Ol Referens Bilong “Laip na Wok Autim Tok Miting Wok Buk”

Ol Referens Bilong Laip na Wok Autim Tok Miting Wok Buk

NOVEMBA 3-9

GUTPELA SAVE I KAM LONG BAIBEL SONG BILONG SOLOMON 1-2

Stori Bilong Pasin Laikim Tru

Yu Ting Pasin Laikim Inap i Stap Strong Yet?

⁹ Taim man na meri i mekim kontrak bilong marit, ol i mas i gat pasin laikim na pasin bilong tingim tru narapela narapela. Ol Kristen i mas i gat pasin laikim insait long marit bilong ol. Tasol pasin laikim bilong ol i wanem kain? Yu ting ol stiatok bilong Baibel i as bilong dispela pasin laikim? (1 Jon 4:8) Yu ting pasin laikim bilong ol i kain olsem pasin laikim i stap namel long ol wanfamili? Yu ting pasin laikim bilong ol i kain olsem pasin laikim i stap namel long 2-pela pren? (Jon 11:3) O yu ting pasin laikim bilong ol i kain olsem pasin laikim i stap namel long man na meri? (Snd. 5:15-20) Olgeta dispela pasin laikim i kirapim ol marit Kristen long laikim tru narapela narapela, na pasin laikim bilong ol i stap strong inap longpela taim. Toktok na pasin bilong man bai helpim meri long luksave olsem man i laikim em tru. Ol poroman marit i gat ol wok bilong mekim long olgeta wan wan de, tasol ol i no ken larim ol dispela samting i pasim ol long kamapim klia olsem ol i laikim tru narapela narapela! Dispela bai strongim marit na ol bai i stap amamas. Long sampela ples, ol papamama i save makim poroman marit bilong ol pikinini. Long ol kain marit olsem, ol poroman marit i no save gut yet long narapela narapela. Olsem na em i bikpela samting long man na meri i mas tokaut olsem ol i laikim narapela narapela, na dispela bai strongim pasin laikim namel long ol na marit bai i stap gut.

¹⁰ Sapos ol poroman marit i kamapim klia olsem ol i laikim narapela narapela, dispela inap helpim ol long narapela rot tu. King Solomon i tok long “wokim sampela bilas gol na ol arapela bilas silva” na givim long meri Sulam. Solomon i litimapim tru nem bilong meri Sulam na em i tok: “Pes bilong en i olsem san i laik kamap na i lait olsem biksan, na pes bilong en i klia tru olsem lait bilong mun.” (Sol. 1:9-11; 6:10) Tasol yangpela meri i laikim tumas wasman bilong sipsip, na em i stap gut long dispela wasman. Wanem samting i strongim meri Sulam na mekim gut bel bilong em taim em i stap longwe long wasman? Meri Sulam yet i stori long dispela samting. (Ritim Solomon 1:2, 3.) Em i tingim yet ol toktok na ol pasin em wasman i mekim bilong soim klia pasin laikim bilong em. Long tingting bilong meri Sulam, toktok na pasin bilong wasman i gutpela tumas na “i winim swit bilong gutpela wain” na i mekim bel bilong em i amamas, na nem bilong wasman i olsem “gutpela sanda” i gat switpela smel ol i kapsaitim long het bilong meri Sulam. (Sng. 23:5; 104:15) Tru tumas, taim man na meri i tingim bek ol gutpela tok na ol gutpela pasin bilong poroman marit, dispela inap strongim pasin laikim namel long tupela. Olsem na long olgeta taim, em i bikpela samting long ol poroman marit i mas mekim ol tok na ol pasin i soim klia olsem ol i laikim tru narapela narapela!

Mekim Wok Painimaut

w15 1/15 31 par. 11

Yu Ting Pasin Laikim Inap i Stap Strong Yet?

¹¹ Song Bilong Solomon i kamapim tu ol skultok we inap helpim ol Kristen i singel yet, na moa yet em ol Kristen husat i wok long painim poroman marit. Meri Sulam i no laikim Solomon, olsem na em i tokim ol meri long Jerusalem olsem: “Yupela i mas . . . mekim strongpela promis long mi, bai yupela i no ken kirapim bel bilong mitupela. Dispela i samting bilong mitupela yet.” (Sol. 2:7; 3:5) Em i mekim dispela tok, long wanem, i no stret long laikim nating wanpela man o meri. Olsem na sapos wanpela Kristen i laik marit, em i ken wet inap long em i bungim man o meri em i laikim tru.

NOVEMBA 10-16

GUTPELA SAVE I KAM LONG BAIBEL SONG BILONG SOLOMON 3-5

Ol Gutpela Pasin Em Bikpela Samting

w15 1/15 30 par. 8

Yu Ting Pasin Laikim Inap i Stap Strong Yet?

