Tripela Samting Mani i No Inap Baim

EM I narakain tru: Maski ol man i pret olsem ol i no inap moa holim wok mani bilong ol, haus bilong ol, o kisim pensen mani, planti bilong ol i laik go het yet long kisim olgeta nupela samting mani i ken baim.

Ol kain lain olsem em isi long ol i bihainim tingting bilong ol man bilong edvetaisim samting em ol i save tok yumi mas i gat bikpela haus, gutpela kar, na ol klos i gat nem. Yu no gat mani? No ken wari—kisim dinau mani na baim! Planti bilong ol i laik luk olsem ol i maniman, maski ol i gat planti dinau tru.

Tasol sori tru, dispela tingting i no inap i stap longpela taim. Buk The Narcissism Epidemic i tok: “Pasin bilong baim olkain nupela samting long dinau mani bilong mekim yu luk na pilim olsem yu maniman, dispela i wankain olsem pasin bilong kisim drak krek koken bilong mekim yu pilim gut. I no hatwok long mekim olsem na yu pilim amamas, tasol dispela amamas i bilong sotpela taim tasol. Bihain mani na amamas bilong yu bai pinis na bai yu pilim bikpela bel hevi tru.”

Baibel i tok “pasin bilong hambak long mani kago” em i longlong pasin. (1 Jon 2:16) Pasin bilong tingting oltaim long kisim mani kago inap pulim tingting bilong yumi i go longwe long ol samting i bikpela samting long laip, em ol samting mani i no inap baim. Tingim 3-pela eksampel.

1. FAMILI I PAS GUT WANTAIM

Brianne,a em wanpela tineja long Amerika, i pilim olsem papa bilong em i tingim wok mani bilong em i olsem bikpela samting moa. Em i tok: “Mipela i gat olgeta samting mipela i nidim na planti samting moa, tasol i no gat wanpela taim papa i save stap long haus bikos em i save raun bilong mekim wok. Mi save papa i raun long wok, tasol mi pilim olsem em i gat wok tu long lukautim famili bilong em!”

Tingim: Bihain papa bilong Brianne inap rigret long wanem ol samting? Em i tingting tumas long kisim mani kago na dispela i mekim wanem long pasin pren bilong em wantaim pikinini meri bilong em? Em i mas givim wanem ol samting long famili bilong em winim mani kago?

Ol stiatok bilong Baibel bilong skelim:

• “Pasin bilong laikim tumas mani em i as bilong olgeta kain pasin nogut. Sampela i bin laikim tumas mani, na dispela . . . i givim pen long ol.”—1 Timoti 6:10.

• “Sapos yu stap wantaim ol pren bilong yu na yupela i kaikai kumu tasol, dispela i winim tru pasin bilong i stap wantaim ol man yu no laikim, na yupela i kaikai mit bilong bulmakau.”—Sindaun 15:17.

Poin em olsem: Mani i no inap helpim famili long pas gut wantaim. Pasin bilong lusim haptaim wantaim famili na laikim tru na tingim narapela narapela, dispela tasol inap mekim famili i pas gut wantaim.—Kolosi 3:18-21.

2. STAP BELGUT NA I NO PRET

Sarah, husat i gat 17 krismas i tok: “Olgeta taim mama bilong mi i tokim mi long mi mas maritim man i gat planti mani, na mi mas skul long mekim wanpela wok we mi inap lukautim mi yet long bihain. Oltaim mama i save tingting tasol long wanem hap mani bai kam long en.”

Tingim: Taim yu tingim ol samting bai painim yu bihain, yu save tingting planti long wanem samting? Long wanem taim pasin bilong tingting planti inap kamap olsem pasin bilong wari tumas long ol samting? Mama bilong Sarah inap mekim wanem na bai em i holim stretpela tingting na em i no tingting oltaim long kisim planti mani?

Ol stiatok bilong Baibel bilong skelim:

• “Lusim pasin bilong bungim ol gutpela gutpela samting bilong yupela long graun, em ples we ol binatang na ros i save bagarapim ol samting, na ol stilman i save kam na stilim.”—Matyu 6:19.

• “Yupela i no save wanem samting bai kamap long yupela tumora.”—Jems 4:14.

Poin em olsem: Maski yu bungim planti mani, dispela i no inap mekim sindaun bilong yu i kamap gutpela long bihain. Ol man inap stilim mani, na tu, mani i no inap pinisim sik o stopim dai. (Saveman 7:12) Baibel i skulim yumi olsem bel na tingting bilong yumi bai stap gut taim yumi kisim save long God na long ol samting em i tingting pinis long mekim.—Jon 17:3.

3. AMAMAS LONG OL SAMTING YU GAT PINIS

Tanya, husat i gat 24 krismas i tok: “Papamama bilong mi i skulim mi long no ken laikim planti samting. Taim mi na twin susa bilong mi i wok long kamap bikpela, mipela i amamas long ol samting mipela i gat, maski ol i liklik samting tasol.”

Tingim: Bilong wanem i hatwok long amamas long ol bikpela samting bilong laip em yu gat pinis? Olsem wanem? Long ol samting bilong mani, yu stap gutpela piksa long famili bilong yu?

Ol stiatok bilong Baibel bilong skelim:

• “Sapos yumi gat kaikai na laplap na haus samting, orait yumi ken ting ol dispela samting em inap long yumi.”—1 Timoti 6:8.

• “Ol man i hangre long kisim save long God, ol i ken amamas.”—Matyu 5:3.

Poin em olsem: I gat ol samting i bikpela samting moa long laip winim mani na ol samting mani i ken baim. Olsem Baibel i tok: “Maski man i gat planti samting, em i no kisim laip long ol dispela samting em i holim.” (Luk 12:15) Amamas tru yumi inap kisim long i stap bilong yumi i kam long rot bilong bekim ol dispela bikpela askim olsem:

• Yumi stap bilong mekim wanem?

• Wanem samting bai painim ol man long bihain?

• Olsem wanem mi ken save gut moa long God?

Ol Witnes Bilong Jehova em lain i wokim dispela nius, bai amamas long helpim yu long kisim bekim bilong ol dispela askim. .