Josua i lukautim ol manmeri bilong Jehova inap planti yia, na bihain em i dai taim em i gat 110 krismas. Long taim em i stap laip, ol Israel i lotuim Jehova. Tasol bihain long Josua i dai, ol i kirap long lotuim ol imis, wankain olsem lain Kenan. Ol Israel i no bihainim tok bilong Jehova, olsem na em i larim king bilong Kenan, nem bilong em Jabin, long putim hevi long ol. Planti taim ol manmeri i askim Jehova long helpim ol. So Jehova i givim ol nupela lida, Barak. Em inap helpim ol manmeri long go bek long Jehova.

Debora, em profet meri, i salim tok long Barak i mas kam lukim em. Jehova i givim wanpela tok long Debora bilong tokim Barak: ‘Kisim 10,000 man, na go bungim ami bilong Jabin long Wara Kison. Long dispela hap bai yu pait na daunim Sisera, kepten bilong ami bilong Jabin.’ Barak i tokim Debora: ‘Mi bai go sapos yu kam wantaim mi.’ Debora i tok: ‘Mi bai go wantaim yu. Tasol yu mas save olsem yu no dispela man husat bai kilim Sisera. Jehova i tok wanpela meri bai kilim em.’

Debora i go wantaim Barak na lain ami bilong em long Maunten Tabor bilong redi long pait. Taim Sisera i harim dispela tok, kwiktaim em i bungim ol karis bilong pait na lain ami bilong em long veli daunbilo. Debora i tokim Barak: ‘Nau long dispela de Jehova bai helpim yu long winim pait.’ Barak na 10,000 lain bilong em i ron i go daun long maunten long bungim strongpela ami bilong Sisera.

Bihain Jehova i mekim Wara Kison i tait. Ol karis bilong pait bilong Sisera i pas long graun malumalum. Sisera i lusim karis bilong em na ran. Barak na lain ami bilong em i daunim ami bilong Sisera, tasol Sisera i ranawe! Em i ranawe na hait long haus sel bilong wanpela meri nem bilong em Jael. Jael i givim em milk long dring na karamapim em long wanpela blanket. Dispela man bilong pait i taiet na slip. Bihain Jael i wokabaut isi isi i go long em na hamarim wanpela sap diwai bilong pasim baklain bilong haus sel, i go insait long het bilong em. Sisera i dai.

Barak i kam bilong painim Sisera. Jael i kamaut long haus sel bilong em na tok: ‘Kam insait. Bai mi soim yu dispela man yu wok long painim.’ Barak i go insait na lukim Sisera i dai pinis na slip i stap. Barak na Debora i preisim Jehova long wanpela singsing bikos em i helpim ol Israel long winim pait long ol birua bilong ol. Inap 40 yia, ol Israel i stap bel isi.

Long taim bilong bikpela hangre long Israel, wanpela meri Israel nem bilong em Naomi, i go stap long Moap wantaim man na tupela pikinini man bilong ol. Bihain man bilong Naomi i dai. Ol pikinini bilong em i maritim Rut na Orpa, ol meri Moap. I no long taim, ol pikinini bilong Naomi tu i dai.

Taim Naomi i harim olsem bikpela hangre long Israel i pinis, em i laik go bek. Rut na Orpa i bihainim em, tasol long rot, Naomi i tokim ol: ‘Yutupela i bin stap gutpela meri marit long ol pikinini bilong mi na gutpela tambu meri bilong mi. Mi laik bai yutupela i marit gen. Go bek long Moap.’ Tupela meri i tok: ‘Mipela i laikim yu! Mipela i no laik lusim yu.’ Naomi i wok long tokim ol long go. Bihain, Orpa i go bek, tasol Rut i bihainim em. Naomi i tokim em: ‘Orpa i go bek long ol lain bilong em na ol god bilong em. Go wantaim em na go haus bilong mama bilong yu.’ Tasol Rut i tok: ‘Mi bai no inap lusim yu. Lain bilong yu bai i kamap lain bilong mi, na God bilong yu bai i kamap God bilong mi.’ Yu ting Naomi i pilim olsem wanem taim Rut i tok olsem?

Rut na Naomi i kamap long Israel long taim bilong kisim bali i redi long gaden. Wanpela taim, Rut i go bilong kisim ol hap bali i stap yet long gaden bilong wanpela man nem bilong em Boas, pikinini man bilong Rahap. Boas i harim olsem Rut em meri Moap na em i stap gut long Naomi. Boas i tokim ol wokman long lusim sampela liklik bali long gaden na bai Rut i ken kisim.

Long apinun, Naomi i askim Rut: ‘Yu wok long gaden bilong husat?’ Rut i tok: ‘Gaden bilong wanpela man nem bilong em Boas.’ Naomi i tokim em: ‘Boas em wanblut bilong man bilong mi. Yu mas wok long gaden bilong em wantaim ol yangpela wokmeri. Yu bai seif long hap.’

Rut i wok long gaden bilong Boas i go inap long taim bilong kisim bali i redi long gaden i pinis. Boas i luksave olsem Rut i save wok hat na em i gutpela meri tru. Long dispela taim bipo, sapos wanpela man i dai na i no gat ol pikinini man, wanblut bilong em inap maritim meri bilong em. So Boas i maritim Rut. Ol i gat wanpela pikinini man nem bilong em Obet, bihain em i kamap tumbuna man bilong King Devit. Ol pren bilong Naomi i amamas tru. Ol i tok: ‘Pastaim, Jehova i givim yu Rut, em i bin mekim gut long yu, na nau yu gat wanpela tumbuna pikinini man. Litimapim nem bilong Jehova.’