Ol Referens Bilong Laip na Wok Autim Tok Miting Wok Buk
© 2023 Watch Tower Bible and Tract Society of Pennsylvania
MAS 4-10
GUTPELA SAVE I KAM LONG BAIBEL | BUK SONG 16-17
“Jehova, Yu Man i As Bilong Olgeta Gutpela Samting”
Ol Yangpela, Yupela Inap i Stap Amamas
KISIM OL GUTPELA PREN
11 Ritim Buk Song 16:3. Devit i save long rot bilong kisim ol gutpela pren. Em i kisim bikpela “amamas” long bung wantaim ol manmeri i laikim tru Jehova. Baibel i kolim ol olsem “ol manmeri holi” bikos ol i bihainim pasin i klin na i stret. Narapela man bilong raitim song i holim wankain tingting long ol pren bilong em. Em i tok: “Mi pren bilong olgeta man i save pret long yu na bilong ol man i save bihainim ol tok bilong yu.” (Sng. 119:63) Olsem yumi stori pinis long stadi i kamap paslain, yu tu inap kisim planti gutpela pren namel long ol manmeri husat i stap daun long Jehova na bihainim tok bilong em. Ol dispela pren inap i gat kain kain krismas.
“Lukim Gutpela Pasin Bilong Jehova”
Devit i tok: “God, yu tasol yu bilong mi na mi no gat narapela samting moa. Na yu givim mi olgeta samting mi sot long en. Laip bilong mi i stap long han bilong yu. Mi kisim olgeta gutpela samting long yu tasol.” (Sng. 16:5, 6) Devit i tenkyu long Jehova i orait long em inap stap pren bilong em na mekim wok bilong em. Wankain olsem Devit, ating yumi gat planti hevi, tasol yumi gat planti samting em God i givim bilong helpim yumi long pas gut wantaim em! Olsem na yumi ken wok yet long amamas long lotu i tru, na oltaim yumi mas “lukim . . . na amamas” long pasin Jehova i makim bilong lotuim em.
Long Olgeta Taim Stap Klostu Long Jehova
2 Yumi olgeta inap lain long planti samting long ol manmeri em Baibel i stori planti long ol—olsem Abraham, Sara, Moses, Rut, Devit, Esta, aposel Pol, na sampela moa. Tasol stori bilong sampela manmeri em Baibel i no stori tumas long ol, dispela tu i ken helpim yumi. Pasin bilong skelim long bel ol dispela stori inap helpim yumi long bihainim tok bilong man bilong raitim song, olsem: “Oltaim mi save pilim Bikpela i stap klostu long mi. Em i stap klostu [“long han sut,” NW ] na i givim strong long mi, olsem na i no gat wanpela samting i ken mekim mi i pret na guria.” (Sng. 16:8) Wanem insait bilong dispela tok?
3 Planti soldia i save holim bainat long han sut, olsem na hap plang ol i holim long han kais i no save lukautim han sut. Tasol sapos wanpela pren i pait klostu long em long han sut, dispela bai lukautim em. Sapos oltaim yumi tingim Jehova na bihainim laik bilong em, em bai lukautim yumi. Orait, nau yumi ken skelim sampela stori long Baibel em ol inap strongim bilip bilong yumi bambai “long olgeta taim [yumi] stap klostu long Jehova.”—Baibel Byington.
Mekim Wok Painimaut
it-2 714
Ai Kiau
Taim ol i yusim dispela tok Hibru ʼi·shohnʹ (Lo 32:10; Pr 7:2), wantaim ʽaʹyin (ai), em i makim “liklik man bilong ai”; olsem tasol, bath (pikinini meri) em ol i yusim long Krai 2:18 i makim “pikinini meri bilong ai,” dispela tupela hap tok wantaim i makim ai kiau. Ol i bungim tupela tok wantaim bilong strongim tok long Buk Song 17:8 (ʼi·shohnʹ bath-ʽaʹyin), dispela i makim, “liklik man, pikinini meri bilong ai” (“ai kiau,” NW ). Dispela tok i kamapim klia olsem man inap lukim liklik piksa bilong em yet long dispela hap bilong ai bilong narapela man.
Ai i malumalum tru na em i hariap long pilim samting; maski liklik gras o hap das i pas namel long skin na ai. Was gut na lukautim samting olsem plastik i karamapim (konia) ai kiau, bikos sapos wanpela samting i sikirapim o wanpela sik i mekim na samting olsem klaut i kamap, dispela bai mekim na i hatwok long lukluk gut o man inap long kamap aipas. Baibel i kamapim strongpela tok, tasol long wankain taim dispela tok i kamapim pasin bilong was gut tru taim em i yusim dispela hap tok “kiau bilong ai.” Yumi mas holim wankain tingting long lo bilong God. (Pr 7:2) Baibel i stori long pasin bilong God long lukautim lain Israel olsem wanpela Papa long Lo 32:10, na em i tok Em i was gut long ol olsem “kiau bilong ai bilong em yet.” Devit i beten olsem God bai lukautim em olsem “ai kiau” bilong Em. (Sg 17:8) Em i laik bai Jehova i hariap long mekim samting long helpim em taim ol birua i laik pait long em. (Skelim Sek 2:8; ol i yusim tok Hibru ba·vathʹ ʽaʹyin, “ai kiau.”).
MAS 11-17
GUTPELA SAVE I KAM LONG BAIBEL | BUK SONG 18
“Jehova . . . Em i Man Bilong Kisim Bek Mi”
Ol Tok Piksa i Stap Long Baibel Yu Kliagut Long Ol?
