IGAT olkain edvetaismen long nau bilong pulim tru tingting bilong yumi long baim ol samting. Ol man bilong salim samting i tingting strong long mekim wanem? Ol i laik mekim yumi pilim olsem yumi nidim tru ol dispela samting. Lain bilong salim samting i save olsem bel na tingting bilong man i save kirapim man long mekim samting. Olsem na ol i mekim edvetaismen na pasin bilong baim samting i kamap olsem samting bilong mekim man i amamas tru.

Buk Why People Buy Things They Don’t Need i tok: “Taim ol man i tingting long baim nupela samting, planti taim ol i save piksaim long tingting olsem ol i raun painim samting ol i laikim, taim ol i painim pinis, orait ol i baim na em i kamap samting bilong ol.” Sampela saveman i tok ol man i save amamas tru long taim ol i raun baim ol samting na dispela inap mekim bodi bilong ol i kamapim marasin adrenalin na i mekim ol i pilim gut. Saveman Jim Pooler i tok: “Sapos man bilong salim samting i luksave olsem man i amamas na i no gat strong long sakim tingting bilong baim samting, em inap yusim dispela bilong kirapim man long baim samting.”

Olsem wanem yu ken was gut na bai ol man bilong salim samting i no ken pulim nabaut tingting bilong yu? Bosim gut bel na tingting, na skelim gut ol tok gris em man bilong salim samting i mekim wantaim ol samting tru tru.

TOK GRIS: “Mekim Laip Bilong Yu i Kamap Gutpela Tru”

Em i nomol long pilim olsem yumi laik i gat gutpela laip. Ol man bilong edvetaisim ol samting i save kamapim ol kain tok gris olsem sapos yumi baim ol rait samting, yumi inap kisim gutpela helt, gutpela sindaun, bel isi, na pas gut moa wantaim ol narapela.

SAMTING TRU TRU:

Taim yumi wok long baim planti samting moa, yumi mekim laip bilong yumi i go nogut moa. Yumi bai lusim bikpela haptaim na mani sapos yumi laik kisim sampela samting moa. Yumi pilim bikpela presa bikos yumi mas bekim dinau yumi bin kisim na nau yumi no gat taim bilong stap wantaim ol famili na pren.

Stiatok: “Maski man i gat planti samting, em i no kisim laip long ol dispela samting em i holim.”—Luk 12:15.

TOK GRIS: “Kisim Biknem na Namba”

Sampela man tasol bai tokaut stret olsem ol i save baim ol samting bilong mekim ol narapela i ting ol i samting tru. Tasol Jim Pooler i tok: “Taim ol man i baim samting, nambawan astingting bilong ol em long resis wantaim ol pren, ol neiba, ol wanwok na ol wanblut.” Long dispela as, planti taim ol edvetaismen i save soim ol samting em ol maniman tasol i save gat. I olsem ol dispela edvetaismen i tokim ol kastama: “Yu inap kamap maniman olsem dispela man o meri!”

SAMTING TRU TRU:

Yumi pilim olsem yumi samting tru long rot bilong skelim yumi yet wantaim ol narapela, dispela inap mekim na oltaim bai yumi pilim olsem yumi no gat ol samting. Taim yumi kisim pinis wanpela samting, orait wantu yumi gat laik long kisim narapela samting moa.

Stiatok: “Sapos bel bilong man i skrap long kisim planti mani, orait oltaim bai em i ting em i sot long mani.”—Saveman 5:10.

TOK GRIS: “Soim Olsem Yu Man i Gat Namba na i No Man Nating”

Buk Shiny Objects i tok: “Wanpela rot we yumi soim ol narapela long yumi husat tru em long rot bilong i gat olkain kago samting.” Ol man bilong salim samting i save long dispela, na ol i traim long tok olsem ol man i gat wanpela kain sindaun na namba, ol tasol i save gat ol dispela samting i gat nem.

