Ol Referens Bilong “Laip na Wok Autim Tok Miting Wok Buk”
© 2023 Watch Tower Bible and Tract Society of Pennsylvania
JANUERI 1-7
GUTPELA SAVE I KAM LONG BAIBEL | JOP 32-33
Mekim Isi Bel Bilong Lain i Karim Hevi Bilong Tingting Planti
it-1 710
Elihu
Elihu i no mekim wansait pasin, na em i no mekim switpela tok bilong grisim wanpela. Elihu i luksave olsem em i wankain long Jop, God i Gat Olgeta Strong em Krieta bilong em, na em i bin kisim graun na wokim em. Elihu i no laik pretim Jop, nogat, em i toktok long Jop olsem pren tru taim em i kolim nem bilong Jop, em samting Elifas, Bildat, na Sofar i no bin mekim.—Jop 32:21, 22; 33:1, 6.
Yu Holim Wankain Tingting Olsem Jehova Long Ol Man i No Gat Strong?
8 Yumi bai pilim hevi bilong ol arapela sapos yumi tingim olsem sampela bratasista i no gat strong, long wanem, helt bilong ol i no gutpela, famili i no wanbel long lotu, na bel hevi i daunim ol. Kain hevi olsem inap painim yumi. Taim lain Israel i stap long Isip, ol i stap rabis na ol i no gat strong. Paslain long ol i go insait long Graun Bilong Promis, ol i kisim toksave olsem ol i “no ken givim baksait” long lain brata bilong ol husat i karim hevi. Jehova i laik bai ol i tingim olsem i stret long helpim ol man i stap rabis.—Lo 15:7, 11; Wkp. 25:35-38.
9 Taim hevi i painim ol narapela, yumi no ken skelim ol o saspek nating long ol, nogat, yumi mas yusim Tok Bilong God long mekim gut bel bilong ol. (Jop 33:6, 7; Mat. 7:1) Yumi ken tok piksa olsem: Taim man i ronim motobaik na em i kisim eksiden na i go kamap long imejensi wod, yu ting ol wokman bilong haus sik bai traim long skelim sapos em i bin kamapim dispela eksiden? Nogat. Ol bai hariap long helpim em. Olsem tasol, sapos ol hevi i mekim na wanpela wanbilip i no gat strong moa, orait yumi mas painim rot long helpim em long kamap strong gen long bilip.—Ritim 1 Tesalonaika 5:14.
10 Sapos yumi lusim sampela haptaim long tingim sindaun bilong ol bratasista, dispela inap stretim tingting yumi holim long ol. Tingim ol sista em famili i birua long ol inap planti yia. Sampela bilong ol i save stap isi na i luk olsem ol i no gat strong, tasol ol i soim klia olsem ol i gat strongpela bilip na strongpela bel. Olsem wanem? Taim yu lukim mama wanpis i kam oltaim long miting wantaim ol pikinini, yu save pilim tru pasin bilong em long bilip na holim strongpela tingting? Olsem wanem long ol tineja em ol i holim strong tok i tru maski ol wanskul i bihainim kain kain pasin nogut? Yumi luksave olsem ol lain yumi ting olsem ol i no gat strong, ating ol i “pulap tru long bilip” wankain olsem ol arapela em sindaun bilong ol i gutpela.—Jems 2:5.5.
Wanem Taim i Stret Long Toktok?
17 Namba 4 man i visitim Jop em Elihu, wanblut bilong Abraham. Em i putim gut yau taim Jop na 3-pela narapela man i toktok. Em i bin putim gut yau long toktok bilong ol bikos ol tok bilong em i soim olsem em i gat pasin sori, na tu, em i kolim stret ol tok we i helpim Jop long stretim tingting kranki bilong em. (Jop 33:1, 6, 17) Bikpela tingting bilong Elihu em long givim biknem long Jehova, na i no long em yet o long narapela man. (Jop 32:21, 22; 37:23, 24) Pasin bilong Elihu i soim olsem i gat taim bilong pasim maus na taim bilong putim yau. (Jems 1:19) Na tu, yumi kisim save olsem taim yumi givim tok kaunsel, nambawan tingting bilong yumi em long givim ona long Jehova, na i no long yumi yet.
18 Sapos yumi amamas long presen bilong yumi long toktok, yumi bai bihainim skultok bilong Baibel na tingim gut wanem taim yumi ken toktok na wanem ol tok yumi ken mekim. Holi spirit i kirapim King Solomon long tokaut olsem: “Tok man i mekim long taim stret bilong en, dispela i olsem ol apol gol i stap insait long ol silva dis.” (Prov. 25:11) Sapos yumi putim gut yau long ol narapela, na yumi tingting gut paslain long yumi toktok, orait toktok bilong yumi bai i olsem ol apol ol i wokim long gol—ol i nais tumas na dia tru. Maski yumi mekim liklik tok o planti tok, toktok bilong yumi bai strongim ol narapela, na Jehova bai amamas long yumi. (Prov. 23:15; Efe. 4:29) Dispela em nambawan gutpela rot bilong soim olsem yumi amamas tru long presen em God i givim long yumi!