Baibel i kolim sampela samting moa bilong makim Jehova. Baibel i tok em i olsem wanpela “bikpela ston” na “strongpela banis.” (2 Samuel 23:3; Song 18:2; Lo 32:4) Wanem samting i wankain? Olsem wanpela bikpela ston i stap strong long ples bilong en na i no save senis, God Jehova i no save senis na em inap stap olsem strongpela ples hait bilong yu.
4 I gat planti tok piksa long Buk Song i stori long ol narapela narapela pasin bilong Jehova. Olsem: Song 84:11 (NW ) i stori long Jehova olsem em i “san na hap plang,” long wanem, em i As bilong lait na laip, na i lukautim gut yumi. Song 121:5 (NW ) i tok, “Jehova i olsem ples kol long han sut bilong yu.” Olsem wanpela gutpela ples kol inap haitim yu long strongpela san, Jehova inap lukautim ol manmeri bilong em na bai ol hevi i no ken bagarapim ol, olsem kukim ol. Em inap haitim ol gut aninit long “han” o “wing” bilong em.—Aisaia 51:16; Song 17:8; 36:7.
it-2 1161 par 7
Singaut
God i save harim singaut bilong ol wokman bilong em. Ol manmeri husat i save lotuim God long spirit na long pasin i tru inap singaut long God na ol i ken bilip olsem em bai harim singaut bilong ol, maski ol i toktok long em long wanem tokples. Na tu, maski ol i no kolim beten long maus, ol i askim God long tingting tasol, God, husat i save long tingting bilong ol man i “harim” o putim yau maski man i beten long wanem kain pasin. (Sg 66:19; 86:6; 116:1; 1Sm 1:13; Ne 2:4) God i save harim singaut bilong ol man husat i askim em long helpim ol, na tu, em i save long laik bilong ol man husat i birua long em na i laik mekim nogut long ol wokman bilong em.—St 21:17; Sg 55:18, 19; 69:33; 94:9-11; Jer 23:25.
Sanap Strong na Karim Hevi Bilong Tingting Planti
2. Tingim bek. Taim yu tingim bek ol samting i bin kamap long laip bilong yu, yu inap tingim wanpela hevi yu bin karim wantaim helpim bilong Jehova? Taim yumi tingim bek ol samting Jehova i mekim bilong helpim yumi na helpim ol wokman bilong em long bipo, dispela i mekim isi bel bilong yumi na helpim yumi long trastim tru Jehova. (Sng. 18:17-19) Wanpela elda nem bilong em Joshua, em i tok: “Mi gat lista bilong ol beten bilong mi em God i bin bekim. Dispela i helpim mi long tingim ol taim we mi askim Jehova long wanpela samting stret na em i givim samting mi askim long en.” Yes, taim yumi tingim bek ol samting Jehova i bin mekim bilong helpim yumi, yumi bai kisim nupela strong bilong daunim pasin bilong tingting planti.
Mekim Wok Painimaut
it-1 432 par. 2
Serap
Ol i no ol imis em lotu haiden i yusim long lotu long bipo olsem sampela man i bin ting. Em ol traipela imis i gat wing na i luk narapela kain, nogat. Planti stori bilong ol Juda long bipo i kamapim olsem (Baibel i no stori long dispela), ol dispela serap i luk olsem ol man. Ol man i wokim gut piksa bilong ol we i soim olsem ol ensel i luk nais tru, ol dispela man i “bihainim stret plen” em Moses i kisim long Jehova taim ol i wokim ol dispela piksa. (Kis 25:9) Aposel Pol i stori long ol olsem ol “serap i naispela tru na sedo bilong [ol] i karamapim ai bilong Bokis Kontrak.” (Hib 9:5) Ol dispela serap i stap wantaim Jehova: “Bai mi kamap long yu antap long ai bilong bokis na toktok wantaim yu. Na namel long 2-pela serap i stap antap long Bokis Kontrak, bai mi tokim yu long olgeta tok em yu mas tokim ol Israel long en.” (Ki 25:22; Nam 7:89) I olsem Jehova i sindaun “antap [o, namel] long ol serap.” (1Sm 4:4; 2Sm 6:2; 2Ki 19:15; 1St 13:6; Sg 80:1; 99:1; Ai 37:16) Ol serap i stap olsem “piksa bilong karis” we Jehova i ron long en (1St 28:18), na ol wing bilong ol serap i bilong lukautim na helpim em long ron spit. Olsem na long wanpela singsing Devit i stori long hau Jehova i hariap i kam long helpim em, i kain olsem em “i sindaun antap long wanpela serap na flai i kam” na “em i stap long wing bilong wanpela ensel na i kam.”—2Sm 22:11; Sg 18:10.
MAS 18-24
GUTPELA SAVE I KAM LONG BAIBEL | BUK SONG 19-21
“Skai i Tokaut Long Biknem Bilong God”
Olgeta i Mas Tokaut Long Biknem Bilong Jehova
DEVIT, pikinini bilong Jesi, i go bikpela olsem man bilong lukautim ol sipsip klostu long Betlehem. Ating planti taim long nait em i bin lukluk i go antap long skai i pulap long ol sta taim em i lukautim ol sipsip bilong papa bilong em long hap ol sipsip i save kaikai gras long en! Em i mas tingim ol dispela samting taim holi spirit bilong God i kirapim em long raitim na singim ol gutpela tok i stap long Song 19: “Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em. Tasol tulait na tudak i skulim ol manmeri long olgeta hap bilong graun. Na tok bilong tupela i go inap long olgeta ples.”—Song 19:1, 4.