⁸ Taim wasman na meri Sulam i litimapim nem bilong narapela narapela, ol i no tingim tasol naispela skin bilong narapela narapela. Skelim tok wasman i mekim taim em i harim toktok bilong meri Sulam. (Ritim Solomon 4:7, 11.) Toktok bilong meri Sulam i olsem “hani i swit long maus,” na “i gutpela tumas olsem susu bilong dring.” Ol dispela hap tok i makim olsem toktok bilong em i nais tru olsem hani na milk. Olsem na taim wasman i tokim meri olsem, “yu naispela tumas [na] i no gat wanpela mak i stap long skin bilong yu,” dispela i makim olsem em i no tingim tasol gutpela skin bilong meri.

w00 11/1 11 par. 17

Tingting Bilong God Long Stretpela Pasin

¹⁷ Wanpela yangpela meri Sulam em tu i bin stap gut long Jehova. Em i yangpela na i gat naispela skin, na wanpela yangpela wasman bilong sipsip na maniman King Solomon bilong Israel ol i laikim em. Song Bilong Solomon i kamapim naispela stori bilong dispela yangpela meri bilong Sulam na olsem wanem em i bin stap stret, na long dispela as ol lain i save long em ol i tingim em olsem wanpela gutpela meri. Spirit bilong God i bin kirapim Solomon long raitim stori bilong dispela meri Sulam, maski meri i bin sakim em. Dispela wasman bilong sipsip em meri Sulam i laikim tumas, em i tingim tru pasin bilong meri Sulam long bihainim stretpela pasin. Em i tok meri Sulam i olsem “wanpela gaden i gat banis, na i no gat man i ken i go long en.” (Solomon 4:12) Long Israel long bipo ol gaden i gat kain kain sayor samting, na ol plaua i gat naispela smel, na ol bikpela diwai. Ol kain gaden olsem i gat banis i raunim, na bilong go insait i gat dua ol i save lokim. (Aisaia 5:5) Long tingting bilong yangpela wasman bilong sipsip, stretpela pasin na naispela skin bilong yangpela meri Sulam i kain olsem wanpela naispela gaden. Em i stap stret olgeta. Dispela meri bai laikim tru na givim bel bilong em long man bihain em bai maritim, na ol narapela man, nogat.

g04 12/22 9 par. 2-5

Bilas i Bikpela Samting Moa

Olsem wanem? Ol gutpela pasin inap kirapim ol narapela long laikim yu? Georgina, husat i bin marit klostu 10-pela yia, i tok: “Insait long ol dispela yia, mi laikim man bilong mi bikos em i gat ones pasin na em i save tingim mi tru. Bikpela samting moa long laip bilong em, em long amamasim God. Dispela i kirapim em long laikim na tingim ol narapela. Em i save tingim mi long taim em i mekim ol disisen na mi pilim olsem em i laikim mi. Mi save olsem em i laikim mi tru.”

Daniel, husat i marit long yia 1987, i tok: “Long mi, meri bilong mi i nais tru. Mi laikim em bikos em i luk nais, tasol samting i mekim na mi laikim em moa, em ol gutpela pasin bilong em. Em i save tingim ol narapela manmeri na i laik mekim ol samting na bai ol i amamas. Em i gat ol gutpela pasin Kristen. Dispela i mekim na mi amamas long stap wantaim em.”

Long dispela taim we ol man i no gat stretpela tingting, yumi mas holim stretpela tingting. Yumi mas save olsem i hatwok long kisim lukluk we yumi laikim—yumi no inap—na dispela i no bikpela samting. Tasol yumi inap long kisim ol gutpela pasin we inap mekim na yumi luk nais tru. Baibel i tok: “Ol switpela tok inap giaman, na naispela lukluk inap pinis hariap, tasol meri i gat pasin bilong pret long Jehova, ol bai litimapim nem bilong em.” Tasol Baibel i givim tok lukaut: “Ol switpela tok inap giaman, na naispela lukluk inap pinis hariap, tasol meri i gat pasin bilong pret long Jehova, ol bai litimapim nem bilong em.”—Provep 11:22; 31:30.

Baibel i helpim yumi long luksave olsem “bikpela samting long ai bilong God em i olsem, em i laik bai [yumi] bilasim insait bilong [yumi] long pasin isi na bel isi, ol i olsem bilas i no inap bagarap.” (1 Pita 3:4) Tru tumas, ol gutpela pasin i winim tru lukluk bilong man. Na olgeta inap long kisim ol dispela gutpela pasin.

Mekim Wok Painimaut

w06 11/15 18 par. 4

Sampela Bikpela Tok Bilong Song Bilong Solomon

2:7; 3:5—Wai na ol meri i stap long haus bilong king i mas mekim strongpela tok promis long “ol gasel na ol dia meri bilong bus”? Ol gasel na ol dia meri bilong bus i luk nais tru. Tasol meri Sulam i tokim ol meri i stap long haus bilong king long ol i no ken mekim ol tok bilong kirapim laik bilong em.

