Wanpela Kain Binen Bilong Ostrelia

WANPELA MAN LONG OSTRELIA I RAITIM DISPELA STORI BILONG KIRAP!

YU INAP tingim wanpela taim em yu bin harim liklik krai ol binen i save mekim taim ol i lusim wanpela plaua na i go long narapela plaua, na dispela i mekim bel bilong yu i stap isi? Man! Em ol gutpela binatang tru. Tasol i gutpela sapos ol i no save kaikaim man, a?

Ating bai yu kirap nogut long kisim save olsem sampela binen i no save kaikaim man​—⁠em sampela kain binen bilong Ostrelia, na ol i stap long planti hap bilong is bilong Ostrelia. Longpela bilong ol dispela binen em inap olsem 4-pela milimita. Kala bilong ol i blakpela, na ol i gat planti waitpela gras long pes na bodi bilong ol. Planti bilong ol i gat ol liklik liklik yelopela mak long bodi bilong ol. Inap olsem 10-pela kain binen i no save kaikaim man ol i stap long Ostrelia, kirap long nambis long hap not bilong Kwinslan na i go daun inap long hap saut bilong Nu Saut Wels. Na sampela bilong ol dispela binen i stap tu long hap bilong Noten Teritori.

Tingim olsem wanem dispela samting i helpim ol man i save kisim hani long ol haus binen. Wanpela man bilong lukautim binen i tok: ‘Taim mi wok wantaim ol narapela kain binen, mi save karamapim pes bilong mi long laplap na putim kolsiot bilong karamapim skin olgeta bilong mi, tasol taim mi wok wantaim ol binen i no save kaikaim man, mi no save putim wanpela samting bilong lukautim skin bilong mi. Maski mi opim haus bilong ol binen inap 5-pela minit pinis, ol i save mekim yet wok bilong ol olsem mi no stap.’

Haus bilong ol binen i no save kaikaim man i narapela kain long haus bilong ol narapela binen bilong wokim hani. Ol i kolim dispela haus olsem haus bilong putim kiau. Ol narapela binen i save putim hani na paura bilong ol plaua long ol haus i gat 6-pela sait, tasol ol binen i no save kaikaim man ol i save wokim ol raunpela samting olsem kap i bung bung wantaim. Ol i save pasim gut ai bilong ol dispela kap taim hani na paura i pulap pinis long en na bihain ol i save wokim ol narapela kap antap long dispela namba wan kap o long arere arere bilong en.

Insait Long Haus Bilong Putim Kiau

Orait nau, long tingting bai yumi go raun insait long dispela haus bilong putim kiau, em samting olsem 15,000 binen i no save kaikaim man ol i stap long en. Tasol yu mas was gut, long wanem, tru ol dispela binen i no save kaikaim man, tasol ol inap holim strong skin bilong yu long wasket bilong ol.

Taim yumi wokabaut insait long dispela haus, yumi lukim bikpela wok i kamap long en. Ol dispela binen i wok gut wantaim. Olgeta wan wan bilong ol i save long wok ol i mas mekim na long wanem hap ol i mas mekim dispela wok. Yumi lukim wanpela liklik binen i wok long wokim na polisim wanpela nupela kap bilong putim hani, na i olsem em i wok long bihainim stret wanpela piksa bilong wokim dispela kap. Klostu long yumi i gat 4-pela binen i wok long pasim ai bilong wanpela kap em hani i pulap pinis long en. Ol i save wokim ol dispela kap bilong putim hani antap long wanpela banis olsem bun bilong haus. Dispela banis i save karim hevi bilong hani.

Nau yumi go insait long narapela rum na yumi lukim wanpela binen i bikpela moa long ol narapela binen. Dispela em kwin bilong ol binen! Man! Em i naispela tru, na em i bilas long ol blakpela na yelopela ring na planti narapela binen i raunim em! Nau kwin i kirap long putim ol kiau long ol 60 kap ol i redim pinis bilong em. Em i putim gut ol kiau long ol kap na dispela i kirapim yumi long tingim pasin bilong wanpela mama long putim bebi bilong em long bet slip! Na yumi ken lukim tu olsem kwiktaim ol binen i save pasim ai bilong ol kap taim kwin i putim kiau pinis. Insait long sampela minit tasol dispela wok i pinis.

