Haus Bilong Binen

OLBINEN (Apis mellifera) i save wokim haus bilong ol long wara kain olsem gris kandel i stap aninit long bel bilong ol. Ol saveman i tok disain bilong haus bilong ol binen i narakain tru. Bilong wanem ol i tok olsem?

Tingim: Inap planti handret yia, ol saveman bilong matematiks i ting i gutpela long wokim ol haus long seip bilong hexagon, em seip i gat 6-pela sait, na i no traiengol o skwe samting. I gat as na ol i tok olsem, long wanem, ol man inap yusim liklik diwai samting long wokim haus we i gat bikpela spes. Tasol ol i no inap stori gut long as bilong dispela. Long 1999, Profesa Thomas C. Hales i mekim ol wok painimaut long matematiks bilong soim olsem i gutpela long wokim ol haus long seip bilong hexagon. Em i stori olsem dispela bai mekim na ol man bai i no yusim planti diwai samting, na tu, olgeta rum bai i gat wankain spes.

Olgeta haus bilong binen i gat seip bilong hexagon. Dispela i mekim na ol binen inap yusim gut olgeta spes, wokim haus long liklik hap wara i kain olsem gris kandel, na tu, bungim planti hani long wanpela liklik spes. Olsem na yumi no kirap nogut taim ol man i stori long pasin bilong ol binen long wokim haus “olsem wanpela narakain wok ensinia.”

Long nau, ol saientis i bihainim pasin bilong ol binen na ol i wokim ol haus we i strong tru na i gat bikpela spes long en. Olsem, ol ensinia bilong balus i bihainim pasin bilong ol binen na ol i wokim ol balus we inap yusim liklik fiul na i no hevi tumas, na tu, ol dispela balus i strong.

Yu ting wanem? Save bilong ol binen long wokim haus bilong en i kamap long rot bilong evolusen? O wanpela i bin wokim?