Man i Soim Rot na Helpim Yumi
JEHOVA i gat olgeta save na bikpela strong, ol spirit nogut i no olsem. Na tu, Jehova em i as tru bilong pasin laikim. (1 Jon 4:8) Long olgeta taim ol tok bilong em i gutpela bilong helpim man na em i no askim yumi long baim em. Tasol ol glasman i no olsem, ol man i mas baim ol na bai ol i givim helpim. God i tok: “Yupela ol manmeri i dai long dring wara [olsem dai long kisim save long God], yupela kam long mi. Yupela kam na dring. Na yupela ol lain i no gat mani, yupela kam long mi, na yupela kisim kaikai. Kam na kisim wain na susu, i no gat pe bilong en. Bilong wanem bai yupela i pinisim nating ol mani bilong yupela long ol samting i no inap helpim yupela, na yupela i stap hangre yet? Putim gut yau long tok bilong mi, na mekim olsem mi tok, na bai yupela i pulap tru long ol kain kain gutpela kaikai mi givim yupela.”—Aisaia 55:1, 2.
Man Bilong Wokim yumi i kamapim ol tok bilong Baibel, olsem na Baibel i helpim yumi long wetim ol gutpela samting bai kamap bihain, na i lukautim pasin bilong yumi long pas gut wantaim God, na i helpim yumi long save olsem laip bilong yumi i gat as bilong en, na em i kamapim ol gutpela stiatok bilong helpim yumi. I gutpela sapos yumi lusim sampela haptaim bilong tingim ol dispela askim na ol bekim bilong Baibel.
[Blok long pes 7]
● Yu inap i stap bel isi? Baibel i tok: “God, Bikpela bilong Israel, em God bilong mekim gutpela na stretpela pasin olgeta, na em man bilong sambai long yupela na helpim yupela, em i tok olsem, ‘Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.’ ”—Aisaia 48:17, 18.
● Bai pasin nogut i stap oltaim? Baibel i tok: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.” (Sindaun 2:21, 22) Tru tumas, ol man nogut na ol spirit nogut bai bagarap na pinis olgeta, i olsem paia i kukim ol olgeta.—Revelesen 20:10, 14.
● Bai sik, pen na hevi i pinis? Baibel i tok: “Harim! Haus sel bilong God i stap wantaim ol manmeri, na God bai i stap wantaim ol, na ol bai i stap ol lain manmeri bilong em. Na God yet bai i stap wantaim ol. Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo [ol hevi bilong nau] ol i pinis olgeta.”—Revelesen 21:3, 4.
Ol spirit nogut i save giaman, tasol God i no save giaman, yes, God “i no inap giaman.” (Taitus 1:2) Na tu, laspela hap bilong ol dispela stori bai kamapim olsem tok i tru bilong God i save mekim ol man i kamap fri na i givim laip long ol man.—Jon 8:32; 17:3.