NOVEMBA 17-23

GUTPELA SAVE I KAM LONG BAIBEL SONG BILONG SOLOMON 6-8

Stap Olsem Banis, na i No Olsem Dua

it “Song Bilong Solomon” par. 11

Song Bilong Solomon

I luk olsem Solomon i tok orait long meri Sulam long go bek long haus bilong em. Taim ol i lukim em i kam, ol brata bilong em i askim: “Husat dispela meri i lusim ples nating na i kam, na em i holim han bilong gutpela pren bilong em?” (Sol 8:5a) Ol brata bilong meri Sulam i no luksave olsem sista bilong ol i holim yet pasin laikim bilong em. Sampela yia paslain, wanpela brata bilong ol i tok long sista bilong em: “Mipela i gat wanpela liklik susa, na susu bilong em i no kamap yet. Bai mipela i mekim wanem long susa bilong mipela taim wanpela man i kam askim long maritim em?” (8:8) Narapela brata i bekim tok: “Sapos susa bilong mipela em i wanpela banis, bai mipela i wokim bilas silva antap long em, tasol sapos em i wanpela dua, bai mipela i banisim em wantaim plang bilong diwai sida.” (8:9) Tasol meri Sulam i sakim olgeta kain tok gris, em i amamas long gaden wain bilong em yet na em i stap gut long pasin laikim bilong em long man em i laikim (8:6, 7, 11, 12), olsem na em inap long tok: “Mi wanpela banis, na susu bilong mi i olsem tupela taua. Em yet inap lukim olsem bel bilong mi i stap isi.”—8:10.

yp 187-188 par. 4

Olsem Wanem Long Mekim Maritpasin Taim Mi No Marit Yet?

Sapos yangpela man o meri i klia long pasin pamuk, dispela i helpim em long abrusim ol samting nogut, olsem sik na pen na hevi. Na dispela stretpela pasin bilong em i helpim em long narapela rot tu. Baibel i stori long wanpela yangpela meri em i pasim tok pinis long maritim wanpela yangpela man. Meri i laikim tumas dispela yangpela man, tasol em i no slip wantaim em; em i stap stret. Olsem na em inap amamas na tok olsem: “Mi olsem wanpela banis, na susu bilong mi i olsem tupela taua.” Em i no olsem wanpela dua i op kwik long man i laik pulim em. Nogat. Em i sanap strong olsem banis bilong wanpela taun em ol man i no inap kalapim na i gat ol strongpela taua ol man i no inap go antap long en! Dispela yangpela meri i strong long bihainim stretpela pasin. Olsem na i stret Baibel i kolim em “namba wan tru.” Na meri inap tok: “Pren bilong mi i save gut olsem, taim mi stap wantaim em, mi stap gut tru na bel bilong mi i stap isi.” Taim em i stap wantaim dispela yangpela man, em i no bin mekim wanpela samting em i sem long en, olsem na em i stap bel isi, na dispela samting i helpim tupela long i stap belgut na amamas wantaim.—Solomon 6:9, 10; 8:9, 10.

yp2 33

Gutpela Eksampel—Meri Sulam

Yangpela meri Sulam i save olsem em i mas holim stretpela tingting long pasin laikim namel long man na meri. Olsem na em i tokim ol pren bilong em: “Mi bai mekim yupela i tok tru antap: Yupela i no ken kirapim laik i stap long bel bilong mi i go inap long bel yet i gat dispela laik.” Meri Sulam i save olsem filings inap daunim pasin bilong skelim samting. Em i luksave olsem, ol narapela inap kirapim em long laikim wanpela husat i no inap stap olsem gutpela poroman. Na tu, filings bilong em inap pasim em long mekim gutpela disisen. So meri Sulam i stap olsem “wanpela banis.”—Song Bilong Solomon 8:4, 10.

Tingting yu holim long pasin laikim i olsem bilong bikpela man na meri olsem meri Sulam? Olsem wanem? Yu inap skelim gut ol samting na i no bihainim tasol laik bilong bel bilong yu? (Provep 2:10, 11) Sampela taim ol narapela inap fosim yu long prenim wanpela long taim yu no redi long mekim olsem. O ating yu pilim olsem em samting yu mas mekim. Olsem, taim yu lukim wanpela boi na gel i holim han na wokabaut, yu pilim olsem yu laik tru long insait long dispela kain pasin pren? Bai yu prenim wanpela husat i no gat wankain bilip long Baibel olsem yu? Meri Sulam i holim tingting olsem meri i bikpela pinis long sait bilong pasin laikim namel long man na meri. Yu tu inap mekim olsem!

Mekim Wok Painimaut

w15 1/15 29 par. 3

Yu Ting Pasin Laikim Inap i Stap Strong Yet?

³ Ritim Solomon 8:6. Sampela Baibel i yusim dispela hap tok, “paia bilong Ja,” na dispela hap tok i gat bikpela mining. Pasin laikim tru i olsem “paia bilong Ja,” long wanem, Jehova yet em i Papa tru bilong dispela pasin laikim. Em i wokim ol man i kamap olsem em yet, olsem na ol inap kisim dispela pasin. (Stt. 1:26, 27) Taim God i bringim Iv i go long Adam, Adam i lukim Iv na em i mekim ol naispela tok i olsem tok piksa. Iv i pas gut wantaim Adam, bikos “God i wokim em long bun bilong [Adam].” (Stt. 2:21-23) Taim Jehova i wokim man, em i inapim man wantaim dispela laik bilong laikim ol narapela, olsem na pasin laikim namel long man na meri inap i stap strong yet.

