God i Wokim Heven na Graun

Jehova God em Krieta bilong yumi. Em i wokim olgeta samting, ol samting yumi inap lukim na ol samting yumi no inap lukim. Paslain long em i wokim ol samting yumi inap lukim, em i wokim planti, planti ensel. Yu save ol ensel i husat? Jehova i wokim ol ensel na ol i kain olsem em. Yumi no inap lukim ol, wankain olsem yumi no inap lukim God. Fes ensel Jehova i wokim i kamap helpim bilong em. Dispela ensel i helpim Jehova taim em i wokim ol sta, ol planet, na olgeta narapela samting. Wanpela bilong ol dispela planet, em graun, naispela ples bilong yumi.

Bihain Jehova i redim graun bilong ol animal na ol man i ken stap long en. Em i wokim san na lait bilong en i givim lait long graun. Em i wokim ol maunten, solwara, na ol riva.

Wanem samting i kamap neks? Jehova i tok: ‘Mi bai wokim gras na ol kain kain diwai.’ Planti kain kain prut, ol kumu samting, na ol plaua i stat long gro. Bihain Jehova i wokim olgeta animal—ol animal i save flai, swim, krol, na ol narapela kain kain animal. Em i wokim sampela i liklik olsem ol rabit, na ol bikpela animal olsem ol elefan. Wanem feiveret animal bilong yu?

Bihain Jehova i tokim fes ensel: “Nau yumi mas wokim man.” Ol man bai narapela kain long ol animal. Ol inap wokim ol samting. Ol inap toktok, lap, na prea. Ol inap lukautim graun na ol animal. Yu save husat em fes man? Yumi ken lukim.