Mekim Wok Painimaut
Wok Yet Long i Go Klostu Long Jehova
10 Olsem tasol, yumi mas tingim lukluk bilong yumi. Tasol yumi no ken traim long luk yangpela moa winim krismas bilong yumi. Baibel i tok: “Ol man i lukim waitpela gras bilong ol lapun, na ol i save, ol lapun i bin bihainim stretpela pasin na ol i stap longpela taim long graun. Olsem na ol i givim biknem long ol.” (Snd. 16:31) Jehova i tingim olsem pasin tru bilong yumi em i bikpela samting tru winim lukluk bilong yumi, olsem na yumi tu i mas holim wankain tingting. (Ritim 1 Pita 3:3, 4.) Olsem na yu ting i stret long yumi kisim sampela kain marasin we inap givim hevi long yumi yet o kisim operesen bilong mekim lukluk bilong yumi i kamap gutpela moa? Maski yumi gat hamas krismas o wanem kain helt, pasin bilong “amamas long Bikpela” bai mekim lukluk bilong yumi i kamap gutpela moa. (Neh. 8:10) Long nupela taim, helt bilong yumi bai kamap gutpela olgeta na yumi bai kamap yangpela gen. (Jop 33:25; Ais. 33:24) Tasol long nau yumi mas mekim ol gutpela disisen na bilip long ol tok promis bilong Jehova. Dispela bai helpim yumi long amamas long laip bilong yumi long nau, na yumi bai i no tingting na wari tumas long helt bilong yumi.—1 Tim. 4:8.
JANUERI 8-14
GUTPELA SAVE I KAM LONG BAIBEL | JOP 34-35
Taim Hevi i Painim Ol Gutpela Man
God i Gat Wanem Ol Pasin?
Oltaim God i save mekim stretpela pasin. Olsem na, “God i no inap tru long mekim pasin nogut, God i Gat Olgeta Strong i no inap mekim pasin i no stret. Nogat tru!” (Jop 34:10) Kot bilong Jehova i stret, man bilong raitim song i tok: “Yu bai skelim ol manmeri long stretpela pasin.” (Buk Song 67:4) “Jehova i save lukim bel bilong man,” olsem na man bilong tupela maus i no inap giamanim em, oltaim em i save lukim gutpela pasin bilong man na mekim stretpela kot. (1 Samuel 16:7) Na tu, God i lukim ol pasin i no stret na olgeta pasin korapsen, na em i promis olsem klostu “ol man nogut . . . bai raus olgeta long graun.”—Provep 2:22.
Wanem Ol Samting Bai Pinis Taim Kingdom Bilong God i Kam?
5 Jehova bai mekim wanem? Long nau, Jehova i opim rot long ol man nogut i ken senisim pasin nogut bilong ol. (Ais. 55:7) Taim i no kamap yet long God bai skelim olgeta wan wan bilong ol. God i skelim pinis pasin nogut bilong dispela haptaim yumi stap long en. Tasol olsem wanem long ol man husat i no laik senisim pasin bilong ol na ol i wok yet long sapotim ol pasin nogut bilong dispela graun i go inap long taim bilong traipela hevi tru? Jehova i tok promis olsem em bai pinisim olgeta manmeri i save mekim pasin nogut. (Ritim Song 37:10.) Ating ol man nogut i ting olsem ol bai abrusim bagarap. Planti bilong ol i save haitim ol pasin nogut ol i mekim, na ol i no kisim panismen long han bilong lo. (Jop 21:7, 9) Tasol Baibel i tok: “God i save lukim olgeta pasin bilong yumi manmeri na olgeta hap yumi go long en. Na i no gat wanpela ples i tudak olgeta long ai bilong en, em ol man bilong mekim pasin nogut i ken i go hait long en na God i no inap lukim ol.” (Jop 34:21, 22) Ol i no inap hait long ai bilong God Jehova. I no gat man inap giamanim em, na i no gat wanpela ples i tudak olgeta na i pasim God long lukim pasin nogut bilong ol man. Bihain long Armagedon, yumi no inap lukim ol man nogut. Ol bai pinis olgeta!—Sng. 37:12-15.
Bai Yu Larim Wanpela Samting i Pundaunim Yu na Yu No Bihainim Jisas?
19 Yu inap lukim wankain hevi i stap long nau? Yes. Planti man long nau i no laikim yumi bikos yumi no insait long ol wok politik. Ol i laik bai yumi mas vot long taim bilong ileksen. Tasol yumi save olsem long ai bilong Jehova, sapos yumi vot long wanpela lida bilong graun long bosim yumi, i olsem yumi sakim wok bos bilong God. (1 Sml. 8:4-7) Ol man i laik bai yumi bildim ol skul na ol haus sik na mekim ol wok bilong helpim ol tarangu lain. Ol i sakim ol tok yumi autim bikos yumi putim wok autim tok i stap nambawan bikpela samting, na yumi no tingting long stretim ol hevi bilong nau.
20 Yumi ken mekim wanem na bai yumi no ken pundaun? (Ritim Matyu 7:21-23.) Nambawan samting long yumi em long mekim wok em Jisas i bin tokim yumi long mekim. (Mat. 28:19, 20) Yumi no ken tru larim ol samting bilong wok politik na ol wok bilong stretim ol hevi bilong dispela graun i pulim nabaut tingting bilong yumi. Em tru olsem yumi laikim tru ol manmeri na yumi pilim hevi bilong ol, tasol nambawan gutpela rot bilong helpim ol em long skulim ol long Kingdom Bilong God, na helpim ol long kisim pasin bilong pas gut wantaim Jehova.
Mekim Wok Painimaut
Pasin Bilong Yu Long Volantia i Ken Litimapim Nem Bilong Jehova!