NOVEMBA 24-30

GUTPELA SAVE I KAM LONG BAIBEL AISAIA 1-2

Ol Man Em “Sin Bilong Ol i Planti Tru” Inap Wet Long Gutpela Samting

ip-1 14 par. 8

Wanpela Papa na Ol Bikhet Pikinini Bilong Em

⁸ Aisaia i mekim sampela moa tok we i kamapim ol strongpela tok long ol Juda: “Sori tru long dispela lain manmeri bilong mekim sin, sin bilong ol i planti tru na i daunim ol, ol i lain nogut tru, ol i pikinini i save kamapim bagarap! Ol i lusim Jehova pinis; ol i no mekim pasin i soim rispek long God Holi bilong Israel; ol i tanim baksait long em.” (Aisaia 1:4) Ol pasin nogut inap i go planti na kamap olsem samting bilong daunim man. Long taim bilong Abraham, Jehova i tok long sin bilong Sodom na Gomora olsem em i “hevi tru.” (Stat 18:20, NW ) Wankain samting i kamap long lain Juda, bikos Aisaia i tok: “Sin bilong ol i planti tru na i daunim ol.” Na tu, em i kolim ol olsem “ol i lain nogut tru, ol i pikinini i save kamapim bagarap!” Tru tumas, ol Juda i olsem ol pikinini i bikhet. Ol i “tanim baksait,” o olsem New Revised Standard Version i kolim, ol i “go longwe tru” long Papa bilong ol.

ip-1 28-29 par. 15-17

“Yumi Stretim Tok”

¹⁵ Nau tok bilong Jehova i soim olsem em i laikim ol na sori long ol. “‘Yupela kam na yumi stretim tok namel long yumi yet. Maski ol sin bilong yupela i olsem retpela kala, ol bai kamap waitpela olsem sno; maski ol i retpela olsem retpela laplap, ol bai kamap olsem waitpela wul.’” (Aisaia 1:18) Planti taim dispela naispela tok long kirap bilong ves i no klia. Olsem, The New English Bible i tok, “Yumi toktok i go i kam”—i olsem tupela sait wantaim i kam bilong stretim tok na kamap long wanpela tingting. Tasol em i no olsem! Jehova i nogat asua, em i mekim olgeta samting bilong helpim dispela bikhet lain, em ol manmeri husat i gat tupela maus. (Lo 32:4, 5) Dispela ves i no stori long tupela lain i toktok i go i kam, nogat, em bung bilong kamapim stretpela pasin. I olsem Jehova i toktok wantaim lain Israel long kot.

¹⁶ Em isi long ting olsem em i no gutpela wei bilong stretim hevi, tasol Jehova em Jas i gat pasin marimari. Pasin bilong em long fogivim sin i bikpela tru. (Buk Song 86:5) Em wanpela tasol inap rausim sin bilong ol Israel we “i olsem retpela kala” na wasim i kamap “waitpela olsem sno.” Nogat wanpela samting man i mekim, ol sakrifais, na ol beten inap rausim mak sin i putim. Pasin bilong Jehova long fogivim sin tasol inap rausim sin. God i tokaut long samting man i mas mekim na bai em i ken fogivim em, dispela i makim tu olsem em i mas tanim bel tru.

¹⁷ Dispela tok i tru i bikpela samting, olsem na Jehova i kolim gen long wanpela poem bilong soim klia—ol sin i olsem “retpela laplap” bai kamap nupela, laplap ol i no bin daim, waitpela wul. Jehova i laik bai yumi save olsem em i Man bilong fogivim ol sin, maski em ol bikpela sin tu, sapos em i luksave olsem yumi tanim bel tru. Lain husat i pilim olsem ol i hatwok long bilip olsem dispela tok i tru, orait ol i mas skelim gut ol stori olsem bilong Manase. Em i mekim ol bikpela sin—inap planti yia. Maski i olsem, em i tanim bel na God i fogivim em. (2 Stori 33:9-16) Jehova i laik bai yumi olgeta, dispela i makim tu lain i mekim ol bikpela sin, long save olsem taim i stap yet long ol inap “stretim tok” wantaim em.

Mekim Wok Painimaut

ip-1 39 par. 9

Haus Bilong Jehova i Nambawan Tru

⁹ Long nau, em tru olsem lain bilong God i no save bung long wanpela maunten we i gat tempel ol i wokim long ston. Long 70 C.E., ol ami bilong Rom i bin bagarapim tempel bilong Jehova long Jerusalem. Maski i olsem, aposel Pol i kamapim klia olsem tempel long Jerusalem na haus lotu sel we i bin stap long pastaim i olsem piksa tasol. Ol i makim bikpela samting long sait bilong lotu, em “trupela haus sel em Jehova yet i bin sanapim, na i no ol man.” (Hibru 8:2) Dispela haus sel em rot Jehova i makim long lotu long em long rot bilong ofa bilong baim bek ol man em Jisas Krais i givim. (Hibru 9:2-10, 23) Dispela tok i makim “dispela maunten em haus bilong Jehova i sanap long en” em Aisaia 2:2 i stori olsem em i makim lotu i klin bilong Jehova long taim bilong yumi. Lain i bihainim lotu i klin i no save go long wanpela ples stret billong mekim lotu, tasol ol i stap wanbel na mekim lotu.

DISEMBA 1-7

GUTPELA SAVE I KAM LONG BAIBEL AISAIA 3-5

I Stret Jehova i Laik Bai Ol Man i Bihainim Tok Bilong Em

ip-1 73-74 par. 3-5

Tok Lukaut i Go Long Gaden Wain i No Karim Gut!

