Pas Ol i Raitim Long Papamama

I no longtaim i go pinis, na tupela yangpela meri long Spen ol i raitim wanpela pas i go long papamama bilong ol bilong tok tenkyu long ol. Sampela tok bilong pas i olsem:

Long gutpela papamama bilong mipela, Pepe na Vicenta:

Bai mipela i stori long wanem samting pastaim? I gat planti samting mipela i laik tokim yupela, na i hatwok long raitim sampela tok bilong kamapim dispela samting. Mipela i laik tok tenkyu long mipela i bin stap laip inap 17 na 15 yia, na long ol dispela yia yupela i bin tingim gut mipela na sori long mipela.

Oltaim mipela i bin save long tingting na long ol lo bilong yupela. Sampela taim mipela i ting, i gat wanem as na mipela i mas kam bek long haus long apinun long taim yupela i makim, tasol nau taim mipela i lukim ol samting i painim ol narapela yangpela, em papamama bilong ol i no bin makim taim ol i mas kam bek long haus, em nau, mipela i save olsem ol dispela lo i bin lukautim mipela.

Yupela i bin stap olsem gutpela piksa long pasin bilong go oltaim long ol miting Kristen long Haus Kingdom. Taim wanpela bikpela samting i pasim yupela, long dispela taim tasol yupela i no go. Dispela i bin helpim tru mipela, na pasin bilong autim tok wantaim yupela long ol Sande, em tu i bin helpim mipela. Long ol Sande, mipela i no gat wok long askim yupela olsem bai yumi autim tok o nogat. Mipela i save pinis bai yumi autim tok!

Taim yupela i mekim bikpela long mipela, yupela i lainim tu mipela long pasin bilong lukautim ol narapela man. Planti man i bin kam long haus bilong mipela, na oltaim yupela i givim ol gutpela samting long ol. Mipela i lukim dispela long ai bilong mipela yet, na mipela i amamas tru, long wanem, papamama bilong mipela ol i gutpela papamama tru.

I no gat narapela man i save gut long mipela na i pilim tru tingting bilong mipela olsem yupela i save mekim. Yupela i nambawan gutpela pren bilong mipela, na mipela i bilip olgeta long yupela.

Bilong pinisim tok, mipela i laik tok olsem mipela i laikim tru yupela. Yupela i papamama bilong mipela, na mipela i no laik bai wanpela narapela man i kisim ples bilong yupela. Sapos mipela inap makim husat i papamama bilong mipela na wanem rot mipela i bihainim long i stap bilong mipela, mipela i no gat tupela tingting​—⁠mipela bai makim yupela na mipela i laik mekim ol samting wankain olsem mipela i bin mekim long i stap bilong mipela.

Mipela ol pikinini i laikim tumas yupela,

ESMERALDA NA YOLANDA