Taim Ol Kiau i Bruk

Taim ol kiau i bruk, ol liklik binatang olsem liklik snek i kamap na wan wan bilong ol i save kisim kaikai ol i bin redim pinis na putim insait long kap bilong en. Taim binatang i kamap bikpela na kap ol i wokim long samting olsem gris kandel em i liklik tumas long em, em i save wokim wanpela haus bilong em yet long tret slika. Insait long dispela haus dispela binatang bai kamap wanpela binen (em i lusim i stap bilong em olsem wanpela liklik snek na kamap binen). Bihain em bai lusim haus bilong em na kirap wok​​—⁠tasol pastaim sampela binen bai helpim em na givim kaikai long em. Olsem wanem long ol dispela kap ol i wokim long samting olsem gris kandel? Kwiktaim ol i save bungim ol na mekim wok gen long ol. Taim ol binen i lusim pinis haus, ol i no gat wok moa long ol dispela haus. Sapos ol i larim ol i stap tasol, dispela bai mekim planti pipia long haus bilong ol long putim kiau. Olsem na planti binen bilong klinim haus i save rausim ol dispela pipia.

Planti binen i no save kaikaim man ol i save wokim wanpela samting bilong wokim haus em ol i kolim serumen. Ol i wokim dispela samting long gris i stap long bodi bilong ol yet na gris ol i kisim long ol plaua na diwai. Ol i save mekim wok long serumen bilong wokim wanpela banis olsem bun bilong haus. Taim ol i wokim ol kap bilong putim hani na paura insait long dispela banis, ol binen i save flai raun insait long ol dispela kap bilong stretim na strongim serumen. Bihain ol i pulapim ol dispela kap na pasim ai bilong ol bilong bungim i stap long haus. Ol binen i save long gutpela taim bilong ol plaua na diwai samting na ol i save tu long taim nogut bilong win ren samting. I olsem ol i save pasin bilong kisim na bungim kaikai em i bikpela samting bilong helpim ol long i stap laip.

Ol binen i save lusim haus bilong ol na ol i save go painim ol samting bilong wokim haus na hani na paura bilong ol plaua. Taim binen i lusim pinis haus, em i kamap olsem wanpela pailot i save gut long raun. Na tu, binen i save gut long ol samting em i mas kisim na long wanem hap em inap painim dispela samting.

Wokim Nupela Haus

Taim ol binen i wok long kamap planti, haus bilong ol i pulap olgeta. Orait nau wanem samting bai kamap? I olsem ol i salim toksave long famili olgeta olsem “yumi mas wokim narapela haus.” Sampela taim wanpela binen tasol bai go na skelim wanpela gutpela hap em ol inap wokim nupela haus long en. Bihain ol “ensinia” bai go na skelim dispela hap. Planti taim inap olsem 30 o 50 bilong ol dispela ensinia bai lusim sampela aua long skelim gut insait bilong dispela hap ol bai wokim nupela haus long en, na i olsem ol i wok long putim ol mak na pos samting bilong makim dispela hap. Taim ol i skelim pinis na save olsem em i gutpela hap bilong wokim haus, ol bai go bek na toksave long ol narapela. Orait nau, insait long 2-pela de tasol, ol “kamda” bilong wokim haus bai kam. Winim 1,000 binen inap i stap insait long dispela lain bilong wokim haus​​—⁠tasol i no gat kwin. Kwiktaim ol i kirap mekim wok, ol i kisim ol samting bilong wokim haus na kaikai bilong olpela haus na bringim i kam long nupela haus.

Bilong redim ol samting na bai kwin bilong dispela nupela haus i ken kam, ol i mas wokim gut dispela haus bambai hat bilong en i stret​​—⁠inap olsem 28 digri Selsias. Bilong mekim olsem, ol binen i save banisim haus long serumen na i olsem ol i karamapim blanket long haus. I olsem ol dispela binen i save olsem ol kiau i mas i stap long ples i hat liklik. Nau olgeta samting i redi pinis, na long namba 9 de samting, ol i bringim nupela kwin, em i bin kamap long olpela haus, i kam insait long nupela haus. Kwiktaim kwin i kirap long putim ol kiau na ol bai kamapim planti binen moa long nupela haus bilong em.

Isi isi ol binen i bin stap pastaim long olpela haus na ol i kam long nupela haus ol bai dai na ol nupela binen i kamap long dispela nupela haus bai senisim ol. Bihain ol binen bilong dispela nupela haus bai lukim olsem ol i mas wokim narapela haus gen. Long dispela rot, samting em Man bilong wokim yumi i bin kamapim i wok long kamap yet!

[Piksa long pes 27]

Ol binen i no save kaikaim man ol i no save wokim haus i gat 6-pela sait, ol i save wokim ol raunpela samting olsem kap i bung bung wantaim

[Piksa long pes 28]

I gat 10-pela kain binen i no save kaikaim man ol i stap long Ostrelia