Ol Okit Bai Pinis?
Ol plaua okit i save kamap long kain kain hap. Ol inap kamap long graun, long ol diwai, na long ol ston tu. Tasol lain International Union for Conservation of Nature and Natural Resources (IUCN) i toksave olsem, planti kain kain bilong ol dispela gutpela plaua i no inap i stap moa long bus sapos ol man i wok yet long mekim nabaut long ol samting bilong graun. Wanpela meri bilong lain IUCN, em Wendi Strahm, em i tok: ‘Taim ol man i mekim nabaut long ol samting bilong bus, dispela i mekim na ol liklik binatang i save karim paura bilong plaua samting i go long narapela plaua, ol i save pinis o ol i go long narapela hap.’ Em i tok moa: “Taim samting olsem i kamap, ol okit i no inap kamapim sampela okit moa.”
Long olgeta yia ol i save salim 5 milion okit long olgeta hap bilong ol man i ken baim, na ol i ting 20 pesen bilong okit, ol i bin kisim long ol bikbus. Lain IUCN i tok, dispela pasin i save bagarapim i stap bilong dispela gutpela plaua. Olsem na lain IUCN i tok, ol man i laik kisim okit, ol i mas baim long ol haus plaua i wok bisnis long salim plaua, na ol i no ken kamautim long ol bikbus.
I gat olsem 20,000 kain kain okit ol man i save long en. Sampela i sotpela tru, inap 0.6 sentimita tasol; sampela moa i olsem rop i save go longpela tru inap 30 mita. Planti okit i save kamap gut long ol ples hat i gat bikpela ren i save pundaun long en. Tasol ol bai kamap gut sapos ol samting bilong graun ol i stap long en i wok stret wantaim.
Sori tru, sampela man i no gat save na ol i mekim nabaut long ol samting bilong graun, olsem na ol i wok yet long bagarapim planti ol plaua, ol okit tu. Tasol liklik taim nau na dispela pasin bai pinis. Long nupela taim God i promis long en, ol man bai stap gut wantaim ol samting bilong graun. Long dispela taim tok bilong man bilong raitim Song bai kamap tru: “Yupela ol gaden, na yupela ol samting i stap long ol gaden, yupela olgeta i mas amamas. Bikpela bai i kam. Em bai i kam na i stap king na bosim olgeta hap bilong graun.”—Song 96:12.
[Piksa Kredit Lain long pes 31]
Jardinería Juan Bourguignon
[Piksa Kredit Lain long pes 31]
Jardinería Juan Bourguignon