2 Ol nambawan gutpela samting Jehova i bin wokim ol i no gat maus na ol i no inap toktok, tasol ol i tokaut long biknem bilong em long olgeta de na olgeta nait. Ol samting God i bin wokim i save tokaut oltaim long biknem bilong Em, na taim yumi tingim pasin bilong ol long tokaut long biknem bilong God “long olgeta hap bilong graun” na bai ol man i ken lukim, dispela i kirapim yumi long daunim yumi yet. Tasol dispela tokaut em ol samting God i bin wokim i save mekim, dispela i no inap. Ol man i stap gut long God, ol tu i mas bungim nek na tokaut long biknem bilong Em. Wanpela man bilong raitim song, em yumi no save long nem bilong em, holi spirit i kirapim em long mekim dispela tok long ol man i lotuim God na stap gut long em: “Yupela i mas amamas long biknem na strong bilong en. Bikpela em i namba wan, olsem na yupela i mas litimapim biknem bilong en.” (Song 96:7, 8) Ol man i pas gut wantaim Jehova ol i amamas long bihainim dispela tok. Tasol wanem ol samting i insait long wok bilong givim biknem long God?
Ol Samting God i Wokim i Tokaut Long Glori Bilong Em!
8 Nau Devit i stori long narapela samting Jehova i bin wokim: “Long skai God i sanapim wanpela haus sel bilong san. San i kam ausait, olsem man i marit na i belgut na i lusim rum bilong en na i kam ausait. San i save amamas na bihainim rot bilong en, olsem man bilong ran i redi long resis. San i save kamap long arere bilong skai na i wokabaut i go long hapsait. I no gat wanpela samting inap hait long hat bilong en.”—Song 19:4-6.
9 Taim yu skelim san wantaim ol arapela sta, em i no bikpela tumas. Tasol em i narakain sta, bikpela bilong en i winim tru ol planet i raunim em. Hevi bilong en i planti planti bilion ton—winim tru hevi bilong olgeta planet samting i raunim em! Strong bilong graviti bilong san i holim graun bilong yumi na graun i stap 150 milion kilomita longwe long san, na em i no go longwe moa o klostu moa long san. Liklik hap tru bilong pawa bilong san i save kam long graun, tasol dispela liklik hap pawa i mekim na olgeta samting inap stap laip.
10 Man bilong raitim song i mekim tok piksa long san, olsem strongpela “man bilong ran” na em i kirap long arere bilong skai na i ran i go long hapsait na long nait em i go insait long wanpela “haus sel.” Taim dispela strongpela sta i go daun, i luk olsem em i go insait long “wanpela haus sel” bilong kisim malolo. Long moningtaim em i kam ausait “olsem man i marit na i belgut na i lusim rum bilong en.” Taim Devit i bin wok wasman bilong sipsip em i kisim save long bikpela kol bilong nait. (Stat 31:40) Em i tingim san i bin hatim graun na skin bilong em. San i bin lusim hap is na ran i go olgeta long hap wes, tasol em i no les, em i olsem strongpela “man bilong ran,” na em i redi long mekim gen.
Wanpela Atis Ol Man i No Tingim Long Nau
Taim yumi kisim save long ol plaua na diwai samting, dispela bai helpim yumi long save long Krieta bilong yumi, ol samting em i wokim i stap long olgeta hap. Wanpela taim Jisas i tokim ol disaipel bilong em long lukim ol plaua bilong bus we i gro long Galili. “Kisim skul long ol plaua lili long bus i kamap olsem wanem. Ol i no save hatwok na ol i no save wokim laplap. Tasol mi tokim yupela, maski Solomon i pasim klos bilong king, bilas bilong em i no winim ol dispela plaua.” (Matyu 6:28, 29) Plaua i no gat nem i luk nais tru na dispela i helpim yumi long tingim olsem God i save long nid bilong ol famili.
Mekim Wok Painimaut
it-1 1073
Hibru, 2
Na i gat narapela kain wei bilong rait em ol i kolim synthetic (o, formal, constructive) parallelism. Long dispela kain rait, namba 2 hap bilong sentens i no kamapim wankain tingting i stap long namba 1 hap, na tu, em i no skelim poin em namba 1 hap i kamapim, nogat. Em i skruim sampela tok moa na i kamapim nupela tingting. Wanpela eksampel i stap long Buk Song 19:7-9:
Lo bilong Jehova em i stret olgeta,
na i save givim nupela strong long man.
Tok bilong Jehova em i samting yumi inap trastim tru,
em i save givim savetingting long man i no gat planti save.
Tok bilong Jehova i stret tru,
na i save mekim man i belgut;
Lo bilong Jehova i gutpela tru,
na i mekim ai bilong man i lait.
Pasin bilong pret long Jehova i gutpela tru,
dispela pasin i save stap oltaim oltaim.
Ol disisen bilong Jehova i tru
na i stret olgeta.
Luksave olsem namba hap bilong wan wan sentens i pinisim gut tok; ves olgeta, olsem na ol i kolim synthesis, olsem ol i bungim 2-pela tingting wantaim. Tasol long ol namba 2 hap, olsem “na i save givim nupela strong long man” na “em i save givim savetingting long man i no gat planti save,” man i ritim inap save olsem ‘lo i stret olgeta’ na “tok bilong Jehova em i samting yumi inap trastim tru.” Long dispela kain pasin bilong rait ol tok long namba 2 hap i strongim poin long namba 1 hap. Olsem na ol i save skruim sampela moa tok long ves na ol i strongim tu ol poin long sampela ves. Em risen na sampela taim ol i kolim tu olsem formal o constructive parallelism.