3 Jehova i no stretim Elihu taim Elihu i askim olsem: “Sapos yu mekim stretpela pasin oltaim, dispela bai i helpim God olsem wanem? Na em bai i kisim wanem gutpela samting long han bilong yu?” (Jop 35:7) Yu ting tok bilong Elihu i makim olsem hatwok bilong yumi bai lus nating taim yumi mekim wok bilong God? Nogat. Tok bilong em i makim olsem Jehova i no sot long wanpela samting na em i nidim yumi long mekim wok bilong em. Jehova i gat olgeta samting. I no olsem em i nidim wok bilong yumi long mekim em i kamap maniman, o kisim bikpela strong moa. Tasol God i givim yumi save, strong, na ol gutpela pasin, na em i skelim hau yumi yusim ol dispela samting.
JANUERI 15-21
GUTPELA SAVE I KAM LONG BAIBEL | JOP 36-37
Wai na Yu Ken Bilipim Promis Bilong God Long Laip Oltaim
Yu Ting Yumi Inap Save Gut Long God?
GOD I SAVE STAP OLTAIM OLTAIM: Baibel i skulim yumi olsem God bai stap “oltaim oltaim.” (Song 90:2) God i no gat kirap bilong em na pinis bilong em. Baibel i tok yumi ol man i “no inap painimaut hamas krismas bilong en.”—Jop 36:26.
Hau dispela i helpim yu: God i tok promis olsem sapos yu kisim save long em bai yu kisim laip oltaim. (Jon 17:3) Yumi inap bilipim dispela tok promis, long wanem, Baibel i tok God em i “King bilong oltaim oltaim.”—1 Timoti 1:17.
Yu Amamas Long Ol Presen God i Givim?
6 Wara i no kamap ais bikos graun i sindaun long rait mak longwe long san. Sapos graun i stap klostu liklik moa long san, olgeta wara bai drai na graun bai hot tumas na ol samting i no inap i stap laip long en. Sapos graun i stap longwe liklik moa long san, olgeta wara bai kamap ais, na sno na ais bai karamapim graun olgeta. Jehova i putim graun long rait mak, olsem na raun bilong wara inap sapotim laip long graun. San i save mekim solwara, ol hanwara, na ol raunwara i kamap hot na i go antap olsem win, na ol dispela win i save bung na kamapim klaut. Long olgeta wan wan yia, san i save hatim skel bilong wara inap olsem planti milion lita na wara i save trip i go antap olsem win. Dispela wara i save trip i stap long ples antap inap olsem 10-pela de, na bihain em i save pundaun olsem ren o sno. Taim ren o sno i pundaun, wara i save ron i go bek long solwara na ol hanwara na ol raunwara, na wara i save mekim gen raun bilong en. Jehova i disainim dispela raun bilong wara, na dispela i soim klia olsem em i gat savetingting na bikpela strong.—Jop 36:27, 28; Ekl. 1:7.
Mekim Bilip Kristen Bilong Yu i Stap Strong
16 Bilip bilong yumi long kisim laip oltaim em wanpela gutpela presen tru i kam long God. Yumi amamas long wetim wanpela gutpela taim tru bai kamap bihain—em wanpela promis yumi save em bai kamap tru. Dispela bilip i stap olsem anka na em i helpim yumi long sanap strong taim ol hevi i painim yumi, taim ol man i birua na mekim nogut long yumi, na tu, taim dai i laik painim yumi. Na dispela bilip i olsem hat kapa, em i banisim tingting bilong yumi na bai yumi ken sakim ol tingting i no stret na holimpas ol tingting i stret. Bilip bilong yumi em Baibel i as bilong en i helpim yumi long go klostu long God, na tu, em i kamapim klia olsem God i laikim yumi tru. Yumi kisim gutpela helpim taim yumi mekim bilip bilong yumi i stap strong.
Mekim Wok Painimaut
it-1 492
Kominikesen
Long ol kantri em Baibel i stori long en long bipo, ol man i save serim ol infomesen na aidia long kain kain rot. Planti taim ol nius long hap bilong ol na ol nius long ol longwe ples i save kamap long rot bilong ol man i karim tok i go i kam. (2Sm 3:17, 19; Jop 37:20) Ol man i save raun i go long ol longwe ples, planti taim ol i raun olsem grup. Dispela lain i save tokim ol man long ol samting i kamap long ol longwe ples taim ol i stop long ol taun o ples samting namel long rot bilong painim kaikai, wara, na ol narapela samting. Palestain i stap namel long Esia, Afrika, na Yurop, so ol man i save i go i kam long dispela hap bilong i go long ol longwe ples. Olsem na em isi long ol manmeri long Palestain i harim stori bilong ol samting i kamap long ol narapela kantri. Planti taim ol i harim stori bilong ol samting i kamap long kantri bilong ol yet na ol longwe ples taim ol i raun long ples maket long taun.
JANUERI 22-28
GUTPELA SAVE I KAM LONG BAIBEL | JOP 38-39
Yu Save Lusim Haptaim Long Kisim Save Kriesen?
Yu Redi Long Wetim Jehova Long Mekim Samting?
