Askim

Taim tupela Kristen i pasim tok pinis long marit, ol i mas i gat wanem tingting long dispela samting?

Taim man na meri i pasim tok pinis long marit, em wanpela samting bilong amamas long en, na tu, em i wanpela bikpela samting. Wanpela strongpela Kristen i no ken ting dispela em i samting nating, na em i ken brukim dispela promis long laik bilong em yet long ol liklik samting. Taim man na meri i pasim tok pinis long marit, em wanpela gutpela taim bilong tupela i ken save gut long narapela narapela paslain long ol i marit.

Taim yumi stori long dispela samting, yumi mas save olsem ol lain bilong narapela narapela ples ol i save bihainim narapela narapela pasin long ol samting bilong marit na ol samting ol i save mekim paslain long marit; na wanem wanem taim ol i stap long en, dispela tu i stiaim ol samting ol i save mekim. Baibel i kamapim klia dispela samting.

Tupela pikinini meri bilong Lot, em “tupela i no bin slip wantaim man,” ol i bin pasim tok pinis long maritim tupela man bilong Sodom. Dispela tupela man bai maritim tupela pikinini meri bilong Lot, tasol Baibel i no tokaut olsem i gat wanem as na ol i bin pasim tok long marit, na olsem wanem ol i bin mekim. Tupela pikinini i bikpela pinis, o nogat? Tupela yet i makim poroman ol i laik maritim, o nogat? Taim ol i pasim tok long marit, ol i mekim long ai bilong planti man, o nogat? Yumi no save long ol dispela samting. (Stat 19:​8-​14) Yumi save olsem Jekop yet i bin pasim tok wantaim papa bilong Resel long mekim wok bilong papa bilong Resel inap 7-pela yia paslain long em i maritim Resel. Jekop i bin kolim Resel olsem “meri bilong mi,” tasol insait long ol dispela yia tupela i no bin slip wantaim. (Stat 29:​18-​21, NW ) Narapela em stori bilong Devit. Bilong maritim pikinini meri bilong Sol, pastaim em i mas pait long ol Filistia na winim ol. Taim Devit i mekim ol samting olsem Sol i tok, orait em inap maritim pikinini meri bilong em, Mikal. (1 Samuel 18:​20-​28) Ol dispela pasin bilong “pasim tok long marit,” ol i narapela narapela na ol i narapela kain long pasin i stap long planti hap long nau.

Lo Bilong Moses i gat ol lo bilong marit na pasin bilong pasim tok long marit. Olsem: Wanpela man inap maritim wanpela o tupela meri, na em inap katim marit long kain kain as. Tasol ol meri i no inap mekim olsem. (Kisim Bek 22:​16, 17; Lo 24:​1-4) Man i pilai wantaim wanpela nupela meri, em i mas maritim dispela meri sapos papa bilong meri i orait long dispela, na em i no ken lusim em. (Lo 22:​28, 29) I gat ol narapela lo bilong marit. Olsem: I gat ol taim bilong man i no ken slip wantaim meri bilong em. (Wok Pris 12:​2, 5; 15:24; 18:19) Wanem ol lo i bosim pasin bilong pasim tok long marit?

Wanpela meri Israel i pasim tok pinis long marit, lo i makim olsem em i stap narapela kain long ol meri i no pasim tok yet long marit. Long sampela samting, ol man i bin tingim em olsem em i marit pinis. (Lo 22:​23-​29; Matyu 1:​18, 19) Ol Israel i no inap tok promis long maritim wanpela insait long famili, olsem wanblut bilong ol. Na i gat ol samting bilong graun bilong famili na dispela tu i mekim na i tambu long maritim wanpela long lain bilong famili. (Wok Pris 18:​6-​20; lukim Wastaua (tok Inglis), Mas 15, 1978, pes 25-28.) Ol dispela samting i kamapim klia olsem, ol wokboi bilong God i no bin ting pasin bilong pasim tok long marit em i samting nating.

Ol kain kain lo i bosim ol Israel, em ol i stap aninit long Lo Bilong Moses, tasol ol Kristen i no aninit long dispela Lo, na tu, ol i no aninit long lo bilong en bilong marit na long pasim tok long marit. (Rom 7:​4, 6; Efesus 2:​15; Hibru 8:​6, 13) Jisas i bin skulim ol lain bilong em olsem pasin ol Kristen i mas bihainim long ol samting bilong marit i narapela kain long ol pasin ol Israel i bin bihainim aninit long Lo. (Matyu 19:​3-9) Tasol tok bilong em i no makim olsem marit o pasim tok long marit em samting nating. Olsem na ol Kristen i ken ting olsem wanem long pasin bilong pasim tok long marit? Em i bikpela samting long ol o nogat?

Long planti kantri, ol wan wan man na meri yet i save makim poroman ol i laik maritim. Taim man na meri i tok promis olsem ol bai marit, nau ol man i save ol i pasim tok pinis long marit. I no olsem ol i mas mekim sampela bikpela samting moa bilong makim olsem ol i pasim tok pinis long marit. Long sampela hap man i save givim ring long meri em bai maritim bilong makim olsem tupela i pasim tok pinis long marit. Sampela i save tokaut long famili bilong ol long taim bilong wanpela liklik bung bilong kaikai o sampela narapela liklik bung.a Em samting bilong wan wan yet long makim wanem samting ol i laik mekim. Baibel i no putim lo long dispela. Taim tupela i pasim tok pinis long marit, dispela i olsem kontrak ol i wokim.

