Sampela Tok i Kam Long Olgeta Hap
Olpela Ples Long Landon Bilong Lukim Ol Animal
Nius The Sunday Times bilong Landon i tok olsem wok bilong digim graun i stap aninit long Haus Taua Bilong Landon i kamapim klia olsem “bipo tru i bin i gat ples bilong lukautim ol kain kain animal long en.” Ol lain bilong skelim ol samting i tok ol samting ol i painim i makim olsem bipo i gat 100 narapela narapela kain animal olsem raino, antelop, taiga, pisin olsem muruk, ol snek, na ol pukpuk, ol i bin lukautim aninit long hap long nau ol i kolim Taua Bilong Wes. Inap longpela taim liklik ol man i save olsem dispela ples bilong lukautim ol animal i bin i stap, tasol ol nupela samting ol i skelim long ol olpela rait bilong yunivesiti na misin bilong king wantaim ol samting ol i painim taim ol i digim graun i kliaim sampela tingting. King Jon i bin kamapim dispela hap bilong lukautim ol animal long yia 1210, na ol i pasim long 1835 taim ol i kamapim narapela hap bilong Landon bilong lukim ol animal long Rijent Pak. Olsem na ol i putim sampela animal bilong king i go long dispela nupela pak na sampela ol i salim i go long Amerika. Dispela ples bilong lukim ol animal aninit long Taua i stap longpela taim, long wanem, ol lain king i kamap bihain ol i amamas long lukautim ol na i no gat ol bikpela hevi tumas long kantri. Geoffrey Parnell, em man i save lukautim ol olpela rait bilong Taua, em i tok olsem: “I no gat narapela kain ples olsem long Landon i stap inap planti handet yia na givim amamas long ol lain bilong king na ol man nating tu.”
Wanpela Kot i Wok Hariap
Nius New Scientist i tok, long Espirito Santo, Brasil, i gat 3-pela jas i wok long skelim wanpela program bilong kompiuta i bilong wokim kot hariap. Dispela program (Electronic Judge) i wok long wanpela kompiuta i liklik. Taim ka i bam, ol polis i singautim wanpela jas na kuskus bilong kot long kam long dispela hap. Program bilong kompiuta i bilong helpim jas long skelim ol samting na wokim kot long dispela taim stret. Kompiuta i kamapim ol askim bilong helpim jas, olsem: “Man i draivim ka i wet i stap taim lait i retpela?” o, “Man i draivim ka i winim mak lo i putim bilong dring bia samting na draiv?” Taim kompiuta i skelim bekim bilong ol dispela askim, kompiuta bai kamapim tokaut bilong kot na as bilong en long wanpela pepa. Olsem nius i tok, kompiuta inap long makim “pe bilong baim kot, makim man long baim kompensesen, na makim man i mas kalabus.” Ol i laik bai dispela kompiuta i helpim wok bilong ol jas i kamap gutpela moa na dispela bai daunim hevi bilong planti tumas man i wet kot long Brasil.
Wara Bilong Grisim Man
Sampela bisnisman long India i tingim hevi em traipela san i kamapim long nau na ol i mekim wok long dispela bilong grisim ol man long baim ol samting. Ol i givim wara i no gat pe long en long ol man i baim ol bikpela samting long stua bilong ol. Nius The Times of India i tok, wanpela man i tok promis long givim 500 lita wara 4-pela taim long wik inap long 2-pela mun long taim bilong bikpela san long ol man i baim wanpela aven, bokis ais, masin bilong wasim klos, o wanpela TV. Narapela i tok promis long givim ‘wara i no gat pe long en i go inap long taim bikpela san i pinis’ sapos man i baim wanpela bokis ais o TV. I no gat wanpela taim bipo em wara i sot olsem, na ol man bilong wok bisnis i stap long hap not-wes bilong Gujarat i luksave olsem bilong grisim ol man long baim ol samting, wara i winim gol, silva, o wanpela raun i no gat pe long en. Long Rajkot, ol bisnisman i tok olsem taim ol i tok long givim wara long ol man bilong grisim ol long baim ol samting, ol man i baim planti samting moa long ol.
Samting Bilong Daimon i No Stap Hait Moa
Strongpela samting i winim ol narapela samting graun yet i kamapim, em daimon. Graun i kamapim dispela taim marasin kabon i kamap hat nogut tru na samting i gat bikpela hevi tru i krungutim. Tasol wanem samting i save kamap taim samting i gat bikpela hevi tru i krungutim daimon? Inap 40 yia ol saientis i wok long painim bekim bilong dispela askim, tasol nau ol i painim bekim pinis. Wanpela niuspepa (The Buffalo News) i tok: “Nau ol i kisim save olsem taim samting i gat bikpela hevi tru i krungutim daimon, dispela strongpela samting tru i kamap olsem grafait, em dispela marasin kabon . . . i bin kamapim daimon pastaim.” Ol saientis i laik bai ol dispela save ol i kisim long ol daimon i helpim ol long wokim sampela tul i gat daimon long en long kamap gutpela moa.