MAS 25-31
GUTPELA SAVE I KAM LONG BAIBEL | BUK SONG 22
Baibel i Tok Profet Long Dai Bilong Jisas
Ol i Painim Pinis Mesaia!
16 Em bai luk olsem God i lusim Mesaia. (Ritim Song 22:1.) Mak i tokim yumi olsem long namba 9 aua, Jisas i singaut strong olsem: “‘Eli, Eli, lama sabaktani?’ mining bilong en: ‘God bilong mi, God bilong mi, bilong wanem yu lusim mi?’” (Mak 15:34) Taim Jisas i tok olsem, i no olsem em i no bilip moa long Papa bilong en. Em i save olsem God bai larim ol birua i kilim em i dai. Dispela i opim rot long Jisas long soim olsem em bai stap gut long God maski wanem samting i kamap. Tok profet bilong Song 22:1 i kamap tru taim Jisas i singaut strong olsem, “God bilong mi, God bilong mi, bilong wanem yu lusim mi?”
Ol i Painim Pinis Mesaia!
13 Devit i tok profet olsem ol man bai tok bilas long Mesaia. (Ritim Song 22:7, 8.) Ol man i tok bilas long Jisas taim em i hangamap long pos. Matyu i tok: “Ol manmeri i go i kam, ol i kirap tok bilas long em, na ol i tantanim het bilong ol na tok: ‘Yu dispela man husat i tok long tromoi tempel i go daun na sanapim gen long 3-pela de, orait helpim yu yet! Sapos yu pikinini bilong God, orait lusim dispela diwai pos na kam daun!’” Ol bikpris, ol saveman bilong Lo, na ol hetman i bin tok bilas long em, ol i tok: “Em i bin kisim bek ol arapela, tasol em i no inap kisim bek em yet! Em i King bilong Israel, larim em i lusim diwai pos na kam daun na mipela bai bilip long em. Em i bin bilip long God, olsem na sapos God i amamas long em, orait larim God i kisim bek em bikos em yet i bin tok, ‘Mi Pikinini Bilong God.’” (Mat. 27:39-43) Jisas i karim pen, tasol em i stap isi na em i no mekim wanpela tok i no stret. Em i stap olsem gutpela piksa tru yumi ken bihainim.
Ol i Painim Pinis Mesaia!
14 Ol bai pilai satu long kisim klos bilong Mesaia. Devit i tok: “Ol i tilim klos bilong mi na ol i kisim, na ol i pilai satu bilong makim wanem man i ken kisim saket bilong mi.” (Sng. 22:18) Dispela samting i kamap tru. Baibel i tok bihain long ol soldia bilong Rom i hangamapim Jisas long pos, ol i pilai satu bilong tilim klos bilong em.—Mat. 27:35; ritim Jon 19:23, 24.
Mekim Wok Painimaut
Soim Rispek Long Ol Bung Holi Bilong Yumi
7 I gat ol rot bilong kamapim klia olsem yumi rispek long ol bung bilong yumi. Wanpela rot em yumi mas i stap long taim bilong mekim ol singsing bilong Kingdom. Planti singsing i olsem ol beten, olsem na yumi mas singsing long pasin rispek na daun long God. Aposel Pol i kolim sampela tok bilong Buk Song 22, na em i tok long Jisas olsem: “Bai mi autim nem bilong yu long ol brata bilong mi. Taim ol i bung bilong lotu bai mi singim song bilong litimapim nem bilong yu namel long ol.” (Hibru 2:12) Olsem na yumi mas tingting strong long sindaun long sia paslain long siaman i kolim namba bilong singsing, na taim yumi singsing yumi mas putim gut tingting long mining bilong ol tok bilong singsing. Gutpela sapos pasin bilong yumi long singsing i kamapim tingting bilong man bilong raitim song, em i tok: “Laik bilong mi i strong olgeta, olsem na bai mi givim bikpela tenkyu long [Bikpela] long bung bilong olgeta manmeri bilong en.” (Song 111:1) Em nau, pasin bilong mekim ol singsing i litimapim nem bilong Jehova em i wanpela gutpela as tru bilong kam long miting long taim stret na long stap i go inap long miting i pinis.
Litimapim Nem Bilong Jehova ‘Namel Long Ol Man i Bung Bilong Lotu’
Nau, olsem long bipo, i gat rot bilong ol man i bilip i ken tokaut long bilip bilong ol ‘namel long ol lain i bung bilong lotu.’ Wanpela rot olgeta inap mekim olsem, em long rot bilong bekim ol askim ol i givim long ol miting bilong kongrigesen. No ken ting pasin bilong bekim tok i no inap kamapim gutpela samting. Olsem: Ol bekim i kamapim olsem wanem yumi inap karim o abrusim ol hevi, ol dispela kain bekim i save strongim ol brata long tingting strong long bihainim ol stiatok bilong Baibel. Ol bekim i stori long ol Baibel ves em ol paragraf i no kamapim tok bilong en o ol bekim i kamapim ol tok ol brata i bin painim taim ol i mekim stadi bilong ol yet, ol inap kirapim ol narapela long kirap mekim gut stadi bilong ol yet.