7 Taim Baibel i stori long hau Jehova i bin wokim graun, Baibel i tok em i bin “putim ol mak bilong graun,” na em i sindaunim gut “ol pos bilong strongim graun,” na em i “putim ston bilong kona bilong en.” (Jop 38:5, 6) Na tu, em i lusim haptaim long skelim gen ol wok bilong em. (Stt. 1:10, 12) Yu ting ol ensel i pilim olsem wanem taim ol i lukim ol nupela samting Jehova i wokim? Ating ol i amamas tru! Em as na wanpela taim ol i “amamas na singaut.” (Jop 38:7) Yumi lainim wanem samting? Jehova i wokim ol dispela samting insait long planti tausen yia, tasol taim Jehova i lukim na skelim gut olgeta samting em i bin wokim, em i tok ol i “gutpela tru.”—Stt. 1:31.
Kirap Bek i Soim Ol Pasin Bilong God—Pasin Laikim, Savetingting, na i No Les Kwik
2 Namba 1: Jehova i wokim Pikinini bilong em, Jisas. Long rot bilong Jisas, “God i wokim olgeta arapela samting,” na em i wokim tu planti milion ensel. (Kol. 1:16) Jisas i amamas tru long wok wantaim Papa bilong em. (Prov. 8:30) Na ol ensel tu i amamas. Ol i lukluk i stap taim Jehova na Jisas, em Saveman Bilong Wok, i wokim ol samting long ples antap na long graun. Ol ensel i mekim wanem? Ol i “amamas na singaut” taim God i wokim graun, na ol i amamas long olgeta wan wan samting God i wokim, na ol i amamas tu taim em i wokim ol manmeri. (Jop 38:7; Prov. 8:31) Olgeta samting Jehova i wokim i kamapim klia pasin laikim na savetingting bilong em.—Sng. 104:24; Rom 1:20.
Kisim Sampela Save Moa Long Jehova Long Rot Bilong Kriesen
8 Yumi ken trastim Jehova. Jehova i helpim Jop long trastim Em moa yet. (Jop 32:2; 40:6-8) Taim God i toktok long Jop, em i stori long planti samting em i bin wokim, dispela i makim tu ol sta, ol klaut, na strong bilong laitning. Na tu, Jehova i stori long ol animal olsem ol wel bulmakau, na ol hos. (Jop 38:32-35; 39:9, 19, 20) Olgeta dispela samting i soim bikpela strong bilong God, na tu, ol i soim olsem em i gat pasin laikim na bikpela savetingting. Dispela toktok i kamap namel long tupela i mekim na Jop i trastim moa yet Jehova. (Jop 42:1-6) Olsem tasol, taim yumi lukim gut kriesen, dispela i kirapim yumi long tingim olsem Jehova i gat bikpela savetingting na bikpela strong moa winim yumi ol man. Na em bai pinisim tru olgeta hevi bilong yumi. Dispela i ken strongim pasin bilong yumi long trastim em.
Mekim Wok Painimaut
it-2 222
Man Bilong Givim Lo
Jehova Olsem Man Bilong Givim Lo. Jehova wanpela tasol em Man Bilong Givim Lo long heven na graun. Em yet i putim ol lo i bosim ol samting em i bin wokim, ol samting i no gat laip (Jop 38:4-38; Sg 104:5-19), na ol animal. (Jop 39:1-30) Na tu, Jehova i wokim man, olsem na man i stap aninit long ol lo i bosim ol samting long ples antap na long graun, na bikos man yet inap skelim na wokim tingting long ol samting, em inap lotuim God na stap aninit long ol lo God i putim long pasin em i mas bihainim. (Ro 12:1; 1Ko 2:14-16) Na tu, lo bilong Jehova i bosim ol ensel.—Sg 103:20; 2Pi 2:4, 11.
Man i no inap brukim ol lo i bosim ol samting long ples antap na graun. (Jer 33:20, 21) Ol lo i bosim ol samting yumi inap lukim long yunives na ol dispela lo i no senis, olsem na save ol saientis i gat long ol dispela lo i stiaim ol long mesarim gut raun bilong mun, ol planet, na ol narapela samting long ples antap. Taim man i brukim ol dispela lo kwiktaim hevi bai painim em. Olsem tasol, ol lo God i givim bilong stiaim pasin bilong yumi i no inap senis na hevi bai painim man husat i brukim ol dispela lo. Ating hevi i no inap painim man kwiktaim taim em i brukim lo God i givim bilong stiaim yumi, tasol em i bikpela samting tru long yumi bihainim ol dispela lo wankain olsem yumi save bihainim ol lo i bosim ol samting em i wokim. “Man i no inap trikim God. Samting man i planim, dispela samting tasol em bai kamautim.”—Ga 6:7; 1Ti 5:24.
JANUERI 29–FEBRUERI 4
GUTPELA SAVE I KAM LONG BAIBEL | JOP 40-42
Skul Yumi Kisim Long Stori Bilong Jop
“Husat i Save Long Tingting Bilong Bikpela?”
4 Taim yumi tingim tingim long bel ol wok na pasin bilong Jehova, yumi no ken tru bihainim ol lo ol man i putim bilong skelim God. Tok Jehova i mekim long Song 50:21 i stori long dispela kain pasin. Em i tok: “Yupela i ting mi wankain olsem yupela yet.” Wanpela saveman bilong Baibel i bin mekim kain tok olsem winim 175 yia i go pinis, olsem: “Ol man i save bihainim tingting bilong ol yet long skelim God, na ol i ting God i mas bihainim ol wankain lo olsem ol i ting ol man i mas bihainim.”
