela taim yumi save pilim olsem bel i kotim yumi. Olsem, bel bilong sampela manmeri inap kotim ol bikos ol i tingim bek ol samting ol i bin mekim paslain long ol i kisim save long tok i tru. Ol narapela em bel i kotim ol bikos ol i tingim ol rong ol i bin mekim bihain long ol i kisim baptais. Em nomol long yumi olgeta i pilim olsem. (Rom 3:23) Em tru olsem yumi laik bihainim stretpela pasin. Tasol “planti taim yumi olgeta i save popaia.” (Jems 3:2; Rom 7:21-23) Yumi no save amamas taim bel i kotim yumi, tasol gutpela samting inap kamap taim bel i kotim yumi. Wai na yumi tok olsem? Bikos taim bel i kotim yumi, dispela inap kirapim yumi long senisim sampela pasin bilong yumi, na yumi bai tingting strong long no ken mekim gen wankain rong em yumi bin mekim.—Hib. 12:12, 13.
13 Sampela taim bel inap kotim yumi yet maski yumi tanim bel pinis long ol rong bilong yumi na Jehova i fogivim yumi pinis. Sapos oltaim yumi larim bel i kotim yumi, dispela inap nogutim yumi. (Sng. 31:10; 38:3, 4) Wai na yumi tok olsem? Tingim eksampel bilong wanpela sista em bel i wok yet long kotim em long ol rong em i bin mekim long bipo. Em i tok: “Mi ting mi no ken mekim moa wok bilong Jehova, long wanem, ating em i no laikim mi moa.” Ating planti bilong yumi i pilim olsem tu. Em i bikpela samting long yumi mas was gut na bai yumi no larim bel i kotim yumi oltaim. Satan bai amamas tru sapos yumi givap na stop long mekim wok bilong Jehova, tasol Jehova i laikim yumi yet na em i no givap long yumi!—Skelim 2 Korin 2:5-7, 11.
Olsem Wanem Jehova i Ken Orait Long Ol Samting Yumi Mekim Long Olgeta De?
I STAP bilong yumi ol man i sotpela na ol de bilong en i wok long pinis hariap. Devit i tingim i stap bilong ol man i sotpela tru na em i beten olsem: “Bikpela, hamas yia i stap yet long laip bilong mi? Wanem taim bai mi dai? Ating laip bilong mi em bai i sotpela tasol? Yu mas toksave long mi. . . . Long ai bilong yu dispela taim bilong mi em i samting nating.” Devit i laik bai toktok bilong em na ol samting em i mekim long i stap bilong em i amamasim Jehova. Devit i wet long God i helpim em, na em i tok: “Mi bilip long yu na wetim yu tasol i helpim mi.” (Song 39:4, 5, 7) Jehova i harim beten bilong Devit. Na tru tumas, em i skelim ol samting Devit i bin mekim na em i givim pe long Devit i stret long dispela.
Long olgeta de yumi bisi na i no hatwok long bihainim pasin bilong ol man long hariap hariap long mekim ol samting na mekim ol kain kain wok. Dispela inap mekim na yumi tingting planti, long wanem, i gat planti samting yumi mas mekim na kisim save long en na i gat sotpela taim tasol bilong mekim ol dispela samting. Olsem wanem? Yumi gat wankain tingting olsem bilong Devit, olsem yumi laik bai God i orait long ol samting yumi mekim? Tru tumas, Jehova i save lukim na skelim yumi wan wan. Inap 3,600 yia i go pinis, Jop, em wanpela man i save pret long God, em i save olsem God i save lukim olgeta pasin bilong em na em i save skelim olgeta samting em i mekim. Olsem na Jop i askim olsem: “Taim God i kam bilong kotim mi . . . , bai mi bekim wanem tok long em?” (Jop 31:4-6, 14) Yumi inap mekim ol samting long olgeta de em Jehova i orait long en sapos yumi putim ol samting bilong spirit i stap nambawan, na bihainim ol lo bilong em, na mekim gutpela wok long taim bilong yumi. Orait nau yumi ken skelim gut ol dispela samting.
Stretim Bek Pasin Pren Bilong Yu Wantaim Jehova
Toktok planti taim wantaim Jehova. Papa bilong yu i save olsem bel inap kotim yu long ol rong yu bin mekim bipo, na dispela inap mekim na i hatwok long yu beten long Em. (Rom 8:26) Maski i olsem, “holim strong pasin bilong beten,” na tokim Jehova olsem yu laik tru long kamap pren bilong em. (Rom 12:12) Andrej i tok: “Bel i kotim mi na mi bin pilim sem nogut tru. Tasol olgeta taim mi beten, bihain long en mi save pilim gut. Mi pilim olsem bel i stap isi tru.” Sapos yu no save long wanem tok yu bai kolim long beten bilong yu, lukim tok bilong King Devit i stap long Buk Song 51 na 65—em man husat i bin tanim bel long ol rong em i mekim.