EPRIL 1-7
GUTPELA SAVE I KAM LONG BAIBEL | BUK SONG 23-25
“Jehova Em i Wasman Bilong Mi”
“Jehova Em i Wasman Bilong Mi”
Jehova i save go pas na bringim ol sipsip bilong em. Ol sipsip i no gat wasman ol i save paul na lus nabaut. Olsem tasol, yumi mas kisim helpim bilong painim stretpela rot bilong bihainim long laip bilong yumi. (Jeremaia 10:23) Devit i tok, Jehova i save bringim lain bilong em i go long ples i gat “gutpela gras” na long ‘ol liklik wara ol i ken dring na malolo.’ Na em i save bringim ol i go “long ol gutpela rot.” (Ves 2, 3) Dispela tok piksa long ples i gat gutpela gras na wara, em i strongim yumi long bilip tru long God. Sapos yumi bihainim rot em God i makim olsem i stap long Baibel, yumi inap mekim ol samting long i stap bilong yumi na dispela i givim bel isi na nupela strong long yumi na yumi stap gut.
“Jehova Em i Wasman Bilong Mi”
Jehova i save lukautim ol sipsip bilong em. Sapos ol sipsip i no gat wasman, ol bai pret na ol i no inap lukautim ol yet. Jehova i tokim lain bilong em olsem ol i no ken pret, maski ol i “wokabaut long ples nogut na bikpela tudak”—olsem long taim i gat bikpela hevi na taim nogut i painim ol. (Ves 4) Jehova i save was long ol na oltaim em i redi long helpim ol. Em inap givim savetingting na strong long ol manmeri i lotuim em bambai ol inap karim ol hevi i painim ol.—Filipai 4:13; Jems 1:2-5.
“Jehova Em i Wasman Bilong Mi”
Jehova i save givim kaikai long ol sipsip bilong em. Ol sipsip i mas i gat wasman bilong painim kaikai bilong ol. Yumi tu i mas kisim ol kaikai bilong spirit, na God tasol inap helpim yumi long kisim. (Matyu 5:3) Yumi tenkyu long Jehova, em i Man Bilong Givim planti samting long yumi, na em i redim planti gutpela kaikai bilong spirit long givim long ol wokman bilong em. (Ves 5) Baibel na ol buk na nius i kamapim tok bilong Baibel, olsem dispela nius nau yu ritim, ol i gat ol gutpela kaikai bilong spirit i save helpim yumi long kisim save long as bilong i stap bilong yumi, na ol samting God i tingting pinis long mekim.
Mekim Wok Painimaut
Laikim Stretpela Pasin Long Bel Olgeta
LONG rot bilong Tok bilong em na holi spirit, Jehova i save bringim lain bilong em long “gutpela rot.” (Sng. 23:3) Tasol yumi gat sin, olsem na sampela taim yumi lusim dispela rot. Bilong kirap gen long mekim pasin i stret, yumi mas wok strong. Wanem samting bai helpim yumi? Olsem Jisas, yumi mas i gat laik tru long mekim pasin i stret.—Ritim Song 45:7.
2 Wanem dispela “gutpela rot”? Dispela rot i makim wokabaut bilong man em stretpela pasin bilong Jehova i as bilong en. Long tok Hibru na tok Grik, “stretpela pasin” i makim pasin bilong bihainim tru ol gutpela stiatok. Jehova i “olsem ples ol [man] i ken i go long en na i stap gut tru,” olsem na ol man i lotu long em ol i amamas long larim em i makim stretpela rot ol i mas bihainim.—Jer. 50:7.
3 Pasin bilong givim bel olgeta long bihainim ol stretpela lo bilong God, dispela tasol em i rot bilong God i ken amamas long yumi. (Lo 32:4) Bilong mekim olsem, pastaim yumi mas wok strong long kisim save long God Jehova long rot bilong Baibel. Taim yumi wok long kisim save moa long em, na go klostu moa long em long olgeta de, bai yumi laikim moa yet stretpela pasin bilong em. (Jems 4:8) Na tu, yumi mas larim Tok Bilong God i stiaim yumi long taim yumi gat wok long mekim ol bikpela disisen.
EPRIL 8-14
GUTPELA SAVE I KAM LONG BAIBEL | BUK SONG 26-28
Hau Devit i Strongim Pasin Bilong Stap Gut Long God
Wok Oltaim Long Mekim Stretpela Pasin
8 Devit i beten: “God, traim olgeta pasin bilong mi. Na skelim bel na tingting [“kidni,” NW ] bilong mi.” (Song 26:2) Ol kidni i stap insait tru long bodi bilong man. Long tok piksa i olsem ol kidni i makim tingting i stap insait tru long bel bilong man. Na bel i makim tingting i save kirapim man long mekim ol samting, ol samting man i pilim, na tingting bilong em. Taim Devit i askim Jehova long skelim em, em i beten askim Jehova long skelim na glasim gut tingting i stap insait tru long bel bilong em.
9 Devit i krai long Jehova long stretim bel na tingting bilong em. Olsem wanem Jehova inap stretim tingting i stap insait long bel bilong yumi? Devit i tok: “Mi litimapim nem bilong Bikpela, long wanem, em i save stiaim mi. Na long nait bel bilong mi i save skulim mi.” (Song 16:7) Wanem mining bilong dispela tok? Dispela tok i makim olsem tok bilong God i go insait tru long bel bilong Devit na i stap olgeta long dispela hap na i stretim tingting na laik i stap insait tru long bel bilong em. Wankain samting inap kamap long yumi sapos yumi tingim na pilim tru tok yumi kisim long rot bilong Baibel, na ol wokman bilong God, na oganaisesen bilong em, na yumi larim dispela tok i stap insait tru long yumi. Sapos oltaim yumi beten long Jehova long stretim yumi long dispela rot, em bai helpim yumi long mekim stretpela pasin.