5 Yumi mas was gut, nogut yumi larim ol lo yumi yet i putim na laik bilong yumi yet i stiaim tingting yumi gat long Jehova. Bilong wanem dispela em i bikpela samting? Taim yumi stadi long Baibel, long tingting bilong yumi ol man i gat sin, yumi inap ting olsem sampela pasin bilong Jehova i no stret. Lain Israel bilong bipo i bin i gat kain tingting olsem na ol i kisim tingting kranki long ol pasin Jehova i mekim long ol. Lukim tok Jehova i mekim: “Yupela i save tok olsem, ‘Dispela pasin Bikpela i save mekim, em i no stret.’ Orait yupela Israel, harim gut tok bilong mi. Yupela i ting pasin bilong mi i no stret, a? Nogat. Pasin bilong yupela tasol i no stret.”—Ese. 18:25.
6 Wanpela rot bilong abrusim pasin bilong skelim Jehova long ol lo yumi yet i putim, em yumi mas save olsem tingting bilong yumi i sot na sampela taim i kranki. Jop i mas kisim skul long dispela samting. Taim Jop i karim bikpela hevi, bel bilong em i bagarap stret na em i tingting long em yet tasol. Em i no tingim moa ol bikpela tok i bin kamap. Tasol long gutpela pasin Jehova i helpim em long kisim stretpela tingting. Jehova i tromoi 70 narapela narapela askim long Jop em Jop i no inap bekim wanpela bilong ol, na long dispela rot, Jehova i kamapim klia olsem tingting bilong Jop i sot. Jop i mekim pasin daun, na i stretim tingting bilong em.—Ritim Jop 42:1-6.
Tingim Bikpela Tok i Bin Kamap
12 Yu ting Jehova i bihainim hatpela pasin na givim tok kaunsel long Jop bihain long em i karim bikpela hevi? God i no mekim hatpela pasin, na Jop tu i no holim kain tingting olsem. Maski Jop i karim pen na hevi, em i mekim ol gutpela tok long God. Jop i tok: “Mi sem tru long mi yet na long olgeta tok mi bin mekim. Na mi sindaun long das na long sit bilong paia, bilong soim yu olsem mi tanim bel pinis.” Jop i mekim dispela tok bikos Jehova i givim gutpela tok kaunsel long em. (Jop 42:1-6) Na tu, yangpela pren bilong Jop, em Elihu, i givim ol gutpela tok bilong stretim tingting bilong Jop. (Jop 32:5-10) Taim Jop i bihainim tok kaunsel bilong Jehova na kisim gen stretpela tingting, God i tokaut olsem em i amamas long pasin bilong Jop long i stap gut long em na karim pen na hevi.—Jop 42:7, 8.
“Bilip na Wetim Jehova i Helpim Yu”
17 Jop em wanpela bilong ol wokman bilong Jehova husat i strongim bel na sanap strong long taim bilong ol bikpela hevi. Long pas aposel Pol i raitim i go long ol Kristen long Hibru, em i kolim nem bilong planti arapela wokman bilong Jehova na em i tok ol i “bikpela lain manmeri i olsem bikpela klaut.” (Hib. 12:1) Ol i bin karim ol bikpela hevi; tasol long laip olgeta bilong ol, ol i stap gut long Jehova. (Hib. 11:36-40) Yu ting pasin bilong ol long sanap strong na ol hatwok bilong ol i lus nating? Nogat tru! Maski long haptaim ol i stap laip yet ol i no lukim God i truim ol tok promis bilong em, ol i wok yet long bilip na wetim Jehova. Na ol i save tru olsem Jehova i orait long ol, olsem na ol i bilip tru olsem ol bai lukim ol tok promis bilong em i kamap tru. (Hib. 11:4, 5) Ol eksampel bilong ol i ken strongim tingting bilong yumi long wok yet long bilip na wetim Jehova.
18 Long nau yumi stap long haptaim we ol pasin bilong graun i wok long i go nogut moa. (2 Tim. 3:13) Satan i no pinisim yet wok bilong em long mekim ol samting bilong traim ol wokman bilong God. Maski wanem ol hevi bai painim yumi long bihain, yumi ken tingting strong long givim bel tru long mekim ol wok bilong Jehova, na yumi ken save tru olsem “yumi bilip long God i gat laip.” (1 Tim. 4:10) Tingim, ol blesing God i givim long Jop i soim olsem “Jehova i gat pasin bilong sori tru na marimari.” (Jems 5:11) Yumi tu i ken wok yet long stap gut long Jehova, na yumi ken save tru olsem em bai givim gutpela pe long “ol man i wok strong long painim em.”—Ritim Hibru 11:6.