Mekim Wok Painimaut
Stap Olsem Man Ol Arapela i Ken Trastim
16 Pasin bilong bosim bel em i bikpela samting sapos yumi laik bai ol narapela i trastim yumi. Dispela pasin i helpim yumi long bosim maus bilong yumi taim yumi laik tokaut long pesenel samting em ol narapela i tokim yumi long en. (Ritim Provep 10:19.) Yumi inap pilim hatwok long bosim bel taim yumi yusim sosel netwok. Sapos yumi no was gut, yumi inap tokaut long sampela pesenel samting bilong ol narapela long planti manmeri. Na taim yumi spredim stori long pesenel samting bilong ol long rot bilong fon o teblet samting, yumi no inap kontrolim samting ol narapela i mekim long ol dispela stori o ol hevi i kamap long dispela. Pasin bilong bosim bel i helpim yumi tu long pasim maus taim ol birua i traim long trikim yumi long tokaut long ol samting we inap givim hevi long ol bratasista bilong yumi. Dispela kain samting inap kamap taim ol polis i kwestenim yumi long kantri we ol i tambuim o pasim wok bilong yumi. Yumi ken bihainim stiatok long “karamapim maus bilong [yumi] na was gut long tok [yumi] mekim” long ol dispela kain taim na long ol narapela taim tu. (Sng. 39:1) Maski yumi stap wantaim famili bilong yumi, ol pren bilong yumi, ol bratasista, na ol narapela, oltaim yumi laik soim olsem ol inap trastim yumi. Na bilong i stap olsem man em ol narapela inap trastim, yumi mas i gat pasin bilong bosim bel.
ME 20-26
GUTPELA SAVE I KAM LONG BAIBEL | BUK SONG 40-41
Wai na Yumi Helpim Ol Narapela?
Man Bilong Givim Samting i Save Amamas
16 Ol man bilong givim samting long narapela i no tingting long kisim bek samting. Jisas i tok: “Taim yu wokim wanpela kaikai, singautim ol lain i stap rabis, ol lain i gat bagarap long bodi, ol lek nogut, na ol aipas. Na yu bai amamas, long wanem, ol i no gat samting bilong bekim bek long yu.” (Luk 14:13, 14) Wanpela man bilong raitim Baibel i tok: “Bikpela i save mekim gut long man i amamas long givim ol samting long ol arapela man.” Narapela man i tok: “Man i save tingim ol rabisman na i helpim ol, dispela man i ken amamas.” (Snd. 22:9; Sng. 41:1) Tru tumas, yumi mas givim ol samting long ol arapela, taim yumi mekim olsem yumi bai amamas taim yumi helpim ol.
17 Pol i mekim wankain tok olsem Jisas i mekim, em i tok: “Amamas bilong givim samting i winim amamas bilong kisim samting.” Dispela tok i makim pasin bilong givim ol samting long sait bilong skin, na tu, taim yumi mekim tok bilong strongim narapela, na stiaim na helpim ol man i nidim helpim. (Apo. 20:31-35) Toktok na pasin bilong aposel Pol i skulim yumi long yusim gut taim na strong bilong yumi long helpim narapela, na tu, yumi mas redi long harim tingting bilong ol na laikim ol.
18 Sampela saveman i painimaut olsem pasin bilong givim i save mekim man i amamas. Wanpela atikol i tok: “Ol manmeri i kisim bikpela amamas moa taim ol i mekim ol samting bilong helpim ol narapela.” Ol saveman i tok, em i bikpela samting long helpim ol narapela bikos dispela i helpim ol man long “pilim olsem laip bilong ol i gat as bilong en na em samting yumi olgeta i mas mekim.” Olsem na planti saveman i tok ol manmeri i mas volantia long helpim ol narapela bambai ol i ken lukautim helt bilong ol na stap amamas. Ol manmeri husat i luksave olsem Baibel em Tok bilong Jehova, em Krieta bilong yumi, ol i wanbel long tok em ol saveman i kamapim.—2 Tim. 3:16, 17.
Jehova Bai Lukautim Yu
7 Sapos yumi sik, yumi inap askim God long mekim isi bel bilong yumi, givim yumi savetingting, na sambai long yumi olsem em i bin sambai long ol manmeri bilong em long bipo. King Devit i tok: “Man i save tingim ol rabisman na i helpim ol, dispela man i ken amamas. Bikpela bai i helpim em long taim hevi i kamap long em. God bai i lukautim em na strongim laip bilong em.” (Sng. 41:1, 2) Long taim bilong Devit, maski man i tingim narapela husat i stap rabis, dispela man yet i no abrusim dai, nogat. Olsem na tok bilong Devit i no makim olsem God bai wokim mirakel na strongim laip bilong dispela man na bai em i stap laip inap oltaim oltaim, nogat. Tok bilong Devit i makim olsem God bai helpim ol man husat i tingim tru ol lain i stap rabis. Hau bai God i helpim ol? Devit i tok: “Taim dispela man i gat sik, Bikpela bai i lukautim em. Em bai i mekim orait sik bilong em, na mekim em i kamap strong gen.” (Sng. 41:3) Yes, sapos wanpela man i tingim narapela husat i stap rabis, em i ken bilip tru olsem God i luksave long gutpela pasin em i mekim. Bodi i gat strong long oraitim em yet, olsem na man inap kamap orait.
Bihainim Pasin Sori Bilong Jehova
17 Taim yu mekim pasin sori, dispela bai helpim yu. Tasol dispela i no ken stap olsem namba 1 risen na yu mekim pasin sori. Bikpela samting em yu laik bihainim pasin bilong God Jehova na givim biknem long em, long wanem, em i as tru bilong pasin laikim na pasin sori. (Snd. 14:31) Yumi ken bihainim pasin bilong em long laikim ol bratasista na mekim pasin sori long ol narapela.—Gal. 6:10; 1 Jon 4:16.