Wok Oltaim Long Mekim Stretpela Pasin
12 Devit i stori long narapela samting i bin helpim em long mekim stretpela pasin, em i tok: “Mi no save raun wantaim ol man nogut. Mi no save wokabaut wantaim ol man bilong giaman. Mi no save laik tru long raun wantaim ol man nogut. Mi save abrusim ol.” (Song 26:4, 5) Devit i no inap raun wantaim ol man nogut. Em i nolaik tru long ol poroman nogut.
13 Olsem wanem long yumi? Yumi save sakim pasin bilong poroman wantaim ol man nogut long rot bilong televisen, vidio, Intenet, o ol narapela rot? Yumi save stap longwe long ol man i haitim pasin tru tru bilong ol? Sampela long skul o long ples wok ol i save haitim pasin tru bilong ol na ol i giaman long kamap pren bilong yumi. Olsem wanem? Yumi laik kamap pren wantaim ol man em ol i no save wokabaut long rot bilong tok i tru bilong God? Ol man i tromoi lotu i tru ol i tok ol i laikim yumi, tasol ol i haitim tingting bilong ol long pulim yumi i go longwe long Jehova. Olsem wanem sapos i gat sampela long kongrigesen Kristen em ol i save mekim hait sampela pasin nogut? Ol tu i save haitim pasin tru bilong ol. Jayson, nau em i mekim wok olsem kongrigesen sevan, taim em i yangpela em i gat sampela pren olsem. Em i tok long ol olsem: “Wanpela taim wanpela bilong ol i bin tokim mi: ‘Ol samting yumi mekim long nau i no bikpela samting, long wanem, long nupela taim i kam bai yumi olgeta i dai pinis. Bai yumi no save yumi lus long wanpela samting.’ Dispela kain tok i kirapim tru tingting bilong mi. Mi no laik i stap olsem daiman taim nupela taim i kamap.” Jayson i bihainim savetingting na lusim ol dispela kain poroman. Aposel Pol i givim tok lukaut olsem: “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’” (1 Korin 15:33) Em i bikpela samting long yumi abrusim ol poroman nogut, a?
Wok Oltaim Long Mekim Stretpela Pasin
17 Haus lotu sel, na alta bilong mekim ol ofa, em i ples tru bilong lotu long Jehova long Israel. Devit i kamapim amamas bilong em long dispela ples, na em i tok: “Bikpela, mi laikim tru haus bilong yu, em dispela ples biknem bilong yu i stap long en.”—Song 26:8.
18 Olsem wanem? Yumi save amamas long bung long ol ples we yumi skul long Jehova? Olgeta Haus Kingdom na ol program bilong skulim yumi long ol samting bilong spirit i stap olsem ples tru bilong lotu tru long God long hap yumi sindaun long en. Na tu, i gat ol kibung distrik, kibung sekit, na ol spesel de kibung. Yumi save lain long “ol lo” bilong Jehova long ol dispela miting. Na sapos yumi “laikim tumas ol dispela lo,” bai yumi amamas long go long ol miting, na bai yumi putim gut yau taim yumi stap long ol dispela miting. (Song 119:167) Yumi save kisim nupela strong taim yumi bung wantaim ol wanbilip bilong yumi em ol i tingim yumi na ol i helpim yumi long bihainim stretpela pasin!—Hibru 10:24, 25.
Mekim Wok Painimaut
Jehova i Save Helpim Ol Man i Bel Hevi
15 Man bilong raitim song, Devit, i tok: “Maski papa na mama i givim baksait long mi, Bikpela bai i lukautim mi.” (Song 27:10) Pasin laikim bilong Jehova i winim pasin laikim bilong olgeta papamama, yumi save long dispela na em i mekim gut bel bilong yumi! Sapos papa o mama i no laikim yu moa, o i mekim nogut long yu, o i lusim yu, dispela inap bagarapim tru bel bilong yu, tasol dispela i no makim olsem Jehova i no laikim yu, nogat, em i laikim yu tru. (Rom 8:38, 39) Tingim, God i save kirapim ol man em i laikim long i kam long em. (Jon 3:16; 6:44) Maski ol man i bin mekim wanem kain pasin long yu, Papa bilong yu long heven i laikim yu tru!
EPRIL 15-21
GUTPELA SAVE I KAM LONG BAIBEL | BUK SONG 29-31
Stretim Man—Kamapim Pasin Laikim Bilong God
it-1 802 par. 3
Pes
Long ‘haitim pes’ inap gat narapela narapela mining taim Baibel i stori long narapela narapela samting. Planti taim dispela tok Jehova God i haitim pes bilong em i makim olsem em i no amamas o em i no givim strong bilong em. Ating dispela inap makim pe bilong man long sakim tok o bilong ol lain i bikhet, olsem lain Israel. (Jop 34:29; Sg 30:5-8; Ai 54:8; 59:2) Sampela taim dispela tok inap makim olsem Jehova i no laik kamapim em yet o i no laik bekim, wet long taim stret em i makim. (Sg 13:1-3) Devit i tokim God long, “haitim pes,” bilong em long ol sin bilong em, em i askim God long lusim tingting long ol rong bilong em.—Sg 51:9; skelim Sg 10:11.
