Wanem Taim Ol Binen i No Binen Tru?

Ol binen i save wok strong tru. Long olgeta de ol i save raun long ol planti handet plaua na kisim hani i go bek long haus. Long taim kol i pinis na taim bilong san i kirap, ol binen man i raun bilong painim poroman. Bilong mekim olsem ol i save lukluk na smelim ol samting. Ol binen i no inap lukluk gut, na wanpela samting i no bilong lain binen i laik pulim ol​—⁠em wanpela plaua okit.

Long hap saut bilong Yurop, i gat sampela wel okit i stap na bilong karim pikinini ol i mas giaman na mekim olsem ol i binen meri. Ol dispela kain okit i mas salim paura, olsem polen, i go long ol narapela okit. Olsem na ol binen i gutpela wokman bilong karim paura i go. Tasol ol okit i no gat switpela hani bilong pulim ol binen, olsem na ol i mas trikim ol binen. Dispela trik i olsem: Ol mak bilong plaua na smel bilong en i wankain stret olsem bilong ol binen meri na dispela i pulim ol binen man i kam! Olgeta wan wan okit i gat mak bilong plaua na smel bilong en yet.

Inap long taim binen man i save em i popaia pinis, okit i pasim pinis paura i gat glu long skin bilong em. Orait nau binen man i flai i go, tasol narapela okit i giamanim em gen, em i go sindaun long en na dispela okit i kisim paura i stap long skin bilong binen. Inap sampela taim ol i wok long giamanim binen na nau binen i save em i no ken bilip moa long ol okit. Tasol long dispela taim em i raun pinis long ol narapela plaua na karim paura i go long ol.

Olsem wanem ol dispela okit i no gat save ol inap kisim smel na mak i wankain olsem binen meri bilong giamanim ol binen? Olaman! Em narapela kain save tru, tasol dispela save i kamapim klia, wanpela Man i gat bikpela save tru i bin wokim ol, em olgeta wok bilong em i narapela kain na i nambawan tru.