Mekim Wok Painimaut
it-2 16
Jehova
Baibel olgeta i stori long wok bos bilong Jehova, na dispela i kamapim klia namba wan tingting bilong Jehova God: mekim holi nem bilong em. Bilong mekim holi nem bilong God, i mas i gat rot long kamapim klia olsem olgeta tok giaman ol i sutim long nem bilong God i no stret. Tasol moa yet, olgeta ensel long heven na ol manmeri long graun i mas tingim nem bilong em olsem samting i holi. Long dispela rot, ol i soim olsem ol yet i luksave na rispektim Jehova olsem nambawan bos bilong heven na graun, na pasin bilong ol long laikim em i kirapim ol long lotuim em na redi long mekim laik bilong em. Beten bilong Devit long Jehova long Buk Song 40:5-10 i kamapim klia dispela pasin na pasin bilong tingim tru olsem nem bilong Jehova i mas stap holi. (Lukim aposel Pol i yusim sampela hap bilong dispela tok bilong man bilong raitim song taim em i stori long Krais Jisas long Hi 10:5-10.)
ME 27–JUN 2
GUTPELA SAVE I KAM LONG BAIBEL | BUK SONG 42-44
Kisim Helpim Long Skul i Kam Long God
Sampela Bikpela Tok Bilong Buk 2 Bilong Buk Song
42:4, 5, 11; 43:3-5. Sapos sampela samting i mekim na yumi no inap bung wantaim kongrigesen Kristen, pasin bilong tingim amamas yumi save kisim taim yumi bung wantaim kongrigesen bai strongim yumi. Ating pastaim bai yumi pilim olsem yumi stap wanpis, tasol dispela bai kirapim yumi long tingim olsem God em i ples hait bilong yumi na yumi mas wetim em i helpim yumi.
Mekim Stadi i Givim Amamas na i Karim Gutpela Kaikai
1 BETEN: Namba wan samting long mekim, em yumi mas beten. (Sng. 42:8) Bilong wanem? Yumi mas tingim pasin bilong stadi long Tok Bilong God i olsem hap lotu bilong yumi. Olsem na yumi mas askim Jehova long redim bel na tingting bilong yumi long kisim ol tok na askim em long givim yumi holi spirit. (Luk 11:13) Barbara i mekim wok misineri inap longpela taim, em i tok: “Olgeta taim mi save beten paslain long mi ritim o mi stadi long Baibel. Bihain long dispela, mi pilim olsem Jehova i stap wantaim mi na em i orait long samting mi mekim.” Pasin bilong beten paslain long stadi i save redim bel na tingting bilong yumi long kisim gut tok bilong God.
“Yupela i No Ken Seksek Nating”
11 Yumi save kisim skul bilong God long rot bilong ol miting, ol kibung, na ol skul tiokratik, na dispela i save strongim yumi. Dispela skul inap helpim yumi long holim stretpela tingting, putim ol mak yumi laik winim long sait bilong wok lotu, na inapim wok Kristen bilong yumi. (Sng. 119:32) Olsem wanem? Yu save mekim olgeta samting yu inap mekim bilong kisim strong long kain skul olsem?
12 Jehova i bin helpim ol Israel long winim ol Amalek na ol Itiopia, na em i strongim Nehemia na ol wanwok bilong em long pinisim wok bilong sanapim gen banis bilong taun. Olsem tasol, God bai strongim yumi bambai yumi inap mekim yet wok autim tok maski ol man i birua long yumi, ol i les long putim yau, na ol narapela samting i mekim yumi tingting planti. (1 Pita 5:10) Yumi no ken ting olsem Jehova bai wokim mirakel bilong helpim yumi, nogat. Yumi yet i mas mekim sampela samting. Yumi mas ritim Baibel long olgeta de, redim ol miting na i go long ol miting long olgeta wik. Na tu, yumi mas mekim ol samting bilong strongim bel na tingting bilong yumi, olsem pesenel stadi, famili lotu, na oltaim yumi mas beten askim Jehova long helpim yumi. Yumi no ken larim ol narapela samting i pasim yumi long kisim helpim long rot bilong ol samting em Jehova i yusim long strongim yumi. Sapos yu luksave olsem han bilong yu i slek long mekim wanpela bilong ol dispela samting, orait yu mas askim God long helpim yu. Luksave long olsem wanem spirit bilong ‘em i kirapim laik bilong yu na i strongim yu long mekim ol samting em yet i laikim.’ (Fili. 2:13) Tasol olsem wanem yu inap strongim han bilong ol arapela?
Mekim Wok Painimaut
it-1 1242
Jekol
Planti taim Baibel i yusim jekol olsem tok piksa. Jop i stori long bikpela hevi i painim em na i tok em i kamap olsem “brata bilong ol jekol.” (Jop 30:29) Taim man bilong raitim song i singsing sori long ol birua i daunim lain bilong God, ating em i tingim ol jekol i bung bilong kaikai bodi bilong ol man i dai long pait (skelim Sg 68:23), na em i tok: “Yu krungutim mipela long ples ol jekol i save stap long en.” (Sg 44:19) Taim Babilon i banisim Jerusalem long 607 B.C.E, dispela i kamapim bikpela hangre, na ol mama i mekim pasin nogut tru long ol pikinini bilong ol. Olsem na i stret Jeremaia i tok “lain bilong mi” i no lukautim gut ol pikinini olsem ol jekol i save mekim.—Kr 4:3, 10.