Mekim Wok Painimaut
it-2 808
Tok bilas
Jop em man i bihainim stretpela pasin na stap gut long God taim ol narapela i tok bilas long em. Tasol em i kisim tingting kranki na mekim popaia, olsem em i kisim tok bilong stretim em. Elihu i tokim em: “Wanem arapela man i bin mekim wankain pasin olsem Jop? Jop i save amamas long tok bilas wankain olsem man i amamas tru long dring wara.” (Jop 34:7) Jop i tingim tumas gutnem bilong em na i no bilong God, na em i laik soim olsem pasin bilong em i stret na em i no tingim stretpela pasin bilong God. (Jop 35:2; 36:24) Taim 3-pela giaman pren bilong Jop i tok bilas long em, Jop i tingim olsem ol i mekim ol dispela tok long em yet na i no long God. Long dispela rot em i olsem man husat i larim ol narapela i tok bilas long em na sutim tok long em na em i amamas, wankain olsem man i amamas taim em i dring wara. Bihain God i tokim Jop olsem tok ol dispela man bilong tok bilas (long laspela tok) i mekim long God em ol tok giaman. (Jop 42:7) Olsem tasol, Jehova i tokim profet Samuel taim ol Israel i strong long i gat wanpela king: “Yu no ken ting ol i les long yu na ol i laik rausim yu. Nogat. Ol i no laik mi stap king bilong ol na ol i rausim mi.” (1Sm 8:7) Na Jisas i tokim ol disaipel bilong em: “Ol man bilong olgeta lain bai heitim yupela [i no long nem bilong yupela, tasol]. . . nem bilong mi i stap long yupela.” (Mt 24:9) Taim Kristen i tingim ol dispela samting, orait dispela bai helpim em long holim stretpela tingting na karim hevi bilong tok bilas na kisim pe bilong em long bihain.—Lu 6:22, 23.
FEBRUERI 5-11
GUTPELA SAVE I KAM LONG BAIBEL | BUK SONG 1-4
Sapotim Kingdom Bilong God
“Bai Mi Seksekim Olgeta Kantri”
8 Ol manmeri i mekim wanem samting long tok yumi autim? Planti manmeri i no laik putim yau long tok yumi autim. (Ritim Buk Song 2:1-3.) Ol kantri i belhat tru. Ol i no laik sapotim dispela King em Jehova i makim. Ol i no tingim tok bilong Kingdom yumi autim olsem “gutnius.” Sampela kantri i putim tambu long wok bilong yumi long autim tok! Maski planti bikman bilong ol dispela kantri i tok olsem ol i lotuim God, ol yet i no laik lusim strong na namba ol i holim. Wankain olsem ol bikman long taim bilong Jisas i bin mekim, ol bikman long nau i sakim dispela Man em Jehova i makim long rot bilong mekim nogut long ol disaipel bilong em.—Apo. 4:25-28.
Stap Gut Long Bilip Maski Ol Manmeri i Brukim Lain
11 Mani kago. Sapos yumi lusim bikpela taim na strong bilong yumi long wok mani, em bai isi tru long yumi pundaun long bilip taim traim i painim yumi. Ruth em wanpela sista long Malawi. Em i tingim sampela Witnes i lusim bilip taim traim i painim ol long 1970. Ruth i tok: “Ol i no inap long lusim gutpela sindaun bilong ol. Sampela i bin go wantaim mipela long kalabus, tasol bihain ol i joinim wok politik na ol i go bek long ples. Ol i bin mekim olsem bikos ol i les long stap long kem bilong ol refiuji we laip i hatwok tru.” Tasol planti Witnes moa i bin sanap strong long bilip, maski i gat hevi bilong mani o planti kago bilong ol i bin lus.—Hib. 10:34.
Mekim Wok Painimaut
it-1 425
Pipia bilong wit
Liklik skin i save karamapim ol grein bilong bali na wit samting. Em tru olsem Baibel i yusim skin bilong grein olsem tok piksa, tasol em i kamapim klia pasin bilong ol lain long bipo long krungutim grein. Bihain long ol i katim wit o bali samting long gaden, dispela skin bilong gutpela grein bai kamap pipia, olsem na i stret em i makim samting i no gat nem, i no gat wok, o ol pipia samting we man i mas rausim long ol gutpela samting na tromoi i go.
Pastaim, ol i krungutim wit samting na skin bai bruk na lusim grein. Bihain ol i yusim fok samting long tromoi ol grein i go antap na bai win i bloim skin bilong grein olsem das. Dispela tok piksa i stret long hau God Jehova i rausim ol apostet namel long lain bilong em, na tu, hau em i rausim ol man nogut na ol kantri i birua long lain bilong em. (Jop 21:18; Sg 1:4; 35:5; Ai 17:13; 29:5; 41:15; Ho 13:3) Kingdom Bilong God bai krungutim ol birua bilong en olsem ol liklik samting na rausim ol olsem skin bilong wit samting.—Da 2:35.
Ol i save bungim ol pipia skin bilong grein na kukim na bai win i no ken bloim i kam bek na bagarapim ol gutpela grein. Olsem tasol, Jon Bilong Baptais i tok profet long paia bai bagarapim ol lotu giaman—Man Bilong Krungutim Wit, Jisas Krais, bai bungim ol wit, “tasol em bai kukim ol pipia bilong wit long paia i no save dai.”—Mt 3:7-12; Lu 3:17.
FEBRUERI 12-18
GUTPELA SAVE I KAM LONG BAIBEL | BUK SONG 5-7
Stap Gut Long God Maski Ol Narapela i No Mekim Olsem
Hau Yumi Ken Kisim Strong Long Ol Tok Bilong Baibel
7 Olsem wanem? Wanpela pren o wanpela insait long famili i bin birua long yu? Sapos olsem, yu ken kisim sampela helpim taim yu skelim stori bilong pikinini man bilong King Devit—em Apsalom—husat i bin birua long papa bilong em na em i bin traim long stilim wok king bilong papa bilong em.—2 Sml. 15:5-14, 31; 18:6-14.