Amamas Long Wetim Jehova
Taim Jehova i stretim yumi, dispela i save helpim yumi, kain olsem pasin bilong prut long kamap bikpela na i mau. Ol tok bilong God long stretim yumi, Baibel i tok long en olsem: “Em i save kamapim kaikai olsem bel isi bilong stretpela pasin long ol manmeri i save kisim dispela stretim.” (Hibru 12:11, King Jems Nupela Testamen) Prut i mas i gat bikpela hap taim liklik bilong go bikpela na mau, na olsem tasol, taim God i skulim yumi, i mas i gat haptaim i lus pastaim bilong yumi ken senisim tingting na pasin bilong yumi. Olsem: Sapos yumi bin mekim sampela pasin i no stret na ol i tekewe sampela wok bilong yumi insait long kongrigesen, pasin bilong yumi long wetim God bai helpim yumi na yumi no bel hevi na lusim wok bilong Jehova. Long kain taim olsem, tok bilong Devit bai strongim bel bilong yumi, em i tok: “[God] i save kros long sotpela taim tasol. Na em i tingting gutpela long yumi na i mekim gut long yumi olgeta taim yumi stap long graun. Aiwara i ken kam daun long nait, tasol long moningtaim bai yu amamas gen.” (Song 30:5) Sapos yumi wok long kisim pasin bilong wetim Jehova na bihainim ol tok kaunsel yumi kisim long Baibel na oganaisesen bilong God, taim bilong yumi long “amamas gen” em bai kamap.
Tanim Bel Tru i Makim Wanem Samting?
18 Bilong rausman i ken soim olsem em i tanim bel tru, em i mas kam oltaim long ol miting na bihainim tok bilong ol elda long bihainim gutpela sediul bilong beten na stadi long Baibel. Na tu, em i mas wok strong long abrusim ol samting we i bin pulim em long mekim sin. Sapos em i wok strong long stretim bek pasin pren bilong em wantaim Jehova, em i ken bilip tru olsem Jehova bai fogivim em na ol elda bai helpim em long kam bek insait long kongrigesen. Taim ol elda i laik painimaut sapos wanpela i tanim bel tru o nogat, ol i save olsem olgeta wan wan keis i no wankain so ol i save skelim gut olgeta wan wan keis na ol i no save skelim man long hatpela pasin.
Mekim Wok Painimaut
Sampela Bikpela Tok Bilong Buk 1 Bilong Buk Song
31:23—Man i bikhet i kisim wanem kain pe? Em i kisim strafe. Taim stretpela man i no tingting gut na mekim popaia Jehova bai stretim em. Man i bikhet i no save tanim bel long pasin nogut em i bin mekim, olsem na em i kisim strafe long pasin nogut em i mekim.—Sindaun 11:31; 1 Pita 4:18.
EPRIL 22-28
GUTPELA SAVE I KAM LONG BAIBEL | BUK SONG 32-33
Wai na Yu Mas Kamapim Bikpela Sin?
Jehova i Marimari na Yumi No Ken Bel Hevi
7 Sapos yumi mekim bikpela rong, ating i hatwok long kamapim long narapela man, na long Jehova tu. Tasol sapos yumi no kamapim, dispela bai mekim wanem long yumi? Devit i tok: “Taim mi no autim sin bilong mi yet, mi krai nogut . . . na bodi bilong mi i slek . . . na . . . strong bilong mi i lus olgeta.” (Song 32:3, 4) Taim Devit i laik haitim rong em i bin mekim, bel bilong em i gat tok, na dispela i daunim em na em i bel hevi na i no gat strong moa. Em i olsem wanpela diwai i no gat wara na i laik drai. Ating tingting bilong em i stap nogut na skin bilong em i gat sik. Em i no amamas moa. Sapos yumi stap olsem, yumi mas mekim wanem?
God i “Redi Long Lusim Rong”
8 Devit i tanim bel na em i tok: “Bihain mi bin autim sin bilong mi long yu. Mi no haitim pasin nogut bilong mi. . . . Na yu lusim asua bilong mi na sin bilong mi tu.” (Song 32:5) Dispela tok “lusim,” ol i kisim long wanpela tok Hibru i olsem “litimapim,” o “karim.” Long dispela hap bilong Baibel em i makim olsem tekewe “asua, sin, o rong.” I olsem Jehova i litimapim sin bilong Devit na karim i go. Dispela i mekim na nau bel bilong Devit i no bagarap moa long dispela sin bilong em. (Song 32:3) Yumi tu inap bilip tru long dispela God i save tekewe rong bilong ol man husat i bilip long ofa bilong Jisas long baim bek ol man na i askim God long lusim rong bilong ol long dispela rot.—Matyu 20:28.
Pasin Bilong Autim Rong i Save Oraitim Man
Taim Devit i autim rong pinis, em i no pilim olsem em i nogut tasol na em i no inap mekim wanpela gutpela wok, nogat. Ol tok em i raitim long Buk Song long pasin bilong autim rong, i makim olsem nau bel bilong em i stap isi na em i gat strongpela tingting long stap gut long wok bilong God. Lukim Song 32. Ves 1 i tok: “Sapos God i lusim pinis rong bilong wanpela man, na i rausim sin bilong em, dispela man i ken amamas.” Olsem na maski rong i bikpela, sapos man i tanim bel tru, orait em inap amamas gen. Wanpela samting man i ken mekim bilong kamapim olsem em i tanim bel tru, em i mas putim asua i go long em yet, wankain olsem Devit i bin mekim. (2 Samuel 12:13) Devit i no tokim Jehova olsem i gat as na em i mekim dispela rong, na em i no wok long putim asua i go long ol narapela, nogat. Ves 5 i tok: “Bihain mi bin autim sin bilong mi long yu. Mi no haitim pasin nogut bilong mi. Mi ting olsem, mi laik autim olgeta sin bilong mi long Bikpela. Mi autim pinis na yu lusim asua bilong mi na sin bilong mi tu.” Taim man i autim rong, dispela i mekim bel i stap isi, na nau asua bilong ol rong em i mekim bipo i no bagarapim moa bel bilong em.