JUN 3-9
GUTPELA SAVE I KAM LONG BAIBEL | BUK SONG 45-47
Singsing Bilong Marit Bilong King
Amamas Long Marit Bilong Pikinini Sipsip!
8 Ritim Song 45:13, 14a. Meri bilong maritim King “i luk nais tru.” Revelesen 21:2 i tok meri bilong marit i olsem wanpela taun, em Nupela Jerusalem, na em i “bilas . . . long bungim man em bai maritim.” “Glori bilong God” i stap long dispela taun bilong heven na em i lait tru “olsem wanpela ston i dia tumas, olsem ston jaspa em i lait na i klia tru.” (Rev. 21:10, 11) Buk Revelesen i stori gut tru long naispela bilas bilong Nupela Jerusalem. (Rev. 21:18-21) Olsem na man bilong raitim song i tok meri bilong marit “i luk nais tru”! Dispela i stret, long wanem, marit bilong King bai kamap long heven.
9 Ol i bringim meri i go long Man em bai maritim, na dispela Man em King Mesaia. Em i bin redim na “klinim [meri] long rot bilong wara, em tok bilong God.” Dispela meri “i stap holi na i no gat mak long en.” (Efe. 5:26, 27) Meri bilong marit tu i mas pasim gutpela bilas i stret long dispela marit. Na tru tumas em i mekim olsem! Em i “putim klos ol i bin wokim na bilasim long tret gol.” Long marit bilong Pikinini Sipsip, “[meri] i kisim tok orait long werim gutpela laplap i lait tru na i klin. Dispela gutpela laplap i makim stretpela pasin bilong ol manmeri holi.”—Rev. 19:8.
Buk Revelesen—Em i Tokaut Long Ol Samting Bai Painim Yumi Long Bihain
10 Jehova bai mekim wanem long taim bilong dispela pait? Em i tok: “Bikpela belhat bilong mi bai kirap kwiktaim.” (Ese. 38:18, 21-23) Revelesen sapta 19 i stori long wanem samting bai kamap bihain. Jehova bai salim Pikinini bilong em long sambai long ol manmeri bilong em na long daunim ol birua bilong em. “Ol lain ami long heven”—ol gutpela ensel wantaim lain 144,000—bai joinim Jisas long mekim dispela pait. (Rev. 17:14; 19:11-15) Dispela pait bai kamapim wanem samting? Dispela pait bai bagarapim na pinisim tru olgeta manmeri na ol oganaisesen we i sakim Jehova!—Ritim Revelesen 19:19-21.
11 Tingim samting em ol gutpela wokman bilong God long graun bai pilim taim God i bagarapim na pinisim tru olgeta birua bilong em! Em taim bilong bikpela amamas tru! Olgeta lain long heven bai singaut na amamas tru taim Bikpela Babilon i bagarap na pinis, tasol i gat narapela samting bai kamapim bikpela amamas moa. (Rev. 19:1-3) Dispela em bikpela tok i stap long Buk Revelesen—“marit bilong Pikinini Sipsip.”—Rev. 19:6-9.
12 Wanem taim bai marit i kamap? Olgeta manmeri insait long lain 144,000 bai stap long heven paslain long pait bilong Armagedon i kamap. Tasol dispela em i no taim bilong marit bilong Pikinini Sipsip. (Ritim Revelesen 21:1, 2.) Marit bilong Pikinini Sipsip bai kamap bihain long pait bilong Armagedon taim God i pinisim olgeta birua bilong em.—Sng. 45:3, 4, 13-17.
it-2 1169
Pait
Bihain long dispela pait, bel isi bai stap long graun insait long 1 tausen yia. Man bilong raitim song i tok: “[Jehova] i save mekim i dai ol pait i kamap long olgeta hap bilong graun. Em i save brukim banara na spia; em i save kukim ol karis bilong pait long paia.” Namba wan truim bilong en i bin kamap taim God i bagarapim ol samting bilong pait we ol birua i yusim na kamapim bel isi long lain Israel. Bihain long Krais i bagarapim ol man i save laikim pasin bilong pait long rot bilong Har–Magedon, bel isi bai stap long olgeta hap bilong graun. (Sg 46:8-10) Ol manmeri bai kisim laip oltaim em ol lain husat i “paitim bainat bilong ol i kamap ain bilong brukim graun na paitim spia bilong ol i kamap naip bilong wokim gaden” na ol “i no skul moa long pait.” “Jehova, bosman bilong bikpela lain ami, i bin tok pinis.”—Ai 2:4; Mai 4:3, 4.
Mekim Wok Painimaut
Wanem Ol Samting Bai Pinis Taim Kingdom Bilong God i Kam?