³ Maski Aisaia i mekim dispela singsing i gat tok piksa long lain i harim tok bilong em o nogat, planti i laik save long dispela singsing. Ating planti i save long wok bilong planim gaden wain, olsem na tok bilong Aisaia i klia na ol inap long piksaim long tingting. Olsem ol man bilong planim wain long nau, man bilong planim wain i no save planim ol sid bilong greip tasol, nogat, em i makim “gutpela rop wain i save karim ol retpela greip”—rop wain ol i kisim long narapela rop wain. Na i stret tru long em i planim wain “long sait bilong wanpela liklik maunten we i save karim planti kaikai” em ples we wain bai karim gut.

⁴ Man i mas wok hat na bai wain i karim gut. Aisaia i stori long papa bilong gaden wain i save digim graun na rausim ol ston’—hatpela wok, wok inap mekim man i taiet! Ating em i yusim ol bikpela ston “long wokim wanpela taua.” Long bipo, dispela kain taua i stap ples bilong ol wasman i save was long gaden na bai ol stilman na animal i no ken kisim ol kaikai. Na tu, em i wokim ston wol namel long ol lain wain i gro. (Aisaia 5:5) Planti taim ol i mekim olsem na bai ren i no ken karim gutpela graun i go.

⁵ Papa bilong gaden wain i wok strong long lukautim wain bilong em, olsem na i stret em i ting olsem wain bai karim kaikai. Olsem na em i katim ston na wokim ples bilong krungutim ol greip. Tasol yu ting dispela samting i kamap tru? Nogat, gaden bilong em i kamapim ol wel greip.

ip-1 76 par. 8-9

Tok Lukaut i Go Long Gaden Wain i No Karim Gut!

⁸ Aisaia i tok long Jehova, em papa bilong gaden wain, “pren mi laikim tru.” (Aisaia 5:1) Aisaia inap tok olsem long God, olsem tok namel long tupela pren bikos em i pas gut wantaim Em. (Skelim Jop 29:4; Buk Song 25:14.) Tasol pasin laikim bilong profet long God i liklik long pasin laikim bilong God long “gaden wain” bilong em—lain em i “planim.”—Skelim Kisim Bek 15:17; Buk Song 80:8, 9.

⁹ Jehova i “planim” lain bilong em long graun bilong Kenan na givim ol lo long ol, na dispela i stap olsem banis bilong lukautim ol na bai ol narapela lain i no ken kirapim ol long bihainim tingting na pasin bilong ol. (Kisim Bek 19:5, 6; Buk Song 147:19, 20; Efesus 2:14) Na tu, Jehova i givim ol jas, pris, na ol profet long skulim ol. (2 King 17:13; Malakai 2:7; Aposel 13:20) Taim ol Israel i pret long ol ami bai kam mekim nogut long ol, Jehova i makim ol man bilong kisim bek ol. (Hibru 11:32, 33) Olsem na i gat risen long Jehova i askim: “Wanem samting moa bai mi mekim long gaden wain bilong mi”?

w06 6/15 18 par. 1

‘Helpim Diwai Wain Bilong Yu’!

Aisaia i tok “ol manmeri bilong Israel” i olsem wanpela gaden wain i wok long karim “ol pikinini i liklik tru na i pait long maus,” o ol pikinini i sting pinis. (Aisaia 5:2, 7) Ol pikinini bilong diwai wain ol man i planim ol i bikpela long ol pikinini bilong diwai wain bilong bus, em ol i liklik tru, na i no gat planti kaikai bilong en, na ol sid i pulap long en. Ol pikinini bilong diwai wain bilong bus i no gutpela bilong kaikai o wokim wain long en—dispela i makim stret dispela lain i tromoi lotu i tru em ol i kamapim kaikai olsem ol i sakim tok na ol i no bihainim stretpela pasin. Em i no asua bilong Papa bilong gaden wain na diwai wain i karim kaikai nogut, nogat. Jehova i bin mekim olgeta samting bambai dispela lain i ken kamapim planti gutpela kaikai. Em i tok: “Mi save, mi bin mekim gutpela wok bai gaden i ken karim gutpela pikinini wain.”—Aisaia 5:4.

w06 6/15 18 par. 2

‘Helpim Diwai Wain Bilong Yu’!

Lain Israel, ol i olsem diwai wain i no karim gutpela kaikai, olsem na Jehova i givim tok lukaut long ol olsem em bai brukim banis em i bin wokim bilong lukautim lain bilong em. Em i no mekim wok moa bilong katim ol han na digim graun long diwai wain bilong em, olsem lain Israel. Ren i save givim wara long gaden wain i no ken pundaun, na ol rop i gat nil na gras nogut bai karamapim gaden.—Aisaia 5:5, 6.

Mekim Wok Painimaut

ip-1 80 par. 18-19

Tok Lukaut i Go Long Gaden Wain i No Karim Gut!

¹⁸ Long taim bilong lain Israel long bipo, olgeta graun i bilong Jehova. Olgeta famili i kisim graun God i givim long ol, em ol i ken rentim o givim olsem dinau, tasol ol i no ken salim long wanpela long holim “inap oltaim.” (Wok Pris 25:23) Dispela lo i helpim ol na ol i abrusim ol hevi i save kamap long baim na salim graun. Na tu, dispela i helpim ol famili na bai ol i no bungim hevi bilong i stap rabis. Tasol sampela Juda i tingim ol yet na brukim ol lo bilong God. Maika i tok: “Ol i laikim ol gaden na ol i strong na kisim; ol i laikim tu ol haus na ol i kisim; ol i giamanim man na kisim haus bilong em, ol i giamanim man na kisim ol samting em i bin kisim long ol tumbuna.” (Maika 2:2) Tasol Provep 20:21 i tok lukaut: “Sapos long pastaim, man i kisim mani kago bilong em long pasin gridi, bihain em i no inap kisim blesing.”

