Bilong Wanem God i Isi Long Ol Man?

TINGIM wanpela pikinini i lus olgeta long kaikai. Tarangu! Pes bilong em i no lait. Ol bun bilong em i kamap ples klia, na bel bilong em i solap. Sapos em i no kisim sampela kaikai bai em i dai, tasol lukim dis em i holim​—⁠dis i stap nating. Ating mama bilong em i sindaun klostu na lukluk long pikinini. Ai bilong mama i go insait na taim yu lukim pes bilong mama yu save, bel bilong em i bagarap stret na em i pilim olsem em i no gat rot. Olsem wanem? Yu inap pasim bel o pasim aiwara i laik kamap long ai bilong yu?

Kain bikpela hevi olsem i painim planti milion man meri pikinini long wanpela bikpela hap graun [6 milion skwea kilomita] ol i kolim Sahel. I gat bikpela hangre tru long dispela hap. Dispela bikpela hap graun long Afrika i stap long hap saut bilong bikpela ples wesan nating ol i kolim Sahara. Kirap long kantri Senegal long nambis bilong Biksolwara Atlantik, dispela hap graun i go inap 4,800 kilomita inap long kantri Itiopia long nambis bilong Solwara Retsi. Tasol bikpela hangre i painim planti milion milion manmeri long ol narapela hap tu. Wol Helt Oganaisesen i tok, long olgeta hap bilong graun i gat inap olsem 1.1 tausen milion manmeri ol i gat bikpela sik o ol i no gat gutpela kaikai.

Hangre i bagarapim tru ol man, tasol i gat planti narapela samting tu i bagarapim ol. Long nau ol man i bagarapim graun na dispela samting i nogutim yumi olgeta. Ol gavman bilong graun i orait long ol pasin i no stret na ol pait, na dispela samting i givim hevi long planti man, na i kilim i dai planti. Orait, bilong wanem God i larim ol dispela hevi i stap? Em i tingim yumi o nogat?

God i Tingim Yumi!

Man bilong wokim yumi em i save tingim yumi. I gat planti samting i kamapim klia dispela samting na i makim olsem em inap mekim ol samting i wok wantaim bilong helpim yumi, na bai olgeta samting em i bin wokim i ken stap gut wantaim. Olsem: Lukim piksa hia bilong binen i go long plaua bilong wanpela diwai i save karim kaikai. Binen i kisim hani long plaua​—⁠plaua i helpim binen long kaikai. Na binen i helpim dispela diwai​—⁠em i kisim paura bilong ol plaua man long wankain diwai i kam long ol plaua meri bilong dispela diwai na nau diwai inap karim kaikai. Long ol diwai i karim kaikai, sampela tasol i gat ol plaua man na plaua meri na i mas i gat binen o binatang bilong karim paura i kam putim long plaua bambai diwai i ken karim kaikai. Tasol yumi save God yet i bin kamapim dispela pasin bilong binatang na diwai i wok wantaim na narapela i helpim narapela. Long dispela gutpela pasin bilong God yumi inap kisim ol pikinini bilong diwai na yumi amamas long kaikai, na dispela kaikai i helpim skin bilong yumi.

Ol binen i save bung wantaim long ol bikpela bikpela lain. Sampela lain binen ol inap olsem 30,000 samting, na olgeta i gat wok bilong ol na ol i save wok gut wantaim. Sampela i save was long haus bilong ol, na sampela i save klinim haus, na sampela i save mekim na i gat win insait long haus. Sampela i wok long bungim hani na paura bilong ol plaua, na sampela i givim kaikai long ol pikinini binen, o ol i raun painim ol nupela hap bilong kisim hani. God yet i kamapim dispela pasin na ol wok bilong ol dispela binen i helpim yumi​—⁠yumi kaikai hani na dispela i swit long maus na i strongim skin bilong yumi.

Man bilong wokim yumi em yet i as bilong dispela mirakel olsem ol binen na ol diwai samting i wok gut wantaim, na ol binen yet i wok gut wantaim. Em wanpela bilong ol planti planti samting i kamapim klia olsem Man bilong wokim yumi em inap mekim ol samting i gat laip i wok gut wantaim. Tru tumas, God “i no save mekim ol samting i paul nabaut. Em i laik bai yumi stap wanbel na wok gut wantaim.” (1 Korin 14⁠:33) Orait, bilong wanem em i larim ol man i paul nabaut na ol i no wok gut wantaim na dispela i givim bikpela hevi long planti man? Sapos tru God i tingim yumi, bilong wanem em i no stretim kwik dispela samting? Bilong wanem God i isi long ol man?

Baibel i bekim ol dispela askim. Dispela buk i tokim yumi, i gat gutpela as na God Jehova i no bin les kwik long ol man. Wanem dispela as? God bai isi long ol man inap hamas mun o yia moa?

[Piksa Kredit Lain long pes 2]

Cover photo: Frilet/Sipa