9 Wanem kain oganaisesen bai stap taim God i pinisim ol oganaisesen i gat pasin korapsen? Bihain long Armagedon, yu ting bai i gat wanpela oganaisesen i stap long graun? Baibel i tok: “God i promis pinis long wokim nupela skai na nupela graun, na stretpela pasin tasol bai i stap long en. Em dispela samting tasol yumi wetim.” (2 Pita 3:13) Olpela skai na graun, em ol gavman i pulap long pasin korapsen na ol manmeri ol i bosim, olgeta bai i no stap moa. Wanem samting bai kisim ples bilong ol? Dispela tok “nupela skai na nupela graun” i makim olsem nupela gavman bai bosim nupela lain manmeri. Jisas Krais bai stap King long dispela Kingdom, na em bai bihainim gut pasin bilong God Jehova, em God i save mekim ol samting i wok gut. (1 Kor. 14:33) Dispela Kingdom bai oganaisim gut “nupela graun.” Ol gutpela man bai stap bilong mekim ol wok. (Sng. 45:16) Krais na lain 144,000 bai stiaim ol dispela manmeri. Tingim: God bai pinisim olgeta oganaisesen i gat pasin korapsen, na wanpela oganaisesen tasol bai bosim graun, na olgeta manmeri bai i stap wanbel, na i no gat pasin korapsen!
JUN 10-16
GUTPELA SAVE I KAM LONG BAIBEL | BUK SONG 48-50
Papamama—Strongim Bilip Bilong Famili Long Oganaisesen Bilong Jehova
Lotu i Tru Bai Mekim Yu Stap Amamas Tru
11 Yumi lotuim Jehova taim yumi stadi long Baibel na skulim ol pikinini long Jehova. De Sabat i opim rot long lain Israel long lusim ol wok bilong wan wan de bambai ol i ken mekim ol samting bilong strongim pasin pren bilong ol wantaim Jehova. (Kis. 31:16, 17) Ol lain i gat bilip i stap namel long lain Israel i skulim ol pikinini bilong ol long Jehova na ol gutpela pasin bilong em. Long nau tu, yumi mas wokim sediul bilong ritim na stadi long Tok Bilong God. Pasin bilong ritim Baibel na stadi long en em wanpela rot yumi ken lotuim Jehova, na dispela i helpim yumi long go klostu moa long em. (Sng. 73:28) Na taim famili i bung na stadi wantaim, papamama i ken helpim ol pikinini bilong ol long kisim pasin bilong pas gut tru wantaim gutpela Papa bilong ol long heven.—Ritim Buk Song 48:13.
I Gat As Tru na Yu Ken Amamas
“Yupela i mas wokabaut long maunten Saion, na raunim banis bilong taun na kaunim ol taua bilong en. Yupela i mas tingting gut long banis bilong Saion, na lukim gut ol strongpela haus bilong en. Olsem na bai yupela i ken toksave long ol lain i kamap bihain.” (Sng. 48:12, 13) Man bilong raitim song i kirapim ol Israel long lukim gut taun Jerusalem. Tingim ol famili Israel husat i go long dispela taun holi bilong mekim ol bikpela bung long olgeta yia na lukim naispela tempel, ating ol i tingim bek planti gutpela samting. Dispela i mas kirapim ol long “toksave long ol lain i kamap bihain.”
Tingim kwin bilong Seba, pastaim em i no bilip tumas long ol stori em i harim long gutpela wok king bilong Solomon na bikpela savetingting bilong em. Wanem samting i senisim tingting bilong em na em i kirap long bilip olsem ol stori em i bin harim ol i tru? Em i tok: “Pastaim mi no bin bilipim dispela tok. Tasol nau mi kam na mi lukim pinis long ai bilong mi yet.” (2 Sto. 9:6) Tru tumas, samting yumi lukim long ‘ai bilong yumi yet,’ em inap mekim bikpela samting moa long yumi.
Olsem wanem yu inap helpim ol pikinini bilong yu long lukim ol gutpela samting bilong oganaisesen bilong Jehova long ‘ai bilong ol yet’? Sapos i gat wanpela brens ofis bilong ol Witnes Bilong Jehova i stap klostu long hap bilong yupela, orait stretim rot bilong go visitim. Mandy na Bethany i kamap bikpela long wanpela hap i stap longwe long Betel inap 1,500 kilomita. Tasol papamama bilong ol i bin stretim rot bilong famili i ken go visitim dispela hap planti taim liklik, na moa yet taim tupela pikinini meri bilong ol i wok long kamap bikpela. Tupela i tok: Paslain long mipela i visitim Betel, mipela i ting em ples we i no gat amamas long en na ol man i gat bikpela krismas tasol i save stap long en. Tasol mipela i bungim planti yangpela husat i wok strong long mekim wok bilong Jehova na ol i amamas! Mipela i lukim olsem oganaisesen bilong Jehova i no stap long dispela liklik hap bilong mipela tasol, na olgeta taim mipela i go long Betel mipela i kisim strong long mekim wok bilong Jehova.” Taim Mandy na Bethany i lukim gut wok bilong oganaisesen bilong God, dispela i kirapim tupela long mekim wok painia, na tu, sampela taim ol i mekim wok volantia long Betel.
Wokabaut Olsem Ol Sitisen Bilong Kingdom!