Mekim Wok Painimaut
Sampela Bikpela Tok Bilong Buk 1 Bilong Buk Song
33:6—Wanem mining bilong dispela tok “God i bin tok”? Dispela i makim olsem God i save salim strong bilong em, olsem holi spirit, bilong mekim wok bilong em, olsem em i bin mekim taim em i bin wokim ol samting long heven. (Stat 1:1, 2) Yumi ken tok dispela strong bilong em, i olsem strongpela win i lusim maus bilong em, na em inap salim i go longwe bilong mekim wok bilong em.
EPRIL 29–ME 5
GUTPELA SAVE I KAM LONG BAIBEL | BUK SONG 34-35
“Oltaim bai mi litimapim nem bilong Jehova”
Yumi Litimapim Nem Bilong Jehova
11“Bai mi tenkyu long God. Oltaim bai mi litimapim nem bilong en.” (Song 34:1) Ol birua i bin raunim Devit na em i mas hait long ples maunten, olsem na ating em i tingting planti long kaikai samting, tasol olsem ves 1 i kamapim klia, em i no larim dispela i tekewe strongpela tingting bilong em long litimapim nem bilong Jehova. Dispela i makim gutpela pasin yumi ken bihainim taim hevi i painim yumi! Maski yumi stap long skul o ples wok o wantaim ol brata Kristen o long autim tok, nambawan bikpela laik bilong yumi i bilong litimapim nem bilong Jehova. I gat planti as na yumi mas mekim olsem! Tingim: Long olgeta taim bai yumi inap kisim amamas na sampela save moa long ol gutpela samting God i bin wokim. Na tingim ol samting em i bin mekim long rot bilong oganaisesen bilong em long graun! Maski ol i sinman, Jehova i bin mekim bikpela wok long ol man i stap gut long em bilong kamapim bikpela wok long taim bilong yumi. Olsem wanem long ol dispela wok bilong God taim yumi skelim wantaim ol wok bilong ol man, em ol lain bilong dispela graun i save givim biknem long ol? Ating yu wanbel wantaim Devit, em i tok: “Bikpela, i no gat wanpela god i olsem yu. Yu winim ol. Na i no gat wanpela man inap mekim wankain wok olsem yu save mekim.”—Song 86:8.
Yumi Litimapim Nem Bilong Jehova
13 “Mi ting long God i bin helpim mi na mi amamas long em. Ol manmeri i karim hevi ol i ken harim dispela tok na ol i ken belgut tru.” (Song 34:2) Hia long dispela ves Devit i no hambak na amamas long ol samting em yet i bin mekim, nogat. Olsem: Em i no litimapim nem bilong em long gutpela plen tru em i bin wokim bilong giamanim king bilong Get. Em i save olsem taim em i stap long Get, em Jehova tasol i bin lukautim em na helpim em long abrusim dai. (Sindaun 21:1) Olsem na Devit i amamas long Jehova, em i no amamas long em yet. Devit i givim biknem long Jehova na dispela i pulim ol man i gat pasin daun long i kam long Jehova. Jisas tu i save givim biknem long Jehova, na dispela i mekim na ol man i gat pasin daun na i larim God i skulim ol, ol i kam long Em. Long nau, ol man bilong olgeta lain, em ol i gat pasin daun, ol i save kam long kongrigesen bilong ol Kristen God i bin makim long holi spirit em ol i bilong olgeta hap, na Jisas i Het bilong en. (Kolosi 1:18) Taim ol dispela man i gat pasin daun i harim ol wokboi bilong God i litimapim nem bilong em, na taim ol i harim ol tok bilong Baibel em holi spirit bilong God i helpim ol long kisimgut, bel bilong ol i pilim tru.—Jon 6:44; Aposel 16:14.
Yumi Litimapim Nem Bilong Jehova
15 “Mi bin beten long Bikpela bai em i helpim mi, na em i harim prea bilong mi. Em i rausim olgeta pret long bel bilong mi, na nau mi stap bel isi.” (Song 34:4) Dispela em bikpela samting tru long Devit. Olsem na em i tok moa: “Ol rabisman i prea long Bikpela na em i harim prea bilong ol, na i helpim ol long olgeta hevi bilong ol.” (Song 34:6) Taim yumi bung wantaim ol wanbilip, i gat planti rot bilong yumi ken kamapim ol gutpela ekspiriens i stori long olsem wanem Jehova i bin helpim yumi long karim ol bikpela hevi na sanap strong. Dispela i save strongim bilip bilong ol wanbilip, wankain olsem ol tok bilong Devit i bin strongim bilip bilong ol poroman bilong em. Ol dispela poroman bilong Devit “ol i bilip long Bikpela, [na] ol i save amamas. Olsem na bilip bilong ol i no bagarap.” (Song 34:5) Maski ol i ranawe long King Sol, ol i amamas, ol i no sem. Ol i bilip strong olsem God i helpim Devit. Na olsem tasol, ol nupela man wantaim ol man i bin stap Kristen longpela taim ol i save bilip na lukluk long Jehova long helpim ol. Ol i pilim tru olsem em i bin helpim ol na ol i gat strongpela tingting long stap gut long em.
Mekim Wok Painimaut
Sampela Bikpela Tok Bilong Buk 1 Bilong Buk Song
35:19—Wanem mining bilong tok bilong Devit olsem no ken larim ol man i heitim mi i tok bilas long mi? Dispela tok inap makim olsem ol birua bilong Devit i amamas taim ol plan nogut bilong ol long em i kamap tru. Devit i askim long dispela i no ken kamap long em.