Wanpela Kristen i no ken hariap long raun wantaim wanpela man o meri, o pasim tok long marit, o marit. Mipela i kamapim ol tok em Baibel i as bilong en, bilong helpim man na meri singel long skelim olsem i gutpela ol i kirap long wokabaut wantaim o mekim sampela samting bilong pasim tok long marit o marit o i no gutpela.b Wanpela bikpela samting bilong dispela tok i olsem, marit bilong wanpela Kristen em i bilong i stap oltaim oltaim.​—⁠Stat 2:​24; Mak 10:​6-9.

Tupela Kristen i mas save gut long narapela narapela paslain long tupela i tingting long pasim tok long marit. Tupela i ken askim ol yet, ‘Olsem wanem? Mi save gut olsem narapela i strong long ol samting bilong spirit na em i givim bel tru long God? Mitupela inap mekim wok bilong God wantaim inap oltaim? Mitupela save gut long pasin bilong narapela narapela? Mi bilip tru olsem mitupela inap wok gut wantaim inap oltaim oltaim? Mitupela i save gut long ol samting narapela i mekim bipo na sindaun bilong narapela long nau?’

Taim tupela Kristen i pasim tok pinis long marit, i stret tupela na ol narapela i ken ting olsem ol bai marit. Jisas i tok: “Yupela i mas tok ‘Yes’ na ‘Nogat’ tasol.” (Matyu 5:37) Ol Kristen i pasim tok long marit, ol i mas bihainim dispela tok. Tasol wan wan taim wanpela Kristen i pasim tok pinis long marit, em inap kisim save long wanpela bikpela rong em poroman bilong em i no bin tokaut long en o em i haitim taim tupela i no pasim tok yet long marit. Ating em i kisim save long sampela samting poroman bilong em i bin mekim bipo, olsem em i insait long pasin raskol o pasin pamuk. Kristen i kisim save long dispela samting, em i mas skelim wanem samting em i ken mekim. Ating tupela yet i ken stori gut long dispela samting na wanbel yet long marit. O ating ol i ken toktok wantaim na pasim tok long pinisim dispela tok ol i pasim bilong marit. Tru dispela samting ol i mekim, em samting bilong tupela Kristen yet​—⁠i no samting bilong ol narapela i mas insait long en, olsem traim long skelim skelim samting tupela i bin mekim​—⁠dispela em i wanpela bikpela samting tupela i mas skelim na pasim tok long en. Tasol poroman i bin kisim save long rong narapela i mekim, ating em bai i gat strongpela laik long pinisim dispela tok tupela i pasim bilong marit, maski narapela i no laik pinisim.​—⁠Lukim “Askim” long Wastaua (tok Inglis), bilong Jun 15, 1975.

I gat gutpela as na tupela i mas stretim ol kain hevi olsem paslain long tupela i marit. Jisas i tok, Baibel i kamapim wanpela as tasol na wanpela i ken katim marit na marit gen, em por·neiʹa, olsem narapela poroman i mekim pasin pamuk. (Matyu 5:​32; 19:⁠9) Em i no tok man i ken katim marit taim em i save long wanpela bikpela hevi o rong narapela i mekim paslain long tupela i marit.

Olsem: Long taim bilong Jisas man inap kisim sik lepra. Olsem wanem? Sapos wanpela man marit Juda i kisim save olsem taim em i no marit yet meri bilong em i gat sik lepra (maski meri i save o i no save), i gat as na man i ken rausim meri bilong em? Ating wanpela Juda i stap aninit long Lo em inap mekim olsem, tasol Jisas i no tok dispela i stret long ol disaipel bilong em i bihainim. Tingim sampela samting olsem long taim bilong yumi. Wanpela man i gat sik sifilis, o narapela kain sik bilong pamuk, o binatang jem HIV i kamapim sik AIDS, o sampela narapela kain bikpela sik i save kalap long planti man, ating em i maritim meri na em i no bin tokaut long ol dispela samting. Ating em i bin kisim ol dispela sik long rot bilong pamuk taim tupela i no pasim tok yet long marit o long taim tupela i pasim tok pinis long marit. Bihain taim meri i kisim save long dispela sik o pasin pamuk man i bin mekim, (maski man i no inap kamapim pikinini o i no inap slip wantaim meri) dispela i no as na tupela i ken katim marit. Baibel i no tok pasin nogut wanpela i mekim paslain long marit em i as na ol i mas katim marit, maski em i kisim sampela sik o em i gat bel long narapela man na em i haitim dispela taim em i marit. Nau tupela i marit pinis na ol i bin tok promis long i stap wantaim.

Dispela kain hevi i save kamap wan wan taim, tasol ol dispela samting yumi stori long en i mas strongim tru bikpela tok, olsem: Taim man na meri i pasim tok long marit, ol i no ken ting em i samting nating. Taim tupela i no pasim tok yet long marit na long taim ol i pasim tok pinis long marit, tupela Kristen hia i mas save gut long narapela narapela. Narapela i mas tok stret long narapela long ol samting em i laik save long en o em i mas save long en. (Long sampela kantri lo i makim olsem ol dokta i mas skelim man na meri paslain long tupela i marit. Sampela i laik bai dokta i skelim ol bilong save ol i gat sik o nogat.) Em nau, taim tupela i pasim tok pinis long marit, dispela i bikpela samting na samting bilong amamas long en, na em bai helpim gut tupela taim tupela i wok long redi long marit tru​—⁠dispela i bikpela samting moa na samting bilong amamas moa yet long en.​—⁠Sindaun 5:​18, 19; Efesus 5:​33.

[Ol Futnot]