5 Stadi long histori. Man i laik kamap sitisen bilong wanpela kantri, ating em i mas lain long histori bilong gavman bilong dispela kantri. Yumi laik stap sitisen bilong Kingdom Bilong God, olsem na yumi laik save long olgeta samting bilong dispela kingdom. Yumi laik bihainim pasin bilong ol pikinini man bilong Kora long Israel bilong bipo tru. Ol i laikim Jerusalem na hap we ol i mekim lotu na ol i laik stori long histori bilong dispela taun. Ol i no mekim olsem bikos taun i luk nais tru, nogat. Ol i mekim, long wanem, em i “taun bilong nambawan king,” Jehova. Ples lotu long Jerusalem em hap we ol manmeri i lain long ol Lo bilong Jehova na lotuim em. Ol manmeri i stap aninit long wok bos bilong Jehova, em King bilong Jerusalem, em ol manmeri Jehova i orait long ol na laikim ol. (Ritim Song 48:1, 2, 9, 12, 13.) Long taim bilong yumi, God i gat wanpela lain bilong em i stap hia long graun. Olsem ol pikinini man bilong Kora, yumi mas i gat laik long stadi na tokim ol arapela long histori bilong ol manmeri bilong God. Taim yumi kisim save moa long lain bilong Jehova na olsem wanem em i helpim ol, dispela i mekim na yumi bilip moa long Kingdom Bilong God. Dispela bai strongim laik bilong yumi long autim gutnius bilong Kingdom.—Jer. 9:24; Luk 4:43.
Mekim Wok Painimaut
it-2 805
Mani Kago
Kantri Israel i gat planti mani kago, olsem na ol manmeri i gat kaikai na dring (1Ki 4:20; Ekl 5:18, 19), na mani kago bilong ol i lukautim ol na ol i no bungim ol hevi bilong i stap rabis. (Pr 10:15; Ekl 7:12) Em tru olsem Jehova i laik ol Israel i amamas long planti samting ol i kisim long pasin bilong wok hat (skelim Pr 6:6-11; 20:13; 24:33, 34), tasol em i givim tok lukaut tu olsem ol i no ken trastim mani kago bilong ol na lusim tingting olsem em i Man husat i givim ol dispela samting. (Lo 8:7-17; Sg 49:6-9; Pr 11:4; 18:10, 11; Jer 9:23, 24) Ol i kisim tok bilong helpim ol long luksave olsem mani kago i bilong sotpela taim tasol (Pr 23:4, 5), na man i no inap givim ol dispela samting long God olsem pe bilong baim bek laip bilong em (Sg 49:6, 7), na tu, mani kago i no inap helpim man i dai pinis (Sg 49:16, 17). Sapos ol i laikim tumas mani kago, dispela bai mekim na ol inap mekim pasin giaman na Jehova i no inap orait long ol. (Pr 28:20; skelim Jer 5:26-28; 17:9-11.) Na tu, ol i mas “onarim Jehova na givim em ol gutpela samting tru bilong [ol].”—Pr 3:9.
JUN 17-23
GUTPELA SAVE I KAM LONG BAIBEL | BUK SONG 51-53
Mekim Ol Samting Bilong Abrusim Ol Bikpela Popaia
Hau Bai Yu Inap Lukautim Bel?
4 Long Provep 4:23, “bel” i makim tingting tru bilong yu em ol man i no inap save long en. (Ritim Buk Song 51:6.) Dispela tok “bel” i makim tingting, filings, astingting, na laik tru bilong yumi yet. Em i makim pasin tru bilong yumi we i kirap long insait na i kam ausait.
5 Pasin bilong lukautim bodi i wankain long pasin bilong lukautim bilip. Namba 1: Sapos yumi laik bai bodi long insait i wok gut, orait yumi mas kisim gutpela kaikai na eksasais oltaim. Olsem tasol, sapos yumi laik stap gut long bilip, orait yumi mas kisim gutpela kaikai bilong strongim bilip na oltaim yumi mas mekim wok bilong soim olsem yumi bilip long Jehova. Yumi mas bihainim save yumi kisim na autim bilip bilong yumi. (Rom 10:8-10; Jems 2:26) Namba 2: Taim yumi skelim bodi bilong yumi, yumi inap ting olsem yumi stap helti, tasol sik inap stap insait long bodi. Olsem tasol, yumi inap mekim wok lotu na ting olsem bilip bilong yumi i stap strong, tasol yumi inap stat long kisim ol laik nogut. (1 Kor. 10:12; Jems 1:14, 15) Satan i laik bai yumi kisim tingting bilong em. Em inap mekim wanem ol samting bilong pulim yumi long bihainim tingting bilong em? Olsem wanem yumi inap lukautim yumi yet?
Yumi Inap i Stap Klin
5 Wanpela bikpela samting yumi ken mekim bilong soim olsem yumi trastim tru Jehova em olsem: Yumi mas beten na askim God long helpim yumi long sakim ol tingting nogut. Taim yumi go klostu long Jehova long rot bilong beten, em bai i kam klostu long yumi. Em i amamas long givim holi spirit bilong strongim tingting bilong yumi long sakim ol tingting nogut na bihainim yet pasin bilong i stap klin. Olsem na yumi mas beten long God na tokim em olsem yumi laik tru bai em i orait long tingting i stap long bel bilong yumi. (Sng. 19:14) Olsem wanem? Yumi save daunim yumi yet na askim God long skelim yumi na painimaut sapos i gat “sampela tok giaman i stap long tingting bilong [yumi]” we inap pulim yumi long mekim sin? (Sng. 139:23, 24) Yumi save beten oltaim na askim God long helpim yumi long i stap gut long em taim traim i painim yumi?—Mat. 6:13.