¹⁹ Jehova i promis olsem em bai rausim samting em ol gridi manmeri i kisim long rot blong sakim lo. Ol haus ol i kisim bai “i no gat wanpela man” i stap long en. Graun bilong ol narapela em ol i kisim bai kamapim liklik kaikai tasol. Tru yumi no save long wanem taim stret na hau dispela samting bai kamap. Tasol i luk olsem, hap truim bilong en i kamap long ol lain husat bai go kalabus long Babilon.—Aisaia 27:10.

DISEMBA 8-14

GUTPELA SAVE I KAM LONG BAIBEL AISAIA 6-8

“Mi Stap! Salim Mi!”

ip-1 93-94 par. 13-14

Jehova God i Stap Long Tempel Holi Bilong Em

¹³ Yumi putim yau wantaim Aisaia. “Mi harim nek bilong Jehova i tok: ‘Bai mi salim husat, na husat bai bringim tok bilong yumi i go?’ Na mi tok: ‘Mi stap! Salim mi!’” (Aisaia 6:8) Askim Jehova i kamapim i soim klia stret olsem em i laik bai Aisaia i bekim, bikos i no gat narapela profet i kamap long dispela visen. I klia tru olsem dispela singaut i go long Aisaia long stap olsem man bilong bringim tok bilong Jehova. Tasol wai na Jehova i askim, “Husat bai bringim tok bilong yumi i go?” Pastaim em i yusim dispela tok “mi,” tasol bihain em i tok “yumi,” so nau Jehova i tok long em yet na narapela man. Husat dispela man? Yu ting em i makim Pikinini tru bilong em, we bihain em i kamap Jisas Krais? Yes, em i makim seim Pikinini em God i tok long em olsem, “Nau yumi mas wokim man i kamap olsem yumi yet.” (Stat 1:26; Provep 8:30, 31) Yes, Pikinini i stap wantaim Jehova long heven.—Jon 1:14.

¹⁴ Aisaia i hariap long bekim tok! Maski em i no save long wanem samting bai kamap, kwiktaim em i bekim tok: “Mi stap! Salim mi!” Na tu, em i no askim long samting em bai kisim sapos em i tok orait long mekim dispela asainmen. Pasin bilong em long redi long mekim wok i stap olsem gutpela eksampel long ol man i lotuim God long nau, em ol i kisim wok long “autim dispela gutnius bilong Kingdom long olgeta hap bilong graun.” (Matyu 24:14) Olsem Aisaia, ol i mekim gut wok bilong ol na autim tok long “olgeta lain man,” maski planti i no harim. Na ol i bilip na mekim yet wok, wankain olsem Aisaia, ol i save olsem man i gat bikpela namba i givim dispela wok long ol.

ip-1 95 par. 15-16

Jehova God i Stap Long Tempel Holi Bilong Em

¹⁵ Nau Jehova i givim tok Aisaia i mas mekim na em i tokim em long bekim bilong ol man: “Go, na tok olsem long ol dispela manmeri: ‘Yupela bai harim tok gen na gen, tasol yupela bai i no inap kliagut; yupela bai lukim gen na gen, tasol yupela bai i no inap kisim wanpela save.’ Mekim bel bilong ol dispela manmeri i pas, mekim yau bilong ol i harim tok, tasol ol i no inap mekim wanpela samting, na pasim ai bilong ol, na bai ai bilong ol i no inap lukim samting na yau bilong ol i harim tok, tasol bel bilong ol i no inap kisimgut tok na bai ol i no tanim i kam bek na kamap orait.” (Aisaia 6:9, 10) Olsem wanem? Dispela i makim olsem Aisaia i mas mekim tok long hatpela pasin na i no skelim gut tok? Na em i sakim ol Juda na mekim olsem Jehova i no stap klostu long ol? Nogat tru! Em ol lain bilong Aisaia we em i pas gut wantaim. Tasol tok bilong Jehova i soim samting ol manmeri bai mekim taim ol i harim tok bilong em, maski Aisaia i givim bel long mekim wok.

