Pisin Bar-Tailed Godwit Samting i Stiaim Raun Bilong En

PISIN bar-tailed godwit i save mekim narakain raun. Em i save raun inap 11,000 kilomita insait long 8-pela de samting.

Tingim: Ol saveman i ting sampela pisin i save yusim wanpela strong bilong graun, olsem magnet, bilong stiaim raun bilong ol. I olsem ol i gat kompas insait long kru bilong ol. Ating pisin godwit i save stiaim tu raun bilong en long rot bilong san na ol sta long nait. I luk olsem dispela pisin inap pilim tu bikpela win na ren i laik kam, na em i yusim dispela win bilong helpim raun bilong en. Tasol ol saveman i save kirap nogut yet long olsem wanem dispela pisin inap mekim kain bikpela raun olsem. Saveman Bob Gill i tok: “Mi bin stadi long dispela pisin inap 20 yia, na mi kirap nogut long dispela pisin.”

Yu Ting Wanem? Save bilong pisin bar-tailed godwit long stiaim raun bilong en i kamap long rot bilong evolusen o wanpela man i bin wokim?