6 Ating pasin em papamama i bihainim long mekim bikpela long yumi o pasin yumi bihainim long bipo inap kirapim yumi long laikim ol pasin em Jehova i no orait long en. Tasol God inap helpim yumi long mekim ol senis bambai yumi inap mekim yet wok bilong em na bihainim ol pasin em i laikim. King Devit i bin luksave long dispela samting. Bihain long Devit i mekim pasin pamuk wantaim Batseba, em i tokim Jehova olsem: “Yu ken wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Sng. 51:10, 12) Yumi ol sinman, olsem na yumi inap laikim ol pasin i no stret, tasol Jehova inap strongim laik bilong yumi long bihainim tok bilong em. Maski sapos ol laik nogut bilong yumi i kamap strong moa na i laik daunim pasin bilong yumi long tingim ol samting i klin, Jehova inap stiaim yumi na bai yumi inap bihainim ol lo bilong em na kisim gutpela sindaun. God inap sambai long yumi na bai ol pasin nogut i no ken daunim yumi.—Sng. 119:133.
Mekim Wok Painimaut
it-1 644
Doek
Wanpela man Idom husat i save lukautim ol wasman bilong ol sipsip bilong King Sol, em bikpela wok tru. (1Sm 21:7; 22:9) I klia tru olsem Doek i bin bihainim lotu Juda. Ating em i bin mekim wanpela tok promis, mekim samting i no klin, o i luk olsem em i kisim sik lepra, olsem na ol i putim em “insait long haus lotu sel long ai bilong Jehova,” ating long dispela taim em i lukim Hetpris Ahimelek i givim bret na bainat bilong Goliat long Devit. Bihain, taim Sol i tokim ol wokman bilong em olsem ol i wokim plen bilong bagarapim em, Doek i tokaut long samting em i lukim long Nop. Bihain long Sol i salim ol man i go kisim Ahimelek na ol pris i kam na em i givim askim long ol, em i tokim ol gad long kilim ol pris i dai. Tasol ol i no laik mekim, olsem na Sol i tokim Doek na em i kilim i dai 85 pris. Bihain long em i kilim i dai ol pris, em i bagarapim Nop, em i kilim i dai olgeta manmeri, yangpela na lapun, na tu, ol animal.—1Sm 22:6-20.
Olsem tok i go pas bilong Buk Song 52 i kamapim, Devit i tok long Doek olsem: “Maus bilong yu i sap olsem resa, na yu save tingting long bagarapim ol arapela na giamanim ol. Yu laikim pasin nogut moa yet winim gutpela pasin, na yu laikim tok giaman moa yet winim pasin bilong tok tru. Yu save laikim tumas tok bilong bagarapim ol arapela, maus bilong yu i pulap long tok giaman!”—Sg 52:2-4.
JUN 24-30
GUTPEL SAVE I KAM LONG BAIBEL | BUK SONG 54-56
God i Stap Long Sait Bilong Yu
Bihainim Gutpela Tingting—Pret Long God!
10 Wanpela taim, Devit i ranawe i go long ples bilong Akis, em king bilong taun Get long Filistia, em ples bilong Goliat. (1 Samuel 21:10-15) Ol wokman bilong king i tok olsem Devit em i birua bilong ol. Devit i mekim wanem long dispela taim bilong hevi? Em i beten na kamapim hevi bilong em long Jehova. (Song 56:1-4, 11-13) Tru, Devit i giaman long mekim olsem em i longlong bambai em i ken ranawe, tasol Devit i save olsem Jehova tasol i bin helpim em long abrusim bagarap long rot bilong blesim samting em i mekim. Pasin bilong Devit long bilip tru na wet long Jehova i soim olsem Devit em i man bilong pret long God.—Song 34:4-6, 9-11.
11 Olsem Devit, yumi inap soim olsem yumi pret long God long rot bilong bilip long tok promis bilong em long helpim yumi long karim ol hevi. Devit i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.” (Song 37:5) Tasol dispela i no makim olsem yumi putim tasol hevi bilong yumi long han bilong Jehova na yumi yet i no mekim wanpela samting bilong stretim dispela hevi na yumi wetim em long stretim hevi bilong yumi, nogat. Devit i no beten tasol long God i helpim em na bihain em yet i no mekim wanpela samting. Nogat. Em i mekim wok long strong na save Jehova i givim em na i mekim ol samting bilong stretim hevi bilong em. Tasol Devit i save olsem man yet i no inap mekim na ol samting i kamap gutpela. Yumi tu i mas i gat wankain tingting. Yumi mas mekim olgeta samting yumi inap mekim bilong stretim hevi bilong yumi, na bihain larim dispela hevi i stap long han bilong Jehova. Planti taim yumi yet i no inap mekim wanpela samting, yumi mas wetim Jehova i helpim yumi. Taim yumi mekim olsem yumi kamapim klia pasin bilong yumi long pret long God. Tok Devit i mekim i ken strongim bel bilong yumi, em i tok: “God em i pren tru bilong ol manmeri i save stap aninit [“pret,” NW ] long em.”—Song 25:14.
