Wanpela Meri Juda i Stori Long As na Em i Skelim Gen Bilip Bilong Em

Tokim mipela long famili bilong yu.

Mama i bin karim mi long Amerika long 1979. Taim mi gat 3-pela krismas, papamama i divos. Mama i skulim mi long bihainim ol pasin na lo bilong ol Juda na em i salim mi i go long skul bilong ol Juda. Taim mi gat 7-pela krismas, mipela i go stap long Israel inap wanpela yia, na mi go skul long wanpela komiuniti bilong wok ol i kolim kibbutz. Bihain mitupela mama i muv i go long Meksiko.

Long hap mipela i stap long en i no gat haus lotu bilong ol Juda, tasol mi save bihainim yet ol pasin bilong lotu Juda. Mi save laitim ol kandel bilong de Sabat, ritim buk Tora, na mekim beten i stap long siddur, em prea buk. Planti taim mi save tokim ol wanskul olsem lotu bilong mi em lotu bilong pastaim tru. Mi no bin ritim Nupela Testamen, em buk i stori long ol wok na ol tok em Jisas Krais i skulim ol man long en. Mama i tokim mi long no ken ritim Nupela Testamen, nogut ol tok bilong en i paulim tingting bilong mi.

Wai na yu kirap ritim Nupela Testamen?

Taim mi gat 17 krismas, mi go bek long Amerika bilong pinisim skul. Long hap, wanpela pren bilong mi, i tok em i Kristen na em i tokim mi olsem, sapos mi no bilip long Jisas, i stap bilong mi bai i no gat as bilong en.

Mi tokim em: “Ol man i bilip long Jisas ol i no save long God.”

Em i askim mi: “Yu bin ritim tu Nupela Testamen?”

Mi tok, “Nogat.”

Em i tok: “So yu ting i stret long kamapim nating tingting bilong yu long samting yu no save long en?”

Tok bilong em i sutim tru bel bilong mi, long wanem, mi yet mi save ting em i pasin kranki long kamapim nating tingting long samting yumi no save long en. Em i stretim mi pinis na mi kisim Baibel bilong em i go long haus na mi kirap long ritim Nupela Testamen.

Ol tok yu ritim i mekim wanem long yu?

Mi kirap nogut olsem ol man i bin raitim Nupela Testamen em ol man Juda. Na tu, taim mi rit i go moa, mi lukim Jisas olsem wanpela Juda husat i gat gutpela pasin na pasin daun, na em i laik helpim ol man, em i no save paulim na kisim ol samting bilong ol man. Na mi go tu long laibreri na kisim ol buk i stori long em. Tasol ol dispela buk i no kirapim mi long bilip olsem em i Mesaia. Sampela buk i kolim em God, tasol mi save olsem dispela em tingting kranki. Long wanem, taim Jisas i bin beten, em i beten long husat—long em yet? Na tu, Jisas i bin i dai. Tasol Baibel i tok long God olsem: “Yu no save dai.”a

Hau yu kisim bekim bilong ol dispela askim?

Tok i tru i no save pait wantaim, na mi tingting strong long painim tok i tru. Olsem na mi beten long God na krai wantaim, em namba 1 taim mi no yusim prea buk bilong mekim beten. Taim mi pinis tasol long beten, wanpela i paitim dua. Em tupela Witnes Bilong Jehova. Ol i givim mi wanpela buk olsem helpim bilong stadi long Baibel. Dispela buk, na ol tok em ol Witnes i stori wantaim mi long en, i strongim mi long bilip olsem Baibel i as bilong ol bilip bilong ol. Olsem: Ol Witnes i no bilip olsem Jisas i wanpela hap bilong god triwan, nogat—em i “Pikinini Bilong God”b na Jisas i “kirap bilong ol samting God i bin wokim.”c

I no longtaim na mi go bek long Meksiko, na mi wok yet long stadi wantaim ol Witnes long ol tok profet i stori long Mesaia. Mi kirap nogut olsem i gat planti tok profet bilong Mesaia i stap long Baibel! Tasol mi gat tupela tingting yet. Mi tingting: ‘Ating Jisas wanpela tasol i inapim ol dispela tok profet o olsem wanem?’ na ‘Nogut Jisas i wanpela kleva man i giaman na ekting olsem em i Mesaia em Baibel i tok profet long en.’

Wanem samting tru i mekim na yu bilip?

Ol Witnes i soim mi long sampela tok profet i makim olsem i no gat wanpela inap giaman bilong inapim ol dispela tok. Olsem: Inap 700 yia samting paslain long Mesaia i kamap, profet Maika i tok Mesaia bai bon long Betlehem, long Judia.d Husat inap stiaim ol samting na bai em i bon long dispela ples stret? Na Aisaia i tok ol bai kilim i dai Mesaia olsem wanpela man nogut tru, tasol ol bai planim em wantaim ol maniman.e Jisas i truim olgeta dispela tok profet.

Na narapela samting we i mekim na mi bilip tru olsem Jisas em i Mesaia, em lain tumbuna bilong em. Baibel i tok Mesaia bai kamap long lain bilong King Devit.f Ol famili Juda bilong bipo ol i gat rekod long nem bilong ol lain tumbuna bilong ol. Sapos Jisas i no bin kamap long lain bilong King Devit, ol birua bilong em bai bikmaus stret na tokaut long olgeta man long dispela samting! Tasol ol i no inap, long wanem, em i klia olsem Jisas i bilong lain bilong Devit. Na tu, ol bikpela lain manmeri ol i bin kolim em “Pikinini bilong Devit.”g

Long 70 C.E.—em 37 yia bihain long Jisas i dai, ol ami bilong Rom i kam bagarapim Jerusalem, na ol rekod i gat nem bilong ol lain tumbuna bilong ol em i lus o i bagarap olgeta. Olsem na bilong ol man i ken luksave long lain tumbuna bilong Mesaia, em i mas kamap paslain long yia 70 C.E.

Dispela save i mekim wanem long yu?

Long Lo 18:18, 19, Baibel i tok profet long God bai kamapim wanpela profet long Israel i kain olsem Moses. God i tok: “Long nem bilong mi yet bai profet i autim tok, na sapos sampela man i sakim tok bilong em, bai mi mekim save long ol.” Mi stadi gut long Baibel olgeta, na dispela i mekim na mi bilip tru olsem Jisas bilong Nasaret em i dispela profet.