Yu gat wanem tingting long yu yet, na yu laik ol narapela i gat wanem tingting long yu? Yu laik ol i lukim yu olsem wanpela stail man o meri o wanpela spot man o meri? Maski yu laik kamap wanem kain man o meri, lain bilong salim samting i tok sapos yu baim ol rait samting, yu inap kamap man o meri yu gat laik long kamap.

SAMTING TRU TRU:

I no gat wanpela kago samting yumi baim i ken senisim pasin bilong yumi o mekim yumi kamapim ol gutpela pasin olsem onest pasin na pasin bilong stap gut long God.

Stiatok: “Yupela i no ken bilasim skin ausait tasol, olsem . . . putim kain kain bilas gol o ol naispela klos. Nogat. . . . bilasim insait bilong yupela.”—1 Pita 3:3, 4.

Tru ol edvetaismen samting i putim presa long yumi long baim ol samting, tasol laik na pasin bilong yumi yet tu inap mekim na yumi tromoi planti mani. Dispela em 6-pela rot bilong helpim yumi long abrusim pasin bilong tromoi planti mani.

1. Sakim pasin bilong baim nating samting. Yu save amamas long raun baim samting na nau yu painim ol samting em pe bilong ol i daun moa? Nogut dispela i mekim na yu laik baim nating samting. Bilong abrusim dispela pasin, stap isi na tingim ol hatwok bilong baim, yusim, na lukautim gut dispela samting yu tingting long baim. Stop na tingim ol samting em bipo yu no bin tingting gut na baim nating na bihain yu bin rigret long en. Lusim sampela haptaim long skelim gut tingting paslain long yu mekim disisen bilong baim samting.

2. No ken baim tasol ol samting bilong mekim yu pilim gut. Pasin bilong raun na baim samting inap mekim yu pilim gut inap sotpela taim. Tasol taim yu bel hevi gen, ating bai yu laik tromoi planti mani moa bilong pinisim bel hevi bilong yu. Bilong mekim yu pilim gut, no ken baim ol samting, i gutpela yu go lukim ol gutpela pren o go wokabaut.

3. No ken baim ol samting bilong kisim amamas tasol. Long nau ol bikpela stua i no ples bilong baim samting tasol, em i kamap ples bilong amamas tu. Maski yu go raun long stua o sekim ol samting long Intenet bilong kisim amamas, planti samting yu lukim i bilong kirapim laik bilong yu long baim samting. Go raun long stua long taim yu tingting long baim wanpela samting stret, na baim tasol samting yu nidim.

4. Makim gut ol pren bilong yu. Pasin na toktok bilong ol pren bilong yu inap kirapim laik bilong yu long baim samting. Sapos yu tromoi planti mani bambai yu ken pilim olsem yu wankain olsem ol pren bilong yu, orait makim ol pren husat i no save tingim tumas mani na ol kago samting.

5. Bihainim savetingting taim yu yusim benk kat. Taim yu save olsem yu gat mani i stap long benk, yu save yusim kat nating nating bilong baim olgeta liklik samting na nau yu luksave olsem yu no gat mani bilong baim ol bikpela samting olsem kaikai na ol bil samting. Na tu, yu mas save long hamas teks na ol fi samting em benk i save rausim long akaun bilong yu taim yu yusim kat long baim samting, dispela bai helpim yu long bihainim savetingting taim yu yusim benk kat.

6. Save long hamas mani yu gat. Em i isi long tromoi nating planti mani sapos yu no save long hamas mani yu gat. Oltaim raitim hamas mani yu tromoi na bai yu ken save long hamas mani i stap yet. Wokim wanpela baset long hamas mani yu save kisim na hamas mani yu save tromoi. Raitim hamas mani yu tromoi na skelim dispela wantaim baset bilong yu. Askim wanpela gutpela pren long helpim yu kliagut long sampela samting yu no kliagut long en long sait bilong mani.