I No Gat Wanpela Samting Inap ‘Pasim God Long Laikim Yumi’
9 Jehova i save tingim tu pasin bilong yumi long sanap strong na karim hevi. (Matyu 24:13) Tingim, Satan i laik bai yu givim baksait long Jehova. Olgeta wan wan de yu stap gut long Jehova, yu bin helpim Jehova long bekim tok giaman Satan i bin sutim long em. (Sindaun 27:11) Sampela taim i hatwok tru long sanap strong na karim hevi. Sik, hevi bilong mani, bel hevi, na ol narapela samting inap mekim na olgeta wan wan de i olsem wanpela traim. Taim ol samting yumi bin wet long en i no kamap, dispela tu inap mekim na yumi bel hevi. (Sindaun 13:12) Jehova i save tingim tru pasin bilong yumi long sanap strong, maski yumi karim ol kain hevi olsem. Long dispela as, King Devit i askim Jehova long tingim krai bilong em, na em i tok: “Yu raitim pinis long buk bilong yu.” (Song 56:8) Yes, Jehova i save tingim tru krai bilong yumi na ol hevi yumi karim taim yumi wok long stap gut long em. Ol dispela samting tu i no liklik samting long ai bilong em.
Pasin Laikim i Helpim Yumi Long Daunim Pasin Bilong Pret
16 Satan i save olsem yumi tingim tru laip bilong yumi. Na em i ting olsem yumi bai lusim olgeta samting yumi gat—na pasin pren bilong yumi wantaim Jehova tu—long lukautim laip bilong yumi. (Jop 2:4, 5) Tasol Satan i popaia tru! Maski i olsem, em “i gat strong bilong kamapim dai,” olsem na em inap yusim pasin bilong pret long dai long mekim na bai yumi lusim Jehova. (Hib. 2:14, 15) Sampela taim, ol man em Satan i stiaim ol, ol i save pretim yumi olsem ol bai kilim yumi dai sapos yumi no lusim bilip. Na long ol narapela taim, Satan inap lukim olsem yumi nidim tru helpim long wanpela bikpela sik yumi gat na em inap yusim dispela long mekim na bai yumi lusim bilip. Ol dokta o ol wanfamili em ol i no Witnes, ol inap putim presa long yumi long kisim blut, na dispela inap brukim lo bilong God. O ating wanpela inap kirapim yumi long kisim wanpela tritmen we i sakim ol stiatok bilong Baibel.
17 Yumi no laik dai, tasol sapos yumi dai, yumi save olsem Jehova bai wok yet long laikim yumi. (Ritim Rom 8:37-39.) Taim ol pren bilong Jehova i dai, em i save tingim ol, i olsem ol i stap laip yet. (Luk 20:37, 38) Em i gat bikpela laik tru long kirapim ol bek. (Jop 14:15) Jehova i bin givim bikpela pe tru so yumi “inap . . . kisim laip oltaim.” (Jon 3:16) Yumi save olsem Jehova i laikim tru yumi na em i tingim yumi. So yumi no laik lusim Jehova taim yumi sik o klostu yumi inap lusim laip bilong yumi, nogat. Yumi laik go long em bilong kisim bel isi, savetingting, na strong. Dispela em samting Valérie na man bilong em i bin mekim.—Sng. 41:3.
Mekim Wok Painimaut
it-1 857-858
Save Long Samting Bai Kamap, Makim Pinis
Judas i bringim ol man i go arestim Jisas na dispela i truim tok profet bilong God, na tu, dispela i soim klia olsem Jehova na Pikinini bilong em inap save long samting bai kamap bihain. (Sg 41:9; 55:12, 13; 109:8; Ap 1:16-20) Tasol dispela i no makim olsem God i makim pinis olsem Judas bai mekim dispela pasin bikhet. Tok profet i soim olsem wanpela pren bilong Jisas bai putim em long han bilong ol birua, tasol tok profet i no kolim husat man tru bai mekim dispela pasin. Ol stiatok i stap long Baibel i soim klia olsem God i no makim pinis samting Judas bai mekim. Pol i kolim lo bilong God olsem: “Yu no ken hariap long putim han antap long wanpela man; na no ken insait wantaim ol arapela long sin bilong ol; yu mas holimpas pasin i klin.” (1Ti 5:22; skelim 3:6.) Long nait olgeta Jisas i beten long Papa bilong em paslain long em i mekim disisen long makim 12-pela aposel na dispela i soim olsem em i tingting na skelim gut ol samting paslain long em i makim ol. (Lu 6:12-16) Sapos God i makim pinis Judas long putim Jisas long han bilong ol birua, dispela bai i no stret wantaim tok God i givim bilong stiaim em, na long sait bilong lo, i olsem God yet i gat asua long sin bilong Judas.
Olsem na i klia tru olsem taim Jisas i makim Judas olsem wanpela aposel, bel bilong Judas i no gat wanpela tingting long putim Jisas long han bilong ol birua. Em i larim “rop bilong diwai i gat posin” long kamap long bel bilong em na bagarapim em, olsem na em i no bihainim tok bilong God, nogat, em i bihainim laik bilong Satan long mekim pasin giaman na stil. (Hi 12:14, 15; Jon 13:2; Ap 1:24, 25; Jem 1:14, 15) Taim dispela pasin na tingting bilong em i kamap ples klia, nau Jisas yet inap luksave long bel bilong Judas na em i tokaut long man husat bai putim em long han bilong ol birua.—Jon 13:10, 11.