¹⁶ Ol manmeri yet i sakim tok. Aisaia bai toktok long ol “gen na gen,” tasol ol i no inap bihainm tok ol i kisim o kliagut long en. Planti bai i gat strongpela het na ol i no inap bihainim tok, i olsem ol i aipas na yaupas. Taim Aisaia i go long ol planti taim, em i soim “ol dispela manmeri” olsem ol i no laik kliagut long tok em i mekim. Ol bai kamapim olsem ol i pasim bel na tingting bilong ol long tok bilong Aisaia—tok bilong God—long ol. Wankain samting i kamap long nau! Planti manmeri i no laik harim tok bilong ol Witnes Bilong Jehova taim ol i autim gutnius long Kingdom Bilong God we klostu nau bai kam.

ip-1 99 par. 23

Jehova God i Stap Long Tempel Holi Bilong Em

²³ Taim Jisas i kolim tok bilong Aisaia, em i soim olsem truim bilong tok profet i kamap long taim bilong em. Planti manmeri i holim wankain tingting olsem lain Juda i stap long taim bilong Aisaia. Ol i mekim ol yet i kamap aipas na yaupas long tok em i autim na ol tu i kisim bagarap. (Matyu 23:35-38; 24:1, 2) Dispela samting i kamap taim ami bilong Rom em Jeneral Taitus i bosim, i kam pait long Jerusalem long 70 C.E. na bagarapim siti na tempel. Tasol sampela i harim tok bilong Jisas na kamap ol disaipel bilong em. Jisas i tok ol dispela lain i ken “amamas.” (Matyu 13:16-23, 51) Em i tokim ol olsem taim ol i lukim “ol ami i kam banisim Jerusalem,” ol i mas “ranawe i go long ol maunten.” (Luk 21:20-22) Tasol “kru holi” em ol i bilip na i kamapim wanpela lain, em “lain Israel bilong God,” ol i abrusim bagarap.—Galesia 6:16.

Mekim Wok Painimaut

w06 12/1 9 par. 3

Sampela Bikpela Tok Bilong Buk Aisaia—Namba 1

7:3, 4—Bilong wanem Jehova i kisim bek king nogut, Ahas? King bilong Siria na king bilong Israel i tingting long rausim King Ahas bilong Juda na makim pikinini man bilong Tabel—em wanpela man i no bilong lain bilong Devit—long kamap king. Dispela wok em Satan yet i stiaim, em bai pasim kontrak bilong Kingdom em Jehova i mekim wantaim Devit. Jehova i kisim bek Ahas bambai Em i ken lukautim lain em “King bilong kamapim gutpela sindaun na bel isi” bai kamap long en.—Aisaia 9:6.

DISEMBA 15-21

GUTPELA SAVE I KAM LONG BAIBEL AISAIA 9-10

Tok Profet Bilong “Bikpela Lait”

ip-1 125-126 par. 16-17

Tok Promis Bilong Prins Bilong Bel Isi

¹⁶ Yes, tok profet bilong Aisaia long “wanpela taim bihain” i makim taim Krais i mekim wok long graun. Long taim Jisas i stap long graun, planti taim em i stap long Galili. Long distrik Galili, em i kirapim wok na tokaut: “Kingdom bilong heven i kam klostu pinis.” (Matyu 4:17) Na tu, em long Galili we em i autim fes Bikpela Tok Long Maunten, makim ol aposel, wokim fes mirakel, na kamap long klostu 500 disaipel bihain long em i kirap bek. (Matyu 5:1–7:27; 28:16-20; Mak 3:13, 14; Jon 2:8-11; 1 Korin 15:6) Long dispela rot Jisas i truim tok profet bilong Aisaia long givim biknem long “hap bilong Sebulun na hap bilong Naptali.” Jisas i autim tok long ol manmeri bilong Galili na long ol narapela hap tu. Taim Jisas i autim gutnius long olgeta hap, dispela i mekim na kantri Israel “i kisim biknem,” dispela i makim tu Juda.

¹⁷ Olsem wanem long tok bilong Matyu long “wanpela bikpela lait” long Galili? Dispela tok tu i kam long tok profet bilong Aisaia. Aisaia i tok: “Ol manmeri husat i bin wokabaut long tudak ol i lukim wanpela bikpela lait. Na ol manmeri i stap long hap we bikpela tudak i karamapim, lait i sain i go long ol.” (Aisaia 9:2) Long taim bilong ol aposel, ol bilip giaman i haitim dispela lait bilong tok i tru. Ol hetman bilong lotu Juda i mekim dispela hevi i go bikpela taim ol i bihainim ol kastam bilong lotu na ol i mekim olsem “tok bilong God i samting nating.” (Matyu 15:6) Ol man i gat pasin daun i karim hevi long dispela, ol i bihainim ol “aipas i laik soim rot long ol arapela.” (Matyu 23:2-4, 16) Taim Jisas em Mesaia i kamap, ai bilong planti man i gat pasin daun i op na ol i luksave long ol gutpela samting. (Jon 1:9, 12) Wok Jisas i mekim long taim em i stap long graun na ol blesing i kamap long sakrifais bilong em i truim tok profet Aisaia i mekim long “bikpela lait.”—Jon 8:12.

ip-1 126-128 par. 18-19

Tok Promis Bilong Prins Bilong Bel Isi

¹⁸ I gat planti risen na lain husat i luksave long lait na bihainim i ken amamas. Aisaia i tok moa: “Yu bin mekim ol manmeri bilong kantri i kamap planti tru; yu bin mekim amamas bilong en i go bikpela tru. Ol i amamas long ai bilong yu, olsem amamas bilong ol manmeri long taim bilong kisim kaikai i redi long gaden, olsem amamas bilong ol man husat i tilim ol gutpela samting ol i bin kisim long taim bilong pait.” (Aisaia 9:3) Wok autim tok bilong Jisas na ol disaipel bilong em, i helpim ol man i gat gutpela bel, na ol yet i soim olsem ol i laik lotuim Jehova long spirit na pasin i tru. (Jon 4:24) I no winim yet 4-pela yia, na planti i kamap Kristen. I gat 3,000 manmeri i kisim baptais long de bilong Pentikos bilong yia 33 C.E. Bihain liklik, “namba bilong ol man em inap olsem 5,000.” (Aposel 2:41; 4:4) Taim ol disaipel i givim bel long soim dispela lait long ol narapela, “planti manmeri moa i wok long kamap disaipel long Jerusalem. Na bikpela lain pris tu ol i bilip.”—Aposel 6:7.