8 (1) Beten. Tingim stori yu ritim, na tokim Jehova long yu bin pilim olsem wanem taim ol narapela i bin birua long yu. (Sng. 6:6-9) Autim stret tingting i stap long bel bilong yu. Bihain askim Jehova long helpim yu long painim ol stiatok we inap stiaim yu long karim dispela hevi i painim yu.
Save Tru Olsem Yu Holim Tok i Tru
3 Yumi mas soim pasin laikim long ol narapela, tasol i gat sampela samting moa yumi mas mekim. Wai na yumi tok olsem? Tingim samting inap kamap sapos wanbilip i mekim bikpela rong—ating em wanpela elda o painia. O olsem wanem sapos wanbilip i bagarapim bel bilong yu? O ating wanpela i kamap apostet, na em i sutim tok olsem yumi no holim tok i tru. Sapos kain samting olsem i kamap, yu ting yu bai larim dispela i pundaunim yu na yu stop long mekim wok bilong Jehova? Skul yumi kisim em olsem: Sapos yu larim pasin bilong ol man i stiaim bilip bilong yu long God, na yu no tingim pasin bilong yu yet long pas gut wantaim Jehova, bilip bilong yu i no inap kamap strong. Bilip bilong yu i olsem haus; yu gat filings na tingting bilong yu yet, na tu, yu mas i gat save bilong ol strongpela tok i tru. Yu mas save tru olsem ol tok Baibel i skulim yu long en long Jehova, em ol tok i tru.—Rom 12:2.
4 Jisas i tok sampela man bai harim tok i tru na ol bai “amamas long en,” tasol taim traim i kamap, ol bai lusim bilip. (Ritim Matyu 13:3-6, 20, 21.) Ating ol i no luksave olsem ol bai karim ol hevi taim ol i kamap disaipel bilong Jisas. (Mat. 16:24) O ol i ting olsem taim ol i kamap Kristen, ol bai i gat gutpela sindaun—ol i ting ol bai kisim ol blesing na i no gat hevi bai painim ol. Tasol yumi olgeta i gat sin, olsem na hevi bai kamap. Sindaun bilong yumi inap senis, na dispela inap daunim amamas bilong yumi inap sampela haptaim.—Sng. 6:6; Ekl. 9:11.
Mekim Wok Painimaut
it-1 995
Matmat
Long Rom 3:13, aposel Pol i kolim tok i stap long Buk Song 5:9 na i tok, maus bilong ol man bilong tok giaman i olsem “matmat i op i stap.” Wankain olsem matmat i pulap long ol man i dai pinis na ol samting i save bagarap, toktok bilong ol inap kilim man na bagarapim man.—Skelim Mt 15:18-20.
FEBRUERI 19-25
GUTPELA SAVE I KAM LONG BAIBEL | BUK SONG 8-10
“Jehova, Long Bel Olgeta Mi Bai Litimapim Nem Bilong Yu”
Amamas Olsem Yu Insait Long Famili Bilong Jehova
6 Jehova i wokim dispela graun olsem wanpela spesel ples bilong yumi long stap long en. Paslain tru long Jehova i wokim namba wan man, em i redim graun bilong ol manmeri i ken stap long en. (Jop 38:4-6; Jer. 10:12) Jehova i tingim ol manmeri na em i laik ol i stap amamas, olsem na em i wokim planti gutpela samting bilong ol manmeri i ken enjoim. (Sng. 104:14, 15, 24) Em i lusim sampela haptaim long lukim ol wok bilong em na em i “lukim olsem ol samting em i wokim i gutpela.” (Stt. 1:10, 12, 31) Em i onarim ol manmeri taim em i tokim ol long stap “bos” bilong olgeta gutpela samting em i wokim long graun. (Sng. 8:6) God i tingting pinis olsem ol manmeri i gutpela olgeta bai amamas long lukautim ol dispela samting inap oltaim oltaim. Yu save tok tenkyu long Jehova long ol dispela gutpela promis?
Yu Amamas Long Ol Presen God i Givim?
10 Wanpela rot bilong soim tenkyu bilong yumi long presen bilong toktok em olsem, yumi mas eksplenim bilip bilong yumi long ol manmeri i bilip long evolusen—eksplenim risen na yumi bilip olsem God i wokim olgeta samting. (Sng. 9:1; 1 Pita 3:15) Ol i tok graun na olgeta samting i stap laip long en i kamap nating, na i no gat Man i bin disainim ol. Yumi inap yusim Baibel na sampela poin long dispela atikol long sambai long Papa bilong yumi long heven, na eksplenim bilip bilong yumi long ol lain i redi long putim yau—stori gut long risen na yumi bilip tru olsem Jehova em Krieta bilong heven na graun.—Sng. 102:25; Ais. 40:25, 26.
Yu Stap “Gutpela Eksampel Long . . . Pasin Bilong Yu Long Toktok”?
13 Givim bel long singsing. Taim yumi singim ol Kingdom song bilong yumi, nambawan samting yumi laik tingim em olsem yumi laik preisim Jehova. Wanpela sista nem bilong em Sara, em i no ting olsem em i gat gutpela nek bilong singsing. Maski i olsem, em i laik preisim Jehova long rot bilong singsing. Olsem na em i luksave olsem, i gutpela long em i redim singsing tu long haus, wankain olsem em i save redim ol narapela hap bilong miting. Em i save mekim prektis long ol singsing na traim long lukim hau ol tok bilong singsing i go gut wantaim topik em ol bai stori long en long miting. Em i tok: “Dispela i helpim mi long putim tingting long ol tok bilong singsing na mi no tingting tumas long nek bilong mi i krai olsem wanem.”