¹⁹ Olsem lain i amamas long bungim planti kaikai i redi o lain i skelim ol gutpela samting bihain long ol i winim pait, ol disaipel bilong Jisas i amamas taim planti man i kam bihainim ol. (Aposel 2:46, 47) Bihain Jehova i larim lait long sain long ol man bilong narapela lain. (Aposel 14:27) So ol manmeri bilong olgeta lain i amamas olsem rot i op long ol tu inap i go klostu long Jehova.—Aposel 13:48.

ip-1 128-129 par. 20-21

Tok Promis Bilong Prins Bilong Bel Isi

²⁰ Ol samting wok bilong Mesaia i kamapim bai stap oltaim oltaim, olsem yumi lukim long tok Aisaia bai kamapim: “Yu bin brukbrukim i go liklik liklik hap plang ol i bin karim, na stik i stap long solda bilong ol, em stik bilong bosman i givim wok long ol, olsem long taim bilong ol Midian.” (Aisaia 9:4) Planti handret yia paslain long taim bilong Aisaia, ol Midian na Moap i hait na pasim tok long giamanim ol Israel long mekim sin. (Namba 25:1-9, 14-18; 31:15, 16) Bihain, ol Midian i mekim nogut long ol Israel long taim ol i pait na stilim ol samting long viles na gaden bilong ol inap 7-pela yia. (Hetman 6:1-6) Tasol bihain Jehova, long rot bilong wokman bilong em, Gideon, i daunim ol ami bilong ol Midian. Bihain long “taim bilong ol Midian” i no gat samting i soim olsem lain bilong Jehova bai kisim gen hevi long han bilong ol Midian. (Hetman 6:7-16; 8:28) Klostu nau, Jisas Krais, em man i winim Gideon, bai mekim pait na kilim i dai ol birua bilong lain bilong Jehova long nau. (Revelesen 17:14; 19:11-21) Bihain, olsem long “taim bilong ol Midian,” em bai mekim wanpela laspela pait na winim inap oltaim oltaim, em bai mekim olsem long strong Jehova i givim na i no long strong bilong ol man. (Hetman 7:2-22) Lain bilong God bai i no kisim hevi gen long han bilong ol birua!

²¹ God i kamapim strong bilong em long winim pait na dispela i no bilong kisim biknem long pait, nogat. Jisas husat i kirap bek pinis em Prins Bilong Bel Isi, taim em i bagarapim ol birua bilong em, em i soim olsem em bai kamapim bel isi bilong i stap oltaim oltaim. Nau Aisaia i stori long paia bai kukim olgeta samting bilong pait: “Olgeta bikpela su i save mats i go na mekim graun i guria na olgeta laplap em blut i karamapim, ol bai kamap olsem paiawut bilong paia.” (Aisaia 9:5) Ol bai i no pilim gen guria i save kamap long su bilong ol soldia i mats. Ol bai i no lukim moa ol yunifom i save pulap long blut bilong ol strongpela soldia. Bai i no gat pait moa!—Buk Song 46:9.

Mekim Wok Painimaut

ip-1 130 par. 23-24

Tok Promis Bilong Prins Bilong Bel Isi

²³ Man bilong givim gutpela tingting em man husat i save givim tok na edvais. Taim Jisas Krais i stap long graun, em i givim ol gutpela tok. Long Baibel yumi ritim olsem “bikpela lain manmeri i kirap nogut long pasin bilong em long skulim ol man.” (Matyu 7:28) Dispela Man Bilong Givim Gutpela Tingting i gat savetingting na em i save pilim hevi bilong ol narapela, na tu, em i save gut long ol manmeri. Ol tok bilong em i no strong tumas na i no bilong kotim ol man. Planti taim em i givim tok bilong helpim man na em i mekim long pasin laikim. Tok bilong Jisas i gutpela bikos em i save bihainim savetingting, ol tok bilong em i stret olgeta, na i no gat popaia. Taim man i bihainim, em bai kisim laip oltaim.—Jon 6:68.

²⁴ Ol tok Jisas i kamapim i no bilong em yet. Olsem na, em i tok: “Tok mi skulim ol man long en i no bilong mi, em bilong man i salim mi i kam.” (Jon 7:16) Olsem Solomon, Jehova God em Man i givim savetingting long Jisas. (1 King 3:7-14; Matyu 12:42) Eksampel bilong Jisas i mas kirapim ol tisa na lain bilong givim tok insait long kongrigesen Kristen long oltaim ol i mas yusim Baibel long kisim tok ol i kamapim.—Provep 21:30.

DISEMBA 22-28

GUTPELA SAVE I KAM LONG BAIBEL AISAIA 11-13

Baibel i Mekim Wanem Tok Long Mesaia?

ip-1 159 par. 4-5