Mekim Wok Painimaut
it-1 832
Pinga
Baibel i save yusim dispela tok “pinga” taim em i stori long ol samting God i mekim, olsem long taim em i raitim Tenpela Lo long 2-pela fletpela ston (Ki 31:18; Lo 9:10), wokim ol mirakel (Ki 8:18, 19), na long taim em i wokim ol samting long ples antap (Sg 8:3). Pinga bilong God we em i yusim long wokim olgeta samting long heven na long graun i makim holi spirit, o strong bilong em, olsem stori bilong buk Stat long taim God i wokim ol samting, Baibel i tok long strong bilong God (ruʹach, “spirit”) i go i kam antap long wara. (St 1:2) Tasol Ol Skripsa Grik i kamapim klia samting em dispela tok piksa i makim, buk Matyu i stori long Jisas i rausim ol spirit nogut long “strong bilong God” na Luk i tok olsem dispela i kamap long rot bilong “pinga bilong God.”—Mt 12:28; Lu 11:20.
FEBRUERI 26–MAS 3
GUTPELA SAVE I KAM LONG BAIBEL | BUK SONG 11-15
Piksaim Yu Yet Long Nupela Taim God Bai Kamapim
Sampela Bikpela Tok Bilong Buk 1 Bilong Buk Song
11:3 Taim dispela ves i tok long ol manmeri i no save mekim stretpela pasin, dispela i makim wanem samting? Dispela i makim olsem i no gat lo na oda na ol man i mekim pasin i no stret. Long kain taim olsem, ol “stretpela man” i mas bilip tru long God.—Song 11:4-7.
Pasin Bilong Pait Na Bagarapim Man Bai Pinis?
Baibel i tok promis olsem klostu nau God bai pinisim ol man i save pait na bagarapim ol narapela. Ol i wetim “de bilong bikpela kot, na ol man i sakim tok bilong God, ol bai bagarap olgeta.” (2 Pita 3:5-7) Ol man bilong pait na bagarapim man bai i no mekim nogut moa long ol arapela. Hau na yumi inap bilip tru olsem God i laik pinisim pasin bilong pait na bagarapim man?
Baibel i tok, God “i heitim tru ol man i laikim pasin pait.” (Song 11:5, NW ) Krieta bilong yumi i laikim gutpela na stretpela pasin. (Song 33:5; 37:28) Em risen na God bai pinisim tru ol man bilong pait na bagarapim narapela.
Are You Willing to Wait Patiently?
15 Bilong wanem Devit i no les kwik? Long Buk Song sapta 13, em i tok: “Mi bilip bai yu marimari long mi oltaim. Na mi amamas long yu bai helpim mi. Yes, bai mi singim song bilong litimapim nem bilong Bikpela. Long wanem, em i bin mekim gut tru long mi.” (Sng. 13:5, 6) Devit i bilip olsem Jehova bai kisim em bek, na tu, em i tingim ol samting Jehova i bin mekim bilong lukautim em. Devit i save olsem pasin bilong i no les kwik bai kamapim gutpela samting.
kr 236 par. 16
Kingdom i Kamapim Laik Bilong God Long Graun
16 Gutpela sindaun. Bihain bai naispela promis i stap long Aisaia 11:6-9 bai kamap tru long sait bilong bilip na long i stap bilong ol man. Ol manmeri na ol pikinini bai stap seif maski ol i go long wanem wanem hap bilong graun. I no gat man o animal bai mekim nogut long ol. Piksaim wanpela taim bai kamap we yu bai lukim dispela graun olgeta i stap olsem ples tru bilong yu we yu ken swim long ol bikpela wara, ol raunwara, na long ol solwara; raun long ol ples maunten; na wokabaut long ol veli na i no gat wanpela samting yu bai pret long en. Na long taim nait i kamap, yu bai i no tingting planti. Tok bilong Esekiel 34:25 bai kamap tru, olsem na ol manmeri bilong God inap “stap gut long ples nating na slip long ol bikbus.”
Mekim Wok Painimaut
Yu Mekim Sampela Senis?
12 Sori tru, planti man long nau i bihainim wankain tingting olsem Pol i bin stori long en. Ol i ting olsem pasin bilong bihainim ol lo na ol stiatok em samting bilong bipo tasol, olsem na long nau i no gat man i mas fosim ol narapela long bihainim ol lo na ol stiatok. Planti ol tisa na ol papamama i larim ol pikinini long bihainim laik bilong ol yet. Ol i skulim tu ol pikinini olsem wan wan man i stap fri long makim wanem samting i stret na wanem samting i no stret. Ol dispela kain manmeri i ting olsem i no gat rot long save long wanem samting i stret na wanem samting i no stret. Na tu, planti man husat i tok ol i bilip long God, ol i ting i no gat wok long bihainim tok bilong God. (Sng. 14:1) Dispela kain tingting inap nogutim ol Kristen. Sapos yumi no was gut, yumi inap lusim pasin bilong bihainim ol tok i kam long oganaisesen bilong God na yumi inap kirap long komplein long ol samting yumi no laikim. O ating yumi no wanbel long sampela tok Baibel i mekim long ol samting bilong kisim amamas, pasin bilong yusim Intenet, na kisim bikpela skul.